དེ་རིང་བལ་ཡུལ་གྱི་དགོན་སྡེ་ཁག་གཉིས་ཀྱི་གཞི་རྩའི་ཐོབ་ཐང་འཕྲོག་པའི་གནད་དོན་དང་འབྲེལ་ནས་སྔོན་འགྲོའི་ཉན་ཞིབ་སྐབས། བོད་མིའི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པས། དབུས་འོས་བསྡུ་ལས་ཁང་གིས་ས་གནས་སུ་ཚོགས་ཆུང་དམིགས་བསལ་ཞིག་བཙུགས་ཡོད་ཅེས་བཀའ་མོལ་གསུངས་ཡོད་ཀྱང་། ས་གནས་སུ་དངོས་སུ་ཕྱིན་ནས་ཞིབ་འཇུག་བྱས་པ་བརྒྱུད་ས་གནས་དང་རང་བདེན་ཚོགས་ཆུང་སོགས་ལ་དེའི་ཐོག་བཀའ་མོལ་གཅིག་ཀྱང་བྱུང་མེད་པའི་གསལ་འདེབས་གནང་སོང་།
དེ་རིང་ཕྱི་ཟླ་ ༦ ཚེས་ ༩ ཉིན་གྱི་སྔ་དྲོའི་ཆུ་ཚོད་ ༡༠།༣༠ ཐོག་ཆེས་མཐོའི་ཁྲིམས་ཞིབ་ཁང་དུ། ཤྲཱི་སེང་གེ་བྲག་ངེས་དོན་བདེ་ཆེན་འོད་གསལ་གླིང་དགོན་པ་དང་ཤྲཱི་སེངྒེ་བྲག་ཤར་སྦག་ཁང་དོན་གྲུབ་ལྡིང་དགོན་པ་གཉིས་ཀྱི་གཞི་རྩའི་ཐོབ་ཐང་འཕྲོག་པའི་གནད་དོན་དང་འབྲེལ་ནས་སྔོན་འགྲོའི་ཉན་ཞིབ་འཚོགས་སོང་བ་དང་། སྐབས་དེར་བོད་ཀྱི་ཁྲིམས་ལུགས་རིག་པ་བའི་ཚོགས་པས་བདེ་སྙན་སེངྒེ་ཤེས་རབ་ཀྱི་ངོ་ཚབ་གནང་སྟེ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་། ཁྲིམས་ཞིབ་པ་གཞན་གཉིས་ཀྱི་མདུན་ནས་བདེ་སྙན་གྱི་གནད་དོན་ཐོག་གསལ་བཤད་དང་ལན་འདེབས་གནང་སོང་། ད་ལྟའི་ཆར་ཁྲིམས་ཞིབ་ཁང་ནས་བདེ་སྙན་གྱི་གནད་དོན་དང་འབྲེལ་ནས་ལན་འདེབས་དང་ཐག་གཅོད་གང་ཡང་གནང་མེད།
སྔོན་འགྲོའི་ཉན་ཞིབ་གྲུབ་མཚམས་སུ་བོད་ཀྱི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་བྱམས་པ་དབང་ཕྱུག་ལགས་ཀྱིས་གསར་འགོད་པར་བརྗོད་དོན། ཁ་སང་དགོན་སྡེ་ཁག་གཉིས་ཀྱི་བདེ་སྙན་ཕུལ་བ་རེད། བདེ་སྙན་ (Writ Petition) ཕུལ་བའི་སྔོན་འགྲོའི་ཉན་ཞིབ་དེ་རིང་འཚོགས་པ་རེད། དེ་རིང་ང་ཚོས་ཞུ་དགོས་པ་གཙོ་བོ་དེ་ང་ཚོའི་ཞུ་སྦྱོར་བའི་ཁ་མཆུའི་ནང་གཙོ་བོ་གཞི་རྩའི་ཐོབ་ཐང་འཕྲོག་ཡོད་མེད་དང་འབྲེལ་ནས་འགྲེལ་བརྗོད་རྒྱས་ཤིང་རྒྱས་པ་བྱས་པ་རེད། ཉན་ཞིབ་དེ་ངོས་ལེན་བྱེད་མིན་ཁྲིམས་ཞིབ་ཁང་ནས་ལན་འབྱོར་གྱི་རེད་བསམ་གྱི་འདུག ད་ལྟ་ཁ་མཆུ་ཨང་ ༢༢ དེ་ངོས་ལེན་བྱས་པ་རེད། བདེ་སྙན་དང་ཁ་མཆུ་ཨང་ ༢༢ གཉིས་པོ་དེ་འབྲེལ་བ་ཆགས་ཀྱི་མེད། སྤྱིར་བཏང་གཞི་རྩའི་ཆ་ནས་མཚོན་པ་ཡིན་ན། དགོན་སྡེ་ཁག་གཉིས་མཆོད་འཇོར་ཁོངས་སུ་སླེབས་ཀྱི་ཡོད་པ་རེད། འོན་ཀྱང་། ད་ལྟ་ཁ་མཆུ་ཨང་ ༢༢ ནང་མི་མང་ཁག་ཅིག་དང་དགོན་སྡེ་ཁག་དྲུག་ལབ་པ་དེའི་ནང་ལ་ཚུད་ཀྱི་མེད་པ་རེད།
དེ་རིང་ཉན་ཞིབ་འཚོགས་པའི་དགོས་དམིགས་གཙོ་བོ་དང་། ཁ་མཆུ་ཨང་ ༢༢ དང་བདེ་སྙན་བར་གྱི་ཁྱད་པར་གཙོ་བོ་ནི། ཁ་མཆུ་ཨང་ ༢༢ དེ་སྤྱིར་བཏང་གི་ཁ་མཆུ་འགྲོ་སྟངས་ཤིག་རེད་ལ་དེ་གཞིར་བཟུང་བྱས་ནས་འགྲོ་ཡི་ཡོད་རེད། ད་ལྟ་བདེ་སྙན་དེ་སྤྱི་མང་གཏུག་གཤེར་གྱི་དོན་ཚན་དྲུག་ཅུ་རེ་དགུའི་ནང་། གཞི་རྩའི་ཐོབ་ཐང་ལག་བསྟར་ཡོང་བའི་བདེ་སྙན། གལ་སྲིད་དོ་བདག་མི་གཅིག་དང། སྡེ་ཚན་གཅིག་ཡིན་རུང་དེའི་ནང་གི་གཞི་རྩའི་ཐོབ་ཐང་འཕྲོག་པ་ཡིན་ན། བདེ་སྙན་ཕུལ་དགོས་ཡོད། རྒྱ་གར་གྱི་ཁྲིམས་གཞིར་བཟུང་བྱས་པ་ཡིན་ན། (Writ Petition) ལབ་ཀྱི་ཡོད་པ་རེད། ཅེས་དང་། བལ་ཡུལ་གྱི་སྔོན་འགྲོའི་འོས་བསྡུ་བྱས་པ་དེ་ཚགས་ཚུད་པོ་ཞིག་ཡིན་པར་ངོས་འཛིན་བྱེད་ཀྱི་ཡོད། དེ་བཞིན་དབུས་འོས་བསྡུ་ལས་ཁང་ནས་བཏོན་པའི་དོན་ཚན་བརྒྱད་ལ་ང་རང་ཚོས་ངོས་ལེན་མེད། དེ་རིང་གི་ཉན་ཞིབ་ནང་གནད་དོན་གཙོ་བོ་དོན་ཚན་བརྒྱད་ལ་ངོས་ལེན་མེད་པ་དེ་རེད། ང་ཚོས་དཔང་རྟགས་ (Evidence) མང་པོ་ཞིག་ཕུལ་ཡོད། དཔང་རྟགས་དེའི་ནང་ནས་གལ་ཆེ་ཤོས་དེ་དབུས་འོས་བསྡུ་ལས་ཁང་གིས་གསུངས་པའི་དོན་ཚན་ཁག་ཁ་ཤས་ཡོད་པ་དང་། ས་གནས་སུ་ཚོགས་ཆུང་དམིགས་བསལ་ཞིག་བཙུགས་ཡོད་ཅེས་བཀའ་མོལ་གསུངས་ཡོད་ཀྱང་། ང་ཚོས་ས་གནས་སུ་དངོས་སུ་ཕྱིན་ནས་ཞིབ་འཇུག་བྱས་པ་བརྒྱུད་ས་གནས་དང་རང་བདེན་ཚོགས་ཆུང་དེ་ཚོ་ལ་དེའི་ཐོག་ལ་བཀའ་མོལ་གཅིག་ཀྱང་བྱུང་མེད་པ་གསལ་པོ་རེད་འདུག ཅེས་འགྲེལ་བརྗོད་གནང་བྱུང་།
ད་ལན་གྱི་ཉན་ཞིབ་ཐོག་བོད་མིའི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་རིན་ཆེན་དབང་རྒྱལ་ལགས་ཀྱིས། འདི་ལོའི་ཕྱི་ཟླ་ ༤ ཚེས་ ༢༣ ཉིན་དབུས་འོས་བསྡུ་ལས་ཁང་ནས་བཏོན་པའི་སྐྱོན་གནད་དོན་ཚན་བརྒྱད་ལ་ངོས་ལེན་མེད་པ་མ་ཟད། ཕྱི་ཟླ་ ༥ ཚེས་ ༥ ཉིན་དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་མཆོག་གིས་གསར་འགོད་པར་ལན་འདེབས་གསལ་བཤད་གནང་བའི་སྐབས། ས་གནས་སུ་ཚོགས་ཆུང་དམིགས་བསལ་ཞིག་བཙུགས་ཡོད་ཅེས་བཀའ་མོལ་གསུངས་ཡོད་ཀྱང་། དོན་དངོས་སུ་ང་ཚོས་ས་གནས་སུ་ཞིབ་འཇུག་དང་འདྲི་བརྩད་བྱེད་པར་ཕྱིན་ཏེ། ས་གནས་ས་ཐོག་ཏུ་ས་གནས་འཐུས་ཚོགས་དང་། ས་གནས་རང་བདེན་ཚོགས་ཆུང་དེ་ཚོ་ལ་གནད་དོན་དེའི་ཐོག་བཀའ་མོལ་གཅིག་ཀྱང་བྱུང་མེད་པ་ཁ་གསལ་རེད་འདུག་ལ། བརྒྱུད་རིམ་དེ་དག་ལ་བལྟས་པ་ཡིན་ན། སྔོན་འགྲོའི་འོས་བསྡུའི་སྐབས་ལ་བྱུང་བའི་གནས་བབ་ཅིག་དངོས་གཞིའི་འོས་བསྡུ་ལ་དོ་ཕོག་མི་བྱུང་བའི་སྔོན་འགོག་བྱས་པ་ཞིག་ཆགས་ཀྱི་ཡོད་པ་དང་། ཡུལ་ཁྲིམས་དང་རྒྱལ་སྤྱིའི་ཁྲིམས་དང་འགལ་གྱི་ཡོད་པ་རེད། དེར་བརྟེན། མ་འོངས་པར་བོད་མིའི་སྒྲིག་འཛུགས་ཀྱི་གནས་བབ་དང་། Legitimacy གནས་སྟངས་ག་རེ་ཆགས་ཀྱི་ཡོད་པ། ཕྱི་ཟླ་ ༤ ཚེས་ ༢༣ ཉིན་གྱི་ཐག་གཅོད་དེ་ཁྲིམས་འགལ་ཡིན་ན། དེའི་རྗེས་ཀྱི་ཐག་གཅོད་རྣམས་ཁྲིམས་འགལ་ཆགས་ཀྱི་ཡོད་པ་དང་། ཕྱི་ཟླ་ ༥ ཚེས་ ༡ ཉིན་དབུས་འོས་བསྡུ་ལས་ཁང་ནས་མཆོད་འཇོག་ས་གནས་མི་མང་ལ་འོས་བླུགས་ཆོག་པའི་ཐོབ་ཐང་སྤྲད་པ་དེས་གོང་གི་སྐྱོན་གནད་དོན་ཚན་བརྒྱད་དེ་རང་བཞིན་གྱིས་ནུས་མེད་ཆགས་ཀྱི་ཡོད་པ་དང་། དེའི་རྗེས་ཀྱི་བྱ་རིམ་རྣམས་ཁྲིམས་ཀྱི་འགལ་འཛོལ་ཤོར་བ་ཞིག་ཡིན་སྐོར་སོགས་འགྲེལ་བརྗོད་གནང་སོང་། ཕྱི་ཟླ་ ༥ ཚེས་ ༡ ཉིན་དབུས་འོས་བསྡུ་ལས་ཁང་གིས་མཆོད་འཇོར་ས་གནས་འོས་བསྡུ་འགན་འཛིན་ལས་རོགས་སུ་ཡིག་ཆུང་ཞིག་བསྐུར་བའི་ནང་། མཆོད་འཇོར་ས་གནས་སུ་དངོས་གཞིའི་འོས་བསྡུ་བྱ་རྒྱུའི་ཐག་གཅོད་ཞུས་པ་ལྟར། འདི་ནས་ཀ་ཐ་མན་གྲུ་ས་གནས་འོས་བསྡུའི་འགན་འཛིན་གྱི་ཐད་ཀར་སྟངས་འཛིན་འོག་དེ་གའི་འོས་བསྡུའི་ཚོགས་ཆུང་གི་ཚོགས་མི་དང་ཟུར་དཔང་ཐོག ས་གནས་འོས་བསྡུའི་འགན་འཛིན་ལས་རོགས་འཕར་མ་བསྐོ་གཞག་ཞུས་པའི་བཀོད་རྒྱ་སོང་བ་ལྟར། ད་ལན་ས་གནས་སུ་དངོས་གཞིའི་འོས་བསྡུའི་སྐབས་སྐུ་ཉིད་ནས་ས་གནས་འོས་བསྡུའི་འགན་འཛིན་ལས་རོགས་ཀྱི་འགན་འཁུར་ཞུ་མ་དགོས་པའི་ཐག་གཅོད་ཞུས་པ་དེ་དོན་དགོངས་འཇགས་ཞུ། ཞེས་གསལ་འདུག
འདི་ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་སྐབས་བལ་ཡུལ་མཆོད་འཇོར་ཁུལ་གྱི་འོས་བསྡུ་ཚགས་ཚུད་མ་བྱུང་བའི་ལབ་གླེང་ཞུ་གཏུག་བྱུང་བ་ལྟར། དབུས་འོས་བསྡུ་ལས་ཁང་གིས་འབྲེལ་ཡོད་ལ་འདྲི་བརྩད་དང་འོས་ཤོག་ལ་ཞིབ་འཇུག་གནང་བ་བརྒྱུད། ཕྱི་ཟླ་ ༤ ཚེས་ ༢༣ ཉིན་མཆོད་འཇོར་ས་གནས་འོས་བསྡུའི་འགན་འཛིན་ལས་རོགས་ཀྱི་མིང་ཐོག་ཏུ་ཐག་གཅོད་ཡི་གེ་ཞིག་བཏང་སྟེ། འོས་བསྡུའི་སྒྲིག་གཞིའི་དགོངས་དོན་ཁག་དང་འགལ་འཛོལ་ཚབས་ཆེན་བྱུང་ཡོད་པ་ར་འཕྲོད་བྱུང་བ་གཞིར་བཟུང་མཆོད་འཇོར་ས་གནས་ལ་དངོས་གཞིའི་འོས་བསྡུ་ཐེངས་གཅིག་ཕྱིར་འཐེན་ཞུ་རྒྱུའི་ཐག་གཅོད་གནང་བ་ཡིན་སྐོར་བཀོད་ཡོད་པ་རེད། གནད་དོན་དེ་དང་འབྲེལ་ནས་ཕྱི་ཟླ་ ༥ ཙེས་ ༥ ཉིན་གྱི་ཉིན་རྒྱབ་ཏུ་བལ་ཡུལ་ནས་ཕེབས་པའི་བློ་བཟང་ཚེ་རིང་ལགས་ཀྱིས་བོད་མིའི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་བརྒྱུད་བལ་ཡུལ་མཆོད་འཇོར་མི་མང་ལ་དངོས་གཞི་འོས་བསྡུའི་ཐོབ་ཐང་འཕྲོག་པའི་གནད་དོན་དང་འབྲེལ་ནས་དབུས་འོས་བསྡུ་ལས་ཁང་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུགས་བྱས། ཕྱི་ཚེས་ ༧ ཉིན་ཁྲིམས་གཏུགས་ངོས་བཞེས་ཀྱིས་ཁ་མཆུ་ཨང་ ༢༢ པར་ངོས་བཞེས་དེབ་འགོད་གནང་། ཕྱི་ཚེས་ ༨ ཉིན་ཞུ་སྦྱོར་བས་བཙན་བྱོལ་བོད་མིའི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་དོན་ཚན་ ༧༦ པའི་དགོངས་དོན་བར་བརྒལ་གྱི་བཀའ་ཁྱབ་གཏོང་གནང་ཡོང་བའི་སྙན་ཞུ་ཕུལ་འདུག་ཀྱང་ངོས་བཞེས་གནང་མེད་པ་རེད།
འདི་ལོའི་ཕྱི་ཟླ་ ༤ ཚེས་ ༢༣ ཉིན་དབུས་འོས་བསྡུ་ལས་ཁང་གིས་མཆོད་འཇོར་ས་གནས་འོས་བསྡུའི་འགན་འཛིན་ལས་རོགས་ཀྱི་མིང་ཐོག་ཏུ་ཐག་གཅོད་ཡི་གེ་ཞིག་བཏང་བའི་ནང་དུ། འོས་བསྡུའི་སྒྲིག་གཞིའི་དགོངས་དོན་ཁག་དང་འགལ་འཛོལ་ཚབས་ཆེན་བྱུང་ཡོད་པ་ར་འཕྲོད་བྱུང་བ་གཞིར་བཟུང་ད་ལན་མཆོད་འཇོར་ས་གནས་ལ་དངོས་གཞིའི་འོས་བསྡུ་ཐེངས་གཅིག་ཕྱིར་འཐེན་ཞུ་རྒྱུའི་ཐག་གཅོད་གནང་བ་ཡིན་སྐོར་དང་། ས་གནས་ནས་འོས་བསྡུའི་སྒྲིག་གཞིར་འགལ་འཛོལ་བྱུང་བའི་གནད་དོན་གསལ་འདོན་གནང་བའི་ནང་། ༡། སྤྱིར་བཅའ་སྒྲིག་དགོངས་དོན་ལྟར་བོད་མི་འོས་འཕེན་པ་ཞིག་ལ་སོ་སོའི་ཐོབ་ཁུངས་ནས་འོས་གཅིག་གི་ཐོབ་ཐང་ལས་མེད་ནའང་། བལ་ཡུལ་མཆོད་འཇོར་ས་གནས་སུ་འོས་འཕེན་པ་གཅིག་གིས་འོས་ཤོག་གཅིག་ལས་མང་བ་འཕེན་པའམ། ཡིག་གཟུགས་གཅིག་གིས་འོས་ཤོག་མང་པོར་བྲིས་པ་མང་དག་ཅིག་མངོན་གསལ་འདུག་པ་འོས་སྒྲིག་འགལ་འཛོལ་ཚབས་ཆེ་བྱུང་བ་དཔེར་ན། འོས་འཕེན་པ་ཁག་ཅིག་ནས་འོས་ཤོག་ ༡༠ དང་། ༢༠། ༤༠། ༧༠། ༡༠༠ ཡན་བརྒལ་བ་འབྲི་མཁན་མང་དག་ཅིག་བྱུང་འདུག
