ཆབ་མདོ་ངག་ཕུན་གྱིས་བརྩམས།
དང་པོ། བལ་བོད་ས་མཚམས་ཀྱི་ཆུ་ལོག་གནོད་འཚེ་དང་རྒྱ་གཞུང་གིས་གནས་ཚུལ་སྦས་བསྐུངས།
ཉེ་ཆར་བལ་བོད་ས་མཚམས་སུ་གློ་བུར་དུ་ཆུ་ལོག་དང་འདམ་རྡོའི་ཆུ་རུད་ཤུགས་ཆེན་ཞིག་བྱུང་སྟེ། ས་གནས་མི་མང་གི་ཚེ་སྲོག་དང་རྒྱུ་ནོར་ཡོངས་ལ་གོད་ཆག་ཚད་མེད་བཟོས་ཡོད། འོན་ཀྱང་རྒྱ་ནག་གཞུང་གིས་དངོས་ཡོད་གནས་ཚུལ་དག་མ་བྱུང་བ་ལྟར་བཟོས་ཤིང་། གོད་ཆག་དེ་ཙམ་ཆེན་པོ་མེད་པའི་སྣང་ཚུལ་བསྐྲུན་ནས་ཛ་དྲག་གི་གནས་སྟངས་རྣམས་ཡོངས་སུ་ཕྱིར་མི་མངོན་པར་སྦས་ཐབས་བྱེད་ཀྱི་ཡོད། དངོས་ཡོད་གནས་ཚུལ་ལ། འབྱུང་ཁམས་ཀྱི་འཁྲུག་ཆ་འདི་ནི་བོད་ཀྱི་རང་བྱུང་ཁོར་ཡུག་ལ་གཏོར་བཤིག་ཚད་མེད་བཏང་བའི་ལོ་རྒྱུས་ཀྱི་རྒྱུ་འབྲས་དང་འབྲེལ་བ་དམ་པོ་ཡོད་པ་ནི་བརྗོད་མ་དགོས་པ་ཞིག་རེད།
གཉིས་པ། བོད་ཀྱི་ཁོར་ཡུག་གཏོར་བཤིག་དང་དེའི་ཕྱི་རོལ་གྱི་མཇུག་འབྲས་ངན་པ།
རྒྱ་དམར་གཞུང་གིས་བོད་ཀྱི་རང་བྱུང་ཁོར་ཡུག་ལ་ཚད་ལས་འདས་པའི་གཏོར་བཤིག་བཏང་དང་གཏོང་བཞིན་ཡོད་ཅིང་། གཏོར་བཤིག་དེའི་མཇུག་འབྲས་ངན་པ་དག་རིམ་གྱིས་ཁྱིམ་མཚེས་རྒྱལ་ཁབ་ཁག་ལའང་ཁྱབ་བཞིན་ཡོད། རྒྱ་གཞུང་གིས་”བོད་ཡར་རྒྱས་འཛུགས་སྐྲུན” ཞེས་པར་ཁ་གཡར་ནས། བོད་ནང་གི་རང་བྱུང་གཏེར་ཁ་ཚད་ལས་འདས་པ་སྔོག་འདོན་བྱས་པ་དང་། ལྷག་པར་དུ་བོད་ཀྱི་གདོད་མའི་ནགས་ཚལ་རྣམས་རྩ་མེད་དུ་གཅོད་འབྲེག་བྱེད་ཀྱི་ཡོད།
དེ་ཡང་བོད་ཀྱི་རང་བྱུང་ཁོར་ཡུག་ངོ་སྤྲོད་དང་། ད་ལྟའི་གནས་སྟངས། སྲུང་སྐྱོབ་སྐོར་ལས། “རྒྱ་ནག་གིས་བོད་ཀྱི་ཆུ་ཕྲན་མང་པོར་འབག་བཙོག་བཟོས་པ་ངོས་ལེན་བྱས་ཡོད། ཁོང་ཚོས་ཆུའི་རྒྱུགས་སྟངས་ཀྱི་སྒྲིག་གཞི་གང་ལའང་རྩིས་མེད་བྱེད་པ་དེ་ནི་བོད་ཀྱི་ཁྱིམ་མཚེས་རྒྱལ་ཁབ་ཁག་བློ་འཚབ་བྱེད་དགོས་པ་ཞིག་ཡིན། རྒྱལ་ཁབ་དེ་ཚོའི་ནང་རྒྱུགས་པའི་ཆུ་བོ་གང་ཞིག་ལ་འབག་བཙོག་ཅི་འདྲ་བཟོ་གྱི་ཡོད་པའི་སྐོར་རྩད་གཅོད་བྱེད་པའི་དབང་ཆ་རྒྱལ་ཁབ་དེ་དག་ལ་ཡོད། གལ་ཏེ་ཛ་དྲག་གི་ཐོག་ནས་འབག་བཙོག་གི་རིགས་འགོག་ཐབས་མ་བྱས་ཚེ། འགྲོ་བ་མིའི་བདེ་སྐྱིད་ཀྱི་གཞི་རྩ་ཡིན་པའི་བོད་ཀྱི་ཆུ་བོ་དེ་དག་ལ་གནོད་སྐྱོན་ཚབས་ཆེན་ཕོག་ནས་དེའི་ཕན་ནུས་ཀྱི་རང་བཞིན་མེད་པར་འགྱུར་སྲིད་པ་ཡིན།” ཞེས་གསལ་བ་ལྟར་རེད།
ང་རང་སྐྱེ་སའི་ལུང་པ་ལྟ་བུར་མཚོན་ནའང་། རྒྱ་གཞུང་གིས་ཤིང་ནགས་གཅོད་འབྲེག་བྱེད་མཁན་གྱི་ལས་ཁུངས་བཙུགས་ཏེ། དབྱར་དུས་ཐང་ཤིང་བཅད་ཅིང་། དགུན་དུས་ཤིང་ཆ་རྣམས་ངོམ་ཆུའི་ནང་གཡུགས་ནས་ཆབ་མདོ་བར་ཆུ་བསྐུར་བྱེད་ཀྱི་ཡོད། ལས་ཀ་བྱེད་མཁན་ཚང་མ་རྒྱ་མི་ཡིན་ཞིང་། ཤིང་ཆ་རྣམས་ཆབ་མདོར་འབྱོར་ལ་ཉེ་སྐབས་ཆུ་ཟུར་དུ་འཐེན་ནས་འཕྲུལ་ཆས་ཀྱིས་པང་ལེབ་བཟོས་ཏེ་རྒྱ་ནག་ཏུ་དབོར་འདྲེན་བྱེད་ཀྱི་ཡོད། སྐབས་དེར་ང་རང་ལོ་ན་ཆུང་བས་དོན་དག་དེ་དག་ལ་དོ་སྣང་མ་བྱུང་ཡང་། ད་ལྟ་བསམ་བློ་གཏོང་དུས་བོད་ཀྱི་གདོད་མའི་ཤིང་ནགས་ལ་གཏོར་སྐྱོན་ག་ཚོད་བཏང་ཡོད་མེད་གསལ་པོར་ཤེས་ཀྱི་འདུག
གསུམ་པ། ཆབ་སྲིད་བཙོན་མའི་དཀའ་སྡུག་དང་ཀོང་པོའི་གདོད་མའི་ནགས་ཚལ་གཏོར་བཤིག
ང་ཚོར་སྤུན་ཉེ་ཞིག་ཡོད་པ་ཁོང་ཆབ་མདོ་ཞི་བ་ལྷ་སྐུ་འཁོར་དང་ལྷན་དུ་ཡོད་པའི་སྐབས་དེར་རྒྱ་དམག་ལ་ཡུན་རིང་འཐབ་འཛིང་གནང་མཁན་ཞིག་ཡིན་མོད། མཐར་རྒྱ་དམག་གིས་གནམ་ས་གཉིས་ཀར་བརྟེན་ནས་འཛིན་བཟུང་བྱས་ཏེ། ཀོང་པོའི་བཙོན་ཁང་ནང་མི་ལོ་སུམ་བཅུ་ལྷག་ཙམ་ལ་དཀའ་སྡུག་མྱོང་དགོས་བྱུང་ཡོད། རྗེས་སུ་ཁོང་བཙོན་གྲོལ་ཐོབ་ནས་ནང་ལ་འབྱོར་སྐབས། བཙོན་ཁང་གི་གནས་ཚུལ་སྐོར་བཤད་མྱོང་། སྐབས་དེར་ཀོང་པོར་གདོད་མའི་ཤིང་ནགས་ཧ་ཅང་མཐུག་པོ་ཡོད་ཀྱང་། རྒྱ་གཞུང་གིས་བཙོན་པ་རྣམས་ལ་ལྟོ་གོས་ཚད་ལྡན་མ་སྤྲད་པར་ཤིང་ནགས་གཅོད་འབྲེག་གི་དྲག་ལས་བྱེད་དུ་བཅུག