ཨ་རིས་རྒྱ་ནག་གི་མཉམ་འབྲེལ་ཞིབ་འཇུག་ལས་དོན་ལ་དོགས་ཟོན་བྱ་དགོས་པའི་བཀོད་ཁྱབ་བཏང་།

རྒྱ་ནག་གི་རྒྱལ་སྲུང་དམག་དོན་དང་འབྲེལ་བའི་སློབ་ཆེན་ཁག་གིས་ཨ་རིའི་འཕྲུལ་རིག་དང་། ཤེས་བྱའི་ཐོན་ཁུངས་རྐུ་འཁྱེར་བྱེད་པ་སོགས་བྱས་ཏེ། ཨ་རིའི་རྒྱལ་སྲིད་བདེ་འཇགས་ལ་ཉེན་ཁ་བསྐྲུན་གྱི་ཡོད་འདུག

ཨ་རིའི་རྒྱལ་སྲུང་བདེ་འཇགས་ལྷན་ཁང་ (Pentagon) གིས། ཨ་རིའི་རྒྱལ་སྲིད་བདེ་འཇགས་ལ་ཉེན་ཁ་ཆེ་བའི་ངོས་འཛིན་འོག་ཨ་རིའི་སློབ་ཆེན་ཁག་ ༣༠ ཡིས་རྒྱ་ནག་གི་ཁུང་ཙིའི་སློབ་གསོ་དང་འབྲེལ་བའི་མཉམ་ལས་གན་རྒྱ་སོགས་ལ་བསྐྱར་ཞིབ་བྱས་ཏེ། ཟླ་འདིའི་ཕྱི་ཚེས་ ༣༡ བར་བསྐྱར་ཞིབ་སྙན་ཐོ་སྤྲོད་དགོས་པའི་བཀོད་ཁྱབ་བཏང་འདུག་ལ། བཀའ་ཁྱབ་དེའི་འོག་ནས་ཨ་རི་དང་རྒྱ་ནག་གི་སློབ་ཆེན་ཁག་བར་གྱི་མཉམ་འབྲེལ་གྱི་ལས་དོན་ཁག་མཚམས་འཇོག་བྱེད་སྲིད་པ་ཞིག་ཡིན་འདུག

ཐེངས་འདིའི་ཨ་རིའི་བཀོད་ཁྱབ་དེ་ནི། ཟླ་འདིའི་ཕྱི་ཚེས་ ༡༤ ཉིན་ཨ་རིའི་ཧཱ་ཝར་ཌི་གཙུག་ལག་སློབ་ཆེན་གྱིས། རྒྱ་ནག་མི་དམངས་བཅིང་གྲོལ་དམག་དང་རྒྱ་ནག་གི་རྒྱལ་སྲུང་ལས་དོན་དང་འབྲེལ་བའི་མཉམ་ལས་གན་རྒྱ་ཁག་ལ་བསྐྱར་ཞིབ་མ་བྱས་པའི་ངོས་འཛིན་ཐུབ་པ་ལ་བརྟེན་ནས་བྱུང་ཞིང་། ཧཱ་ཝར་ཌི་སློབ་ཆེན་གྱིས་རྒྱ་ནག་གི་པེ་ཅིན་མཁའ་འགྲུལ་བཟོ་སྐྲུན་སློབ་ཆེན་དང་མི་དམངས་རྒྱལ་སྲུང་ཚན་རྩལ་གཙུག་ལག་སློབ་ཆེན། ནན་ཅིང་བཟོ་རིག་དང་ལག་རྩལ་སློབ་ཆེན། དེ་བཞིན། རྒྱ་ནག་གི་དམག་དོན་དང་འབྲེལ་བའི་སློབ་ཆེན་གཞན་དང་མཉམ་འབྲེལ་གྱིས་ཞིབ་འཇུག་ལས་དོན་གཉེར་ཡོད་པར་ཨ་རིའི་གྲོས་ཚོགས་ཀྱིས་སྐྱོན་བརྗོད་བྱས་འདུག

