༸གོང་ས་མཆོག་ལ་མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་དང་ཧི་མ་ལ་ཡའི་ནང་པའི་ཆོས་ཚོགས་ཐུན་མོང་ནས་བརྟན་བཞུགས་བསྟར་འབུལ་དང་བཀའ་དྲིན་རྗེས་དྲན་གྱི་གཟེངས་རྟགས་ཕུལ་སོང་།
དེ་རིང་ཕྱི་ཚེས་ ༢༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་རྒྱལ་བ་རིན་པོ་ཆེ་མཆོག་ལ་མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་དང་ཧི་མ་ལ་ཡའི་ནང་པའི་ཆོས་ཚོགས་ཐུན་མོང་ནས་སྐུ་ཚེ་མི་གཤེགས་རྡོ་རྗེའི་ཁམས་སུ་བརྟན་པའི་བརྟན་བཞུགས་བསྟར་འབུལ་ཞུས་ཤིང་། མདོ་ཁམས་ཆུ་བཞི་སྒང་དྲུག་གཞིས་བྱེས་གཉིས་ནས་༸མགོན་པོ་གང་ཉིད་མཆོག་ལ་བཀའ་དྲིན་རྗེས་དྲན་དུ་རིགས་གསུམ་པདྨའི་རང་མདངས་གཟེངས་རྟགས་དང་། ཧི་མ་ལ་ཡའི་ནང་པའི་ཆོས་ཚོགས་ནས་བྱམས་བརྩེའི་གཟེངས་རྟགས་ཤིག་འབུལ་ལམ་ཞུས་སོང་། ད་ལན་བརྟན་བཞུགས་བསྟར་འབུལ་སྐབས་མདོ་ཁམས་ཆུ་བཞི་སྒང་དྲུག་ནས་ཨ་རི་དང་། ཁེ་ན་ཌ། ཨོ་གླིང་། ཡུ་རོབ་རྒྱལ་ཁབ་ཁག དྷ་ས་སོགས་ནས་སེར་སྐྱ་མི་མང་ ༦༠༠ ཙམ་དང་། ཧི་མ་ལ་ཡའི་ཆོས་ཚོགས་ནས་རྒྱ་གར་གྱི་མངའ་སྡེ་འབྲས་ལྗོངས་དང་། ལ་དྭགས། ཧི་མ་ཅལ། ཇ་མུ་དང་ཀ་ཤི་མིར་ནང་དཔལ་གྷར་ (Palghar)། ཨུ་ཏ་ར་ཁན་ཌི་ (Uttarakhand)། ནུབ་བྷན་གྷལ་ (West Bengal)། ཨ་རུ་ན་ཅལ་བཅས་མངའ་སྡེ་བདུན་ནས་ཚོགས་བཅར་བ་ ༩༠༠ ཡས་མས་མཉམ་ཞུགས་གནང་འདུག
ཧི་མ་ལ་ཡའི་ནང་པའི་ཆོས་ཚོགས་ཀྱི་བྱམས་བརྩེའི་གཟེངས་རྟགས་ཀྱི་མཚོན་དོན་ནི། ༡) འཛམ་གླིང་གླིང་ཆེན་ལྔའི་སྐྱེ་འགྲོ་རྣམས་ལ་མགོན་པོ་གང་གི་ཐུགས་བྱམས་པ་དང་སྙིང་རྗེ། ཡེ་ཤེས་ལྔའི་འཕྲིན་ལས་རྒྱུན་མི་ཆད་པར་འཇུག་པའི་མཚོན་དོན་དུ་རྒྱུ་རིན་ཆེན་དངུལ་ལས་གྲུབ་པའི་གཏེར་ཆེན་གྱི་བུམ་པ་རིན་ཆེན་སྣ་ལྔས་བཀང་ཞིང་བཀྲ་ཤིས་རྟགས་བརྒྱད་ཀྱི་