ཟླ་འདིའི་ཕྱི་ཚེས་ ༢༡ ཉིན་ཁྲིམས་ཞིབ་པ་ཆེ་བ་ཟུར་པ་རྒན་ཆེན་པ་ངག་དབང་འཕེལ་རྒྱས་མཆོག་སྐུ་ཚེ་མ་ཟིན་པའི་གནས་ཚུལ་ཐོན་འདུག་པ་དང་། དེ་རིང་ཉིན་རྒྱབ་ཏུ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཡོངས་ནས་དམ་པ་ཁོང་ལ་རྗེས་དྲན་གྱི་མཆོད་འབུལ་སྨོན་ལམ་འཚོགས་རྗེས། མྱ་ངན་གུས་འདུད་མཚོན་སླད་ལས་མཚམས་བཞག་སོང་།
བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིིམས་ཞིབ་པ་ཆེ་བ་ཟུར་པ་རྒན་ཆེན་པ་ངག་དབང་འཕེལ་རྒྱས་མཆོག་ཕྱི་ལོ་ ༡༩༥༢ ལོར་བོད་མངའ་རིས་རུ་ཐོག་རྫོང་རྭ་སྤང་དུ་འཁྲུངས་པ་དང་། ཕྱི་ལོ་ ༡༩༦༠ ལོར་ལ་དྭགས་སུ་བཙན་བྱོལ་དུ་ཕེབས། ཕྱི་ལོ་ ༡༩༦༣ ལོར་བཞུགས་སྒར་རྡ་རམ་ས་ལ་དང༌། ཀང་ར་ཟུར་གསོག་སློབ་གྲྭ་བརྒྱུད་མ་སུ་རི་གཏན་སློབ་ཏུ་འཛུལ་ཞུགས་གནང་ནས་ཕྱི་ལོ་ ༡༩༧༢ ལོར་འཛིན་རིམ་བཅུ་གཅིག་གི་བསླབ་པ་མཐར་སོན། སློབ་གྲྭར་སློབ་སྦྱོང་གནང་རིང་ཁང་ཚན་རྒན་བདག་ལོ་བཞི་དང་། སྤྱི་ཁྱབ་རྒན་བདག་ཨང་དང་པོའི་ལས་འགན་ལོ་གསུམ་བཞེས་ཞོར་དུ་ས་གནས་གཞོན་ནུའི་རིག་གཞུང་འབྲེལ་མཐུད་པའི་ལས་ཁུར་བཞེས་ཡོད། སློབ་གྲྭ་ཐོན་རྗེས་ལྡི་ལིར་ལོ་གཅིག་རིང་དྲུང་ཡིག་གི་སློབ་སྦྱོང་གནང༌ཡུན་རིང་ལྡི་ལི་ས་གནས་གཞོན་ནུའི་རྩིས་པ་དང་འབྲེལ་མཐུད་པའི་འགན་བཞེས། ཕྱི་ལོ་ ༡༩༧༤ ཟླ་ ༧ ཚེས་ ༡༦ ཉིན་སྲི་ཞུ་བའི་ཁོངས་སུ་འཛུལ་ཞུགས་གནང་སྟེ་དཔལ་འབྱོར་ལས་ཁུངས་ཀྱི་གཞོན་དྲུང་དང་། ཕྱི་ལོ་ ༡༩༧༥ ལོར་ནང་སྲིད་ཁྱབ་ཁོངས་སྒང་ཏོག་དོན་གཅོད་ཁང་གི་ལས་དྲུང་དུ་བསྐོ་གཞག་གནང༌། དུས་ཡུན་དེའི་རིང་ལས་ཞོར་དུ་སློབ་སྦྱོང་མཇུག་སྐྱོང་གིས་ཅན་ངྷི་གྷར་གཙུག་ལག་སློབ་གཉེར་ཁང་དུ་ཡིག་འགྲུལ་ལམ་ནས་བྷི་ཨེ་ (B.A) བསླབ་པ་མཐར་སོན།
ཕྱི་ལོ་ ༡༩༨༣ ལོར་རྭ་སྦང་ལ་ཀུན་ཕན་གླིང་གཞིས་ཆགས་ཀྱི་ལས་དྲུང་ལོ་གཅིག་དང་གཞིས་མགོའི་ལས་ཚབ་ལོ་གཅིག་ལྷག་ཙམ་གནང༌། གཞིས་མགོ་དང་། མཉམ་དྲུང་། བཟོ་མགོ་བཅས་གཅིག་ལྕོགས་ཀྱི་ལས་ཁུར་བླངས། ཕྱི་ལོ་ ༡༩༩༣ ཟླ་ ༢ པའི་ནང་རྡོར་གླིང་གཏན་སློབ་ཀྱི་བོད་རིགས་སློབ་སྤྱིར་གནས་སྤོས་བསྐོ་གཞག་གནང་། ཕྱི་ལོ་ ༡༩༩༧ ཟླ་ ༣ པའི་ནང་བོད་གཞུང་འཕྲོད་བསྟེན་ལས་ཁུངས་ཀྱི་ཟུང་འབྲེལ་དྲུང་ཆེར་བསྐོ་གཞག་གིས་འཛིན་སྐྱོང་གི་ལས་འགན་བཞེས་པ་དང་། མི་རིང་བར་ཕྱི་དྲིལ་ལས་ཁུངས་སུ་གནས་སྤོས་གནང་སྟེ་འཛིན་སྐྱོང་ལས་ཁུར་གནང་། ཕྱི་ལོ་ ༡༩༩༨ ཟླ་ ༡༡ ནང་ཨ་རིའི་སྐུ་ཚབ་དོན་གཅོད་ཁང་གི་དྲུང་ཆེར་བསྐོ་གཞག་གནང་སྟེ་ལས་ཁུར་བཞེས་ཡོད། ཕྱི་ལོ་ ༢༠༠༢ ཕྱི་ཟླ་ ༥ པའི་ནང་དྲུང་ཡིག་ཆེན་མོར་གནས་སྤར་གྱིས་ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་ཁྲིམས་དྲུང་དུ་བསྐོ་གཞག་གནང་། ཕྱི་ལོ་ ༢༠༠༤ ཟླ་ ༤ པའི་ནང་འཆར་འབུལ་ཕྱག་རྟགས་དགོངས་དོན་བཞིན་མ་སུ་རི་བོད་ཁྱིམ་དྲུང་ཆེར་བསྐོ་གཞག་གནང་། ཕྱི་ལོ་ ༢༠༠༥ ཟླ་ ༡༢ ཚེས་ ༡༦ ཉིན་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་ལས་ཁུར་དམ་འབུལ་བཞེས་པ་དང་། ཕྱི་ལོ་ ༢༠༠༩ ཟླ་ ༡༠ ཚེས་ ༡༦ ཉིན་ཁྲིམས་ཞིབ་པ་ཆེ་བའི་ལས་ཁུར་དམ་བཅའ་འབུལ་བཞེས་ཀྱིས་ཕྱི་ལོ་ ༢༠༡༤ ཟླ་ ༡༠ ཚེས་ ༡༥ ཉིན་ཁྲིམས་ཞིབ་པ་ཆེ་བའི་ལས་ཡུན་ལོ་ ༥ ཧྲིལ་པོ་ཚང་སྟེ་བགྲེས་ཡོལ་དུ་ཕེབས།
གསར་འགོད་པ། སྐལ་བཟང་སྦྱིན་པ།