གདོད་མའི་མཛེས་སྡུག་ལྡན་པའི་ལུང་པ་དེ་དག་ནང་ཐང་ཤིང་རེ་ཟུང་ལས་མ་ལུས་པ་བཟོས་ཏེ། དཔེར་ན། མི་ཞིག་གི་ལུས་ཀྱི་རྒྱན་ཆ་དང་གོས་བཤུས་པ་ལྟར་བཟོས་ཡོད།
དེ་ཡང་བོད་ཀྱི་རང་བྱུང་ཁོར་ཡུག་ངོ་སྤྲོད་དང་། ད་ལྟའི་གནས་སྟངས། སྲུང་སྐྱོབ་སྐོར་ལས། “ཕྱི་ལོ་ ༡༩༤༩ ལོར་བོད་ཀྱི་གདོད་མའི་ནགས་ཚལ་གྱི་རྒྱ་ཁྱོན་ལ་སྤྱི་ལེ་གྲུ་བཞི་མ་ཉིས་འབུམ་ཉིས་ཁྲི་ཆིག་སྟོང་བརྒྱད་བརྒྱ་ (༢༢༡,༨༠༠) ཡོད་པ་དང་། ཕྱི་ལོ་ ༡༩༨༥ ལོར་ནགས་ཚལ་གྱི་རྒྱ་ཁྱོན་ལ་སྤྱི་ལེ་གཅིག་འབུམ་སུམ་ཁྲི་བཞི་སྟོང་ (༡༣༤,༠༠༠) ལས་ལྷག་མེད་པར་ཕྱེད་ཀ་ཉུང་དུ་ཕྱིན་ཡོད།” ཅེས་གསལ་བ་ལྟར་རྒྱ་གཞུང་གིས་བོད་ཀྱི་གདོད་མའི་ཤིང་ནགས་ག་ཚོད་ཅིག་གཅོད་འབྲེག་བཏང་ཡོད་པ་གསལ་པོ་རེད།
དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གིས་ཧོ་ལན་ཌེར་ཡོ་རོབ་ཁུལ་གྱི་བཙན་བྱོལ་བོད་མི་རྣམས་ལ་བསྩལ་བའི་བཀའ་སློབ་ལས། “ང་རང་ཚོའི་བོད་ཀྱི་རང་བྱུང་ཐོན་སྐྱེད་གྲས། ནགས་ཚལ་ནི་ཀོང་པོ་རྒྱུད་དང་། ཁམས་ཀྱི་ལྷོ་རྒྱུད། འབར་མ་དང་ཡུན་ནན་གྱི་བར་དང་། ཤར་རྒྱུད་ཟི་ཁྲོན་ལ་ཐུག་པའི་བར་གྱི་ནགས་ཚལ་དེ་ཚོ་འཛམ་བུ་གླིང་གི་ནགས་ཚལ་ཆེ་ཤོས་གྲས་ལ་ངོས་འཛིན་བྱེད་ཀྱི་འདུག དེ་བཞིན་བོད་དབུས་ཁུལ་ལྷོ་ཕྱོགས་རོང་མཚམས་རྣམས་ལ་ནགས་ཚལ་ཤིན་ཏུ་ཁྱོན་ཆེན་པོ་ཡོད། གྲོ་མོ་ནས་སྟོད་བར་གྱི་རོང་མཚམས་ཕལ་ཆེར་ལ་ནགས་ཚལ་མང་པོ་ཞིག་ཡོད། སྔར་ཕན་གཅོད་འབྲེག་བྱེད་མ་མྱོང་བའི་བོད་ཀྱི་སྲིད་པའི་ནགས་ཚལ་དེ་དག་ནས་རྒྱ་མིས་ཤིང་ཆ་རྒྱ་ནག་ལ་ཊག་འཁོར་དང་། ཆུ་ཐོག་ནས་འོར་འདྲེན་གང་འདྲ་བྱས་མི་འདུག་གམ། རྒྱ་ནག་ནང