འབུར་རིས་རིན་ཆེན་གསེར་ཚག་ཚར་དུ་དངར་བས་བརྒྱན་པ། ༢) འགྲོ་བ་མིའི་རིགས་ཡོངས་ལ་བྱམས་བརྩེའི་སྤྱོད་པ་དར་དཀར་ཡུག་གཅིག་གིས་ཁྱབ་ཅིང་ཆོས་ལུགས་རིགས་སུ་མ་མཆིས་པ་མཐུན་ལམ་གོང་བུ་གཅིག་ཏུ་བསྒྲིལ་བའི་མཚོན་དོན་དུ། བཀྲ་ཤིས་པའི་ཆོས་དུང་དཀར་པོ་གཡས་སུ་འཁྱིལ་བའི་ཏོག་གིས་བརྒྱན་པ། ༣) བོད་ཀྱི་ཆོས་དང་རིག་གཞུང་། སྐད་དང་ཡི་གེ། བོད་ཀྱི་བདེན་དོན་ཁག་ཡུག་དང་བཅས་པ་རྒྱུན་འཛིན་དང་ཉམས་གསོ་མཛད་པའི་མཚོན་བྱེད་དུ། མདུན་དུ་རང་ཅག་ཁ་བ་རི་པའི་ཐུན་མོང་མ་ཡིན་པའི་བོད་ཀྱི་ཡི་གེའམ་བྷོར་ཊའི་ཡི་གེས་མཚན་བྱང་བཀོད་པ། ༤) རྒྱ་གར་གྱི་གནའ་བོའི་རིག་གཞུང་བསྐྱར་གསོ་དང་འབྲེལ་བྱམས་བརྩེ་ལྡན་པའི་འཛམ་གླིང་ཞིག་འཛུགས་སྐྲུན་གནང་རྒྱུའི་རླབས་ཆེན་དགོངས་གཞི་དང་མཛད་འཕྲིན་རྣམས་མཚོན་ཆེད་དུ། གཡས་སུ་ཧིན་དྷི་དང་གཡོན་དུ་དབྱིན་ཡིག་ཐོག་མཚན་བྱང་བཀོད་འདུག
མདོ་ཁམས་ཆུ་བཞི་སྒང་དྲུང་གཞིས་བྱེས་གཉིས་ནས་རིགས་གསུམ་པདྨའི་རང་མདངས་ཞེས་པའི་གཟེངས་རྟགས་ཀྱི་མཚོན་དོན་ནི། རྒྱལ་བ་རིག་གསུམ་མདོན་པོའི་ཕྱག་མཚན་གསེར་དངུལ་བཀྲ་མའི་སེང་གེས་བཏེགས་པ། པདྨས་སྤྱན་རས་གཟིགས་ཀྱི་ཐུགས་རྒྱུད་ཀྱི་བརྩེ་བ་སྙིང་རྗེ་ཆེན་པོ་དང་། རྡོ་རྗེས་ཕྱག་ན་རྡོ་རྗེའི་ཐུགས་རྒྱུད་ཀྱི་མཐུ་སྟོབས་ནུས་པ། རང་གྲིས་རྗེ་བཙུན་འཇམ་པའི་དབྱངས་ཀྱི་ཐུགས་རྒྱུད་ལ་མངའ་བའི་མཁྱེན་རབ་མཚོན་ཞིང་། རང་ཅག་བོད་ཁ་བ་གངས་ཅན་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ། རིགས་གསུམ་སྒྱུ་འཕྲུལ་གཅིག་ཏུ་འདུས་པའི་བདག་ཉིད། མཁྱེན་བརྩེ་ནུས་གསུམ་གྱི་བླ་མ། ༸གོང་ས་ལྷ་མིའི་རྣམ་འདྲེན་རྒྱལ་དབང་ཐམས་ཅད་མཁྱེན་པ་སྐུ་ཕྲེང་བཅུ་བཞི་པ་ཆེན་པོ་མཆོག་ཁོ་ནར་ངེས་ཤིང་། ཕྱག་མཚན་རྣམས་གསེར་ཁྲི་ཁམས་གསུམ་ཟིལ་