སྤྱི་འཐུས་ཚོགས་གཙོ་མཆོག་གིས་སྐུ་ཞབས་རོ་བྷེ་ཊི་ཐོར་མན་ལགས་ཀྱི་ཤུལ་ལུས་ནང་མིར་ཐུགས་གསོ་གནང་།  

སྐབས་བཅོ་བརྒྱད་པའི་བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས་ནང་དོན་རིག་པའི་མཁས་པ་དང་སློབ་དཔོན་ཆེན་མོ་སྐུ་ཞབས་རོ་བྷེ་ཊི་ཐོར་མན་ལགས་དགུང་ལོ་  ༨༤ ཐོག་སྐུ་གྲོངས་པར་ཐུགས་གསོའི་འཕྲིན་ཡིག་ཕུལ།

ཕྱི་ཚེས་ ༡༦ ཉིན་བོད་ཀྱི་ནང་དོན་རིག་པའི་མཁས་དབང་དང་༧གོང་ས་རྒྱལ་བ་རིན་པོ་ཆེ་མཆོག་གི་གྲོགས་པོ་སྐུ་ཞབས་རོ་བྷེ་ཊི་ཐོར་མན་( Robert Thurman ) ལགས་དགུང་ལོ་ ༨༤ ཐོག་སྐུ་གྲོངས་ཡོད་སྟབས། དེ་རིང་སྐབས་བཅོ་བརྒྱད་པའི་བིད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས། འདས་པོ་ཁོང་གི་བཟའ་ཟླ་ནེ་ནཱ་( Nena Von Schlebrugge) ལགས་ཀྱི་མཚན་ཐོག་ཏུ། ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེད་ཀྱི་སེམས་གསོའི་འཕྲིན་ཡིག་ཅིག་ཕུལ་འདུག

འཕྲིན་ཡིག་ནང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས། སྐུ་ཞབས་ཁོང་གིས་བོད་མི་རྣམས་ལ་རྒྱབ་སྐྱོར་གནང་བ་དང་། ༧གོང་ས་རྒྱལ་བ་རིན་པོ་ཆེ་མཆོག་དང་འབྲེལ་ལམ་དམ་ཟབ་ཡོད་སྟབས། ཁོང་ནི་རིག་གཞུང་ཕན་ཚུན་གྱི་འབྲེལ་ལམ་དང་། ཞི་བདེ། དྲང་བདེན། དེ་བཞིན་འགྲོ་བ་མིའི་ཆེ་མཐོང་སོགས་སྟོབས་ཤུགས་ལྡན་པའི་འབོད་སྒྲ་ཞིག་ཡིན། ཞེས་གསུངས་འདུག

ཡང་འཕྲིན་ཡིག་ནང་། ང་ཚོས་ཁོང་སྐུ་གཤེགས་པར་མྱ་ངན་ཞུ་བ་དང་ཆབས་ཅིག ཁོང་གིས་སྦྱང་བརྩོན་དང་། ཞབས་ཕྱི། འགྲོ་བ་མིའི་བསམ་བློའི་དཔལ་ཡོན་བཅས་རྒྱུན་འཛིན་བྱས་པ་ནི་ཡི་རངས་ཞུ་དགོས་པ་ཞིག་ཡིན། ཁོང་གི་མཛད་རྗེས་ཀྱིས་མཁས་དབང་རྣམ་པ་དང་། ཆོས་ལུགས་ཀྱི་ཉམས་ལེན་པ། བྱམས་བརྩེ་ལྡན་པའི་འཛམ་གླིང་ཞིག་བསྐྲུན་འདོད་མཁན་ཡོངས་ལ་སེམས་ཤུགས་ཤིག་བསྩལ་ངེས་ཡིན། ངས་བོད་མི་མང་སྤྱི་འཐུས་སྐབས་བཅོ་བརྒྱད་པ་དང་། འཛམ་གླིང་ས་ཕྱོགས་གང་སར་ཡོད་པའི་བོད་མི་རྣམས་ཀྱི་ཚབ་ཞུས་ཏེེ། འདས་པོ་ཁང་གི་ཤུལ་ལུས་ནང་མི་དང་། གྲོགས་པོ། སློབ་མ། ཡིད་སྨོན་བྱེད་མཁན་ཡོངས་ལ་གདུང་སེམས་མཉམ་སྐྱེད་ཞུ། ཞེས་གསུངས་འདུག

