ཉེ་ལམ་ཨ་རིས་རྒྱ་ནག་གི་བཟོ་ཚོང་ཁང་གསུམ་ལ་བཀག་སྡོམ་གྱི་ཉེས་ཆད་བཅད་པར་བརྟེན། དེ་རིང་རྒྱ་ནག་གིས་ཨ་རིའི་བཟོ་ཚང་ཁང་ ༥༦ ལ་ཉོ་ཚོང་བཀག་སྡོམ་དང་འབྲེལ་བའི་ཉེས་ཆད་བཏང་བ་ཡོངས་བསྒྲགས་བྱས་འདུག
ཉེ་ཆར་ཨ་རིས་རྒྱ་ནག་གི་བཟོ་ཚོང་ཁང་ཆེ་གྲས་ཨ་ལི་བྷ་བྷ་དང་བྷའེ་ཌུ་ (Baidu) སོགས་བཀག་སྡོམ་བྱས་ཡོད་པར་བརྟེན། དེ་རིང་ཕྱི་ཚེས་ ༢༢ ཉིན་རྒྱ་ནག་གིས་ཨ་རིའི་དམག་དོན་དང་རྒྱལ་སྲུང་དང་འབྲེལ་བའི་བཟོ་ཚོང་ཁང་བཅུ་ལ་བཀག་སྡོམ་ཉེས་ཆད་བཀལ་ཏེ་རྒོལ་ལན་བསློགས་ཡོད་པ་མ་ཟད། རྒྱ་ནག་གི་བཟོ་ཚོང་ཁང་ཁག་གིས་ཨ་རིའི་བཟོ་ཚོང་ཁང་ ༤༦ གི་ཐོན་རྫས་ཉོ་ཚོང་བྱེད་མི་ཆོག་པའི་བཀའ་རྒྱ་བསྒྲགས་འདུག
དེ་འབྲེལ་རྒྱ་ནག་གི་ཚོང་དོན་ལྷན་ཁང་གིས། རྒྱ་ནག་རྒྱལ་ཁབ་ཀྱི་བདེ་འཇགས་སྲུང་སྐྱོབ་བྱེད་པ་དང་། ཨ་རིས་རྒྱ་ནག་གི་དམག་དོན་བཟོ་ཚོང་རྣམས་ཀྱི་མིང་ཐོ་ཟེར་བ་ནོར་འཁྲུལ་ངང་རྒྱ་སྐྱེད་བཏང་བ་ལ་ལན་འདེབས་བྱེད་ཆེད་ཡིན་ཞེས་དང་། ཨ་རིའི་བཟོ་ཚོང་ཁང་བཅུ་ལ་དམག་དོན་དང་དམག་དོན་མིན་པའི་བེད་སྤྱོད་གཉིས་ལྡན་གྱི་ཅ་དངོས་ཕྱིར་གཏོང་བྱེད་པར་བཀག་སྡོམ་བྱ་རྒྱུ་ཡིན་པ་མ་ཟད། རྒྱལ་ཁབ་གསུམ་པའི་ནང་ཡོད་པའི་བཟོ་ཚོང་ཁང་དང་མི་སྒེར་གྱིས་རྒྱ་ནག་གིས་བཀག་སྡོམ་བྱས་པའི་ཨ་རིའི་བཟོ་ཚོང་ཁང་དག་ལ་དམག་དོན་དང་དམག་དོན་མིན་པའི་དངོས་ཟོག་ཕྱིར་འདྲེན་བྱེད་པར་བཀག་སྡོམ་བྱ་རྒྱུ་ཡིན་ལ། རྒྱ་ནག་གི་བཟོ་ཚོང་ཁང་ཁག་གིས་དགོས་ངེས་ཅན་གྱི་ཅ་དངོས་ཕྱིར་གཏོང་བྱེད་པར་ཆོག་མཆན་ཞུ་ཆོག་གི་ཡོད་ཚུལ་སོགས་བསྒྲགས་འདུག
རྒྱ་ནག་གིས་མིང་འདོན་བྱས་པའི་ཨ་རིའི་བཟོ་ཚོང་ཁང་བཅུ་ནི། ཁ་ལི་ཧྥོར་ནི་ཡར་རྟེན་གཞི་བྱས་པའི་བཟོ་ཚོང་ཁང་ (AVEOX) དང་། ཨ་རིའི་མངའ་སྡེ་ཨུ་ཊ་ནང་གི་གྲོང་ཁྱེར་ (South Salt Lake) དུ་རྟེན་གཞི་བྱས་པའི་ (Red Cat) བཟོ་ཚོང་ཁང་དང་ (Teal) བཟོ་ལས་ཁང་། ཨུ་ཊ་རྫོང་གི་(Springville) གྲོང་ཁྱེར་དུ་རྟེན་གཞི་བྱས་པའི་བཟོ་ལས་ཁང་ (IMSAR)། ཨ་རིའི་མངའ་སྡེ་ཨིན་ལན་ཌི་གསར་པ་ནང་གི་རོ་ཌི་གླིང་ཕྲན་གྱི་གྲོང་ཁྱེར་བྷི་རི་སི་ཊོལ་ (Bristol) དུ་རྟེན་གཞི་བྱས་པའི་དམག་དོན་གྲུ་གཟིངས་དང་མཚོ་གྲུའི་བཟོ་ལས་ཁང་ (Jaia Robotics)། ཁོ་ལོ་ར་ཌོ་མངའ་སྡེའི་གྲོང་ཁྱེར་བྷོ་རོམ་ཧྥིལ་ཌི་རུ་རྟེན་གཞི་བྱས་པའི་ (Ball Aerospace & Technologies)། ཝི་སི་ཁོན་སིན་མངའ་སྡེའི་གྲོང་ཁྱེར་ཨོ་ཤི་ཀོ་ཤི་རུ་རྟེན་གཞི་བྱས་པའི་རྒྱལ་སྲུང་བཟོ་ཚོང་ཁང་ (Oshkosh)། ཝར་ཇི་ནི་ཡ་མངའ་སྡེའི་གྲོང་ཁྱེར་ནོར་ཧྥོལ་ཀི་ (Norfolk) རུ་རྟེན་གཞི་བྱས་པའི་མཚོ་གྲུ་བཟོ་ལས་ཁང་ (L3Harris)། ནེ་ཝ་ཌ་མངའ་སྡེའི་ལ་སི་ཝེ་གྷ་སི་ (Las Vegas) གྲོང་ཁྱེར་དུ་རྟེན་གཞི་བྱས་པའི་བཟོ་ལས་ཁང་ (MP Materials) དང་ཨ་རིའི་མངའ་སྡེ་ཨོཀ་ལཱ་ཧོ་མ་ནང་གི་ (USA Rare Earth) བཟོ་ལས་ཁང་བཅས་ཡིན་འདུག
ད་དུང་རྒྱ་ནག་གཞུང་འབྲེལ་ཤིན་ཧྭ་ (Xinhua) གསར་ཁང་གིས་གནས་ཚུལ་སྤེལ་བའི་ནང་། རྒྱ་ནག་གཞུང་གིས་ཨ་རིའི་དམག་དོན་དང་འབྲེལ་བའི་ཡུལ་དེའི་མངའ་སྡེ་ཨ་རི་རྫོ་ནའི་ (Arizona) ཊག་སོན་ (Tucson) གྲོང་ཁྱེར་དུ་རྟེན་གཞི་བྱས་པའི་མེ་ཤུགས་འཕུར་མདའ་དང་འགོག་སྲུང་གི་བཟོ་ལས་ཁང་ (Raytheon Missiles & Defence) དང་ཨ་རིའི་མངའ་སྡེ་མེ་རི་ལན་ཌི་ (Maryland) ནང་ཡོད་པའི་བྷེ་ཐེ་སི་ཌ་ (Bethesda) རྫོང་དུ་རྟེན་གཞི་བྱས་པའི་ཨ་རིའི་མཁའ་དབྱིངས་དང་འགོག་སྲུང་ཁག་ཐེག་བྱེད་མཁན་གྱི་བཟོ་ཚོང་ཁང་ (Lockheed Martin) ཚུད་པའི་ཨ་རིའི་བཟོ་ཚོང་ཁང་ ༤༦ གི་ཐོན་རྫས་ཉོ་སྒྲུབ་བཀག་སྡོམ་བྱ་རྒྱུ་ཡིན་སྐོར་ཡང་བསྒྲགས་འདུག
