ཆེས་མཐོའི་ཁྲིམས་ཞིབ་ཁང་གིས་བདེ་སྙན་དེབ་འགོད་ཨང་ ༡ ངོས་བཞེས་རྩིས་མེད་དུ་སོང་བའི་ཐག་གཅོད་གནང་ཡོད་ཀྱང་ཁ་མཆུ་ ༢༢ ནང་གྱོད་ཡ་སྣོན་མའི་ངོ་བོ་ཐོག་ནས་ཞུ་གཏུག་བྱ་ཆོག་གི་ཡོད་འདུག
དེ་རིང་ཕྱི་ཚེས་ ༡༢ ཉིན་དབུས་འོས་བསྡུ་ལྷན་ཁང་གིས། ཟླ་འདིའི་ཕྱི་ཚེས་ ༩ ཉིན་བདེ་སྙན་པ་སེང་གེ་ཤེས་རབ་དང་། གྱོད་ཡའི་ངོ་ཚབ་བཅས་པར་ཆེས་མཐོའི་ཁྲིམས་ཞིབ་ཁང་གི་གཏུག་བཤེར་ཁང་དུ་སྔོན་འགྲོའི་ཉན་ཞིབ་ཚོགས་པ་དང་འབྲེལ་བའི་ཐག་གཅོད་གནང་སྐབས། བདེ་སྙན་དེའི་ངོ་བོ་དང་། རྐྱེན་རྩ། དགོས་འདུན་བཅས། ཁ་མཆུ་ཨང་ ༢༢ པ་དང་གཅིག་མཚུངས་སུ་ཆགས་སྟབས། ཁ་མཆུ་ཨང་ ༢༢ ནང་གྱོད་ཡ་སྣོན་མའི་ངོ་བོ་ཐོག་ནས་ཞུ་གཏུག་བྱ་ཆོག་པ་ལས། རྐྱེན་རྩ་གཅིག་ལ་ཞུ་རྩོད་གཅིག་ལས་མང་བ་ཆགས་པ་ཡིན་ན། ཁྲིམས་ཡིག་གི་བྱ་རིམ་ཚུལ་མིན་དུ་གྱུར་ཉེན་སོང་། སྤྱི་མང་ཁྲིམས་ཡིག་དོན་ཚན་ ༨༨ དགོངས་དོན་བདེ་སྙན་དེབ་འགོད་ཨང་ ༡ དེ་བཞིན་ངོས་བཞེས་བརྩི་མེད་དུ་བཏང་བའི་ཐག་གཅོད་གནང་སོང་།
བདེ་སྙན་གྱི་ཐག་གཅོད་གྲུབ་རྗེས་བོད་མིའི་ཁྲིམས་ལུགས་རིག་པ་བའི་ཚོགས་པའི་ཁྲིམས་རྩོད་པ་རིན་ཆེན་དབང་རྒྱལ་ལགས་ཀྱིས། བདེ་སྙན་དང་སྤྱི་དམངས་ཀྱི་ཁྲིམས་ཡིག་གཏུག་ཡ་གཉིས་ཀྱི་རྐྱེན་རྩ་དང་འབྱུང་རྐྱེན་དེ་གཉིས་གཅིག་པ་ཆགས་ཀྱི་འདུག ཁྲིམས་ཡིག་བརྒྱུད་རིམ་གཅིག་གི་ཐོག་ནས་གནང་བ་ཡིན་ན་མ་འཐུས་བ་གང་ཡང་མི་འདུག་ཅེས་གསུངས་པ་དེ་གསལ་པོ་བཟོ་དགོས་རྒྱུ་གནད་འགག་ཅིག་ཆགས་ཀྱི་འདུག་ལ། བདེ་སྙན་གྱི་ཞུ་རྩ་ལ་ངོས་ལེན་མ་གནང་བ་ཞིག་རྩ་བ་ནས་མ་རེད། ངོས་བཞེས་གནང་ཡོད་རེད་དེ། གནད་འགག་ཅིག་ག་རེ་ཆགས་ཡོད་རེད་ཟེར་ན། རྒྱ་གར་ནང་ CBC ཡི་འགྲོ་སྟངས་ཤིག་དང་། བདེ་སྙན་ (Writ Petition) གྱི་འགྲོ་སྟངས་ཤིག་ཡོད་རེད། དེའི་ཁྱད་པར་དེ་ལ་ཁྲིམས་ཞིབ་པ་རྣམས་ཀྱིས་ལུང་འདྲེན་ཞུ་ཡ་དེ། སྤྱི་དམངས་གཏུག་གཤེར་གྱི་དོན་ཚན་བཅུ་དགུ་ཡི་དགོངས་དོན་གཞིར་བཟུང་། གལ་ཏེ་ཁ་མཆུ་གཅིག་ལ་རྐྱེན་རྩ་དང་འབྱུང་རྐྱེན་ཡོད་པ་ཡིན་ན། ཁ་མཆུ་ཡི་བརྒྱུད་རིམ་ཚགས་ཚུད་ཡོང་རྒྱུ་དང་གནད་དོན་གཅིག་ཡོང་སླད་བརྒྱུད་རིམ་གཅིག་གི་སྒང་ལ་འགྲོ་ན་ཞེས་དགོངས་པ་བཞེས་ཡ་དེ་འདྲ་ཞིག་རེད་འདུག ཡིན་ཡང་། ཞུ་སྦྱོར་བར་གནད་འགག་ག་རེ་ཆགས་ཀྱི་ཡོད་རེད་ཟེར་ན། གལ་སྲིད་ཁྲིམས་ཞིབ་པ་རྣམས་ཀྱིས་དོན་ཚན་ ༦༩ པ་བདེ་སྙན་དེ་ངོས་བཞེས་གནང་བ་ཡིན་ན། དེའི་བརྒྱུད་རིམ་དེ་རྒྱ་གར་ནང་(Writ Petition) འགྲོ་སྟངས་གཞིར་བཟུང་། Writ ཐེངས་ལྔ་ལྷག་ཅིག་གཏང་རྒྱུའི་སྐུ་དབང་ཚང་མ་ཡོད་རེད་དེ། དེ་དག་ཚང་མ་ག་རེ་བྱས་ནས་གཏོང་གི་མེད་བ་བསམ་པའི་དོགས་པ་ཞིག་བདེ་སྙན་པའི་ངོ་ཚབ་རྣམས་ལ་རང་བཞིན་གྱི་བསླེབས་སོང་། ཞེས་བརྗོད་བྱུང་།
ཡང་ཁོང་གིས། ཁྲིམས་སྒྲིག་གི་ཐོག་ནས་ཁྲིམས་ཞིབ་པ་རྣམས་ཀྱིས་སྤྱི་དམངས་གཏུག་གཤེར་གྱི་དོན་ཚན་ ༨༨ དེ་ལུང་འདྲེན་གནང་འདུག་ལ། ལུང་འདྲེན་དེ་ཁྲིམས་ཞིབ་པ་རྣམས་ཀྱི་སྐུ་དབང་རེད་ལ། དེ་ནི་ཁྲིམས་ཀྱི་བརྒྱུད་རིམ་ཞིག་ཆགས་ཀྱི་ཡོད་རེད། ཁྲིམས་ཀྱི་བརྒྱུད་རིམ་དང་རང་ཆས་སུ་ཡོད་པའི་སྐུ་དབང་ལབ་དུས། གལ་ཆེ་ཤོས་དེ་ག་རེ་གཟིགས་དགོས་ཀྱི་རེད་ཞུས་པ་ཡིན་ན། ད་ལྟའི་ང་ཚོའི་འོས་བསྡུ་ཆེན་པོ་འདིའི་ནང་ལ། བལ་ཡུལ་དང་ལྷག་པར་མཆོད་འབྱོར་ཙམ་མ་རེད། བལ་ཡུལ་ཕྱོགས་ཡོངས་དང་ལྷག་པར་རྒྱལ་ས་ཀ་ཐི་མན་ཌུའི་ནང་བྱུང་བའི་གནད་དོན་ལ། འོས་བླུག་རྒྱུ་མ་རག་པའི་གནས་སྟངས་ཤིག་བྱུང་ནས་ཁ་མཆུ་འདི་འགྲོ་ཡི་ཡོད་པའི་གནས་བབ་འོག སྤྱི་ཡོངས་ཀྱི་ཁྲིམས་སྒྲིག་དང་། ལྷག་པར་ད་ལྟའི་འདེམས་ཐོན་བྱུང་བའི་བཀུར་འོས་སྤྱི་འཐུས་རྣམས་ལ་ཁྲིམས་མཐུན་རང་བཞིན་ Legitimacy ཇི་ཙམ་ཆགས་མིན་དེ་ཁྲིམས་སྒྲིག་གི་དྲི་བ་གལ་ཆེན་ཞིག་ཆགས་ཀྱི་ཡོད་རེད། གནས་བབ་དེའི་ཐོག་ནས་བདེ་སྙན་དེ་ངོས་བཞེས་གནང་དགོས་པའི་གནད་འགག་ཅིག་ཐུག་ཡོད་རེད། ཅེས་བརྗོད་བྱུང་།
