རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བརྒྱད་པའི་ཐོག་དམིགས་བསལ་ཆེད་མཁས་མི་སྣ་དང་ཨོ་གླིང་གི་ཆབ་སྲིད་པ། དེ་བཞིན་བོད་དོན་རྒྱབ་སྐྱོར་བ་སོགས་ཀྱིས་བོད་རྒྱལ་ཁབ་སླར་གསོ་ཡོང་ཐབས་དང་འབྲེལ་བའི་གཏམ་བཤད་དང་བགྲོ་གླེང་གནང་སྟེ་གྲོས་ཆོད་དོན་ཚན་ ༤ གཏན་འབེབས་གནང་འདུག
ཟླ་འདིའི་ཕྱི་ཚེས་ ༢༣ ནས་དེ་རིང་ཕྱི་ཚེས་ ༢༦ བར་ཉིན་གྲངས་བཞིའི་རིང་ཨོ་གླིང་གི་གྲོང་ཁྱེར་སིཌ་ནེ་ (Sydney) ཡི་ཉེ་འགྲེམ་རི་སྔོན་པོ་ (Blue Mountain) རུ། རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བརྒྱད་པ་འཚོགས་ཏེ་དེ་རིང་མཇུག་བསྡུས་ཡོད་པ་དང་། ཚོགས་ཆེན་འདིའི་ཐོག་ཨ་རི་དང་། སོག་པོ། རྒྱ་ནག ཐའེ་ཝན། ཉི་ཧོང་། རྒྱ་གར། ཤར་ཊུར་ཀི་སི་ཐན་སོགས་འཛམ་གླིང་གི་རྒྱལ་ཁབ་མི་འདྲ་བ་ ༡༢ ཀྱི་ཚོགས་མི་དང་ཚོགས་ཞུགས་པ་ ༡༠༠ ལྷག་མཉམ་ཞུགས་གནང་སྟེ། མཇུག་བསྡོམས་ཐོག་རྒྱ་ནག་གཞུང་གིས་བོད་མིའི་བདེན་པའི་འབོད་སྐུལ་རྩིས་མེད་གཏོང་བཞིན་ཡོད་པས་བོད་མིའི་སྒྲིག་འཛུགས་ལ་བོད་རིགས་ཡོངས་ལ་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་ཕྱིར་འཐེན་གནང་དགོས་པའི་འབོད་སྐུལ་ཞུ་རྒྱུ་དང་། བོད་རྒྱལ་ཁབ་ཀྱི་རྩ་ཁྲིམས་ཀྱི་ཟིན་བྲིས་”དེ་བཙན་བྱོལ་ནང་གི་ཚོགས་པ་ཡོངས་ཀྱིས་ཐུན་མོང་གིས་མངོན་འགྱུར་བྱེད་དགོས་པའི་རྩ་དོན་ཞིག་ཏུ་འགྱུར་བར་ཤུགས་སྣོན་རྒྱག་དགོས་པ་སོགས་ཀྱི་གྲོས་ཆོད་དོན་ཚན་ ༤ བཞག་འདུག
ཐེངས་འདིའི་ཚོགས་ཆེན་ཐོག་གཏམ་བཤད་པ་ཉི་ཧོང་གཙུག་ལག་སློབ་ཆེན་གྱི་སློབ་དཔོན་ཆེན་མོ་དང་ཉི་ཧོ་སྐུ་ཚབ་དོན་ཟུར་རྒྱ་རི་པདྨ་རྒྱལ་པོ་ལགས་དང་། ཉི་ཧོང་གཙུག་ལག་སློབ་ཆེན་དགེ་རྒན་འབུམ་རམས་པ་ཆོས་ལྡན་འབུམ་ལགས། ཨོ་གླིང་གི་གྲོས་ཚོགས་འཐུས་མི་ལྕམ་སྐུ་ཊི་རི་ཤི་ (Trish Doyle) ལགས། སིཌ་ནེ་གྲོང་སྡེའི་སྤྱི་ཁྱབ་སྐུ་ཞབས་མར་ཀི་ (Mark Greenhill) ལགས། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་བཀྲ་ཤིས་དར་རྒྱས་ལགས། ཡུ་གུར་གྱི་རང་དབང་གླེང་སྟེགས་ཀྱི་ཚོགས་གཙོ་སྐུ་ཞབས་ཨུ་མི་ཏི་ (Umit