༢། འོས་མིའི་ཨང་རིམ་དང་མིང་གཞུང་གཅིག་གྱུར་ལེབ་བཤུས་བརྒྱབ་པའི་ཡིག་གཟུགས་གཅིག་པའི་འོས་ཤོག་མང་དག་ཁ་གསལ་མཐོང་རྒྱུ་འདུག་པ་ནི་ཚབས་ཆེའི་སྒྲིག་འགལ་ཆགས་ཡོད། ༣། འོས་བསྡུའི་དུས་ཡུན་ཉིན་གཅིག་དེ་རང་ལ་ཟིན་དགོས་ཀྱང་། དེ་ནས་ཁྱིམ་ཚང་སོ་སོ་དང་ཚོགས་སྡེ་ཁག་ལ་འོས་ཤོག་འགྲེམས་སྤེལ་བྱས་པའི་ཐོག འོས་ཤོག་ཕྱིར་བསྡུ་ཉིན་འགྱངས་ཀྱིས་བསྡུ་ལེན་བྱས་པའི་སྒྲིག་འགལ་བྱུང་འདུག ༤། དེ་གའི་ས་གནས་ཁག་ཅིག་ལ་ཚོགས་ཆུང་གི་ཚོགས་མི་གཅིག་རང་བརྒྱུད་འགྱིག་ཤོག་འཁྱེར་ཏེ་འོས་ཤོག་བགོས་འགྲེམས་དང་བསྡུ་ལེན་བྱས་རིགས་བྱུང་ཡོད་ཚོད་འདུག ༥། འོས་ཤོག་ཁག་ཅིག་སྟེང་འོས་མིའི་མིང་ཙམ་ལས་གཞན་འབྲུ་དོན་ཆ་ཚང་བཀོད་མེད་པར་འོས་མི་ངོ་རྟགས་ཆོད་པའི་ཁུངས་སྐྱེལ་ཁ་གསལ་མེད་པ་དང༌། འོས་མིའི་མིང་དང་ལོ་རྒྱུས་མ་མཐུན་པ་བཀོད་རིགས་ཁག་གཅིག་རྩིས་འགྲོ་བཏང་བ་ཡང་བྱུང་ཡོད་པ་ནི། འོས་བསྡུའི་སྒྲིག་གཞི་དོན་ཚན་ ༣༤(༢།ཅ) ནང་དོན་སྔོན་འགྲོའི་སྐབས་འོས་མིའི་ངོ་རྟགས་ཆོད་པའི་ཁུངས་སྐྱེལ་ཁ་གསལ་མེད་ན་འོས་ཤོག་རྩིས་མེད་གཏོང་རྒྱུ་ཞེས་པའི་དགོངས་དོན་དང་འགལ་འཛོལ་བྱུང་འདུག ༦། འོས་ཤོག་གཅིག་གི་སྟེང་ཡིག་གཟུགས་མི་འདྲ་བའི་མི་གཉིས་ནས་འོས་ཤོག་བསྐངས་བ་གང་ཙམ་བྱུང་འདུག