ཁོང་གིས་བརྗོད་དོན། ད་ལན་བདེ་སྙན་པར་སེམས་འཚབ་བྱུང་ཡོད་ཀྱང་། གནད་ཆེས་ཆེ་བ་ནི་ད་ལན་གྱི་གནད་དོན་དང་འབྲེལ་ནས་བོད་མི་མང་སྤྱི་འཐུས་གདམ་གྱི་ཡོད་སྟབས། དེ་ནི་མི་སྒེར་གྱི་སེམས་འཚབ་བྱས་པ་ཙམ་མིན་པར། བོད་མི་རྣམས་ཀྱིས་སེམས་ངལ་བྱ་དགོས་པའི་གནད་དོན་ཞིག་ཏུ་གྱུར་བའི་མུར། ད་ལན་མཆོད་འབྱོར་མི་མང་ལ་འོས་བསྡུ་གོ་སྐབས་མ་རག་པ་དང་འབྲེལ་བའི་ཁྲིམས་གཏུག་ནི་མི་སྒེར་གྱི་ཁེ་ཕན་ཞིག་གཏན་ནས་མིན་པར། བོད་མི་རིགས་ཀྱི་མ་འོངས་པའི་ཕུགས་འདུན་དང་། དབུས་བོད་མིའི་སྒྲིག་འཛུགས་ཡུན་གནས། མ་འོངས་པར་བཙན་བྱོལ་བོད་མིའི་སྒྲིག་འཛུགས་སུ་ཁྲིམས་མཐུན་རང་བཞིན་གྱི་དབང་བསྒྱུར་ཞིག་ཡོང་སླད། ཁ་མཆུ་གཏུག་གིན་ཡོད་པ་ལས་གང་ཟག་མི་སྒེར་གྱི་ཁེ་ཕན་ཐོབ་སླད་གཏུག་པ་ཞིག་གཏན་ནས་མིན་པར། བཙན་བྱོལ་བོད་མིའི་ཆབ་སྲིད་ཀྱི་རྐུབ་སྟེགས་སྟེང་མི་བུ་བྱས་པ་ཅན་ཞིག་ཡོང་སླད་ཡིན་པ་ལས། མི་སྒེར་གྱི་ཁེ་ཕན་དང་ཐོབ་ཐང་རྩོད་ལེན་གྱི་ཆེད་གཏན་ནས་མིན་སྐོར་བརྗོད་བྱུང་།
དེ་རིང་དབུས་འོས་བསྡུ་ལྷན་ཁང་གིས་བདེ་སྙན་གྱི་སྔོན་འགྲོའི་ཉན་ཞིབ་དང་ཐག་གཅོད་ཅིག་བྱས་པའི་ཁྲོད། བདེ་སྙན་ནང་དོན་ཆ་ཚང་ཞིབ་བལྟས་ཀྱིས། ཕྱི་ལོ་ ༢༠༢༦ ཟླ་ ༦ ཚེས་ ༩ རེས་གཟའ་མིག་དམར་སྔ་དྲོའི་ཆུ་ཚོད་༡༠།༣༠ ཐོག་ཁ་བྱང་གོང་དུ་གསལ་བའི་བདེ་སྙན་པ་སེང་གེ་ཤེས་རབ་དང་། གྱོད་ཡའི་ངོ་ཚབ་བཅས་པར་ཆེས་མཐོའི་ཁྲིམས་ཞིབ་ཁང་གི་གཏུག་བཤེར་ཁང་དུ་སྔོན་འགྲོའི་ཉན་ཞིབ་ཚོགས་པ་དང༌། བདེ་སྙན་པའི་བདེ་སྙན་ནང་འཁོད་ཞུ་དོན་ལ་ངེས་གཏན་གསལ་བཟོ་དང༌། ཁུངས་སྐྱེལ་དཔང་རྟགས་འདོན་འབུལ་བཅས་ལ་བརྟག་ཞིབ་གནང་འབྲས་སུ།
