རྒྱལ་མཚན་ནོར་བུས་བོད་ནང་མི་རིགས་མཐུན་སྒྲིལ་ཡར་ཐོན་གྱི་ཁྲིམས་གཙོས་རྒྱ་བསྒྱུར་སྲིད་ཇུས་ལག་བསྟར་དོན་འཁྱོལ་བྱས་ཏེ་ཞི་ཅིན་ཕིན་གྱི་དྲིན་ལན་འཇལ་དགོས་ཡོད་ཟེར།
ཉེ་ལམ་ཕྱི་ཟླ་ ༩ ཚེས་ ༢༢ ཉིན་ཀན་སུའུ་ཞིང་ཆེན་གྱི་དམར་ཤོག་དྲུང་ཆེ་ཧུའུ་ཁྲང་ཧྲན་ཟེར་བ་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེར་བསྐོ་གཞག་བྱས་ཏེ། ཕྱི་ཚེས་ ༢༣ ཉིན་ནས་ཧུའུ་ཁྲང་ཧྲན་གྱིས་དངོས་སུ་ལས་འཁུར་ལག་བསྟར་གྱིས་འདས་པའི་གཟའ་འཁོར་གཅིག་གི་དུས་ཡུན་ནང་། བོད་ཀྱི་རྒྱལ་ས་ལྷ་དང་། ས་སྐྱ་དགོན་པ་དང་གཙང་བཀྲ་ཤིས་ལྷུན་པོ་དགོན་པ་སོགས་སུ་བརྟག་ཞིབ་ཟེར་བ་བྱས་ཏེ། ད་སྔ་བར་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་མགོ་ཁྲིད་འཕགས་པ་ལྷ་དགེ་ལེགས་རྣམ་རྒྱལ་དང་ནང་བསྟན་མཐུན་ཚོགས་ཀྱི་ཚོགས་གཙོ་རྒྱལ་མཚན་ནོར་བུ་སོགས་སུ་ཐུག་འཕྲད་བྱས་ཏེ། ཁ་བྲལ་ལ་ངོ་རྒོལ་དང་། མེས་རྒྱལ་གོང་བུ་གཅིག་གྱུར། དེ་བཞིན་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ཟེར་བ་སོགས་ལག་བསྟར་ཚ་འདེད་བྱེད་དགོས་སྐོར་སོགས་བརྗོད་འདུག
ཁོས་བཀྲ་ཤིས་ལྷུན་པོ་དགོན་དུ་བོད་རང་སྐྱོང་ལྗོངས་ཟེར་བའི་ནང་བསྟན་མཐུན་ཚོགས་ཀྱི་ཚོགས་གཙོ་དང་རྒྱ་ནག་རྒྱལ་ཡོངས་སྲིད་གྲོས་ཀྱི་རྒྱུན་ལས་པན་ཆེན་རྒྱལ་མཚན་ནོར་བུར་ཐུག་སྟེ། རྒྱལ་མཚན་ནོར་བུས་བསྒྲུབ་དགོས་པའི་སྐད་ཆ་གཙོ་བོ་ཁག་ཅིག་བཤད་འདུག་ཅིང་། དེ་དག་གི་ཁྲོད་རྒྱལ་མཚན་ནོར་བུས་བོད་བརྒྱུད་ནང་བསྟན་ཆོས་ལུགས་རྒྱ་ནག་ཅན་དུ་བསྒྱུར་བའི་ཁ་ཕྱོགས་མཐའ་འཁྱོངས་དང་། རྒྱ་ནག་གི་ཁྲིམས་ལུགས་འོག་ནས་དགོན་སྡེ་དོ་དམ་ལྷན་ཁང་ཚད་ལྡན་དང་ཆོས་ལུགས་ལས་དོན་དོ་དམ་ལ་ཤུགས་སྣོན་རྒྱག་སྐོར་དང་གཅིག
གཉིས་ཞི་ཅིན་ཕིན་གྱིས་རྒྱལ་མཚན་ནོར་བུའི་མཇལ་འཕྲད་ཐེངས་གཉིས་དང་ལེན་གནང་ཡོད་ཟེར། གསུམ་རྒྱལ་མཚན་ནོར་བུས་ཞི་ཅིན་ཕིན་ལ་ཐུག་སྐབས་ཀྱི་སྐད་ཆ་དང་རེ་བ་བཅོལ་བ་རྣམས་སེམས་ལ་བརྟན་པོར་བཅིངས་ནས། ཞི་ཅིན་ཕིན་གྱི་དུས་རབས་གསར་པའི་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ཟེར་བར་སློབ་སྦྱོང་ལག་བསྟར་གཏིང་ཟབ་བྱེད་དགོས་པ། བཞི་ཞི་ཅིན་ཕིན་དང་དམར་ཤོག་ཚོགས་པའི་བོད་སྐྱོང་ཟེར་བའི་སྲིད་ཇུས་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་དགོས་པ།
