བོད་མི་འཇིགས་བྲལ་ཀླུ་ལྡིང་ལགས་ཁེ་ན་ཌའི་རིམ་པ་གཉིས་པའི་དམག་དཔོན་དུ་བསྐོ་གཞག་བྱས།

ཁེ་ན་ཌར་གནས་སྡོད་བོད་མི་གཞོན་སྐྱེས་འཇིགས་བྲལ་ཀླུ་ལྡིང་ལགས་ཁེ་ན་ཌའི་རྒྱལ་དམག་གཙུག་ལག་སློབ་ཆེན་ནས་སློབ་ཐོན་གྲུབ་འབྲས་ཨང་དང་པོར་སོན་པར་བརྟེན་ཐད་ཀར་(Second lieutenant)དམག་དཔོན་དུ་བསྐོ་གཞག་གནང་འདུག

Photo from the Facebook of Tsering Luding. Collected by Tibet Times.

ཁ་སང་ཕྱི་ཚེས་ ༡༩ ཉིན་་ཁེ་ན་ཌའི་ནང་གནས་སྡོད་བོད་མི་གཞོན་སྐྱེས་འཇིགས་བྲལ་ཀླུ་ལྡིང་ལགས་ཁེ་ན་ཌའི་རྒྱལ་དམག་གཙུག་ལག་སློབ་ཆེན་(The Royal Military College of Canada )ནས་སློབ་མཐར་ཕྱིན་པ་དང་བསྟུན། ཁོང་གི་དམག་སྦྱོང་གི་གྲུབ་འབྲས་རྩེར་སོན་པར་བརྟེན། ཐད་ཀར་ཁེ་ན་ཌའི་(Second lieutenant)དམག་དཔོན་དུ་བསྐོ་གཞག་བྱས་འདུག་ལ། ཁོང་ནི་བོད་མི་ཞིག་ཐད་ཀར་ཁེ་ན་ཌའི་དམག་དཔོན་གྱི་གནས་རིམ་དེར་བསྐོ་གཞག་བྱུང་བ་ཐོག་མ་དེ་ཆགས་ཀྱི་ཡོད་འདུག

འཇིགས་བྲལ་ཀླུ་ལྡིང་ལགས་ཀྱི་པཱ་ལགས་ཚེ་རིང་ཀླུ་ལྡིང་ལགས་ཀྱིས་ངོ་དེབ་ཏུ་གནས་ཚུལ་སྤེལ་བའི་ནང་། དེ་རིང་ཁྱེད་རང་རྒྱལ་དམག་སློབ་གྲྭ་ཆེན་མོ་ནས་སློབ་མཐར་ཕྱིན་ནས་ལག་འཁྱེར་དང་དམག་དཔོན་ལ་བསྐོ་བཞག་བྱུང་སྐབས། རྒྱལ་དམག་སློབ་གྲྭ་ཆེན་མོའི་ཀ་བ་བཞི་སྟེ། ཤེས་ཡོན། སྐད་གཉིས་སྨྲ་བ། དམག་དོན་མགོ་ཁྲིད། ལུས་རྩལ་བཅས་ལེགས་གྲུབ་བྱུང་བར་ང་ཚོའི་སེམས་ནང་དགའ་སྤོབས་དང་གུས་བརྩི་ཆེན་པོ་སྐྱེས་བྱུང་། དུས་སྐབས་འདི་ནི་ལས་སླ་པོ་ཞིག་མ་ཡིན་པར་ལོ་མང་རིང་གི་བློས་གཏོང་དང་ཆོད་སེམས། སྒྲིག་ལམ། འགྱུར་མེད་དམ་བཅའ་བཅས་ལ་བརྟེན་ནས་བྱུང་བ་རེད། བརྒྱུད་རིམ་འདིའི་ཁྲོད་ཁྱེད་ལ་རང་ཉིད་ཀྱི་སྟོབས་ཤུགས་དང་མི་གཤིས་ལ་ཉམས་ཚོད་ལེན་དགོས་པའི་དཀའ་ངལ་འཕྲད་ཡོད་ཀྱང་། ཁྱེད་ཀྱིས་ཡོད་ཚད་ལ་དཔའ་ངར་དང་གཟི་བརྗིད་ལྡན་པའི་ངང་ནས་གདོང་ལེན་བྱས་ཡོད། དེ་རིང་ཁྱེད་ཀྱིས་སྤོབས་པའི་ཐོག་ནས་དམག་ཆས་གྱོན་ཆོག ཁྱེད་ཀྱིས་རང་གི་བློ་གཏད་དང་སྒྲིག་ལམ། བརྩོན་འགྲུས་བཅས་ལ་བརྟེན་ནས་ངོ་མཚར་ཆེ་བའི་གནས་བབ་འདིར་བསླེབས་ཡོད། ཁྱེད་རང་ནུས་སྟོབས་ལྡན་པའི་མགོ་ཁྲིད་ཅིག་ཏུ་འཚར་ལོངས་བྱུང་བ་དེ་ང་ཚོའི་མི་ཚེའི་ནང་གི་དགའ་སྤྲོ་ཆེ་ཤོས་དེ་ཡིན། ཁྱེད་རང་དམག་དཔོན་གྱི་ལམ་དུ་བསྐྱོད་སྐབས། དམག་དཔོན་ངོ་མ་ནི་དབང་ཆ་དང་གོ་གནས་ཀྱི་སྐོར་མ་རེད། དེ་ནི་གུས་ཞབས་དང་བརྩི་འཇོག སྙིང་རྗེ་བཅས་གཞི་རྟེན་བྱས་ཏེ་གཞན་ལ་ཞབས་ཕྱི་ཞུ་རྒྱུ་དེ་རེད། ཅེས་བརྗོད་འདུག

