དེ་རིང་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་དབུ་བརྙེས་ཏེ་ལོ་ངོ་ ༢༥ འཁོར་བ་དང་༸སྐུའི་གོ་སྟོན་སྲུང་གཙིའི་དུས་ཆེན་མཉམ་འཛོམས་ཀྱི་མཛད་སྒོ་འཚོགས་སོང་།
དེ་རིང་ཕྱི་ཚེས་ ༡༥ ཉིན་གྱི་ཉིན་རྒྱབ་ཆུ་ཚོད་ ༢ པའི་སྟེང་གངས་སྐྱིད་སྤྱི་ཐབ་ཚོགས་ཁང་དུ་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་དབུ་བརྙེས་ནས་མི་ལོ་ཧྲིལ་པོ་ ༢༥ འཁོར་བའི་དུས་དྲན་སྲུང་གཙིའི་མཛད་སྒོ་ཞིག་འཚོགས་སོང་། སྐབས་དེར་སྐུ་མགྲོན་གཙོ་བོ་བོད་ཀྱི་དཔེ་མཛོད་ཁང་གི་འགན་འཛིན་དང་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་གཞོན་པ་དགེ་བཤེས་ལྷག་རྡོར་ལགས་དང་། དམིགས་བསལ་སྐུ་མགྲོན་དུ་ལོ་མང་རིང་ལྟེ་གནས་ཁང་ལ་དཔལ་འབྱོར་གྱི་མཐུན་འགྱུར་དང་རྒྱབ་སྐྱོར་གནང་མཁན་འཇར་མན་གྱི་ (Heinrich-Böll-Stiftung) ཞེས་པའི་རྒྱ་གར་ཁུལ་གྱི་འགན་འཛིན་རྗོ་ཆེན་ (Jochen Lucksheiter) ལགས་དང་དབུས་བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། དེ་བཞིན་དབུས་འོས་བསྡུ་ལས་ཁང་གི་འགན་འཛིན་རྣམ་པ་དང་དཔལ་འབྱོར་དྲུང་ཆེ་ཀྱང་གསར་ཚེ་རིང་དོན་གྲུབ་ལགས། བོད་ཀྱི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་འགན་འཛིན་དང་སྐུ་ཚབ། དེ་བཞིན་རྒྱ་གར་ཡུལ་མིའི་ཚོགས་སྡེ་ཁག་གི་འགན་འཛིན་དང་ཤེས་ཡོན་པ་སོགས་ཁྱོན་མི་གྲངས་ ༨༠ ལྷག་མཉམ་ཞུགས་གནང་འདུག
མཛད་སྒོ་དེ་འཚོགས་པའི་གལ་གནད་དང་འབྲེལ་ནས་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་ལགས་ཀྱིས་འདི་གའི་གསར་འགོད་པར་བརྗོད་དོན། དེ་རིང་གི་ཉིན་མོ་དེ་ང་ཚོའི་ལྟེ་གནས་ཁང་གི་དུས་ཁྱད་པར་ཅན་ཞིག་རེད། དམིགས་བསལ་མ་སྒྲིག་བསམ་པ་ལྷུན་འགྲུབ་ཀྱིས་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་དབུ་བརྙེས་ནས་མི་ལོ་ཉེར་ལྔ་དང་སྟབས་བསྟུན་ནས་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་༸སྐུའི་གོ་སྟོན་དང་བྱམས་བརྩེའི་ལོ་སྲུང་གཙིའི་དུས་ཆེན་གཉིས་མཉམ་འཛོམས་བྱུང་བ་དེ་བསོད་ནམས་ཆེན་པོ་ཞིག་དང་གལ་ཆེན་པོ་ཞེ་དྲགས་བརྩི་ཡི་ཡོད། དེ་རིང་ང་ཚོས་མཛད་སྒོ་འདི་འཚོགས་ཐུབ་པ་དེའང་རྟེན་འབྲེལ་ཡག་པོ་བྱུང་སོང་བསམ་པ་དང་། ང་ཚོ་མི་ཞིག་ཡིན་པའི་ཆ་ནས་རྩོད་རྙོག་ཟེར་བ་དེ་རང་བཞིན་གྱིས་ཡོང་བསྡད་པ་ཞིག་རེད། དེར་བརྟེན་༸གོང་ས་རྒྱལ་བ་རིན་པོ་ཆེ་མཆོག་གིས་མི་ལོ་ ༩༠ རིང་ལ་ཞི་བདེ་དང་དམངས་གཙོ། དེ་བཞིན་ཆོས་ལུགས་ལ་མ་བརྟེན་པའི་བཟང་སྤྱོད་སོགས་དང་འབྲེལ་བའི་ལམ་སྟོན་དང་བཀའ་སློབ་བསྩལ་གནང་མཛད་ཡོད་པ་མ་ཟད། ང་ཚོས་བྱེད་མི་ཐུབ་པ་ཞིག་མེད་ཀྱང་ལྟེ་གནས་ཁང་གི་ངོས་ནས་ལོ་ ༢༥ རིང་ལ་སོ་སོའི་མི་ཚེའི་ནང་ཉིན་རེ་ཉིན་རེའི་འཚོ་བའི་ནང་བེད་སྤྱོད་གཏོང་ཐུབ་རྒྱུའི་ཐོག་ལ་ཞབས་འདེགས་ཞུས་ཏེ་ལོ་ ༢༥ འཁོར་གྱི་ཡོད་པས་དགའ་བ་སྒོམ་དགོས་པ་ཞིག་ཆགས་ཀྱི་འདུག དེས་ན་དེ་རིང་ང་ཚོའི་མཛད་སྒོ་འདི་དགའ་དགའ་སྤྲོ་སྤྲོའི་ངང་ནས་ཕྱིན་པའི་རེ་བ་རྒྱག་གི་ཡོད། དེ་བཞིན་སྐུ་མགྲོན་རྣམ་པས་བཀའ་སློབ་གནང་བ་དང་། དེ་རིང་གལ་ཆེ་བ་ཞིག་ལ་དམིགས་བསལ་གྱིས་ལྟེ་གནས་ཁང་གི་བརྒྱུད་རིམ་ནང་ཟབ་སྦྱོང་དང་། ང་ཚོ་དང་མཉམ་དུ་ཕྱག་ལས་གནང་མྱོང་མཁན་གྱི་ཚོགས་སྡེ་ཁག་མང་པོ་ཞིག་ཡོད་ལ། ཁོང་རྣམ་པའི་ངོས་ནས་ཤུགས་རྐྱེན་གང་འདྲ་བྱུང་ཡོད་པ་དེའི་ཐོག་ལ་དང་བླངས་ཀྱི་ཐོག་ནས་བཀའ་མོལ་གནང་ཡོད་པ་རེད། དེ་བཞིན་ང་ཚོ་བོད་པ་དང་རྒྱ་གར་ཡུལ་མི་མཉམ་དུ་གཅིག་ཕན་གཅིག་གྲོགས་དང་། ཕན་ཚུན་གུས་བརྩི་ཡོད་པ། རིག་གཞུང་མི་འདྲ་བའི་མཉམ་དུ་གནས་ཐུབ་པའི་ཐོག་ནས་འབད་བརྩོན་ཞུ་ཡི་ཡོད་པར་སོང་། དེ་རིང་འདིར་རྟེན་འབྲེལ་གྱི་ཚུལ་དུ་ང་ཚོ་བོད་པའི་གཞས་པ་གྲགས་ཅན་ནས་གཞས་གཏོང་བ་དང་། རྒྱ་གར་གྱི་དྷ་སའི་ཁུལ་གྱི་གཞས་སོགས་གྲ་སྒྲིག་བྱས་ཡོད།
ལྟེ་གནས་ཁང་གི་ངོ་སྤྲོད་དང་འབྲེལ་ནས་འགན་འཛིན་ཀརྨ་ལེགས་བཤད་ལགས་ཀྱིས། ༸གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་སྨོན་ལམ་དང་། དེ་ལ་བརྟེན་ནས་ཌན་མག་ (Denmark) རྩོད་རྙོག་འདུམ་སྒྲིག་ལྟེ་གནས་ཁང་གི་བརྒྱུད་རྩོད་རྙོག་གི་རིག་གནས་དེ་རླབས་ཆེན་ཞིག་ཡིན་པ་ཤེས་རྟོགས་བྱུང་སྟེ། ཕྱི་ལོ་ ༢༠༠༡ ལོར་ནང་སྲིད་ལས་ཁུངས་ཀྱི་སྟངས་འཛིན་ཁྱབ་ཁོངས་ནས་ཐོག་མར་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གསར་འཛུགས་གནང་བ་རེད། དང་ཐོག་ལྟེ་གནས་ཁང་དུ་ནང་སྲིད་ཀྱི་ཁང་པ་སྟོང་པ་ཞིག་དང་རྐུབ་བཀྱག་གསུམ་ཡོད་པའི་ཐོག་ནས་ལས་བྱེད་གསུམ་གྱིས་ལས་དོན་བྱེད་མགོ་འཛུགས་བྱས་པ་རེད། འོན་ཀྱང་། སྐབས་དེ་དུས་༸གོང་ས་མཆོག་གི་བཀའ་སློབ་ལམ་སྟོན་གཞིར་བཟུང་ང་ཚོས་དམིགས་ཡུལ་ངེས་ཅན་དང་འཆར་སྣང་བརྟན་པོ་ཞིག་བཟུང་ནས་རྩོད་རྙོག་དེ་བཟང་པོའི་ཕྱོགས་སུ་འགྱུར་ཐུབ་པར་ཐབས་ལམ་གང་ཡོད་ཐོག་སྦྱོང་བརྡར་བྱས་ཡོད་ཅིང་། ཐོག་མར་ཚོགས་པ་ཆུང་ཆུང་ཞིག་མགོ་བཙུགས་པ་དང་། ད་ལྟའི་ཆར་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་དེ་རྒྱ་གར་རྒྱལ་ཡོངས་སུ་ཁྲིམས་མཐུན་དེབ་སྐྱེལ་ཡོད་པའི་ཤེས་ཡོན་གྱི་ལྟེ་གནས་གལ་ཆེན་པོ་ཞིག་ཆགས་པ་དང་། ལྷག་པར་དུ་རྩོད་རྙོག་འདུམ་སྒྲིག་དང་སྦྱོང་བརྡར། བར་འདུམ། ལམ་སྟོན། དེ་བཞིན་ནུས་སྟོབས་གོང་སྤེལ་ (Empowerment) དང་། ནུས་པ་སྐྱེད་སྲིང་ (Capacity Building) སོགས་ཆེད་ལས་ཀྱི་ངོ་བོ་ཡོད་པའི་ལྟེ་གནས་ཁང་གལ་ཆེན་ཞིག་ཆགས་ཡོད་ཅེས་གསུངས་བྱུང་།
འདས་པའི་ལོ་ངོ་ ༢༥ རིང་བོད་ཀྱི་རྩོད་རྙོག་འདུམ་སྒྲིག་ཁང་གི་ཆེས་བརྗེད་བཀའ་བ་དང་དྲན་སླ་བའི་ལས་དོན་ག་རེ་རེད་བསམ་གྱི་འདུག་གམ་ཞེས་དྲི་བ་དྲིས་པར་ཁོང་གིས། དེ་འདྲ་བའི་དཔེ་མཚོན་མང་པོ་ཡོད་ཀྱང་། གཅིག་ཞུས་པ་ཡིན་ན། མི་མང་པོ་ཞིག་གིས་ང་ཚོའི་ཟབ་སྦྱོང་གི་རྗེས་སུ་དེ་སྔ་བྱས་པའི་ལས་དོན་སྒྲུབ་ཕྱོགས་ལ་འགྱུར་བ་ཕྱིན་ཏེ་མི་ཚེའི་ནང་ཕན་ཐོགས་ཞེ་དྲགས་བྱུང་སོང་གསུང་གི་ཡོད། དཔེར་ན། རྒྱ་གར་ལྷོ་ཕྱོགས་ཀྱི་གདན་ས་ཁག་ཏུ་རྩོད་རྙོག་དང་འབྲེལ་བའི་ཟབ་སྦྱོང་ཉིན་བཞིའི་རིང་ཕུལ་བ་རེད། སྐབས་དེར་ལོ་ངོ་སུམ་ཅུ་བཞི་བཅུའི་རིང་ནང་པའི་ལྟ་གྲུབ་དང་རིགས་གནས་ལ་སློབ་གཉེར་གནང་སྟེ་མཐར་ཕྱིན་པའི་དགེ་བཤེས་མང་པོ་ཕེབས་ཡོད། ཟབ་སྦྱོང་གི་རྗེས་སུ། ཁོང་ཚོས་ངས་མི་ཚེ་ཕྱེད་ཀ་ལྷག་ནང་པའི་ལྟ་གྲུབ་ལ་སློབ་སྦྱོང་བྱས་ནས་གོ་དོན་སོགས་ཀྱི་ཐད་དཀའ་ངལ་གང་ཡང་མེད། འོན་ཀྱང་། ངས་ལོ་ངོ་སུམ་ཅུར་སློབ་སྦྱོང་བྱས་པའི་ཡོན་ཏན་དེ་མིའི་མི་ཚེ་དང་འཚོ་བའི་ནང་བེད་སྤྱོད་བྱེད་པའི་ངེས་པ་དེ་ཉིན་གྲངས་བཞིའི་རིང་གི་ཟབ་སྦྱོང་བརྒྱུད་ནས་ཐོབ་བྱུང་། འདི་འདྲ་བའི་ཟབ་སྦྱོང་ལ་ང་ཚོའི་སྤྱི་ཚོགས་འདི་སྤྱི་ཚོགས་གཞན་དང་མི་འདྲ་བ་བཟོ་ཐུབ་པའི་ནུས་པ་ལྡན་སྐོར་གསུངས་སོང་། དེ་བཞིན། དགེ་རྒན་ཁག་ཅིག་སློབ་ཕྲུག་ལ་ཉེས་རྡུང་བཏང་ན་མ་གཏོགས་ཐབས་ལམ་མེད་པའི་གནས་སྟངས་འོག་ལྷུང་ཞིང་། དགེ་རྒན་གྱི་ལས་གནས་ནས་རྩ་དགོངས་ཞུ་རྩིས་ཡིན་ཡང་། རྩོད་རྙོག་འདུམ་སྒྲིག་ཁང་གི་ཟབ་སྦྱོང་ཐོབ་རྗེས་སློབ་འཁྲིད་ཀྱི་ཐབས་ལམ་གསར་པ་རག་སྟེ་སློབ་འཁྲིད་མུ་མཐུད་བྱེད་པའི་སེམས་ཤུགས་དང་ལམ་ཁ་རྙེད་པ་སོགས་བྱུང་ཡོད། ཅེས་བརྗོད་བྱུང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