ལྔ་བོད་ཀྱི་ཆོས་ལུགས་མི་སྣ་དང་དད་ལྡན་མང་ཚོགས་ལ་དམར་ཤོག་ཚོགས་པའི་ཆབ་སྲིད་སློབ་གསོ་ཁྲིད་སྟོན་བྱས་ཏེ། བོད་མི་སེར་སྐྱ་ཚང་མས་དམར་ཤོག་ཚོགས་པ་དང་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཆབ་སྲིད་ལ་བློ་སེམས་གཉིས་ཀྱི་མོས་པ་དང་། དམར་ཤོག་ཚོགས་པ་དང་། རྒྱ་ནག དེ་བཞིན་སྤྱི་ཚོགས་རིང་ལུགས་བཅས་ལ་དགའ་ཞེན་དགོས་པ།
དྲུག་རྒྱལ་མཚན་ནོར་བུས་འདུལ་ཁྲིམས་དང་བསྟན་དོན་གྱི་ནང་དོན་སྔོག་འདོན་གཏིང་ཟབ་བྱས་ཏེ་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཟེར་བར་མཉམ་འདྲེས་བྱེད་ཐུབ་པ། དགོན་སྡེ་ཁག་གི་གྲྭ་བཙུན་དང་དད་ལྡན་མང་ཚོགས་ལ་བློ་བརྟན་འགྱུར་མེད་ངང་དམར་ཤོག་ཚོགས་པའི་བཀའ་ལ་ཉན་པ་དང་བཀའ་དྲིན་ཚོར་བ། རྗེས་སུ་འབྲངས་པ་བཅས་ཁྲིད་སྟོན་གནང་དགོས་པ། བདུན་གོང་བརྗོད་དོན་ཚན་རྣམས་གཙང་སྒྲུབ་ཧུར་ཐག་བྱས་ཏེ་ཞི་ཅིན་ཕིན་གྱི་དྲིན་ལན་འཇལ་དགོས་སྐོར་སོགས་འདུག
བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཧུའུ་ཁྲང་ཧྲན་ཕྱི་ལོ་ ༡༩༩༨ ལོར་སི་ཁྲོན་གྱི་ཇིན་ཅང་གྲོང་ཁྱེར་དུ་ཐོག་མར་ཆབ་སྲིད་ཀྱི་ལས་ཀར་ཞུགས་ཤིང་། ཕྱི་ལོ་ ༢༠༡༢ ཟླ་ ༢ ནང་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་དམར་ཤོག་དྲུང་ཆེ་གཞོན་པར་བསྐོ་གཞག་བྱུང་བ་དང་ཟླ་གཉིས་ཀྱི་རྗེས་ནས་དཀར་མཛེས་བོད་རིགས་རང་སྐྱོང་ཁུལ་གྱི་དམར་ཤོག་དྲུང་ཆེའི་འགན་ཁུར་འདུག ཕྱི་ལོ་ ༢༠༡༥ ལོར་མཚོ་སྔོན་ཞིང་ཆེན་གྱི་དམར་ཤོག་ཚོགས་པའི་འགན་འཛིན་དང་རྒྱུན་ལས་བྱས། ཕྱི་ལོ་ ༢༠༢༢ ཟླ་ ༡༢ ནང་ཀན་སུའུ་ཞིང་ཆེན་གྱི་དམར་ཤོག་དྲུང་ཆེར་བསྐོ་གཞག་བྱུང་སྟེ། ཁྱོན་འདས་པའི་ལོ་ ༡༤ རིང་བོད་ནང་གི་བོད་མི་རྣམས་ཀྱི་ཐོག་སྲིད་ཇུས་ལག་བསྟར་གྱི་ལས་ཀ་བྱས་མྱོང་འདུག ཧུའུ་ཁྲང་ཧྲན་ཕྱི་ལོ་ ༡༩༦༣ ལོར་ཅང་ཤི་ཞིང་ཆེན་གྱི་གོ་ཨན་གྲོང་ཁྱེར་ནང་སྐྱེས་པ་དང་ད་ལྟ་ལོ་ ༦༢ རེད་འདུག