འཇིགས་བྲལ་ཀླུ་ལྡིང་ལགས་དམག་དཔོན་དུ་བསྐོ་གཞག་བྱུང་བའི་སྐོར་ཡིག་ཆའི་ནང་དུ། ཁོང་གིས་རྒྱལ་དམག་སློབ་གྲྭ་ཆེན་མོའི་ཤེས་ཡོན་དང་། སྐད་གཉིས་སྨྲ་བ། དམག་དོན་མགོ་ཁྲིད། ལུས་རྩལ་བཅས་སློབ་གསོའི་ཀ་བ་བཞིའི་ཐོག་ཨང་དང་པོའི་གྲུབ་འབྲས་བླངས་པར་བརྟེན་ནས་བྱུང་ཞིང་། སློབ་ཆེན་དེ་ནས་ཐད་ཀར་(Second lieutenant)དམག་དཔོན་དུ་བསྐོ་གཞག་བྱུང་བ་རྣམས་ནི་མཁའ་དམག་གི་དཔོན་པོ་ཡིན་ལ། འཇིགས་བྲལ་ལགས་ཀྱི་བཀོད་འདོམས་འོག་དམག་མི་ཁྱོན་ ༣༠ ནས་ ༤༠ བར་ཡོད་པ་ཁེ་ན་ཌའི་དམག་གི་དྲ་ཚིགས་ (Canadiansoldiers) སུ་གསལ་འདུག

འཇིགས་བྲལ་ཀླུ་ལྡིང་ལགས་སུ་ཁེ་ན་ཌའི་རྒྱལ་པོ་ཆར་ལེ་སི་གསུམ་པ་མཆོག་གི་མཚན་ཐོག་ནས་ཆེ་བསྟོད་ངོས་འཛིན་ལག་འཁྱེར་གནང་བའི་ནང་། ང་ཚོས་ཁྱེད་ཀྱི་ལྷག་བསམ་དང་། སྙིང་སྟོབས། གཞུང་དྲང་བཅས་ལ་ཡིད་ཆེས་དང་བློས་འགེལ་བྱས་ཏེ། ཁྱེད་རང་ང་ཚོ་ཁེ་ན་ཌའི་དམག་དཔུང་གི་དཔོན་རིགས་ཤིག་ཏུ་བསྐོ་བཞག་བྱེད་ཀྱི་ཡོད། ཁྱེད་ཀྱིས་གཟབ་ནན་དང་བརྩོན་པ་ཆེན་པོས་དམག་སྤྱི་གཞོན་པའམ་མ་འོངས་པར་ང་ཚོས་གོང་འཕར་དང་བསྐོ་བཞག་བྱེད་པའི་གོ་གནས་གཞན་དག་གི་ཐོག་ནས་ལས་འགན་ལེགས་པོ་བསྒྲུབ་དགོས། ང་ཚོས་ཁྱེད་ཀྱིས་དམག་དཔོན་གྱི་ལས་རིགས་དང་མགོ་འཁྲིད་ཀྱི་ཕུལ་བྱུང་གྲུབ་འབྲས་སྟོན་རྒྱུ་དང་། དམག་དོན་གྱི་སྤྱོད་བཟང་ལ་དམ་ཚིག་བརྟན་པོས་སྲུང་སྐྱོབ་དང་རྒྱུན་འཁྱོངས་བྱེད་པའི་རེ་བ་བྱེད་ཀྱི་ཡོད། ང་ཚོས་གཏན་འབེབས་བྱས་པ་ལྟར་ཁྱེད་ཀྱི་འོག་ཏུ་ཞབས་ཕྱི་སྒྲུབ་བཞིན་པའི་དཔོན་རིགས་དང་དམག་མི་ཚོར་བཀའ་རྒྱ་དང་སྒྲིག་ཁྲིམས་ལེགས་པར་འགྲུབ་དགོས་པ་མ་ཟད། ཁོང་ཚོའི་བདེ་དོན་ལ་དམིགས་པ་དང་བདག་སྐྱོང་ལེགས་པོ་བྱེད་དགོས། ང་ཚོས་ཁོང་ཚོར་ཁྱེད་ལ་བརྩི་སྲུང་བྱེད་དགོས་པའི་བཀའ་བཏང་ཡོད་ལ། ཁྱེད་ཀྱིས་ཀྱང་ཁྲིམས་ལྟར་ང་ཚོའམ་དཔོན་རིགས་གཞན་དག་གི་བཀའ་དང་བཀོད་བྱུས་ལ་ཉན་དགོས་ཞེས་གསུངས་འདུག