ཟླ་འདིའི་ཕྱི་ཚེས་ ༡༡ ཉིན་ཨ་རིའི་རྒྱལ་སྲུང་ལས་ཁུངས་ཀྱིས་རྒྱ་ནག་གི་ཁེ་ལས་ཁང་ཆེ་གྲས་ཨ་ལི་བྷ་བྷ་ (Alibaba) དང་། བྷའེ་ཌུ་ (Baidu)། (BYD) བཅས་ཀྱིས་རྒྱ་ནག་གཞུང་འབྲེལ་གྱི་སྡེ་ཁག་ཅིག་དང་ལྷན་དུ་མཉམ་ལས་བྱས་ཏེ། རྒྱ་ནག་གི་དམག་དོན་འཕེལ་རྒྱས་ལ་རྒྱབ་སྐྱོར་བྱེད་ཀྱི་ཡོད་པ་ར་འཕྲོད་བྱུང་སྟབས། ཨ་རིའི་ཐོ་གཞུང་ནག་པོའི་ཁུངས་སུ་བཅུག་ཡོད་འདུག་ལ། རྒྱ་ནག་གི་ཁེ་ལས་ཁང་དེ་དག་མ་འོངས་པར་ཨ་རིའི་རྒྱལ་སྲུང་དང་འབྲེལ་བའི་ཚོང་ལས་ཅི་རིགས་ནང་མཉམ་ཞུགས་ཆོག་གི་མེད་ཅིང་། ཨ་རིས་ཁྲིམས་སྒྲིག་དེ་ཟླ་འདིའི་ཟླ་མཇུག་ནས་དངོས་སུ་ལག་བསྟར་བྱ་རྒྱུ་ཡིན་པ་རེད།
ཕྱི་ལོ་ ༢༠༢༤ ཟླ་ ༡ པོའི་ནང་རྒྱ་ནག་གཞུང་གིས་ཨ་རིའི་གོ་མཚོན་དང་འབྲེལ་བའི་བཟོ་གྲྭ་ལྔ་ཡིས་ཐའེ་ཝན་ལ་གོ་མཚོན་ཕྱིར་ཚོང་བྱས་ཏེ། རྒྱ་ནག་གི་ནང་སྲིད་ལ་ཐེ་གཏོགས་བྱེད་ཀྱི་ཡོད་པའི་ངོས་འཛིན་འོག་ཉེས་ཆད་བཏང་ཡོད་འདུག གཞན་ཡང་། ཕྱི་ལོ་ ༢༠༢༡ ཟླ་ ༡༢ ནང་ཨ་རིའི་ནོར་སྲིད་ལྷན་ཁང་གིས། རྒྱ་ནག་གི་བཟོ་ཚོང་ཁང་ ༣༠ ལྷག་ཁྲིམས་འགལ་གྱི་ཐོ་ཁོངས་སུ་རྩིས་ཏེ། བཟོ་ཚོང་ཁང་དེ་དག་གིས་རྒྱ་ནག་གི་དམག་སྲིད་ལས་དོན་ལ་རམ་འདེགས་བྱེད་ཀྱི་ཡོད་པའི་སྐྱོན་བརྗོད་བྱས་ཡོད་པ་མ་ཟད། འབྱུང་འགྱུར་ཁྲིམས་འགལ་གྱི་ཐོ་གཞུང་དུ་ཚུད་པའི་རྒྱ་ནག་གི་བཟོ་ཚོང་ཁང་དེ་དག་གིས་ཨ་རིའི་ནང་ཚོང་ལས་གཉེར་མི་ཆོག་པ་དང་ཨ་རིའི་བཟོ་གྲྭ་ཁག་གིས་ཉེས་ཆད་ཕོག་པའི་རྒྱ་ནག་གི་བཟོ་གྲ་དེ་དག་ལ་ཚོང་འབྲེལ་བྱས་མི་ཆོག་པར་བཟོས་ཡོད་པ་རེད།
གནས་ཚུལ་དེའི་ཐད་རྒྱ་ནག་གཞུང་གིས། ཨ་རིས་རྒྱ་ནག་གི་འཕྲུག་རིག་བཟོ་ཚོང་ཁང་དག་བཀག་སྡོམ་བྱེད་པ་ནི་ཨ་རིའི་འཕྲུལ་རིག་བཟོ་ཚོང་ཁག་ལ་གནོད་སྐྱོན་ཆེ་བ་ལས་རྒྱ་ནག་གི་དཔལ་འབྱོར་ལ་གནོད་སྐྱེལ་ཐུབ་ཀྱི་མེད། ཨ་རིའི་བྱེད་སྟངས་དེས་རྒྱ་ནག་གི་ཁྲོམ་རའི་ཁེ་སྤོགས་ཆེན་པོ་ལེན་བཞིན་པའི་ཨ་རིའི་བཟོ་ཚོང་ཁང་དག་གི་རེ་བ་ཆུད་ཟོས་སུ་གཏོང་གི་ཡོད་ཚུལ་བཤད་འདུག ད་བར་ཨ་རིའི་རྒྱལ་སྲུང་ལས་ཁུངས་ཀྱིས་ལོ་ལྟར་ཐོ་འགོད་བྱེད་བཞིན་པའི་མིང་གཞུང་ནག་པོའི་ནང་རྒྱ་ནག་གི་ཚོང་ལས་ཁང་ ༡༨༨ བཅུག་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