་ལ་ཤིང་ཆའི་མཐུན་རྐྱེན་དཀོན་པོ་ཡིན་སྟབས་བོད་ནས་རྒྱ་ནག་ཏུ་ཕྱིར་ལོག་བྱེད་མཁན་གྱི་རྒྱ་མི་ཚོས་པང་ལེབ་ཀྱི་སྒམ་ཆེན་བཟོས་ནས་དེའི་ནང་ལ་སྒམ་གཅིག་དང་། དེའི་ནང་ལ་སྒམ་གཅིག་དེའི་ནང་ལ་ཡང་སྒམ་གཅིག་བྱས་ནས་གང་ལྟར་ཊག་གིས་ཁྱོགས་ཚད་ག་ཚོད་དབོར་འགྲོ་གི་འདུག” ཅེས་བཀའ་སྩལ་བ་ལྟར་རེད།
སྐབས་དེ་དུས་བཙོན་པ་རྣམས་ལ་ཉིན་མོ་ངལ་རྩོལ་དང་མཚན་མོར་ཆབ་སྲིད་སློབ་གསོ་བཏང་ནས་དཀའ་སྡུག་མྱོང་བཅུག་པས། དཀའ་སྡུག་དེ་འདྲ་མྱོང་བ་ལས་མགྱོགས་མྱུར་ཐར་ན་བསམ་པའི་བསམ་བློ་ཡང་འཁོར་མྱོང་ཡོད་པར་བཤད། སྐབས་རེར་བཙོན་པ་འགའ་རེས་བཙོན་སྲུང་མཉམ་དུ་དྲུད་ནས་གཡང་གཟར་ནས་མཆོང་སྟེ་རང་སྲོག་བཅད་པའི་གནས་ཚུལ་ཡང་བྱུང་ཡོད།
དེ་ཡང་མདོ་ཁམས་ཤོ་ལྷོ་ཁུལ་གྱི་བྱུང་བ་མདོར་བསྡུས་སུ་བརྗོད་པ་ཐོག་མའི་སྐུལ་བྱེད་བུང་བུའི་སྒྲ་དབྱངས་ཞེས་བྱ་བ་ལས། “ཕྱོགས་གཞན་ཞིག་ནས་བཤད་ན་མི་ཚང་མ་གཡས་གཡོན་ཀུན་ཏུ་རང་སྲོག་རང་གིས་བརླགས་པ་དང་། ལྟོགས་ཤི་ཐེབས་པ། དམར་གསོད་གཏོང་བ་སོགས་སྡུག་བསྔལ་མི་ཟད་པའི་དམྱལ་བ་ནང་བཞིན་བཙོ་བསྲེགས་བཅད་གསུམ་དང་། ཁའི་འཐབ་འཛིང་། ཕན་ཚུན་དགག་པའི་དར་འཕྱར། རྒྱོབ། གསོད་ཀྱི་རང་སྒྲ་ཆེས་ཆེར་སྒྲོགས་ཏེ་མིའི་མིག་ལ་དམྱལ་བའི་སྡུག་བསྔལ་མཐོང་བ་འདི་འདྲ་རེད་ཨང་སེམས་པ་དང་། རང་གི་བསམ་པར་གང་ལྟར་གསོན་པོར་གནས་རྒྱུ་ནི་བྱ་ཐབས་བྲལ། འོན་ཀྱང་ཐབས་ཇི་འདྲ་བ་ཞིག་བརྒྱུད་ནས་ཤི་ན་ཨེ་དྲག་བསམ།” ཞེས་གསལ་བ་ལྟར་སྐབས་དེ་དུས་བོད་ཀྱི་ཆབ་སྲིད་བཙོན་པ་རྣམས་ལ་དཀའ་སྡུག་གང་འདྲ་ཞིག་མྱོང་དགོས་བྱུང་ཡོད་པ་གསལ་བོ་རེད།