༧། ཨ་རི་ནས་ཡིན་པའི་འོས་འཕེན་པ་ཞིག་ལ་རྒྱ་བལ་འབྲུག་གསུམ་གྱི་ཆོལ་ཁའི་ཐོབ་ཁུངས་ལ་འོས་འཕངས་བ་སྒྲིག་འགལ་བྱུང་འདུག ༨། ད་ལན་བལ་ཡུལ་ནང་གི་འོས་བསྡུའི་ལས་དོན་བྱས་ཕྱོགས་ཐོག་འདི་གའི་ཞིབ་འཇུག་གི་བརྒྱུད་རིམ་ནང་། ཉིད་རང་ལ་ཐེངས་གསུམ་དྲི་རྩད་བྱས་སྐབས་བལ་ཡུལ་མཆོད་འཇོར་ནང་འོས་བསྡུའི་སྐབས་སྒྲིག་འགལ་གང་ཡང་བྱུང་མེད་པའི་ཚགས་ཚུད་ངང་གྲུབ་ཡོད་ལུགས་སྐོར་འགྲེལ་བརྗོད་ནན་གཏན་གནང་ཡོད་པ་མ་ཟད། འོས་ཤོག་གྲངས་བཤེར་སྐབས་ཚོགས་མི་དང་ཟུར་དཔང་སུ་ཐད་ནས་མི་གཅིག་གིས་འོས་ཤོག་མང་པོ་བྲིས་ཡོད་པ་ཤེས་རྟོགས་བྱུང་མེད་པའི་འགྲེལ་བརྗོད་བྱུང་བ་མ་ཟད། མཆོད་འཇོར་མི་མང་བརྒྱ་ཆ་ ༦༠ གྲྭ་ཟུར་དང་བཙུན་ཟུར་ཡིན་པ་དང་། བླ་མ་གཅིག་གི་སློབ་མ་ཡིན་པའི་རྒྱུ་མཚན་གྱིས་ཡིག་གཟུགས་གཅིག་པ་ཡོང་སྲིད་པའི་གསལ་བཤད་བྱས་ཡོད། ལྷག་པར་དུ་ད་སྐབས་བལ་ཡུལ་ནང་གི་སྔོན་འགྲོའི་འོས་བསྡུ་ལས་དོན་ཐོག་འདི་ག་དབུས་སུ་ཞིབ་འཇུག་འགྲོ་བཞིན་པ་ཤེས་བཞིན་དུ་ཡང་ཡང་དབུས་ལ་འབྲེལ་བ་བྱས་ཏེ་གནོན་ཤུགས་ལྟ་བུའི་བསུན་གཙེར་བཟོས་པ་དང་། ཕྱི་ལོ་ ༢༠༢༦ ཟླ་ ༤ ཚེས་ ༢༢ ཉིན་ཡིག་ཐོག་ནས་ཞིབ་འཇུག་ལ་ཐེ་ཇུས་ལྟ་བུའི་ཉེན་བརྡ་༼སྐུ་ཉིད་ནས་སྤྱི་ཚོགས་འཁྲུག་གཞི་མི་ཡོང་བའི་འགན་འཁུར་གཙོ་བོ་བཞེས་ནས། འདི་ག་བལ་ཡུལ་མཆོད་འཇོར་ས་གནས་ཁེར་རྐྱང་ལ་འོས་ཤོག་བཏང་བདེ་མ་མཆིས་པའི་ཁྲིམས་མཐུན་གྱི་དཔང་རྟགས་དང་། ལུང་འདྲེན་ཁ་གསལ་འཁོད་པའི་བཀའ་ཡིག་ཞིག་གང་མྱུར་གནང་སྐྱོང་ཡོང་བ་ཞུ༽ ཞེས་བསམ་ཡུལ་ལས་འདས་པའི་ས་གནས་འོས་བསྡུའི་འགན་འཛིན་ལས་རོགས་ཞིག་ནས་དབུས་འོས་བསྡུ་ལས་ཁང་ལ་ཞིབ་འཇུག་ཐོག་ལས་འགན་གྱི་ཆ་ཤས་སུ་མཐུན་འགྱུར་རམ་འདེགས་ཞུ་རྒྱུ་ལྟ་ཞོག དེ་ལས་ལྡོག་སྟེ་འདི་གར་སྐྱོན་བརྗོད་དང་འཇིགས་བསྐུལ་ལྟ་བུའི་སྒྲིག་འགལ་གྱི་ཡིག་ཆུང་བཏང་བ་འོས་འཚམས་གཏན་ནས་མ་མཐོང་བས་ཡིད་གཟབ་གནང་གལ། ཞེལ་གསལ་ཡོད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
