འདི་ལོའི་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཁྱབ་ཁོངས་བོད་སློབ་ཁོངས་ནས་འཛིན་རིམ་བཅུ་གཉིས་ཀྱི་སློབ་ཕྲུག་གྲངས་ ༩༡༨ རྒྱལ་ཡོངས་ཡིག་རྒྱུགས་ནང་མཉམ་ཞུགས་བྱས་ཏེ་སློབ་ཕྲུག་གྲངས་ ༩༠༥ ཡི་ཡིག་རྒྱུགས་འཕྲོད་པའི་བརྒྱ་ཆ་ ༩༨།༥༨ རེད་འདུག
རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཁྱབ་ཁོངས་འཛིན་རིམ་བཅུ་གཉིས་ཀྱི་རྒྱུགས་འབྲས་གསལ་བསྒྲགས་གནང་ཡོད་ཅིང་། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཕྱོགས་བསྡོམས་ལྟར་ན། འདི་ལོར་རྒྱ་གར་རྒྱལ་ཡོངས་ཀྱི་འཛིན་རིམ་བཅུ་གཉིས་པའི་ཡིག་རྒྱུགས་ནང་ཞུགས་མཁན་བོད་པའི་སློབ་གྲྭ་གྲངས་ ༡༣ གྱི་སློབ་ཕྲུག་གྲངས་ ༩༡༨ ཡོད་པའི་ཁྲོད། སློབ་ཕྲུག་གྲངས་ ༩༠༥ ཡིག་རྒྱུགས་འཕྲོད་དེ་ཡིག་རྒྱུགས་འཕྲོད་པའི་བརྒྱ་ཆ་ ༩༨།༥༨ བླངས་འདུག དེའི་ཁྲོད་བོད་པའི་སློབ་གྲྭ་ ༧ གྱིས་ཡིག་རྒྱུགས་བརྒྱ་ཆ་ ༡༠༠ འཕྲོད་འདུག
འདི་ལོའི་ཚན་རིག་ཡིག་རྒྱུགས་ཁྲོད་མ་སུ་རི་བོད་ཁྱིམ་སློབ་གྲྭའི་སློབ་མ་བསྟན་འཛིན་ནོར་འཛོམས་ལགས་ཀྱིས་བརྒྱ་ཆ་ ༩༢།༦ བླངས་ནས་ཨང་དང་པོ་ཐོབ་ཡོད་ཅིང་། ཚོང་ལས་སྡེ་ཚན་གྱི་ཁོངས་སུ་ཨང་དང་པོ་ཐོབ་མཁན་མ་སུ་རི་སམ་བྷོ་ཊ་གཏན་སློབ་ཀྱི་སློབ་མ་ནི་ཞི་བྷ་ཡིན་པ་དང་། ཁོང་གི་ཡིག་རྒྱུགས་གྲུབ་འབྲས་ཀྱི་སྐར་གྲངས་བརྒྱ་ཆ་ ༩༡།༢ ཡིན་འདུག དེ་བཞིན་འབྱུང་རིག་སྡེ་ཚན་གྱི་ཁོངས་སུ་ཨང་དང་པོ་ཐོབ་མཁན་ཧ་ཝ་པུར་སམ་བྷོ་ཊའི་སློབ་གྲྭའི་སློབ་མ་ཨར་ཡིན་ལགས་ཡིན་འདུག ཁོང་གི་ཡིག་རྒྱུགས་གྲུབ་འབྲས་ཀྱི་སྐར་གྲངས་བརྒྱ་ཆ་ ༩༥།༤ ཡིན་འདུག
འདི་གའི་གསར་འགོད་པས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་འཕར་དང་དེང་རབས་ཤེས་ཡོན་ཚན་པའི་འགན་འཛིན་གཅིག་ལྕོགས་བསྟན་འཛིན་རྡོ་རྗེ་ལགས་སུ་ད་ལོའི་ཡིག་རྒྱུགས་ཐད་དགོངས་ཚུལ་གང་འདྲ་ཡོད་མེད་དྲིས་པར་ཁོང་གིས། ལོ་ལྟར་ཡིག་རྒྱུགས་ནང་མཉམ་ཞུགས་བྱེད་མཁན་གྱི་འཛིན་རིམ་བཅུ་པ་དང་བཅུ་གཉིས་ཀྱི་སློབ་མར་འགྱུར་བ་འགྲོ་བཞིན་ཡོད་ཅིང་། རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་ཡིག་རྒྱུགས་ཀྱི་སྒྲོམ་གཞི་དང་། ནང་དོན། བསླབ་གཞི་རྩ་འཛིན། ཡིག་རྒྱུགས་ཀྱི་ལམ་སྲོལ་བཅས་ལའང་འགྱུར་བ་ཤུགས་ཆེན་འགྲོ་བཞིན་ཡོད་པའི་གནས་སྟངས་ཀྱི་འོག་ཏུ། འཛིན་རིམ་བཅུ་གཉིས་ཀྱི་ཡིག་རྒྱུགས་འཕྲོད་པའི་བརྒྱ་ཆ་ ༩༨།༥༨ ལོན་ཡོད་པ་དང་། འཛིན་རིམ་བཅུ་པའི་ཡིག་རྒྱུགས་འཕྲོད་པའི་བརྒྱ་ཆ་ ༩༧། ༧༡ བླངས་ཡོད། སྤྱི་ཡོངས་ཀྱི་ཡིག་རྒྱུགས་ཀྱི་གྲུབ་འབྲས་ཡག་པོ་རེད་བསམ་གྱི་འདུག ལོ་རེ་བཞིན་ཡིག་རྒྱུགས་ཀྱི་གྲུབ་འབྲས་ལ་འཕར་ཆག་གི་གནས་སྟངས་གང་ཡང་འབྱུང་སྲིད་པ་ཞིག་རེད། དེ་ལས་ཀྱང་གལ་ཆེ་བ་ནི་རྒྱུན་ལྡན་གྱི་སློབ་མའི་ཤེས་ཡོན་གལ་ཆེན་པོ་རེད། ཅེས་གསུངས་བྱུང་།
དེ་བཞིན་འདི་ལོར་རྒྱ་གར་རྒྱལ་ཡོངས་ཀྱི་འཛིན་རིམ་བཅུ་པའི་ཡིག་རྒྱུགས་ནང་ཞུགས་མཁན་བོད་པའི་སློབ་གྲྭ་གྲངས་ ༢༢ ཀྱི་སློབ་མ་ཁྱོན་ ༡༠༠༥ ཡོད་པའི་ཁྲོད། སློབ་ཕྲུག་ ༩༨༢ ཀྱིས་ཡིག་རྒྱུགས་འཕྲོད་དེ་ཁྱོན་ཡིག་རྒྱུགས་འཕྲོད་པའི་བརྒྱ་ཆ་ ༩༧།༧༡ བླངས་འདུག དེའི་ཁྲོད་བོད་སློབ་གྲངས་ ༡༤ ཡི་ཡིག་རྒྱུགས་འཕྲོད་པའི་བརྒྱ་ཆ་ ༡༠༠ རེད་འདུག སྤྱིར་བཏང་འདི་ལོའི་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་ཡིག་རྒྱུགས་གྲུབ་འབྲས་དེ་ཟླ་འདིའི་ཕྱི་ཚེས་ ༡༣ ཉིན་གསལ་བསྒྲགས་བྱས་པ་དང་ཕྱི་ཟླ་ ༤ ཚེས་ ༡༥ ཉིན་འཛིན་རིམ་བཅུ་བའི་ཡིག་རྒྱུགས་གྲུབ་འབྲས་གསལ་བསྒྲགས་བྱས་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