ཉེ་ལམ་ཨ་རིའི་རྒྱལ་སྲིད་བདེ་འཇགས་ལྷན་ཁང་གིས། ཕྱི་ལོ་ ༢༠༡༩ ལོའི་རྒྱལ་སྲུང་བདེ་འཇགས་འགན་འཁྲིའི་ཁྲིམས་ཞེས་པའི་དོན་ཚན་ ༡༢༨༦ པའི་ནང་དོན་ལག་བསྟར་འོག་རྒྱ་ནག་དང་ཨུ་རུ་སུ། ཨེ་རན་བཅས་ཀྱི་སློབ་ཆེན་ ༡༣༠ ཐོ་གཞུང་ནག་པོའི་ཁོངས་སུ་བཅུག་སྟེ། ཨ་རིས་སློབ་ཆེན་དེ་དག་ལ་མཉམ་ལས་བྱ་རྒྱུ་མཚམས་འཇོག་དགོས་སྐོར་བསྒྲགས་ཡོད། དེའི་ནང་རྒྱ་ནག་གི་སློབ་ཆེན་ ༨༨ ཡོད་འདུག་ལ། དམིགས་བསལ་རྒྱ་ནག་གི་སློབ་ཆེན་དེ་དག་གིས་ཨ་རིའི་ནང་རྣམ་པ་བསྒྱུར་བའི་ཁུང་ཙིའི་སློབ་གསོ་བསྐྱར་སྤེལ་བྱེད་བཞིན་ཡོད་པའི་འགྲེལ་བརྗོད་བྱས་འདུག

ཨ་རིའི་རྒྱལ་སྲུང་བདེ་འཇགས་ལྷན་ཁང་གིས། མཉམ་ལས་ཀྱི་སློབ་གསོའི་མིང་འོག་ནས་ཨ་རིའི་རྒྱལ་སྲིད་བདེ་འཇགས་ལ་ཉེན་ཁ་བསྐྲུན་རྒྱུར་གུ་ཡངས་ཀླད་གོར་ཡིན། ཞེས་བརྗོད་འདུག་ལ། ཐེངས་འདིའི་བཀོད་ཁྱབ་དེ་ནི་བཀའ་འཁྲོལ་མེད་པའི་ཨ་རིའི་འཕྲུལ་རིག་དང་ཤེས་བྱའི་ཐོན་ཁུངས་རྐུ་འཁྱེར་བྱེད་པ། དགྲ་ཡི་བཤུ་གཞོག་སོགས་ལ་རྒོལ་རྡུང་གཏོང་སླད་དུ་ཡིན་པ་རེད།

ཐག་གཅོད་དེ་ནི་ཨ་རིའི་གྲོས་ཚོགས་གོང་འོག་གཉིས་ཀྱི་གོ་མཚོན་ཚོགས་ཆུང་དང་། གྲོས་ཚོགས་ཀྱི་རྒྱ་ནག་དམར་ཤོག་ཚོགས་པའི་ལས་དོན་ཚོགས་ཆུང་གིས་ལམ་སྟོན་འོག་ཨ་རིའི་རྒྱལ་སྲུང་བདེ་འཇགས་ལྷན་ཁང་གིས་གཙོ་འགན་བླངས་ཤིང་། ཨ་རིའི་སློབ་ཆེན་ཁག་དང་བཟོ་གྲྭ་ཁག དེ་བཞིན་ཉམས་ཞིབ་པ་དང་ཚན་རིག་པ་སོགས་ཀྱིས། ཐོ་གཞུང་ནག་པོའི་ཁོངས་སུ་བཅུག་པའི་ཕྱིའི་རྩ་འཛུགས་ཁག་དང་མཉམ་ལས་བྱེད་པ་དང་། རོགས་དངུལ་ལེན་པ། གནས་ཚུལ་བརྗེ་རེས་སོགས་བྱེད་སྐབས་དོགས་ཟོན་ནན་མོ་བྱེད་དགོས་པའི་སྐུལ་མའང་བྱས་འདུག