Hamit) ལགས་སོགས་ཀྱིས་མ་འོངས་པར་བོད་རྒྱལ་ཁབ་སླར་གསོ་གནང་ཐབས་སྐོར་ལ་གཏམ་བཤད་གནང་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་ཐེངས་འདིའི་ཚོགས་ཆེན་གོ་སྒྲིག་ཚོགས་ཆུང་གི་དྲུང་ཆེ་བསྟན་པ་དར་རྒྱས་ལགས་སུ་ཚོགས་ཆེན་གྱི་གལ་གནད་དང་ཚོགས་ཆེན་གྱི་བརྗོད་གཞི་སོགས་ཀྱི་སྐོར་དྲིས་པར་ཁོང་གིས། ཕྱི་ཟླ་ ༥ ཚེས་ ༢༣ ཉིན་རྒྱ་ནག་དམར་ཤོག་སྲིད་གཞུང་གི་དྲག་གནོན་འོག་ཆིངས་ཡིག་དོན་ཚན་བཅུ་བདུན་ཟེར་བའི་གྲོས་མཐུན་ཞིག་བཙན་གྱིས་བཞག་སྟེ་ལོ་ངོ་ ༧༥ འཁོར་བའི་ཉིན་མོ་ཡིན་པ་མ་ཟད། དོན་དངོས་སུ་བོད་རང་བཙན་ཡིན་པའི་གནས་བབ་ཡིག་ཐོག་ནས་ཤོར་བའི་ཉིན་མོའང་ཡིན་པར་སོང་། ད་ལན་རྒྱལ་སྤྱིའི་བོད་རང་བཙན་གྱི་ཚོགས་ཆེན་ཐེངས་བརྒྱད་པ་དེ་ཕྱི་ཚེས་ ༢༣ ནས་ ༢༦ བར་ཉིན་གྲངས་བཞིའི་རིང་འཚོགས་པ་རེད། ཚོགས་ཆེན་དེ་ནི་ཉིན་མོ་དེར་ངོ་རྒོལ་དང་། ལོ་རྒྱུས་ཀྱི་འཁྱོག་བཤད་ལ་བརྡ་ལན་སྤྲོད་ཆེད་དང་། མ་འོངས་བོད་རྒྱལ་ཁབ་སླར་གསོའི་འཆར་གཞི་གསར་བཟོ། ཡང་ན། དེ་སྔའི་བོད་རང་བཙན་གྱི་གནས་བབ་སླར་གསོ་གནང་ཐབས་སོགས་ལ་དམིགས་ཡོད། ཅེས་དང་། ཚོགས་ཆེན་ཐོག་བོད་ཀྱི་འདས་མ་ད་གསུམ་གྱི་ལོ་རྒྱུས་འཕེལ་རིམ་ལ་དབྱེ་ཞིབ་དང་། བོད་རྒྱལ་ཁབ་སླར་གསོའི་ཐབས་ཇུས་གསར་བཟོ། དེ་བཞིན་བོད་ཀྱི་མ་འོངས་ལས་འགུལ་ལ་ཁ་ཕྱོགས་གསར་པ་སྟོན་པ་སོགས་ཀྱི་བརྗོད་གཞིའི་ཐོག་གྲོས་བསྡུར་གནང་བ་མ་ཟད། ཚོགས་ཞུགས་པ་རྣམས་དང་དམིགས་བསལ་ཆེད་མཁས་མི་སྣ། གནས་བཞུགས་རྒྱལ་ཁབ་ཀྱི་ཆབ་སྲིད་པ་དང་། བོད་དོན་རྒྱབ་སྐྱོར་བ་སོགས་ཀྱིས་བོད་རང་བཙན་སླར་གསོ་དང་འབྲེལ་ནས་གཏམ་བཤད་དང་ཆེད་རྩོམ་སྒྲོག་སྦྱངས། བགྲོ་གླེང་ལྷུག་པོ་གནང་ཡོད་སྐོར་སོགས་བརྗོད་བྱུང་།
དེ་རིང་ཕྱི་ཚེས་ ༢༦ ཉིན་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བརྒྱད་པ་མཇུག་བསྒྲིལ་བ་དང་བསྟུན། ཚོགས་ཆེན་ཐེངས་བརྒྱད་པའི་ཐོག་གྲོས་ཆོད་དོན་ཚན་བཞི་གཏན་འབེབས་གནང་ཡོད་ནི། དང་པོ། འདས་ཟིན་པའི་ལོ་རྒྱུས་ནང་གི་མེས་པོ་རྣམས་ཀྱི་བྱས་རྗེས་ལུང་འདྲེན་གྱིས་དེའི་བཀའ་དྲིན་རྗེས་དྲན་གྱི་ལས་འགུལ་འདྲ་མིན་བརྒྱུད། ལོ་རྒྱུས་ཀྱི་གོ་རྟོགས་མཐོར་འདེགས་གཏོང་བ་དང་ཆབས་ཅིག་བོད་མི་ནང་ཁུལ་མ་འཆམ་པ་དེ་རྒྱལ་ཁབ་ཤོར་རྐྱེན་གཙོ་བོ་ཞིག་ཏུ་གྱུར་ཡོད་པ་ངོས་འཛིན་ཐོབ་པའི་སྒོ་ནས་བོད་མི་ནང་ཁུལ་འཆམ་མཐུན་ཡོང་བར་ཤུགས་སྣོན་རྒྱག་དགོས་པ།
