ལོ་རྗེས་མར་འཚོགས་འཆར་ཡོད་པའི་རྒྱལ་སྤྱིའི་གཞོན་ནུའི་བོད་རིག་པའི་གྲོས་ཚོགས་ཀྱི་ཚོགས་འདུར་རྩོམ་ཡིག་བསྡུ་བཞིན་པའི་སྐབས་དང་བསྟུན་ནས་ཞིབ་འཇུག་རྩོམ་ཡིག་གི་ནང་དོན་གནད་བསྡུས་འབྲི་སྟངས་ཐད་ཟབ་སྦྱོང་ཞིག་དྲ་ལམ་དུ་འཚོགས།
ཟབ་སྦྱོང་འདིའི་ཐོག་གཏམ་བཤད་གནང་བར་ཧྥ་རན་སི་ཤར་ཕྱོགས་སློབ་གླིང་གི་སློབ་དཔོན་ཧྥ་རན་སོ་ཝ་ཟི་ རོ་པིན (Françoise Robin) དང་། སི་ཊེ་ཧྥན་ ཨར་གྷེ་ལེ་རེ་(Stéphane Arguillère) ལགས་གཉིས་གདན་འདྲེན་བྱས་འདུག ཁོང་གཉིས་ཀྱིས་སོ་སོའི་ཉམས་ཞིབ་ཀྱི་ཁྱབ་ཁོངས་དང་། ཉམས་མྱོང་གཞིར་བཞག་ནས། ཞིབ་འཇུག་རྩོམ་ཡིག་གི་ནང་དོན་གནད་བསྡུས་ནང་གཙོ་བོ་རིག་པ་གསར་པ་དང་། རྒྱུ་ཆ་ཁུངས་ལྡན། དེ་བཞིན་གྲུབ་དོན་ཅི་ཡོད་སོགས་གནད་དུ་བསྡུས་པ་ཙམ་མིན་པར་འབུར་དུ་བཏོན་ནས་བཤད་དགོས་པ་ལས། ཡིག་འབྲུ་བཞི་བརྒྱའི་ནང་བརྗོད་གཞི་ཡོངས་རྫོགས་བཤད་ལོང་མེད་སྐོར་བརྗོད་བྱུང་། ཡང་བརྗོད་གཞིའི་ཐད་ནས་ཆུང་ཆུང་ཡིན་དགོས་སྐོར་ཡང་དཔེ་རུ་དྲངས་ནས་བརྗོད་བྱུང་། དཔེར་ན་ཀློང་ཆེན་རབ་འབྱམས་པའི་སྐོར་ཉམས་ཞིབ་བྱེད་པར་ཁོང་གིས་དགེ་རྒན་དུ་བསྟེན་པའི་བླ་མ་དག་ལས་གཅིག་གི་སྐོར་རྩད་གཅོད་མཐིལ་ཕྱིན་བྱ་རྒྱུ་དང་། ཡང་རྒྱ་ནག་གཞུང་གིས་ལག་བསྟར་བྱས་དང་བྱེད་མུས་ཡིན་པའི་འབྲོག་སྡེ་གནས་སྤོའི་སྲིད་ཇུས་ཀྱི་གནས་བབ་ཤེས་རྟོགས་ཡོང་བར། བོད་ཀྱི་རྩོམ་པ་པོ་རྣམས་ཀྱི་བརྩམས་ཆོས་ནང་སྦྲ་ནག་གི་སྐོར་ཇི་ལྟར་བྲིས་ཡོད་མེད་རྟོག་ཞིབ་བྱེད་ཕྱོགས་སོགས་དཔེ་རུ་དྲངས་ནས་བརྗོད་བྱུང་།