ཁེ་ན་ཌའི་རྒྱལ་པོའི་དམག་དོན་སློབ་གླིང་ནི་ཕྱི་ལོ་ ༡༨༧༤ ལོར་ཁེ་ན་ཌའི་སྲིད་བློན་ཨེ་ལེག་རྫན་ཌར་ (Alexander Mackenzie) གཞུང་གིས་དགོས་འདུན་བཏོན་པ་དང་གྲོས་ཚོགས་ཀྱིས་གཏན་འབེབས་བྱས་པའི་གཞུང་འབྲེལ་དམག་དོན་སློབ་ཆེན་སྙན་གྲགས་ཅན་ཞིག་ཡིན་ཞིང་། སློབ་ཆེན་དེར་དམིགས་བསལ་གཙུག་ལག་རབ་འབྱམས་པའི་བསླབ་གཞི་མི་འདྲ་བ་ ༢༠ ཡོད་ཅིང་། སློབ་མ་གྲངས་ ༡༢༠༠ ལ་དམག་དོན་ཆེད་སྦྱོང་སྤྲོད་ཀྱི་ཡོད་འདུག་ལ། སློབ་ཆེན་དེས་དམག་གི་མགོ་འཁྲིད་སྐྱེད་བསྲིང་གིས། རྒྱལ་ཁབ་ལ་དམིགས་བསལ་ཞབས་འདེགས་ཞུ་བའི་གཞི་རྩ་འདིང་གི་ཡོད་པའི་ཁར། སློབ་ཆེན་དེ་ནས་མཐར་ཕྱིན་པའི་དམག་མི་རྣམས་ལ་རིག་གཞུང་དང་ཤེས་ཡོན་སོགས་གང་ཅིའི་ཐད་ནས་རྒྱལ་སྤྱིའི་ཐོག་ཏུ་ཁེ་ན་ཌའི་སྐུ་ཚབ་བྱེད་པའི་མགོ་ཁྲིད་ཀྱི་ནུས་པ་ལྡན་ཞིང་། ལྷག་པར་དུ་སློབ་ཆེན་དེ་ནི་ཁེ་ན་ཌའི་རྒྱལ་སྲུང་དང་སྤྱི་ཚོགས་བདེ་འཇགས་སོགས་དང་འབྲེལ་བའི་མགོ་ཁྲིད་མི་སྣ་གསོ་སྐྱོང་བྱེད་པའི་སློབ་གསོའི་ལྟེ་གནས་གལ་ཆེན་ཞིག་ཡིན་འདུག སློབ་ཆེན་དེ་ཁེ་ན་ཌ་ཙམ་དུ་མ་ཟད། རྒྱལ་སྤྱིའི་ཐོག་ནས་དམག་དོན་གྱི་ཁྱད་འཕགས་མཐོ་རིམ་སློབ་གཉེར་ཁང་ཞིག་ཏུ་ངོས་འཛིན་བྱེད་ཀྱི་ཡོད་འདུག

བོད་མི་འཇིགས་བྲལ་ཀླུ་ལྡིང་ལགས་ནི་ཁ་ན་ཌ་ཊོ་རིན་ཊོ་རུ་སྐྱེས་ཤིང་། ཕག་ཌིལ་མཐོ་རིམ་སློབ་གྲྭ་(Parkdale Collegiate Institute)ནས་སློབ་མཐར་ཕྱིན་ཡོད་འདུག

གསར་འགོད་པ། སྐལ་བཟང་སྦྱིན་པ།