དེ་རིང་རྒྱལ་སྤྱིའི་འགྲེམས་སྟོན་ཉིན་མོར་བཞུགས་སྒར་དྷ་རམ་ས་ལའི་བོད་ཀྱི་འགྲེམས་སྟོན་ཁང་ཁག་གི་འཐུས་ཚབ་རྣམས་ཀྱིས་འགྲེམས་སྟོན་གྱི་ལམ་ནས་བོད་ཀྱི་ལོ་རྒྱུས་ཀྱི་བདེན་པ་ར་སྤྲོད་བྱེད་ཕྱོགས་སོགས་ལ་གྲོས་བསྡུར་གནང་སོང་།
དེ་རིང་ཕྱི་ཟླ་ ༥ ཚེས་ ༡༨ ཉིན་བོད་མིའི་སྒྲིག་འཛུགས་ཕྱི་དྲིལ་བོད་ཀྱི་འགྲེམས་སྟོན་ཁང་དུ། རྒྱལ་སྤྱིའི་འགྲེམས་སྟོན་ཉིན་མོ་ཐེངས་ ༤༩ པ་སྲུང་གཙི་གནང་སོང་། སྐབས་དེར་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་དང་། བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས། བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས། རྩོམ་པ་པོ་བུ་ཆུང་ཚེ་རིང་ལགས། དེ་བཞིན་དྷ་སའི་འགྲེམས་སྟོན་ཁང་ཁག་གི་འཐུས་ཚབ་བཅས་མཉམ་ཞུགས་གནང་སོང་། སྐབས་དེར་བོད་ཀྱི་འགྲེམས་སྟོན་ཁང་གི་དུས་དེབ་འདོན་ཐེངས་གསུམ་པ་དབུ་འབྱེད་དང་། ༧པཎ་ཆེན་སྐུ་ཕྲེང་བཅུ་བ་དང་བཅུ་གཅིག་པ་མཆོག་རྣམ་གཉིས་ཀྱི་སྐུ་པར་འགྲེམས་སྟོན་གནང་སོང་།
ཕྱི་དྲིལ་བོད་ཀྱི་འགྲེམས་སྟོན་ཁང་གི་དུས་དེབ་དེའི་ནང་ཕྱི་དྲིལ་བོད་ཀྱི་འགྲེམས་སྟོན་ཁང་དང་། བོད་ཀྱི་དཔེ་མཛོད་ཁང་། བོད་ཀྱི་ཟློས་གར་ཁང་། འགྲོ་ཕན་བོད་ཀྱི་སྨན་རྩིས་ཁང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་བཅས་ཀྱི་འགྲེམས་སྟོན་ཁང་ཁག་གིས་འགྲེམས་སྟོན་གྱི་ལས་དོོན་གཉེར་ཕྱོགས་ཐོག་དཔྱད་རྩོམ་ཕྱོགས་སྒྲིག་གནང་འདུག་ལ། ཚོགས་ཐོག་ཏུ་རྒྱལ་སྤྱི་དང་མཐུན་པའི་ཐོག་ནས་འགྲེམས་སྟོན་གྱི་དུས་དེབ་ཡར་རྒྱས་གཏོང་ཕྱོགས་གླེང་མོལ་གནང་སོང་།
རྒྱལ་སྤྱིའི་འགྲེམས་སྟོན་ཉིན་མོའི་གལ་གནད་སྐོར་ལ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། དེ་རིང་ནི་རྒྱལ་སྤྱིའི་ཐོག་སྲུང་གཙི་བྱེད་བཞིན་པའི་འགྲེམས་སྟོན་ཉིན་མོ་ཆགས་ཡོད། ཕྱི་དྲིལ་བོད་ཀྱི་འགྲེམས་སྟོན་ཁང་གི་གོ་སྒྲིག་འོག་སྲུང་གཙི་ཞུ་བཞིན་ཡོད་པ་རེད། འདི་ཡང་གནད་འགག་ཧ་ཅང་ཆེན་པོ་ཞིག་རེད་བསམ་གྱི་འདུག