གནོན་གྱི་སྟེང་དུ་ལྷང་ངེར་བཏེགས་པ། མགོན་པོ་གང་ཉིད་བོད་མི་རིགས་ཀྱི་མགོན་དཔུང་དམ་པར་ཞགས་པད་གཡོ་བ་མེད་པར་རྟག་ཏུ་གནས་པར་མཚོན། གཡས་གཡོན་གཉིས་ཀྱི་པདྨ་ཟུང་གིས་ལུགས་གཉིས་ཀྱི་འཕྲིན་ལས་མཚོན་ཞིང་། པདྨ་གཉིས་ཀྱི་ཡུ་བ་ཆུ་རིས་ཀྱི་རྣམ་པ་ཅན་བཞིས་ཆུ་བཞི་དང་། ལོ་འདབ་དྲུག་གིས་སྒང་དྲུག དཀྱིལ་གྱི་པདྨ་དང་ཉེ་བར་འབྲེལ་བ་འདི་དག་གིས་བོད་མི་རིགས་འཇིག་ཉེན་གྱི་སོ་མཚམས་སུ་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གིས་རྒྱལ་བསྟན་ཆབ་སྲིད། ༸རྒྱལ་དབང་ཐམས་ཅད་མཁྱེན་པའི་སྐུ་ཕྱྭའི་སྲུང་སྐྱོབ་དང་དད་དམ་གཡོ་བ་མེད་པའི་ལྷག་བསམ་རྣམ་པར་དག་པ་མཚོན། འབུལ་མཚོན་གཙོ་བོ་ནི་བདག་ཅག་གི་སྟོན་པ་ཤཱཀྱ་ཐུབ་པའི་སྐུ་གསེར་ཟངས་ལས་གྲུབ་པ། ཁྲུ་ཚད་དབྱིན་ཇི་ ༡༥ ཅན། གྲངས་ ༡༡༣ གསར་བཞེངས་ཞུས་ཏེ། ལྷ་བླའི་ལུང་བསྟན་དང་། ༸མགོན་པོ་གང་ཉིད་ཀྱིས་ཐུགས་དམ་གཡོ་བ་མེད་པའི་ཞལ་བཞེས་གནང་དགོན་ལྟར། མགོ་ནག་བོད་མི་ཡོངས་དང་འཛམ་གླིང་དད་ལྡན་སྐྱེ་འགྲོ་ཡོངས་ཀྱི་མངོན་འདོད་བཞིན་དགུངས་གྲངས་ ༡༡༣ ལྷག་བརྟན་པར་བཞུགས་རྒྱུའི་རྟེན་འབྲེལ་མ་འཁྱུག་པར་མངོན་འགྱུར་ཡོང་བའི་རྟེན་དུ་ཕུལ་བ་ཡིན་པ་རེད།
དེ་རིང་འདི་གའི་གསར་འགོད་པས་མདོ་ཁམས་ཆུ་བཞི་སྒང་དྲུག་གི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་པདྨ་གྲུབ་དབང་ལགས་སུ་བརྟན་བཞུགས་ཕུལ་བའི་རྒྱུ་རྐྱེན་གཙོ་བོ་ག་རེ་ཡིན་སྐོར་དྲིས་པར་ཁོང་གིས། བོད་ཁ་བ་གངས་ཅན་གྱི་ལྗོངས་སུ་༸གོང་ས་རྒྱལ་བ་རིན་པོ་ཆེ་མཆོག་ལས་བཀའ་དྲིན་ཆེ་བ་ཞིག་མེད་པ་ཚང་མས་ཤེས་གསལ་རེད། ཡིན་ནའང་། ད་ལན་བོད་མིའི་སྒྲིག་འཛུགས་ཀྱིས་བྱམས་བརྩེའི་ལོ་སྲུང་གཙི་ཞུ་ཡི་ཡོད་རེད་ལ། ང་ཚོ་སྐྱེས་བུ་རྣམ་ལྡན་ཡོངས