༸གོང་ས་མཆོག་གིས་ཌ་སི་མོན་ཊུ་ཊུ་དམ་པ་དེ་ཉིད་སྙིང་ནས་བརྩེ་བའི་གྲོགས་པོ་ཞིག་ཡིན་གསུངས།

ལྷོ་ཨ་ཧྥི་རི་ཁའི་ཡེ་ཤུའི་ཆོས་དཔོན་ཞིང་གཤེགས་དམ་པ་ཌ་སི་མིན་ཊུ་ཊུ་མཆོག་གི་ཐེབས་རྩའི་དབུ་འཛིན་ནས་༸གོང་ས་མཆོག་ལ་མཇལ་བཅར་ཞུས།

དེ་རིང་ཕྱི་ཚེས་ ༡༥ ཉིན་ལྷོ་ཨ་ཧྥི་རི་ཁའི་ཆོས་དཔོན་ཌ་སི་མིན་ཊུ་ཊུ་དམ་པ་དེ་ཉིད་ཀྱི་ཐེབས་རྩའི་དབུ་འཛིན་སྐུ་ཞབས་ནེ་ཀོ་ལ་སི་ཇི་སི་ཊོམ་མ་ཚིག(Niclas Kjelstrom-Matseke)ལགས་བཞུགས་སྒར་དྷ་རམ་ས་ལར་ཆེད་བཅར་གྱིས་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་འདུག

སྐུ་ཞབས་ཁོང་གིས་འདི་གའི་གསར་འགོད་པར་མཇལ་ཁའི་མྱོང་ཚོར་སྐོར་ལ་གསུངས་དོན། ང་ཚོ་ཆོས་དཔོན་ཌ་སི་མོན་ཊུ་ཊུ་མཆོག་གི་ཐེབས་རྩའི་ལས་མི་རྣམས་འདིར་འབྱོར་བར་དགའ་ཚོར་ཆེན་པོ་བྱུང་། དེ་རིང་ཞོགས་པར་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་རྒྱུ་བྱུང་བ་ནི་ཧ་ཅང་སྐལ་བ་བཟང་པོ་ཡིན། ངས་༸གོང་ས་མཆོག་ལ་ང་རང་ཉིད་ངོ་སྤྲོད་དང་ལྷན་དུ། ཌ་སི་མོན་ཊུ་ཊུ་མཆོག་དང་ངེད་གཉིས་མཉམ་དུ་ཡོད་པའི་པར་ཞིག་གཟིགས་འབུལ་ཞུས་པ་ཡིན། པར་དེ་ནི་ཌ་སི་མོན་ཊུ་ཊུ་མཆོག་གིས་རང་ཉིད་ཀྱི་ཐེབས་རྩའི་འགན་དབང་ང་ལ་སྐུལ་བཞིན་པའི་སྐབས་ཀྱི་པར་ཞིག་ཡིན།  སྐབས་དེར་༸གོང་མཆོག་གིས་ངའི་སྐད་ཆ་མཚམས་འཇོག་གནང་སྟེ། ཌ་སི་མོན་ཊུ་ཊུ་ནི་ངོས་ཀྱི་གྲོགས་པ་ཙམ་མིན་པར་སྙིང་ནས་བརྩེ་བའི་གྲོགས་པོ་ཡིན་ཞེས་གསུངས་པ་དེས། ༸གོང་ས་མཆོག་གི་ཌ་སི་མོན་ཊུ་ཊུ་ལ་བཅངས་པའི་བརྩེ་སེམས་ཟབ་མོ་མཚོན་ཡོད་ལ། ང་ཚོས་ཌ་སི་མོན་ཊུ་ཊུ་མཆོག་༸གོང་ས་མཆོག་ལ་བརྩེ་བ་ཇི་ཙམ་ཡོད་མེད་ཤེས་ཚོར་ཡོད་པས། ང་ཚོ་བརྩེ་བའི་གཏམ་རྒྱུད་འདིའི་ཆ་ཤས་སུ་གྱུར་བ་དང་མུ་མཐུད་མཇུག་སྐྱོང་ཐུབ་པར་དགའ་ཚོར་བྱུང་། ང་ཚོ་འདིར་བསྡད་པའི་རིང་བོད་མིའི་མགོ་འཁྲིད་རྣམས་དང་བོད་མི་གང་མང་ནས་ང་ཚོར་ཐུག་པར་དགའ་བསུ་ཡོད། ང་ཚོ་དང་བོད་མིའི་བར་དང་། ཨ་རི་དང་ཨེ་ཤ་ཡ། ཡུ་རོབ་དང་ལྷོ་ཨ་མི་རི་ཁ་སོགས་ང་ཚོ་ཚང་མའི་བར་ཞི་བདེ་དང་དྲང་བདེན། འདྲ་མཉམ་ལ་གུས་བརྩི་ལྡན་པའི་ཐུན་མོང་གི་ཁྱད་ཆོས་ལྡན་ཡོད་ཅེས་གསུངས་སོང་།