ཡང་ཟླ་འདིའི་ཕྱི་ཚེས་ ༡༧ ཉིན་ཨ་རིའི་སློབ་གསོ་སྲུང་སྐྱོབ་ཁང་གིས་སྙན་ཐོ་ཞིག་བཏོན་པ་ལྟར་ན། ཨ་རིའི་སློབ་ཆེན་ཁག་ ༨༣ དང་དམའ་རིམ་ནས་མཐོ་འབྲིང་བར་གྱི་སློབ་གྲྭ་ ༢༦ གི་སློབ་མ་རྣམས་ལ་རྒྱ་ནག་དམར་ཤོག་གི་ཤུགས་རྐྱེན་ཐེབས་མུས་ཡིན་ཞིང་། དེ་ནི་ཞི་ཅིན་ཕིན་གྱི་བཀོད་འདོམས་དང་རྒྱ་ནག་ཤེས་རིག་ལས་ཁུངས་ཀྱི་ལྟ་རྟོག་འོག་རྒྱ་ནག་གི་སློབ་མ་ཨ་རིར་ཤེས་ཡོན་བརྗེ་ལེན་དང་སློབ་སྦྱོང་བྱེད་པར་མངགས་ཏེ། ཨ་རིའི་སློབ་གསོའི་ཁོར་ཡུག་ནང་རྒྱ་ནག་གི་ཁུང་ཙིའི་སློབ་གསོ་དང་ཞི་ཅིན་ཕིན་གྱི་སྤྱི་ཚོགས་རིང་ལུགས་ཀྱི་དགོངས་པ་ཟེར་བ། མར་ལེའི་རིང་ལུགས་སོགས་དམར་ཤོག་གི་སློབ་གསོའི་ཤུགས་རྐྱེན་སྤེལ་དང་སྤེལ་མུས་ཡིན་འདུག

ཨ་རིའི་རྒྱལ་ས་ཝང་ཤིན་ཊོན་དུ་ཡོད་པའི་རྒྱ་ནག་གཞུང་ཚབ་ཁང་གི་མགྲིན་ཚབ་པ་ལིའུ་ཁྲང་ཟེར་བས། ཨ་རིས་རྒྱལ་སྲིད་བདེ་འཇགས་ལ་ཁ་གཡར་ནས་སློབ་གསོ་དང་ཤེས་ཡོན་བརྗེ་རེས། རྒྱུན་ལྡན་གྱི་ཚན་རིག་གི་ཞིབ་འཇུག་སོགས་ཆབ་སྲིད་དང་ལག་ཆར་བཀོལ་སྤྱོད་གཏོང་གི་ཡོད་པའི་སྐྱོན་བརྗོད་བྱས་འདུག་པ་མ་ཟད། ཨ་རིས་གྲང་དམག་གི་བསམ་བློ་དོར་ཏེ། རྒྱལ་ཁབ་གཉིས་བར་གུ་ཡངས་དང་འདྲ་མཉམ་གྱི་ཤེས་ཡོན་བརྗེ་རེས་དང་ཚན་རིག འཕྲུལ་རིག་དང་རིག་གཞུང་གི་མཉམ་ལས་ཀྱི་ཁོར་ཡུག་བསྐྲུན་དགོས་སྐོར་ནན་ཏན་བཤད་འདུག

ཨ་རིས་ཐོ་གཞུང་ནག་པོའི་ཁོངས་སུ་བཅུག་པའི་རྒྱ་ནག་གི་སློབ་ཆེན་གྱི་ཁྲོད། ཧྥུའུ་ཏན་གཙུག་ལག་སློབ་ཆེན། ཧྲང་ཧའེ་འགྲིམ་འགྲུལ་སློབ་ཆེན། ཧྲན་ཡཱང་མཁའ་དབྱིངས་འཕུར་སྐྱོད་སློབ་གྲྭ་ཆེན་མོ། རྒྱལ་སྤྱིའི་འབྲེལ་བའི་གཙུག་ལག་སློབ་གྲྭ་ཆེན་མོ། རྒྱ་ནག་དམག་དཔུང་གི་མཉམ་འབྲེལ་ལས་དོན་རྒྱབ་སྐྱོར་དམག་དཔུང་འཕྲུལ་ལས་སློབ་གླིང་། རྒྱ་ནག་གི་པེ་ཅིན་མཁའ་འགྲུལ་བཟོ་སྐྲུན་སློབ་ཆེན་དང་མི་དམངས་རྒྱལ་སྲུང་ཚན་རྩལ་གཙུག་ལག་སློབ་ཆེན། ནན་ཅིང་བཟོ་རིག་དང་ལག་རྩལ་སློབ་ཆེན་སོགས་རྒྱ་ནག་གི་དམག་དོན་དང་རྒྱལ་སྲུང་གཉི་གར་འབྲེལ་བའི་སློབ་ཆེན་མང་དག་ཅིག་ཡོད་འདུག

གསར་འགོད་པ། སྐལ་བཟང་སྦྱིན་པ།