དེ་བཞིན་བོད་ནང་གཏེར་ཁ་སྔོག་འདོན་གྱི་ལས་འགུལ་ཤུགས་ཆེན་དབང་གིས་བོད་ཀྱི་རང་བྱུང་ཁོར་ཡུག་ལ་གནོད་སྐྱོན་ཆེན་པོ་ཞིག་བཏང་དང་གཏོང་བཞིན་ཡོད། དེ་ཡང་ ༡༩༩༣ ཟླ་ ༦ པ་ཙམ་ནས། མཚོ་སྔོན་ཁོངས་ཀྱི་རྩེ་ཁོག་རྫོང་སྟོབས་ལྡན་ཞང་(ཡུལ་ཚོ་)ཁེ་རིའི་ཆུ་རྔའི་གསར་རྡེའུ་ཞེས་པའི་ས་ཆར། རྒྱ་མི་ཁྲི་ ༢༠ ཡོང་སྟེ་ས་ཆ་ཉོས་ནས་གསེར་བརྐོས་ཏེ་རིན་འབབ་རྒྱ་གཞུང་ལ་འབུལ་གྱི་ཡོད་འདུག རེབ་ཀོང་ཞོ་འོང་དུའང་རྒྱ་མི་ ༢༠༠ ནས་ ༣༠༠ བར་གྱིས་གསེར་སྔོག་འདོན་བྱེད་ཀྱི་ཡོད་པ་དང་། གསེར་གྱི་བཟོ་གྲྭ་རེབ་ཀོང་རྫོང་ཐོག་ཏུ་ཡོད་འདུག་པ་ལྟར། རྒྱ་གཞུང་གིས་བོད་ཀྱི་ས་ཆ་ནས་གཏེར་ཁ་ཚད་མེད་སྔོག་འདོན་བྱེད་ཀྱི་ཡོད་པ་མ་ཟད། བོད་ཀྱི་རྩྭ་ཐང་མང་པོ་འཕྲོ་བརླག་ཏུ་གཏོང་གི་ཡོད།
བཞི་པ། གཙང་པོ་བཀག་འགོག་དང་ཧི་མ་ལ་ཡའི་རི་རྒྱུད་ཀྱི་ཉེན་ཁ།
དེང་སྐབས་རྒྱ་དམར་གཞུང་གིས་བོད་ཀྱི་གཙང་པོ་རྣམས་བཀག་ནས་ཆུ་མཛོད་ཆེན་པོ་རྒྱག་བཞིན་ཡོད་པས། བོད་ཀྱི་ས་གཤིས་དང་ཁོར་ཡུག་ལ་གནོད་སྐྱོན་ཆེན་པོ་ཐེབས་ཀྱི་ཡོད། ལྷག་པར་དུ་གཙང་པོའི་གཡས་གཡོན་དུ་གནས་པའི་ཞིང་འབྲོག་མང་ཚོགས་ལ་གནོད་འཚེ་ཆེན་པོ་འཕོག་བཞིན་ཡོད། བོད་ཀྱི་གཙང་པོ་དེ་དག་ཕྱོགས་གཉིས་རི་བོ་མཐོན་པོ་ཅན་གྱི་ལུང་གཤོངས་ནས་བཞུར་བཞིན་ཡོད་པས། གལ་སྲིད་ས་རུད་དང་རི་ལྡེབས་ཉིལ་ནས་གཙང་པོ་འགག་པ་ཡིན་ན། ཟུར་གྱི་གྲོང་སྡེ་མང་པོ་ཆུས་འཁྱེར་རྒྱུ་ཡིན་པ་ནི་བལ་བོད་ས་མཚམས་ཀྱི་ཆུ་རུད་དེ་ལས་གསལ་པོར་ཤེས་ཐུབ།
དེ་ཡང་བོད་ཀྱི་རང་བྱུང་ཁོར་ཡུག་ངོ་སྤྲོད་དང་། ད་ལྟའི་གནས་སྟངས། སྲུང་སྐྱོབ་སྐོར་ལས། “ཕྱི་ལོ་ ༡༩༧༧ ལོའི་སྔོན་དུ་གྲོ་མོར་ཤིང་གཅོད་རུ་ཁག་འདྲ་མིན་ ༣༠ ལྷག་ཙམ་ཡོད་པ་དེ་དག་གིས་གདོད་མའི་ནགས་ཚལ་ལ་རང་སྣང་གང་ཤར་གྱི་སྒོ་ནས་གཞི་རྒྱ་ཆེ་བའི་གཅོད་འབྲེག་གི་བྱ་བའི་འདུ་འགོད་ལ་ཞུགས་པས། གཅོད་འབྲེག་བྱས་པའི་ནགས་ཤུལ་གྱི་རྒྱ་ཁྱོན་ཀུང་ཅིང་ (ཧེག་ཊར) ༡༦,༤༠༠ ལྷག་ཟིན་པ་དང་། ནགས་ཚལ་གྱི་སྐྱེ་དངོས་ཚོམ་བུར་ཡ་ང་བའི་གནོད་འཚེ་ཕོག་པ་མ་ཟད། སྐྱེ་དངོས་ཁོར་ཡུག་ཀྱང་དོ་མི་མཉམ་པར་གྱུར་སྟབས། ལོ་རབས་བདུན་ཅུར་སླེབས་ནས་བཟུང་ནགས་ཁུལ་དུ་དེ་སྔ་བྱུང་མྱོང་མེད་པའི་བྱེ་རླུང་ལྡང་འགོ་བཙུགས་ཡོད། དྲག་ཆར་བསྟུད་མར་བབས་པ་དང་། གནམ་གཤིས་གྲང་དུ་སོང་བ། སྔར་ཆུ་ལོག་གི་མིང་ཙམ་ཡང་ཐོས་རྒྱུ་མེད་པའི་གྲོ་མོར་གྲོ་མོ་གཙང་པོའི་ཆུ་ལོག་བྱུང་བ། ས་བརྡིབས་དང་། འདམ་རྡོའི་ཆུ་རུད་སོགས་རྒྱུན་མི་ཆད་པར་ཐོན་ནས་མི་དམངས་ཀྱི་ཚེ་སྲོག་དང་རྒྱུ་ནོར་ལ་གནོད་སྐྱོན་ཚབས་ཆེ་བཟོས་ཡོད།” ཅེས་གསལ་བ་ལྟར་བོད་ཀྱི་རང་བྱུང་ཁོར་ཡུག་ལ་གནོད་སྐྱོན་དེ་འདྲ་བཏང་བའི་དབང་གིས་ཆུ་ལོག་དང་། ས་བརྡིབས་པ། འདམ་རྡོའི་ཆུ་རུད་རྒྱུན་མི་ཆད་པར་ཡོང་ནས་བོད་མི་རྣམས་ལ་གནོད་འཚེ་ཆེན་པོ་ཐེབས་བཞིན་ཡོད།
ད་དུང་རྒྱ་གཞུང་གིས་བསམ་ཤེས་མེད་པར་བོད་ཀྱི་རང་བྱུང་ཁོར་ཡུག་ལ་གནོད་སྐྱོན་གཏོང་བཞིན་ཡོད། གང་ལྟར་རྒྱ་གཞུང་གིས་དཔལ་འབྱོར་ཁེ་ཕན་དང་ཆབ་སྲིད་དམིགས་ཡུལ་ཁོ་ན་གཙོ་བོར་འཛིན་པ་ལས། མ་འོངས་པའི་ཁོར་ཡུག་དང་མི་མང་གི་ཚེ་སྲོག་ལ་ལྟ་རྟོག་བྱེད་ཀྱི་མེད། བོད་མཐོ་སྒང་གི་ཁོར་ཡུག་ནི་བོད་རང་གི་གནས་སྟངས་གཅིག་པུ་མ་ཡིན་པར། ཤར་ཨེ་ཤ་ཡ་དང་ཧི་མ་ལ་ཡའི་རི་རྒྱུད་ཀྱི་ཁྱིམ་མཚེས་རྒྱལ་ཁབ་མང་པོའི་ཁོར་ཡུག་དང་འབྲེལ་བ་དམ་པོ་ཡོད། དེར་བརྟེན་ད་ལྟ་ནས་བོད་ཀྱི་ཁོར་ཡུག་ལ་དོ་སྣང་མ་བྱས་ཚེ། མ་འོངས་པར་ཁྱིམ་མཚེས་རྒྱལ་ཁབ་ཚོར་ཡང་འབྱུང་བ་འཁྲུག་པའི་འཇིག་པ་ཆེན་པོ་འཕྲད་རྒྱུ་ཡིན་པ་ཐག་ཆོད་རེད།
ལྔ་པ། སྲིད་གཞུང་གཉིས་ཀྱི་བྱེད་སྟངས་མི་འདྲ་བའི་བསྡུར་བ།