དེ་བཞིན། ཟླ་འདིའི་ཕྱི་ཚེས་ ༡༣ ཉིན་ལྷོ་ཨ་ཧྥི་རི་ཁའི་ཡེ་ཤུའི་ཆོས་དཔོན་ཌ་སི་མིན་ཊུ་ཊུ་མཆོག་དམ་པའི་ཐེབས་རྩ་(CEO) ཡི་སྤྱི་གཉེར་བ་ཇཱ་ནེ་ཊི་ཇོབ་སོན་(Janet Jobson)ལགས་ཀྱིས་༸གོང་ས་མཆོག་ལ་མཇལ་བཅར་ཞུས་ཡོད་ལ། སྐབས་དེར་སྤྱི་གཉེར་བ་ཇཱ་ནེ་ཊི་ཇོབ་སོན་ལགས་ཀྱིས། ༸གོང་ས་མཆོག་དང་ཌ་སི་མོན་ཊུ་ཊུ་རྣམ་གཉིས་ནས་འགྲོ་བ་མིའི་བདེ་རྩ་དང་བྱམས་བརྩེ་སོགས་གལ་གནད་ཆེ་བའི་གནད་དོན་མང་པོའི་ཐོག་ཐུགས་འགན་བཞེས་ཡོད་ཅིང་། ལྷག་པར་དུ་འདི་ལོ་ནི་བྱམས་བརྩེའི་ལོར་སྲུང་གཙི་གནང་བཞིན་ཡོད་སྟབས། ང་ཚོ་འདིར་ཡོང་བ་ཡིན། ང་ཚོའི་ཐེབས་རྩའི་ལས་དོན་ལ་མཚོན་ན།  ཞིང་གཤེགས་དམ་པ་ཌ་སི་མོན་ཊུ་ཊུ་མཆོག་གི་དགོངས་གཞི་མཐའ་དག་གང་ཐུབ་ཀྱིས་བསྒྲུབ་རྒྱུར་འབད་བརྩོན་གནང་བཞིན་ཡོད་ལ།  ང་ཚོ་ལྷོ་ཨ་ཧྥི་རི་ཁ་ནས་འདིར་སྤྱི་སྙོམ་དྲང་བདེན་དང་སྙིང་རྗེ་སོགས་འགྲོ་བ་མིའི་རིན་ཐང་དོན་དུ་བཞེངས་མཁན་༸གོང་ས་རྒྱལ་བ་རིན་པོ་ཆེ་མཆོག་གི་སྐུ་མདུན་དུ་བཅར་ཐུབ་པ་དང་བསྟུན་ནས།  མང་ཚོགས་དང་ཐེབས་རྩའི་དམིགས་ཡུལ།  རིན་ཐང་།  དེ་བཞིན་༸གོང་ས་མཆོག་དང་ཌ་སི་མོན་ཊུ་ཊུ་བར་གྱི་དམིགས་བསལ་འབྲེལ་བ་དེ་དག་གོང་འཕེལ་དང་རྒྱུན་མཐུད་ཐུབ་པ་ནི་དོན་སྙིང་ལྡན་པ་ཆགས་སོང་ཞེས་གསུངས་སོང་།

གསར་འགོད་པ། སྐལ་བཟང་སྦྱིན་པ།