འགྲེམས་སྟོན་ཁྲོད་དུ་བོད་ཀྱི་ཅ་དངོས་དང་། སྒྱུ་རྩལ། པར་རིས་སོགས་གང་ཡིན་ཡང་རྒྱལ་སྤྱིའི་སྡིངས་ཆའི་སྟེང་དུ་འགྲེམས་སྟོན་གྱི་ཐོག་ནས་སོ་སོའི་བདེན་པ་ར་སྤྲོད་བྱེད་ཐུབ་པའི་གནས་སྟངས་ཤིག་ཆགས་ཀྱི་ཡོད། བརྒྱུད་ལམ་འདི་ནི་ཧ་ཅང་རྩ་ཆེན་པོོ་ཞིག་རེད། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་བོད་ཀྱི་འགྲེམས་སྟོན་ཁང་བཙུགས་པ་ལ་བརྟེན་ནས་བོད་ཀྱི་གནས་ཚུལ་ཁྱབ་སྤེལ་བྱེད་ཐུབ་པར་ཧ་ཅང་ཕན་ཐོགས་ཆེན་པོ་བྱུང་ཡོད། དེ་རིང་འདིར་དྷ་ས་ཁུལ་གྱི་འགྲེམས་སྟོན་ཁང་ཁག་གི་སྐུ་ཚབ་རྣམས་འཛོམས་ཏེ་འགྲེམས་སྟོན་གྱི་ལས་དོན་གཉེར་སྟངས་དང་། འགྲེམས་སྟོན་གྱི་དུས་དེབ་འདོན་སྟངས་ཐོག་བགྲོ་གླེང་གནང་བ་གལ་ཆེན་པོ་རེད། ང་ཚོར་བདེན་པ་ཡོད་ཅེས་བཤད་བཞིན་ཡོད་ཀྱང་། བདེན་པ་དེ་ར་འཕྲོད་དགོས་པ་རེད། བདེན་པ་ར་འཕྲོད་པར་བརྒྱུད་ལམ་ཞིག་ལ་འགྲོ་དགོས་པ་ཞིག་རེད། དེའི་བརྒྱུད་རིམ་དེ་འགྲེམས་སྟོན་གྱི་ཐོག་བསྟན་ཚེ། མི་མང་གིས་ལྟ་བདེ་བ་དང་ཤེས་བདེ་བའི་གལ་གནད་ཞིག་ཆགས་ཡོད་པ་རེད། ཅེས་འགྲེལ་བརྗོད་གནང་སོང་།
བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས། རྒྱ་ནག་གིས་བོད་ནང་དུ་བཙན་འཛུལ་བྱས་པ་ནས་བཟུང་འགྲེམས་སྟོན་བརྒྱུད་ལམ་ཐོག་བོད་རྒྱ་ནག་གི་ཆ་ཤས་ཡིན་པ་དྲིལ་བསྒྲགས་ཤུགས་ཆེན་བྱེད་བཞིན་ཡོད། ཕྱི་ལོ་ ༢༠༢༠ ལོའི་རྗེས་སུ་རྒྱ་ནག་སྐམ་ས་ཆེན་པོའི་ནང་འགྲེམས་སྟོན་ཁང་མང་པོ་བརྒྱབ་ཡོད། ཕྱི་ལོ་༡༩༩༨ ཙམ་ལ་བོད་ཀྱི་རྒྱལ་ས་ལྷ་སར་བོད་ཀྱི་འགྲེམས་སྟོན་ཟེར་བ་ཞིག་ཐོག་མར་བཙུགས་ཡོད། ཕྱི་ལོ་ ༢༠༡༥ ལོར་འགྲེམས་སྟོན་ཁང་དེ་རྒྱ་སྐྱེད་བཏང་ཡོད། ལོ་ ༡༥ ལྷག་གི་ནང་དུ་རྒྱ་ནག་གཞུང་གིས་བོད་ཀྱི་ལོ་རྒྱུས་འཁྱོག་བཤད་ཀྱི་འབྲས་་བུ་ཐོན་པ་གསལ་བོ་མཐོང་ཡོད་རེད། དེའི་ཁྲོད་དུ་བོད་ནི་གནའ་སྔ་མོ་ནས་རྒྱ་ནག་གི་ཁོངས་ཡིན་པ་དང་། བོད་ཀྱི་ཆོས་གོས་སོགས་རྒྱ་ནག་ནས་དཔེ་བླངས་པ་བསྒྲུབ་ཡོད་པ་རེད། རྒྱ་ནག་གཞུང་གིས་ཀྱང་འགྲེམས་སྟོན་གྱི་བརྒྱུད་ལམ་ནས་མི་མང་ལ་བློ་ཁྲིད་བྱེད་ཐུབ་ཀྱི་ཡོད་པ་གསལ་བོ་ཤེས་ཀྱི་ཡོད། ཅེས་འགྲེལ་བརྗོད་གནང་སོང་།
ཡང་ཁོང་གིས། ཕྱི་རྒྱལ་དུ་གཟའ་མཇུག་ལ་ཕ་མ་རྣམས་ཀྱིས་རང་ཉིད་ཀྱི་བུ་ཕྲུག་འགྲེམས་སྟོན་ཁང་དུ་ལྟ་སྐོར་དུ་ཁྲིད་ཀྱི་ཡོད་པ་དང་། དེ་ནི་བྱིས་པ་རྣམས་ཀྱི་འདོད་མོས་ལྟར་འདས་པའི་ལོ་རྒྱུས་ལ་སློབ་སྦྱོང་བྱེད་པའི་གོ་སྐབས་ཤིག་ཡོད། དེང་རབས་ཚན་རྩལ་གྱི་འགྱུར་འགྲོས་དང་བསྟུན་ནས་འགྲེམས་སྟོན་ཁང་དུ་ལྟ་སྐོར་དུ་སྐྱོད་པ་དེ་ཡང་བྱིས་པ་རྣམས་ལ་གནོན་ཤུགས་མེད་པའི་སློབ་སྦྱོང་བྱེད་སྟངས་ཡག་ཤོས་ཆགས་ཡོད་ལ། བཙན་བྱོོལ་བོད་པའི་སྤྱི་ཚོགས་སུའང་དེང་དུས་ཚན་རྩལ་གྱི་སློབ་སྦྱོང་བྱེད་སྟངས་གོམས་འདྲིས་ཆགས་དགོས་པ་མ་ཟད། དེང་དུས་རྒྱུག་ཆེ་བའི་འགྲེམས་སྟོན་ཁང་གི་སྒྱུ་རྩལ་དང་པར་རིས་སོགས་དང་མཉམ་དུ་བོད་ཀྱི་ལོ་རྒྱུས་ཀྱི་བདེན་པ་གསལ་དགོས་པ་མ་ཟད། འགྲེམས་སྟོན་གྱི་ཐོག་ནས་བོད་ཀྱི་ལོ་རྒྱུས་སློབ་སྦྱོང་བྱེད་པའི་ནུས་པ་སྐྱེད་སྲིང་བྱ་དགོས་སྐོར་བརྗོད་སོང་།
དེ་བཞིན་བོད་ཀྱི་ཟློས་གར་ཚོགས་པའི་ཉམས་ཞིབ་དང་རིག་གནས་དགེ་རྒན་བསོད་ནམས་ཚེ་བརྟན་ལགས་ཀྱིས། བོད་ནང་དུ་རྒྱ་གཞུང་གིས་བོད་ཀྱི་ལོ་རྒྱུས་འཁྱོག་བཤད་བྱས་པའི་རྐྱེན་གྱིས་གཞོན་སྐྱེས་ཁྲོད་དུ་བོད་ཀྱི་ལོ་རྒྱུས་ཀྱི་བདེན་པ་མཐོང་ཐུབ་མེད་པས།བཙན་བྱོལ་ནང་རང་དབང་གི་ཐོག་ནས་འདས་བའི་བྱུང་རབས་ལ་སློབ་སྦྱོང་བྱེད་དགོས་པ་མ་ཟད། འགྲེམས་སྟོན་གྱི་དེང་རབས་སློབ་སྦྱོང་བྱེད་ཕྱོགས་དང་བསྟུན་ནས། བོད་པའི་མི་རབས་གསར་པས་རྒྱལ་སྤྱིའི་སྤྱི་ཚོགས་ནང་རྒྱ་གཞུང་གིས་གཏོར་བཤིག་གཏོང་བཞིན་པའི་གནས་སྟངས་ཐེར་འདོན་གནང་དགོས་སྐོར་བརྗོད་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