ཐེངས་འདིའི་ཆུ་རུད་གནོད་འཚེའི་ཁྲོད་སྲིད་གཞུང་གཉིས་ཀྱི་བྱེད་སྟངས་ལས་དངོས་ཡོད་གནས་ཚུལ་གསལ་པོར་ཐོན་ཡོད། བལ་ཡུལ་གཞུང་གིས་འཛུགས་སྐྲུན་ལས་མི་མང་གི་ཚེ་སྲོག་གཙོ་བོར་བཟུང་སྟེ། ཉིན་མཚན་མེད་པར་མིའི་ཚེ་སྲོག་སྐྱོབ་ཐབས་ཀྱི་ནུས་ཤུགས་ཡོད་ཚད་བཏོན་ཡོད། རྒྱལ་ཁབ་གཞན་ལ་གནས་ཚུལ་དྲང་མོ་བསྟན་ཞིང་། ཉིན་རེར་མིའི་ཚེ་སྲོག་ག་ཚོད་ཤོར་ཡོད་མེད་དང་ག་ཚོད་སྐྱོབ་ཐུབ་ཡོད་མེད་ཕྱི་གསལ་ནང་གསལ་བྱས་ཡོད།
དེ་ལས་ལྡོག་སྟེ་རྒྱ་ནག་གཞུང་གིས་ “མི་མང་ནི་ང་ཚོའི་སྲོག་ཤིང་ཡིན” ཞེས་བཤད་ཀྱང་། དངོས་ཡོད་ཐོག་མིའི་ཚེ་སྲོག་ལས་ཆབ་སྲིད་ཀྱི་གདོང་འབག་དང་འཛུགས་སྐྲུན་གཙོ་བོར་འཛིན་གྱི་ཡོད། ཁོ་ཚོས་མི་གསུམ་ལས་ཚེ་སྲོག་ཤོར་མེད་ཚུལ་བཤད་ཀྱང་། སྐྱིད་རོང་འགག་སྒོ་གཅིག་པུའི་ནང་མི་མང་པོའི་ཚེ་སྲོག་ཤོར་བ་བརྙན་ཐུང་ཁག་ལས་མཐོང་རྒྱུ་འདུག རྒྱ་གཞུང་གིས་བོད་ནང་ལྟ་སྲུང་བརྙན་མིག་ (CCTV) མང་པོ་བཙུགས་ཡོད་ཀྱང་། དངོས་ཡོད་གནས་ཚུལ་རྣམས་ཕྱི་ལ་མ་ཁྱབ་པར་བཀག་འགོག་བྱེད་ཀྱི་ཡོད།
མཇུག་གི་གཏམ།
གནས་ཚུལ་འདི་དག་ལས་རྒྱ་ནག་གཞུང་གིས་བོད་ནང་ཆབ་སྲིད་ངན་པ་གང་འདྲ་ཞིག་འཁྲབ་ཀྱི་ཡོད་མེད་དང་། རང་ཉིད་ཀྱི་ཁེ་ཕན་ཆེད་དུ་མི་མང་གི་ཚེ་སྲོག་དང་། རང་བྱུང་ཁོར་ཡུག་ལ་སྣང་ཆུང་གང་འདྲ་བྱེད་ཀྱི་ཡོད་མེད་གསལ་པོར་ཤེས་རྟོགས་ཐུབ་ཀྱི་ཡོད། བོད་མཐོ་སྒང་གི་གཙང་པོ་དང་ཁོར་ཡུག་ལ་གནོད་སྐྱོན་བཏང་བ་དེས་འཛམ་གླིང་དང་། ལྷག་པར་དུ་ཧི་མ་ལ་ཡའི་རི་རྒྱུད་ཀྱི་མི་མང་ཡོངས་ལ་ཉེན་ཁ་ཆེན་པོ་བཟོ་བཞིན་ཡོད་པས། རྒྱལ་སྤྱིའི་སྤྱི་ཚོགས་ཀྱིས་དོན་དག་འདིར་དོ་སྣང་ཤུགས་ཆེན་བྱེད་དགོས་པ་ནི་ཧང་ཅང་གལ་ཆེན་པོ་ཆགས་ཡོད། ད་ནི་ང་ཚོ་ཚང་མས་ནུས་ཤུགས་གཅིག་ཏུ་སྤུངས་ཏེ་ཐབས་ལམ་སྣ་ཚོགས་ཀྱི་སྒོ་ནས་བོད་དོོན་ལས་འགུལ་རྒྱུན་ཆད་མེད་པ་སྤེལ་དགོས་པའི་དུས་ལ་སླེབས་འདུག་སྙམ།
