བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཡོངས་ཀྱིས་བཀའ་ཟུར་ཇོ་དཔལ་དཔལ་འབྱོར་ཚེ་རིང་ལགས་འདས་གྲོངས་སུ་གྱུར་བར་གདུང་སེམས་མཉམ་སྐྱེད་ཀྱི་མཆོད་འབུལ་སྨོན་ལམ་འཚོགས།
ཁ་སང་ཕྱི་ཚེས་ ༡༡ ཉིན་བཀའ་ཟུར་ཇོ་དཔལ་དཔལ་འབྱོར་ཚེ་རིང་མཆོག་དགུང་ལོ་ ༧༨ སྟེང་ཨོ་གླིང་དུ་འདས་གྲོངས་སུ་གྱུར་བའི་གནས་ཚུལ་ཐོན་ཡོད་སྟབས། དེ་རིང་ཉིན་རྒྱབ་ཆུ་ཚོད་གཉིས་པའི་ཐོག་དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམས་གཙོས། དབུས་ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་གདུང་སེམས་མཉམ་སྐྱེད་ཀྱི་མཆོད་འབུལ་སྨོན་ལམ་འཚོགས་ཏེ། ཉིན་རྒྱབ་ཆུ་ཚོད་ ༣ ནས་ལས་ཁུངས་ཁག་ལས་མཚམས་བཞག་སོང་།
སྲིད་ཚབ་ཆོས་རིག་བཀའ་བློན་ཆུ་སྐྱ་སྦྲ་གཉིས་ཚེ་རྒྱལ་མཆོག་གིས་དམ་པ་ཁོང་གི་ལོ་རྒྱུས་སྒྲོག་སྦྱང་གནང་བའི་ཁྲོད། བཀའ་ཟུར་ཇོ་དཔལ་དཔལ་འབྱོར་ཚེ་རིང་མཆོག་ནི། ཕྱི་ལོ་ ༡༩༤༨ ལོར་བོད་ཀྱི་བྱང་ཐང་གནམ་རུར་སྐུ་འཁྲུངས། རང་ལོ་བཅུར་སོན་སྐབས་རྒྱ་དམག་གིས་བོད་ས་བཙན་བཟུང་དབང་གིས་བཙན་བྱོལ་དུ་འབྱོར་ཏེ་བལ་ཡུལ་སྤོག་རར་སློབ་ཞུགས་གནང་། ཕྱི་ལོ་ ༡༩༦༦ ལོར་བཀྲ་ཤིས་གླིང་གཞིས་ཆགས་ཚུགས་སྐབས་སྐད་སྒྱུར་གནང་། ཕྱི་ལོ་ ༡༩༦༨ ལོར་ལོ་གཉིས་ཙམ་རིང་དབྱིན་ཡུལ་དུ་སློབ་སྦྱོང་ལ་བསྐྱོད། ཕྱི་ལོ་ ༡༩༧༠ ལོ་ནས་བཀྲ་ཤིས་གླིང་གཞིས་ཆགས་སུ་དགེ་རྒན་དང་དགེ་ཆེའི་ཕྱག་ལས་གནང་། ཕྱི་ལོ་ ༡༩༧༣ ཟླ་ ༡༠ ཚེས་ ༡ ནས་གནས་བདུན་པའི་ཐོག་རྡོར་སྦ་ཀྲན་གཞིས་འགོར་བསྐོ་གཞག་དང༌། ཕྱི་ལོ་ ༡༩༧༧ ཟླ་ ༡༡ ཚེས་ ༢༠ ནས་གནས་བདུན་པ་རང་འཇགས་ཐོག་བལ་ཡུལ་དོན་གཅོད་ཁང་ལས་བྱེད་དུ་གནས་སྤོས། ཕྱི་ལོ་ ༡༩༨༢ ཟླ་ ༤ ཚེས་ ༢༦ ནས་གནས་རང་འཇགས་ཐོག་ཤེས་རིག་ལས་ཁུངས་ཀྱི་དྲུང་གཞོན་དུ་གནས་སྤོས།
ཕྱི་ལོ་ ༡༩༨༥ ཟླ་ ༡ ཚེས་ ༡ ནས་གནས་རང་འཇགས་ཐོག་བལ་ཡུལ་ཤེས་ཡོན་འགན་འཛིན། ཕྱི་ལོ་ ༡༩༨༦ ཟླ་ ༥ ཚེས་༡༥ ནས་གནས་རང་འཇགས་ཐོག་བལ་ཡུལ་སྐུ་ཚབ་དོན་གཅོད། ཕྱི་ལོ་ ༡༩༩༡ ཟླ་ ༩ ཚེས་ ༡༩ ནས་གནས་དྲུག་པར་གནས་སྤར་གྱིས་ཤར་ཡུ་རོབ་སྐུ་ཚབ་དོན་གཅོད། ཕྱི་ལོ་ ༡༩༩༤ ཟླ་༤ ཚེས་ ༢༨ ནས་དྲུང་འཕར་དུ་གནས་སྤར། ཕྱི་ལོ་ ༡༩༩༧ ཟླ་ ༤ ཚེས་ ༡༤ ནས་དྲུང་ཡིག་ཆེན་མོར་གནས་སྤར་དང་སྦྲགས་ལས་འགན་རང་འཇགས། ཕྱི་ལོ་ ༡༩༩༨ ཟླ་ ༤ ཚེས་ ༢༨ ནས་ཨོ་སི་ཀྲི་ཡའི་སྐུ་ཚབ་དོན་གཅོད། ཕྱི་ལོ་ ༢༠༠༢ ཟླ་ ༡༢ ཚེས་ ༧ ནས་ཕྱི་ལོ་ ༢༠༠༧ ཟླ་ ༥ ཚེས་ ༣༠ བར་ཤར་ཨེ་ཤ་ཡའི་སྐུ་ཚབ་དོན་གཅོད་ཀྱི་མཛད་འཁུར་བཞེས་ཏེ་བགྲེས་ཡོལ་ཐོན། དེ་རྗེས་ཕྱི་ལོ་ ༢༠༠༧ ནས་ ༢༠༡༡ བར་འཕྲོད་བསྟེན་བཀའ་བློན་གྱི་ཐུགས་འགན་བཞེས། བཀའ་བློན་གྱི་མཛད་འགན་ཟུར་རྗེས་སུའང་བོད་ཀྱི་སྐད་ཡིག་དང་བོད་མིའི་ཡ་རབས་བཟང་སྤྱོད་གོང་སྤེལ་སླད་ཀུན་ཁྱབ་བོད་ཀྱི་ལས་འགུལ་བསྟི་གནས་ཁང་བཙུགས་གནང་ཡོད། ཕྱི་ལོ་ ༢༠༢༦ ཟླ་ ༦ ཚེས་ ༡༡ ཉིན་རྒྱབ་ཨོ་གླིང་དུ་དགོངས་པ་རྫོགས།
གསར་འགོད་པ། དཔལ་ལྡན།