གཉིས་པ། གྲོས་མཐུན་དོན་ཚན་བཅུ་བདུན་དེ་ནུས་མེད་ཁྲིམས་འགལ་ཡིན་པ་ཁུངས་སྐྱེལ་ཡིག་ཆ་དང་བཅས་ཡིག་རིགས་འདྲ་མིན་ཐོག་བོད་ཕྱི་ནང་ཀུན་ལ་ཁྱབ་བརྡལ་དུ་གཏོང་དགོས་པ་དང་། རྒྱ་ནག་གཞུང་གིས་གྲོས་མཐུན་ཡིག་ཆ་དེའི་ནང་གི་དོན་ཚན་གཅིག་ཀྱང་ལག་བསྟར་བྱེད་བཞིན་མེད་པར་མ་ཟད། དེ་ལས་ལྡོག་ནས་བོད་མི་ས་ཡ་གཅིག་ལྷག་ཙམ་གྱི་ཚེ་སྲོག་འཕྲོག་ཡོད་པའི་ཁར། བོད་ཀྱི་སྐད་དང་ཡི་གེ ཆོས་དང་རིག་གཞུང་། ཐོན་ཁུངས་ཁོར་ཡུག་བཅས་ལ་ཚད་ལས་བརྒལ་བའི་གཏོར་བརླག་འཕྲོག་བཅོམ་བཏང་ཡོད་པ་དང་། དུས་ད་ལྟའང་བོད་ཕྱི་ནང་གི་སྐྱོན་བརྗོད་དང་སེམས་ཁྲལ་སྣང་མེད་དུ་བཏང་སྟེ། མུ་མཐུད་དུ་ཡ་ང་ཞིང་གདུག་རྩུབ་ཆེ་བའི་མི་སེར་སྤེལ་ཡུལ་རང་བཞིན་གྱི་དབང་བསྒྱུར་ལ་བརྟེན་ནས་བོད་རྩ་མེད་དུ་གཏོང་བཞིན་ཡོད་པར་མུ་མཐུད་དུ་ངོ་རྒོལ་ཐེར་འདོན་བྱེད་དགོས་པ།
གསུམ་པ། རྒྱ་ནག་གཞུང་གིས་བོད་གཞུང་དམངས་ཀྱི་དྲང་བདེན་འབོད་སྐུལ་རྩིས་མེད་དུ་གཏོང་བཞིན་ཡོད་པ་དང་། རྒྱ་གཞུང་ལ་ཡིད་ཆེས་བྱེད་དཀའ་བ་སོགས་རྒྱུ་མཚན་དུ་དྲངས་ཏེ། བཙན་བྱོལ་བོད་གཞུང་དང་གྲོས་ཚོགས་ཀྱིས་བཙན་བྱོལ་བོད་གཞུང་གི་ལངས་ཕྱོགས་ཏེ། “བོད་རིགས་ཡོངས་ལ་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་”དེ་ཕྱིར་འཐེན་གྱིས་རྒྱལ་ཁབ་སླར་གསོ་བྱེད་དགོས་པ་ཡོངས་གྲགས་སུ་བཟོ་དགོས་པ་བཙན་བྱོལ་བོད་གཞུང་ལ་འབོད་སྐུལ་བྱེད་དགོས་པ།
བཞི་པ། “བོད་རྒྱལ་ཁབ་ཀྱི་རྩ་ཁྲིམས་ཀྱི་ཟིན་བྲིས་”དེ་བཙན་བྱོལ་སྤྱི་ཚོགས་ཀྱི་དམངས་ཁྲོད་ཚོགས་པ་ཡོངས་ཀྱི་ཐུན་མོང་གིས་མངོན་འགྱུར་བྱེད་དགོས་པའི་རྩ་དོན་ཞིག་ཏུ་འགྱུར་བར་ཤུགས་སྣོན་རྒྱག་དགོས་པ་དང་། དེའི་ཆེད་དུ་གྲོས་མོལ་བགྲོ་གླེང་བྱེད་དགོས་པ་བཅས་བཀོད་འདུག་
འདས་ལོའི་ཕྱི་ཟླ་ ༧ ཚེས་ ༡༣ ནས་ ༡༥ བར་ཉིན་གསུམ་གྱི་རིང་ཁེ་ན་ཌའི་གྲོང་ཁྱེར་ཊོ་རོན་ཊོ་ (Toronto) རུ་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བདུན་པ་འཚོགས་ཡོད་ཅིང་། སྐབས་དེར་བོད་རང་བཙན་གྱི་ཚོགས་པ་གསར་འཛུགས་གནང་དགོས་མིན་དང་། བོད་མིའི་སྒྲིག་འཛུགས་ཀྱི་ངོས་ནས་ཀྱང་དབུ་མའི་ལམ་གྱི་སྲིད་ཇུས་ལ་བསྐྱར་ཞིབ་གནང་དགོས་པ། ཡང་ན། བོད་རང་བཙན་གྱི་སྲིད་ཇུས་འཛིན་པའི་དུས་ལ་བབ་ཡོད་མིན་སོགས་ཀྱི་བརྗོད་གཞིའི་ཐོག་གྲོས་བསྡུར་གནང་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
