དེ་རིང་༸གོང་ས་མཆོག་གིས་སྐབས་བཅུ་དྲུག་པའི་བཀའ་ཤག་ལ་འཐོན་མཇལ་བསྩལ་བ་དང་བཀའ་ཤག་གིས་ལོ་ལྔའི་རིང་གི་ལས་བསྡོམས་སྙིང་བསྡུས་ཤིག་ཡར་གཟིགས་འབུལ་ཞུས་འདུག
དེ་རིང་ཕྱི་ཚེས་ ༢༦ ཉིན་བཞུགས་སྒར་རྒྱལ་བའི་ཕོ་བྲང་ནས་༸གོང་ས་རྒྱལ་བ་རིན་པོ་ཆེ་མཆོག་གིས་སྐབས་བཅུ་དྲུག་པའི་སྲིད་སྐྱོང་དང་ནང་ཆོས་འཕྲོད་གསུམ་གྱི་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་དང་བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག དེ་བཞིན། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་ལ་ལས་ཉིན་མཐའ་མའི་ཉིན་འཐོན་མཇལ་དང་བཀའ་སློབ་བསྩལ་འདུག
སྐབས་དེར་༸གོང་ས་རྒྱལ་བ་རིན་པོ་ཆེ་མཆོག་གིས། ང་ཚོ་བོད་ནས་ཚུར་འཕོས་ནས་རྒྱ་གར་ལ་ལོ་ཡུན་འདི་ཙམ་ཕྱིན་པ་རེད། དངོས་གནས་བོད་རྒྱ་ཆེ་མི་མང་གི་བློ་གཏད་ས་ཤིག་དང་། གཞན་དག་ཕར་བཞག་ནས་བོད་ཐོག་དོ་སྣང་བྱེད་མཁན་གྱི་རྒྱ་རིགས་ཚོས་ཀྱང་བློ་གཏད་ནས་བསྡད་ཡོད། ང་ཚོས་འདིར་ཚོད་ཟིན་ནས་བོད་ཀྱི་ཆོས་དང་རིག་གཞུང་དང་འབྲེལ་བའི་བོད་མི་རིགས་ཀྱི་ལྟེ་གནས་དང་། བོད་ཀྱི་ཆོས་དང་རིག་གཞུང་བདག་པོ་རྒྱག་མཁན་གྱི་ལྟེ་གནས་གྱོང་ཐག་ཆོད་འདུག་བསམ་པ་རྒྱ་མིས་མཐོང་གི་ཡོད། ད་ཡག་པོ་ཞེ་དྲགས་འདུག ཐུགས་རྗེ་ཆེ་ཞེས་གསུངས།
འདི་གའི་གསར་འགོད་པར་སྲིད་སྐྱོང་སྤེན་པ་ཚེ་རིང་མཆོག་གིས། དེ་རིང་བཀའ་ཤག་སྐབས་བཅུ་དྲུག་པའི་ལས་ཉིན་མཐའ་མ་ཆགས་ཀྱི་ཡོད། དེར་བརྟེན། དེ་རིང་༸གོང་ས་རྒྱལ་བ་རིན་པོ་ཆེ་མཆོག་ལ་འཐོན་མཇལ་ཞིག་ཞུས་དང་ལྷན་དུ། འདས་པའི་ལོ་ལྔའི་རིང་གི་བཀའ་ཤག་སྐབས་བཅུ་དྲུག་པའི་ལྷན་ཁང་རེ་རེ་ཡི་ལས་བསྡོམས་སྙིང་བསྡུས་ཤིག་ཡར་ཕུལ་བའི་གོ་སྐབས་བྱུང་སོང་། ༸གོང་ས་མཆོག་ནས་བཙན་བྱོལ་ནང་དུ་ང་ཚོའི་ཆོས་དང་རིག་གཞུང་མི་ཉམས་རྒྱུན་འཛིན་བྱེད་པར་བོད་ནང་གི་བོད་མི་ཚོས་ཀྱང་རེ་བ་བརྒྱབ་བསྡད་ཡོད་སྐོར་གྱི་བཀའ་སློབ་བསྩལ་བ་དང་ལས་བསྡོམས་ཐད་ཐུགས་རྗེ་ཆེ་ཞེས་ནམ་རྒྱུན་ནས་བཀའ་གནང་བ་བཞིན་རེད། དེ་དང་མཉམ་དུ་སང་ཉིན་སྲིད་སྐྱོང་གི་དམ་འབུལ་ཡིན་པ་དང་བཀའ་ཤག་ལ་འགྱུར་བ་འགྲོ་བའི་དུས་ཚོད་ཅིག་བསླེབས་བསྡད་ཡོད་པར་ཐུགས་སྨོན་སྐྱབས་འཇུག་གནང་རོགས་ཞུས་པ་ཡིན། དེ་ནས་༸གོང་ས་མཆོག་གིས་བཀའ་བློན་རྣམ་པ་རེ་རེར་སྒྲོལ་མའི་ཞལ་ཐང་རེ་དང་ཐུབ་པའི་སྐུ་རེ་བཅས་ཕྱག་བསྩལ་གནང་སོང་། ཞེས་གསུངས་སོང་།
བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། དེ་རིང་ནི་ང་ཚོའི་ཉི་མ་མཐའ་མ་ཆགས་ཀྱི་ཡོད། སྲིད་སྐྱོང་མཆོག་དང་ང་ཚོ་བཀའ་བློན་ཚོས་ལོ་ལྔའི་རིང་གི་ལས་ཡུན་གྲུབ་སྟེ། མཐའ་མར་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་རྒྱུ་བྱུང་། དཔལ་ལྡན་སྲིད་སྐྱོང་མཆོག་གིས་ལས་བསྡོམས་སྙིང་བསྡུས་ཤིག་ཡར་ཕུལ་རྒྱུ་བྱུང་སོང་། ཞེས་དང་། སྤྱི་ཡོངས་ནས་༸གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་ནང་གི་བོད་མི་ཚོས་ཀྱང་ཚུར་རེ་བ་བྱས་ནས་ལྟ་ས་ཡོད་པའི་སྒྲིག་འཛུགས་ཤིག་ (བོད་མིའི་སྒྲིག་འཛུགས་) ཡོད་པ་དེ་གལ་ཆེན་པོ་ཡིན་པ་ང་ཚོ་ཚང་མས་མཁྱེན་དགོས་པ་དང་བཀའ་སློབ་ནང་དུའང་དེ་གསལ་བོ་བྱས་ནས་ཡང་བསྐྱར་ཕེབས་སོང་། ཞེས་གསུངས་སོང་།
ཡང་ལོ་ལྔའི་མྱོང་ཚོར་སྐོར་ལ་ཁོང་གིས། ང་ཚོ་ཚང་མར་ལས་འབྲེལ་གྱི་ཐོག་ནས་ཉམས་མྱོང་མི་འདྲ་བ་རེ་ཡོད་ཀྱང་། སྤྱིའི་ཆ་ནས་ང་ཚོ་ཐོག་མར་དམ་བཅའ་ཕུལ་བར་ཡོང་བའི་སྐབས་སུ། སྟབས་མ་ལེགས་པ་ཞིག་ལ་ང་ཚོའི་སྤྱི་ཚོགས་གང་འཚམ་འཁྲུག་བསྡད་པའི་གནས་སྟངས་ཤིག་ཏུ་ལྷུང་ཡོད། དེ་རིང་ང་ཚོ་མར་ཐོན་པའི་སྐབས་སུ་བོད་མིའི་སྒྲིག་འཛུགས་ཀྱི་ཀ་བ་གསུམ་ཆ་ཚང་བསྡད་ཡོད་པ་ནི་བཀྲ་ཤིས་པའི་རྟེན་འབྲེལ་རེད་ལ། ང་ཚོ་གསུམ་དགའ་པོ་བྱུང་། དེའི་ནང་ནས་ལོ་རྒྱུས་ནང་བུད་མེད་གསུམ་བཀའ་བློན་དུ་བསྐོ་གཞག་བྱུང་བ་རེད། སྤྱིར་བཏང་བཀའ་ཤག་ནང་བུད་མེད་གསུམ་བསླེབས་པ་ཉུང་ཉུང་ཡིན་ས་རེད། དེའི་ནང་ནས་ཀྱང་གསུམ་ཆ་གཉིས་བུད་མེད་ཡིན་པའི་དུས་འདི་མི་འདྲ་བ་ཞིག་རེད། རང་ཉིད་ལ་མཚོན་ན་མཉམ་རུབ་ཀྱི་ནུས་པ་འདོན་ཐུབ་པ་དང་ཉམས་མྱོང་ཡང་རག་སོང་། ཞེས་གསུངས་སོང་།
སྤྱིར་སྐབས་བཅུ་དྲུག་པའི་བཀའ་ཤག་གི་དམ་འབུལ་དེ་ཕྱི་ལོ་ ༢༠༢༡ ཟླ་ ༥ ཚེས་ ༢༧ ཉིན་སྤེན་པ་ཚེ་རིང་མཆོག་གིས་སྲིད་སྐྱོང་གི་ལས་འཁུར་དམ་འབུལ་ཞུས་པ་ནས་མགོ་བཙུགས་ཡོད་ཅིང་། སང་ཉིན་སྟེ། ཕྱི་ལོ་ ༢༠༢༦ ཟླ་ ༥ ཚེས་ ༢༧ ཉིན་སྐབས་བཅུ་བདུན་པའི་བཀའ་ཤག་གམ་བོད་མིའི་སྒྲིག་འཛུགས་ཀྱི་འདེམས་ཐོན་སྲིད་སྐྱོང་སྤེན་པ་ཚེ་རིང་མཆོག་གིས་སླར་ཡང་ལས་འཁུར་དམ་འབུལ་ཞུ་གཏན་ཁེལ་ཡོད་ལ། ཕྱི་ཟླ་ ༥ ཚེས་ ༣༠ ཉིན་སྐབས་ ༡༨ འདེམས་ཐོན་སྤྱི་འཐུས་རྣམས་ཀྱིས་ཚོགས་དྲུང་ལས་ཁུངས་སུ་འབྱོར་ཐོ་འགོད་རྒྱུ་དང་། ཕྱི་ཚེས་ ༣༡ ཉིན་ཁྲིམས་ཞིབ་པ་ཆེ་བའི་མདུན་ནས་བར་བར་བརྒལ་ཚོགས་གཙོས་དམ་འབུལ་ཞུས་གྲུབ་མཚམས། བར་བརྒལ་ཚོགས་གཙོའི་མདུན་ནས་འདེམས་ཐོན་སྤྱི་འཐུས་རྣམས་ཀྱིས་དམ་འབུལ་ཞུ་རྒྱུ་དང་། ཕྱི་ཟླ་ ༦ ཚེས་ ༡ ཉིན་ཁྲིམས་ཞིབ་པ་ཆེ་བའི་མདུན་དུ་སྤྱི་འཐུས་ཚོགས་གཙོ་གཞོན་གཉིས་ཀྱིས་དམ་འབུལ་ཞུ་རྒྱུ་ཡིན་འདུག
གསར་འགོད་པ། སྐལ་བཟང་སྦྱིན་པ།
