སྲིད་སྐྱོང་མཆོག་གིས་༸གོང་ས་རྒྱལ་བ་རིན་པོ་ཆེ་མཆོག་སྐུ་འཚོ་བཞུགས་ཡོད་མེད་ལ་མ་ལྟོས་པར་བོད་ཀྱི་གནད་དོན་མུ་མཐུད་གནས་རྒྱུ་ཡིན་པ་ལས་ཡལ་མི་སྲིད་སྐོར་གསུངས་འདུག
ཟླ་འདིའི་ཕྱི་ཚེས་ ༨ ནས་ ༢༧ བར་ཉིན་གྲངས་ཉི་ཤུའི་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་རྒྱལ་ས་ལྡི་ལི་དང་། བྷར་ལིན། ཧྥེ་རེང་ཧྥར་ཊི་ (Frankfurt) ཝ་ཤིང་ཊོན་ཌི་སི་བཅས་སུ་གཞུང་འབྲེལ་ཕྱོགས་ཕེབས་གནང་གཏན་འཁེལ་བ་ལྟར། ཕྱི་ཚེས་ ༩ ཉིན་རྒྱལ་སྤྱིའི་ཁྱོན་ཡོངས་སུ་༸གོང་ས་རྒྱལ་བ་རིན་པོ་ཆེ་མཆོག་གི་༸སྐུའི་གོ་སྟོན་སྲུང་གཙི་ཞུ་བཞིན་པ་དང་བསྟུན། རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་རང་བྱུང་ལྟེ་གནས་ཁང་ (India Habitat Centre) དུ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་༸གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་ལ་ཕུལ་བའི་ལེགས་སྐྱེས་ (His Holiness the Dalai Lama’s Guru Dakshina to Bharat) ཞེེས་པའི་བརྗོད་གཞིའི་ཐོག་གསུང་བཤད་གནང་ཡོད་ཅིང་། མཛད་སྒོ་དེའི་ཐོག་བོད་རིག་པ་བ་དང་། ཨེ་ཤ་ཡའི་ཧི་མ་ལ་ཡ་ཞིབ་འཇུག་ལྟེ་གནས་ཁང་(CHASE) གི་འགན་འཛིན་སྐུ་ཞབས་ཝི་རྗེ་ (Vijay Kranti) ལགས་ཀྱིས་གཙོ་སྐྱོང་གནང་བ་དང་། རྒྱ་གར་རང་བྱུང་ལྟེ་གནས་ཁང་གི་འགན་འཛིན་འབུམ་རམས་པ་སུ་རེ་ཤི་ (K. G. Suresh) ལགས། ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས་དང་། དྲུང་ཆེ་བཀྲ་ཤིས་བདེ་སྐྱིད་ལགས། རྒྱ་གར་དུ་ཡོད་པའི་ཅེཀ་སྤྱི་མཐུན་རྒྱལ་ཁབ་ཀྱི་གཞུང་ཚབ་པ་འབུམས་རམས་པ་ཨེ་ལི་སི་ཀཱ་ (Dr. Eliška Žigova) ལགས་གཙོས་པའི་ཚོགས་བཅར་བ་ ༢༠༠ ལྷག་མཉམ་ཞུགས་གནང་འདུག
སྐབས་དེར་སྲིད་སྐྱོང་མཆོག་གིས་༸གོང་ས་མཆོག་གི་ཡང་སྲིད་ངོས་འཛིན་གནང་ཕྱོགས་ཐད་རྒྱ་ནག་ལ་དབང་ཚད་ཁྱོན་ནས་མེད་པ་དང་། རྒྱ་ནག་གིས་༸སྐུའི་ཡང་སྲིད་ངོས་འཛིན་གནང་ཕྱོགས་ཀྱི་གནད་དོན་ཐད་ཐེ་ཇུས་བྱས་ཏེ་སྟངས་འཛིན་བྱེད་ཐབས་གནང་མུས་ཡིན་ཡང་། ༸གོང་ས་མཆོག་གིས་ཁོང་གི་ཡང་སྲིད་ནི་རང་དབང་ལྡན་པའི་འཛམ་གླིང་རྒྱལ་ཁབ་ཞིག་གི་ནང་སྐྱེ་རྒྱུ་ཡིན་ཞེས་གསུངས་ཡོད་པ་དེ་བསྐྱར་ནན་དང་སྦྲགས། ༸མགོན་པོ་གང་ཉིད་མཆོག་ལོ་ངོ་ ༡༣༠ རིང་སྐུ་འཚོ་བཞུགས་གནང་རྒྱུའི་ཐུགས་རེ་དང་ངོས་བཞེས་གནང་ཡོད་པ། རྒྱ་ནག་གཞུང་གིས་༸གོང་ས་མཆོག་སྐུ་འཚོ་བཞུགས་མེད་སྐབས་བོད་ཀྱི་གནད་དོན་ཡང་མཇུག་རྫོགས་འགྲོ་བའི་ཚོད་དཔག་བྱེད་ཀྱིན་འདུག་ཀྱང་། དོན་དངོས་སུ་རྒྱ་ནག་ལ་བརྡ་ལན་སྤྲོད་འདོད་པ་ནི། རྒྱ་ནག་དམར་ཤོག་རིང་ལུགས་དེ་༸གོང་ས་རྒྱལ་བ་རིན་པོ་ཆེ་མཆོག་ལས་དུས་ཡུན་རིང་བར་འཚོ་ཐུབ་མིན་ལྟ་རྒྱུ་ཞིག་ཡིན་སྐོར་སོགས་གསུངས་འདུག
ཡང་སྲིད་སྐྱོང་མཆོག་གིས། བོད་དང་རྒྱ་གར་དབར་ལོ་རྒྱུས་དང་། དཔལ་ཡོན་གྱི་འབྲེལ་བ་ཆེན་པོ་ཡོད་པ་མ་ཟད། རིམ་པས་རྒྱལ་ཁབ་གཉིས་བར་ཆོས་དང་སྐད་ཡིག རིག་གཞུང་གི་འབྲེལ་ལམ་ཡར་རྒྱས་དང་། བོད་མིར་ཆབ་སྲིད་ཀྱི་དཀའ་ངལ་འཕྲད་པའི་སྐབས་སུ་རྒྱ་གར་གཞུང་མང་གཉིས་ཀྱིས་ཀྱང་ཕྱོགས་གང་ཅིའི་ཐད་ནས་མཐུན་འགྱུར་གནངས་དང་གནང་མུས་ཡིན་པར་བཀའ་དྲིན་རྗེས་དྲན་ཞུས་པ་དང་། ༸གོང་ས་མཆོག་གི་ཐུགས་ཀྱི་དགོངས་གཞི་ལྟར་བོད་མི་རྣམས་ཀྱིས་རྒྱ་གར་གྱི་ནང་བསྟན་གྱི་སྲོལ་རྒྱུན་ཁག་ཉར་ཚགས་དང་། སླར་གསོ། ཁྱབ་སྤེལ་ཐུབ་པ་དེ་ནི་རྒྱ་གར་གཞུང་མང་ལ་བཀའ་དྲིན་རྗེས་དྲན་གྱི་ལེགས་སྐྱེས་ཤིན་ཏུ་ནས་ཆེན་པོ་ཞིག་ཡིན་པ། བོད་ཀྱི་ཐབས་ཇུས་དང་། ཁོར་ཡུག་གི་གལ་གནད་སྐོར་ནན་བརྗོད་གནང་ཞིང་། བོད་མཐོ་སྒང་ནི་རྒྱ་གར་ཚུད་པའི་ཨེ་ཤ་ཡའི་མི་འབོར་ས་ཡ་མང་པོའི་ཉིན་རེའི་འཚོ་བའི་ཐོག་དགོས་མཁོ་དང་ཕན་ཐོགས་ཆེན་པོ་ཡོད་སྐོར་དང་། རྒྱ་ནག་གཞུང་གིས་བོད་ནང་དུ་དམ་དྲག་ཤུགས་ཆེར་གཏོང་མུས་ཡིན་པའི་ཐོག རྒྱ་ནག་གིས་སྲིད་ཇུས་འདྲ་མིན་ལག་བསྟར་བྱས་ཏེ་བོད་ཀྱི་ངོ་བོ་དང་། རིག་གཞུང་། སྐད་ཡིག་སོགས་རྩ་མེད་གཏོང་ཐབས་བྱེད་བཞིན་པར་སེམས་འཚབ་ཡོད་པ་དང་། བོད་ཀྱི་མ་འོངས་པའི་གནས་སྟངས་ནི་རྒྱ་གར་གྱི་བདེ་འཇགས་དང་ས་ཁུལ་བརྟན་ལྷིང་ལ་འབྲེལ་བ་ཤུགས་ཆེན་ཡོད་སྐོར། རྒྱ་གར་གྱི་རྒྱབ་སྐྱོར་ལ་བརྟེན་ནས་བོད་མི་ཚོས་བོད་དོན་འཐབ་རྩོད་ཐོག་མུ་མཐུད་འབད་བརྩོན་བྱ་རྒྱུ་དང་། འདས་པའི་ལོ་ངོ་ ༦༠ ལྷག་གི་རིང་རྒྱ་གར་གྱིས་བོད་མི་རྣམས་ལ་ཕ་མ་བཞིན་ལྟ་སྐྱོང་གནང་བར་བཀའ་དྲིན་ཆེན་པོ་ཡིན་སྐོར་སོགས་གསུངས་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