༡། དབུས་འོས་བསྡུ་ལས་ཁང་གིས་ཕྱི་ལོ་ ༢༠༢༦།༤།༢༣ འཁོད་བལ་ཡུལ་མཆོད་འཇོར་མི་མང་ལ་སྐྱོན་གནད་དོན་ཚན་ ༨ ཅན་དང་འབྲེལ་བའི་ཐག་གཅོད་གནང་བའི་ཁོངས་བདེ་སྙན་པ་སེང་གེ་ཤེས་རབ་དང་། ཤར་སྦག་ཁང་དོན་འགྲུབ་སྡིང་། ཤྲཱི་སེང་གེ་བྲག་ངེས་དོན་བདེ་ཆེན་འོད་གསལ་གླིང་དགོན་པ་བཅས་པར་བལ་ཡུལ་མཆོད་འཇོར་ཁྱབ་ཁོངས་སུ་ཚུད་ཀྱི་ཡོད་པ་སྔོན་འགྲོའི་ཉན་ཞིབ་སྐབས་ར་འཕྲོད་བྱུང་།
༢། བལ་ཡུལ་མཆོད་འཇོར་མི་མང་ ༢༠༠༠ ལྷག་ཕྱི་ལོ་ ༢༠༢༦ སྲིད་སྤྱི་གཉིས་ཀྱི་འོས་བསྡུའི་ཆེད་དེབ་བསྐྱེལ་བགྱིས་པའི་ནང༌། གོང་གསལ་བདེ་སྙན་པ་ཐུན་མོང་ཡང་ཚུད་ཡོད་པ་ར་འཕྲོད་བྱུང་།
༣། བདེ་སྙན་གྱི་རྐྱེན་རྩ། དབུས་འོས་བསྡུ་ལས་ཁང་གིས་ཕྱི་ལོ་ ༢༠༢༦།༤།༢༣ ཉིན་བཏང་པའི་བཀའ་ཁྱབ་དེར་ཐུག་ཡོད་པ་དང་། བཙན་བྱོལ་བོད་མིའི་བཅའ་ཁྲིམས་ལེའུ་གཉིས་པ། དོན་ཚན་ ༡༡ པ་༼འོས་བསྡུ་དང་འོས་གཞིའི་ཐོབ་ཐང་༽ དེ་བཞིན་གཞི་རྩའི་ཐོབ་ཐང་དང་། ལས་འགན་ལ་གནོད་འགལ་ཆགས་ཀྱི་ཡོད་པའི་སྐོར་གྱོད་ཡའི་ངོ་ཚབ་ནས་གསལ་བཤད་བྱས།
༤། བདེ་སྙན་པས་འདོན་འབུལ་བྱས་པའི་ཡིག་དངོས་ཐོ་གཞུང་ནང་གསལ་གྱི་ཟུཪ་སྦྱཪ་ ༡ ནས་ ༣ བཪ་གྱི་ཡིག་ཆ་ཁག་ཁ་མཆུ་ཞུ་སྦྱོར་དེབ་འགོད་ཨང་ ༢༢ ཀྱི་གྱོད་ཡས་འདོན་འབུལ་ཡིག་དངོས་ཐོ་གཞུང་ནང་གསལ་དང་གཅིག་མཚུངས་རེད་འདུག་པ་བཅས་ལ་བརྟེན།
ཁྱེད་ཅག་གི་བདེ་སྙན་ཕྱི་ལོ་ ༢༠༢༦ །༥།༢༦ འཁོད་པ་དང་ཁ་མཆུ་ཞུ་སྦྱོར་དེབ་འགོད་ཨང་ ༢༢ ཀྱི་ངོ་བོ་དང་། རྐྱེན་རྩ། དགོས་འདུན་བཅས་པ་གཅིག་པ་ཆགས་ཀྱི་འདུག་པས། ཁྱེད་ཅག་བདེ་སྙན་པ་ཐུན་མོང་གི་ཞུ་གཏུག་ཐོབ་ཐང་སྲུང་སྐྱོབ་ཆེད་སྤྱི་མང་ཁྲིམས་ཡིག་དོན་ཚན་ ༡༩ [ཀ] པའི་དགོངས་དོན་ཁ་མཆུ་ཞུ་སྦྱོར་དེབ་འགོད་ཨང་ ༢༢ ནང་གྱོད་ཡ་སྣོན་མའི་ངོ་བོ་ཐོག་ནས་ཞུ་གཏུག་བྱེད་ན་འཐུས་རྒྱུ་དང་། རྐྱེན་རྩ་གཅིག་ལ་ཞུ་རྩོད་གཅིག་ལས་མང་བ་ཆགས་པ་ཡིན་ན། ཁྲིམས་ཡིག་གི་བྱ་རིམ་ཚུལ་མིན་དུ་ཆགས་ཉེན་ལ་སོང་། སྤྱི་མང་ཁྲིམས་ཡིག་དོན་ཚན་ ༨༨ དགོངས་དོན་བདེ་སྙན་དེབ་འགོད་ཨང་ ༡ དེ་བཞིན་ངོས་བཞེས་བརྩི་མེད་སོང་བའི་ཐག་གཅོད། ཅེས་གསལ་ཡོད།
གསར་འགོད་པ། དཔལ་ལྡན།