དེ་བཞིན། རྒྱ་གར་གྱི་སྲིད་བློན་མུ་དྷི་མཆོག་གི་ཨེག་སི་སྤྱི་ཚོགས་དྲ་ལམ་སྟེང་གི་ཐུགས་གསོའི་འཕྲིན་ཡིག་ནང་། བོད་ཀྱི་རིག་གནས་དང་ཆོས་ལུགས་ལ་མཁས་པའི་མི་སྣ་གྲགས་ཅན་སྐུ་ཞབས་རོ་བྷེ་ཊི་ཐོར་མན་ལགས་སྐུ་གཤེགས་པར་སེམས་པ་ཧ་ཅང་སྐྱོ་བོ་བྱུང་། ཁོང་ནི་རྒྱ་གར་གྱི་གྲོགས་པོ་རྙིང་པ་ཞིག་ཀྱང་ཡིན། ཁོང་གི་བརྩམས་ཆོས་བརྒྱུད་ནས་ནང་པའི་ལྟ་གྲུབ་འཛམ་གླིང་ཡོངས་ལ་དར་སྤེལ་བྱས་པ་མ་ཟད། རིག་གནས་ཕན་ཚུན་དབར་གོ་རྟོགས་ཀྱི་ཟམ་པ་བརྟན་པོ་ཞིག་ཀྱང་བཙུགས་ཡོད། ལོ་འགའི་སྔོན་ལ་ང་ཁོང་དང་ནེའུ་ཡོག་གྲོང་ཁྱེར་དུ་ཐུག་འཕྲད་འབྱུང་སྐབས། ང་ཚོའི་དབར་ལ་སྐད་ཆ་ཡག་པོ་ཞིག་བྱུང་བ་དེ་ངས་ད་ལྟའང་དྲན་གྱི་འདུག ངའི་སེམས་པ་ཁོང་གི་ནང་མི་དང་གྲོགས་པོ། ཡིད་སྨོན་བྱེད་མཁན་ཚོ་དང་མཉམ་དུ་ཡོད། ཅེས་གསུངས་འདུག

སྐུ་ཞབས་རོ་བྷེ་ཊི་ཐོར་མན་ལགས་ནི། རྩོམ་པ་པོ་དང་། བོད་ཀྱི་ནང་དོན་རིག་པའི་མཁས་དབང་། སློབ་དཔོན་ཆེན་མོ། ༧གོང་ས་རྒྱལ་བ་རིན་པོ་ཆེ་མཆོག་གི་གྲོགས་པོ་དང་ཨ་རིའི་བོད་ཁང་གི་འགན་འཛིན་ཡིན། ཕྱི་ལོ་ ༡༩༩༧ ལོར་ཁོང་ཨ་རིའི་ཤུགས་རྐྱེན་ཅན་གྱི་མི་སྣ་ཉི་ཤུའི་ནང་དྲག་འདེམས་བྱུང་བ་དང་། ཕྱི་ལོ ༢༠༠༣ ལོར་རྒྱལ་སྤྱིའི་བོད་དོན་ལས་འགུལ་ཁང་གིས་ཁོང་ལ་བདེན་པའི་འོད་སྣང་གི་གཟེངས་རྟགས་ (Light of Truth Award) ཞེས་པའི་འགྲོ་བ་མིའི་ཐོབ་ཐང་སྲུང་སྐྱོབ་དང་འབྲེལ་བའི་ཆེས་མཐོའི་གཟེངས་རྟགས་ཤིག་ཕུལ། ཕྱི་ལོ་ ༢༠༠༦ ལོར་ནེའུ་ཡོག་ཚགས་ཤོག་གི་ཆོས་ལུགས་ཐད་ནས་ཤུགས་རྐྱེན་ཆེ་ཤོས་ཀྱི་མི་སྣར་མཚན་འདོན་བྱས། ཕྱི་ལོ་ ༢༠༢༠ ལོར་རྩོམ་རིག་དང་ཤེས་ཡོན་ཐོག་རྒྱ་གར་གྱི་ཆེས་མཐོའི་པདྨ་ཤྲི་གཟེངས་རྟགས་ཐོབ།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།