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་གོ་སྟོན་གྱི་བརྟན་བཞུགས་འདི་ཚོགས་པ་སྐྱིད་སྡུག་ཁག་མང་པོ་ཞིག་གིས་ཕུལ་དང་འབུལ་མུས་ཡིན་པ་མ་ཟད། ང་ཚོ་མདོ་ཁམས་ཆུ་བཞི་སྒང་དྲུག་གི་ངོས་ནས་གཞིས་བྱེས་གཉིས་ཀྱི་ཚབ་ཞུས་ཏེ་༸མགོན་པོ་གང་ཉིད་མཆོག་སྐུ་ཚེ་བརྟན་པ་དང་། མཛད་འཕྲིན་རྒྱས་པ། ཐུགས་ཀྱི་དགོངས་བཞེད་མཐའ་དག་ལྷུན་གྱིས་འགྲུབ་པར་བརྟན་བཞུགས་བསྟར་འབུལ་ཞུས་པ་ཡིན། ཞེས་དང་། ༸གོང་ས་མཆོག་ལ་བརྟན་བཞུགས་བརྒྱ་དང་སྟོང་སོགས་ག་ཚོད་ཕུལ་རུང་། བཀའ་དགོངས་ལས་ལྷག་པ་ཞིག་མེད་པ་རེད། དེང་སང་བཀའ་དགོངས་འགྲུབ་དགོས་རེད་ཟེར་ནས་ཤོད་མཁན་མང་པོ་ཡོད་ཀྱང་། ནམ་ཞག་རྒྱུན་དུ་ནས་༸གོང་ས་མཆོག་གི་བཀའ་དགོངས་ཇི་ཙམ་འགྲུབ་ཀྱི་ཡོད་མེད་ངེད་གཉིས་ཀ་ལའང་དྲི་བ་རེད། དེར་བརྟེན་ཚང་མས་དགོངས་པ་བཞེས་དགོས་རྒྱུ་ཧ་ཅང་གིས་གལ་ཆེན་པོ་རེད། བོད་ནང་ཡོད་པའི་བོད་མི་ཚོ་བརྟན་བཞུགས་ལ་མི་དངོས་པོ་དང་རྒྱུ་དངོས་པོ་འདིར་ཡོང་ས་མེད་ཀྱང་། སྐུ་ཕྱྭའི་ཞབས་རིམ་དང་མ་ཎི་དུང་སྒྲུབ་གསོག་པའི་ཐོ་བརྒྱ་ཕྱག་དང་འབུམ་ཕྲག་བསགས་པ་སོགས་འབྱོར་བའི་སྐབས། དངོས་གནས་དྲང་གནས་ང་ཚོ་བཙན་བྱོལ་དུ་ཡོད་པའི་བོད་མི་རྣམས་ཀྱིས་དོན་དངོས་སུ་རྡོག་རྩ་གཅིག་སྒྲིལ་བྱ་རྒྱུ་དང་། ང་ཚོས་༸མགོན་པོ་གང་ཉིད་མཆོག་ལ་སྤྲེལ་ལད་ཙམ་མིན་པར་དོན་དངོས་སུ་ཁོང་གི་བཀའ་སློབ་དེ་དག་སྙིང་ལ་བཅངས་དགོས་པའི་དུས་ལ་སླེབས་འདུག ༸མགོན་པོ་གད་ཉིད་ཀྱིས་སྐྱིད་ན་སྐྱིད་མཉམ་དང་། སྡུག་ན་སྡུག་མཉམ་ཞེས་གསུངས་པ་ལྟར། ང་ལའང་འགན་འདུག་ལ། ཁྱེད་རང་ལའང་འགན་འདུག་བསམ་གྱི་ཡོད། ཅེས་བརྗོད་བྱུང་།