རྒྱལ་སྤྱིའི་གཞོན་ནུའི་བོད་རིག་པའི་གྲོས་ཚོགས་ཀྱི་ཚོགས་གཙོ་སྦྲ་རིགས་ཐོགས་ལགས་སུ་ཁ་པར་བརྒྱུད་ཉམས་ཞིབ་ཟབ་སྦྱོང་འདི་འདྲ་ཞིག་གོ་སྒྲིག་བྱེད་དགོས་པའི་དམིགས་ཡུལ་ཐད་བཅར་འདྲི་ཞུས་པར། ཁོང་གིས། ཉམས་ཞིབ་ཟབ་སྦྱོང་འདི་ནི་གཙོ་བོ་རྒྱལ་སྤྱིའི་གཞོན་ནུའི་བོད་རིག་པའི་ཚོགས་ཆེན་ནང་གསར་དུ་འཛུལ་ཞུགས་བྱེད་མཁན་ཚོར་དམིགས་པ་ཞིག་ཡིན། ཁོང་ཚོར་ཞིབ་འཇུག་གི་ཐབས་ལམ་དང་། རྩོམ་ཡིག་ནང་དོན་གནད་བསྡུས་འབྲི་སྟངས་ཐད་ལམ་སྟོན་བྱ་རྒྱུ་གལ་ཆེན་པོ་ཞེ་བོ་མཐོང་སོང་། རྒྱལ་སྤྱིའི་ཞིབ་འཇུག་གི་ཚོགས་པ་མང་ཆེ་བ་དེ་འདྲ་རེད། བོད་པ་ལྟ་བུར་མཚོན་ན་རྒྱལ་སྤྱིའི་བོད་རིག་པའི་ཞིབ་འཇུག་གི་ཚོགས་པ་དང་། རྒྱལ་སྤྱིའི་གཞོན་ནུའི་བོད་རིག་པའི་གྲོས་ཚོགས་གཉིས་ཡོད་རེད། ཞིབ་འཇུག་ཚོགས་པའི་ནང་ལ་རྩོམ་ཡིག་ངོས་ལེན་བྱེད་ཕྱོགས་ཐད་ནས་བལྟས་ན། དབྱིན་ཡིག་ནང་འབྲི་མཁན་ཚོའི་རྩོམ་ཡིག་ངོས་ལེན་ཐོབ་པའི་བརྒྱ་ཆ་མཐོ་བ་དང་། བོད་ཡིག་ནང་འབྲི་མཁན་ཚོའི་རྩོམ་ཡིག་ངོས་ལེན་ཐོབ་པའི་བརྒྱ་ཆ་དམའ་བ་འདུག དབྱིན་ཡིག་ནང་འབྲི་མཁན་ཕྱི་མི་རྣམས་ཀྱི་གནས་ཚད་ཡག་པ་དང་། བོད་ཡིག་ནང་འབྲི་མཁན་ཚོའི་གནས་ཚད་སྐྱོ་བ་དེ་འདྲ་རེད་མི་འདུག རྩོམ་ཡིག་གི་ནང་དོན་གནད་བསྡུས་འབྲི་སྟངས་དང་། རྩོམ་ཡིག་གི་བརྗོད་བྱ་འདེམས་སྟངས། རྩོམ་ཡིག་གི་དྲི་བ་འདོན་སྟངས་སོགས་ཀྱི་ཐད་ནས་བོད་པ་ཚོས་ཐབས་ལམ་དེ་ཏག་ཏག་ཤེས་ཀྱི་ཡོད་མ་རེད། སོང་ཙང་། ང་ཚོས་སྔོན་མ་ཡང་ཟབ་སྦྱོང་དེ་འདྲ་སྤྲོད་མྱོང་ཡོད་ལ། དེ་གལ་ཆེན་པོ་མཐོང་བྱུང་། དམིགས་ཡུལ་དེ་འཁུར་ནས་མ་འོངས་པར་རྒྱལ་སྤྱིའི་བོད་རིག་པའི་ཚོགས་འདུ་རེད། རྒྱལ་སྤྱིའི་གཞོན་ནུའི་བོད་རིག་པའི་ཚོགས་འདུ་རེད། དེ་མ་ཡིན་པའི་རྒྱལ་སྤྱིའི་ཚོགས་འདུ་ག་རེ་ཡིན་ནའང་། དེ་འདྲའི་སྒང་ལ་བོད་དང་ཧི་མ་ལ་ཡའི་རི་རྒྱུད་ཀྱི་མཁས་པ་ཚོ་མང་པོ་ཞིག་འགྲོ་ཐུབ་པའི་ཆེད་དུ་གོ་སྒྲིག་བྱས་པ་ཡིན། ཞེས་བརྗོད་བྱུང་།