ཧི་མ་ལ་ཡའི་ནང་པའི་ཆོས་ཚོགས་ཀྱི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་མི་དགེ་བཤེས་མ་བསྟན་འཛིན་ལྷ་སྒྲོན་ལགས་ཀྱིས། ༸སྐུའི་གོ་སྟོན་དང་བྱམས་བརྩེའི་ལོ་སྲུང་གཙི་ཞུ་ཡི་ཡོད་པ་དང་བསྟུན། དེ་རིང་ཧི་མ་ལ་ཡའི་ནང་པའི་ཆོས་ཚོགས་ནས་རྒྱ་གར་གྱི་མངའ་སྡེ་བདུན་ནས་ཚོགས་བཅར་བ་ ༩༠༠ ཡས་མས་མཉམ་ཞུགས་གནང་ཡོད་ཅིང་། ༸གོང་ས་མཆོག་གི་འཛམ་གླིང་སྤྱི་ལ་སྨན་པའི་རླབས་ཆེན་གྱི་མཛད་རྗེས་མང་པོ་ཡོད་པ་རྣམས་ལ་བཀའ་དྲིན་རྗེས་དྲན་དང་ཐུགས་རྗེ་ལེགས་འབུལ་མཚོན་ཆེད། དེ་བཞིན་རྟེན་འབྲེལ་མཚོན་སླད་བརྟན་བཞུགས་བསྟར་འབུལ་ཞུས་ཡོད། ཅེས་དང་། ཧི་མ་ལ་ཡའི་ནང་པའི་ཆོས་རིག་འཛིན་སྐྱོང་ཚོགས་པ་དང་། རྒྱ་གར་ཧི་མ་ལ་ཡའི་དཔལ་ན་ལེཎྜའི་སྲོལ་རྒྱུན་ཚོགས་པ་ཟེར་བ་གཉིས་ཡོད་ལ། ༸མགོན་པོ་གང་ཉིད་ཀྱིས་ཕྱི་ལོ་ ༡༩༨༠ ཙམ་ནས་བཟུང་ཚོགས་པ་གཉིས་པོར་གཟིགས་པ་ཆེན་པོ་གནང་གི་ཡོད་པ་རེད། རྒྱུ་མཚན་ནི་གཙོ་བོ་རྒྱ་གར་ཧི་མ་ལ་ཡ་ཤར་མོན་དང་ནུབ་ལ་དྭགས་བར་དཔལ་ན་ལེཎྜའི་སྲོལ་རྒྱུན་དེ་ང་ཚོར་ལོ་ངོ་སྟོང་ཕྲག་སྔོན་ནས་དར་བ་དེ་ཉམས་པ་སླར་གསོ་དང་མི་ཉམས་གོང་འཕེལ་ཡོང་རྒྱུ་དང་། ༸གོང་ས་མཆོག་དུས་ནས་དུས་སུ་ས་གནས་ས་ཐོག་ཏུ་ཆིབས་བསྒྱུར་གནང་སྐབས། ཧི་མ་ལ་ཡའི་རི་རྒྱུད་ཁུལ་གྱིས་བཀའ་འགྱུར་དང་བསྟན་འགྱུར་རྣམས་མཆོད་གཤོམ་དུ་སྒྲིག་པ་ཙམ་མིན་པར། བཀའ་འགྱུར་བསྟན་འགྱུར་དེ་དག་སོ་སོའི་སློབ་དེབ་ཡིན་པ་བཞིན་པ་སློབ་གཉེར་གནང་དགོས་པ་དང་། སོ་སོའི་ཕྲུ་གུར་བོད་ཀྱི་སྐད་ཡིག་སློབ་ཁྲིད། དེ་བཞིན་རིག་གནས་ཆེ་ཆུང་རྣམས་བསླབ་པ་སློབ་གཉེར་བྱེད་དགོས་པ། ཁོར་ཡུག་སྲུང་སྐྱོབ་གནང་དགོས་གལ་ཆེ་སྐོར་སོགས་བཀའ་སློབ་རབ་དང་རིམ་པ་གནང་གི་ཡོད་པ་ཇི་བཞིན་ཚོགས་པ་ཁག་གིས་སྣེ་འཁྲིད་དེ་ས་གནས་ས་ཐོག་ཏུ་མི་མང་རྣམ་པས་འཛིན་སྐྱོང་གནང་རྒྱུ་གལ་ཆེན་ཡིན་སྐོར་འགྲེལ་བརྗོད་གནང་བྱུང་།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