ཡང་དེ་རིང་གི་ཟབ་སྦྱོང་ནང་མཉམ་ཞུགས་བྱེད་མཁན་ག་ཚོད་བྱུང་ཡོད་མེད་དང་། རེ་བ་བརྒྱབ་པ་ནང་བཞིན་བྱུང་ཡོད་མེད་དྲིས་པར། ཁོང་གིས། གོ་སྒྲིག་བྱས་པ་ནང་བཞིན་དཔེ་ཡག་པོ་བྱུང་སོང་། མི་ ༩༢ ཙམ་གྱིས་མཉམ་ཞུགས་བྱས་སོང་། དྲི་བ་དྲིས་ལན་ཡང་ཡག་པོ་བྱུང་སོང་། ཟབ་སྦྱོང་སྤྲོད་མཁན་ནི་རྒན་ཧྥ་རན་སོ་ཝ་ཟི་ རོ་པིན་ (Françoise Robin) དང་། སི་ཊེ་ཧྥན་ ཨར་གྷེ་ལེ་རེ་(Stéphane Arguillère) ལགས་གཉིས་རེད། ཁོང་གཉིས་ཀ་མཁས་པ་རྒན་པ་རེད། ཉམས་མྱོང་ཡང་ཕྱུག་པོ་རེད། གཅིག་ཐད་ནས་ཁོང་གཉིས་ཀྱི་ཆེད་ལས་ཀྱི་རྒྱབ་ལྗོངས་ཡང་མི་འདྲ་བ་རེད། གཅིག་ཆོས་ལུགས་དང་། གཞན་དེ་རྩོམ་རིག་རེད། དེ་འདྲ་སོང་ཙང་ཡག་པོ་བྱུང་སོང་། ཞེས་བརྗོད་བྱུང་།
མ་འོངས་པར་ཟབ་སྦྱོང་འདི་འདྲའི་རིགས་གོ་སྒྲིག་བྱ་འཆར་ཡོད་མེད་དྲིས་པར། ཁོང་གིས། མ་འོངས་པར་ཟབ་སྦྱོང་འདི་འདྲ་གོ་སྒྲིག་བྱས་ན་ཡག་པོ་ཡོང་ས་རེད་བསམ་གྱི་འདུག དེ་རིང་གི་ཟབ་སྦྱོང་གི་དམིགས་ཡུལ་གཙོ་བོ་ནི་ལོ་རྗེས་མར་ལྷོ་ཀོ་རི་ཡའི་རྒྱལ་ས་སོ་ཡོལ་ལ་འཚོགས་འཆར་ཡོད་པའི་རྒྱལ་སྤྱིའི་གཞོན་ནུའི་བོད་རིག་པའི་གྲོས་ཚོགས་ཀྱི་ཆེད་དུ་རེད། ཚོགས་འདུ་དེར་རྩོམ་ཡིག་འབུལ་བར་ཟླ་བ་གཅིག་ཙམ་ལས་ལྷག་མི་འདུག ཉིན་མཐའ་མ་དེ་ཕྱི་ཟླ་ ༡༡ ཚེས་ ༡ བར་དུ་རེད། དེར་རྩོམ་ཡིག་གང་འདྲ་འབྲི་དགོས་རེད། དེ་ལ་གནད་འགག་གཙོ་བོ་ག་རེ་ཡོད་རེད། དེ་འདྲའི་ཐད་ནས་ཁ་ཚ་དགོས་གཏུགས་ཆགས་ཀྱི་ཡོད་རེད། མ་འོངས་པར་བརྗོད་གཞི་གཞན་ཏེ། དཔེར་ན་འབུམ་རམས་པའི་དཔྱད་རྩོམ་འབྲི་སྟངས་དང་། རྒྱལ་སྤྱིའི་དུས་དེབ་གྲངས་ཅན་ཐོག་རྩོམ་ཡིག་འཁོད་དགོས་ན་གཙོ་བོ་ག་རེ་བྱེད་དགོས་ཀྱི་ཡོད་མེད་སོགས་ཀྱི་སྐོར་ལ་ཟབ་སྦྱོང་གོ་སྒྲིག་བྱེད་པའི་དམིགས་ཡུལ་དང་འཆར་གཞི་ཡོད། ཅེས་ལན་འདེབས་གནང་བྱུང་།
བོད་ཀྱི་དུས་བབ་གསར་ཁང་གིས་སྤེལ།
