སྲིད་སྐྱོང་མཆོག་གིས་ལས་བྱེད་ཚང་མས་རང་ཉིད་མི་མང་གི་ཞབས་ཕྱི་ཞུ་མཁན་ཡིན་པའི་བསམ་བློ་དང་པོར་འཛིན་དགོས་སྐོར་གསུངས་སོང་།
དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། སྐབས་ ༡༧ པའི་བཀའ་ཤག་ནས་བོད་ཀྱི་མ་འོངས་འགན་སྲུང་ཞེས་པའི་ཕུགས་དམིགས་ཡིག་ཆ་སྔ་མར་བསྐྱར་ཞིབ་ཀྱིས་ཁ་གསབ་སྣོན་འཕྲི་ཇི་བྱུང་རྣམས་ལས་བྱེད་ཡོངས་ལ་ངོ་སྤྲོད་ཀྱི་མཛད་རིམ་ཞིག་འཚོགས་སོང་། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། དེ་རིང་ནི་བཀའ་ཤག་སྐབས་བཅུ་བདུན་པ་ཡར་ཕེབས་ནས་ལས་བྱེད་ཚོ་དང་ལྷན་དུ་འཛོམས་པ་ཐོག་མ་ཆགས་ཡོད། ང་ཚོ་འདིར་ཚོགས་ཁང་དུ་ཡོད་པ་དང་དྲ་ཐོག་ནས་གསན་མཁན་ཚང་མ་ལས་དབང་གིས་ཁོར་ཡུག་གཅིག་གི་ནང་ལས་ཀ་བྱེད་པའི་གོ་སྐབས་བྱུང་བ་རེད། ང་ཚོའི་ངོས་ནས་གོ་སྐབས་འདི་ཆུད་ཟོས་སུ་མ་བཏང་བར་གང་ཐུབ་ཅི་ཐུབ་ཀྱིས་ནུས་པ་སྤུངས་ཏེ་བོད་སྤྱི་པའི་རྩ་དོན་འགྲུབ་པར་འབད་འབུངས་བྱེད་པའི་དམ་བཅའ་བརྟན་པོ་ཡིན།
ང་ཚོ་མི་མང་གིས་བདམས་པའི་སྲིད་སྐྱོང་དང་གྲོས་ཚོགས་བརྒྱུད་ནས་བདམས་པའི་བཀའ་བློན་རྣམ་པ། དེ་བཞིན། འཛིན་སྐྱོང་གི་ལས་བྱེད་རྣམ་པ་ཚང་མའི་བསམ་བློའི་ནང་ཐོག་མར་ང་ཚོ་ཚང་མ་མི་མང་གི་ཞབས་ཕྱི་སྒྲུབ་མཁན་ཡིན་བསམ་པའི་བསམ་བློ་དེ་དང་པོ་དགོས་ཀྱི་འདུག ཞབས་ཕྱི་ཞུ་མཁན་ཡིན་པའི་བསམ་བློ་དེ་ཡོད་པ་ན། ཞབས་ཕྱི་ཞུ་ཡུལ་དེར་གུས་བརྩི་དང་ལྡན་པའི་ཐོག་ནས་ཞབས་ཕྱི་ཞུ་ཐུབ་པའི་གནས་སྟངས་ཡོང་གི་རེད། རང་ཉིད་དཔོན་པོ་ཡིན་བསམ་པའི་ཐོག་ནས་ལས་ཀ་བྱས་པ་ཡིན་ན། རང་བཞིན་གྱིས་དེར་དོ་ཕོག་འགྲོ་བའི་གཞི་ཞིག་ཆགས་བསྡད་ཡོད།
གཞུང་ཞབས་པ་ཡིན་པའི་ཆ་ནས་ལས་འགན་བཀོད་སྒྲིག་གང་དུའང་ཡོང་གི་རེད། དེར་བརྟེན། རང་ཉིད་གང་དུ་བཀོད་སྒྲིག་བྱས་པའི་ལས་འགན་དེ་བསྒྲུབ་དགོས་བསམ་པའི་ཐོག་ནས་ནུས་པ་སྤུངས་དགོས་པ་ལས། གནས་སྤོར་བཏང་བའི་རྒྱུ་མཚན་ལ་བརྟེན་ནས་འཁོན་འཛིན་བཟུང་སྟེ་ལས་དོན་འཐུས་ཤོར་བཏང་བ་ཡིན་ན། དེས་སྤྱི་པ་ལ་གནོད་ཀྱི་ཡོད། ཅེས་གསུངས་སོང་།
དེའི་རྗེས་སྲིད་སྐྱོང་མཆོག་གིས་བོད་ཀྱི་མ་འོངས་འགན་སྲུང་། ཕྱི་ལོ་ ༢༠༢༦ ནས་ ༢༠༣༡ བར་གྱི་ཕུགས་དམིགས་ཡིག་ཆ་ཞེས་པ་ངོ་སྤྲོད་གནང་སོང་། ཕུགས་དམིགས་ཡིག་ཆ་དེར་ལེའུ་གསུམ་དང་ཤོག་ངོས་ཁྱོན་ ༣༠ འདུག་ཅིང་། ལེའུ་དང་པོ་བོད་དོན་བདེན་མཐའ་གསལ་ཐབས་ཞེས་པའི་ནང་གཏན་འཇགས་ཐབས་བྱུས་ཚོགས་ཆུང་ཚགས་ཚུད་དང་རྒྱ་རིགས་ལ་འབྲེལ་བ་དང་། རྒྱ་དམར་གཞུང་གི་གནོད་འཚེ་ཕོག་མཁན་སྡེ་ཁག་ལ་འབྲེལ་འཛུགས། བོད་ཀྱི་ལོ་རྒྱུས་གནས་བབ་ངེས་བརྟན་བཟོ་ཐབས། ༧རྒྱལ་བའི་ཡང་སྲིད་སྐོར་གྱི་རྒྱ་དམར་གཞུང་གི་གཡོལ་བྱུས་ལ་གདོང་ལེན་བྱེད་ཕྱོགས་སོགས་འདུག ལེའུ་གཉིས་པ་བཙན་བྱོལ་བོད་མིའི་སྤྱི་ཚོགས་བདེ་དོན་ཞེས་པའི་ནང་སྤྱི་ཚོགས་གོང་བུ་ཆིག་དྲིལ་དང་། བོད་མིའི་ངོ་བོ་སྲུང་སྐྱོབ་དང་འཚོ་གནས་གོང་སྤེལ། བོད་ཀྱི་ཤེས་ཡོན་དང་སྐད་ཡིག་དར་སྤེལ་སོགས་འདུག་ལ། དེ་བཞིན། ལེའུ་གསུམ་པ་བོད་མིའི་སྒྲིག་འཛུགས་ཀྱི་ནུས་ཤུགས་གོང་སྤེལ་ཞེས་པར་ལག་གཞི་ཁག་འཆར་འགོད་དང་ལག་བསྟར་མཇུག་སྐྱོང་། སྒྲིག་འཛུགས་ནུས་སྟོབས་གོང་སྤེལ། ལས་བྱེད་པའི་ནུས་རྩལ་མཐོར་འདེགས་བཅས་འདུག
བོད་ཀྱི་མ་འོངས་འགན་སྲུང་ཞེས་པའི་ཕུགས་དམིགས་ཡིག་ཆ་ངོ་སྤྲོད་དང་སྦྲགས། བོད་མིའི་སྒྲིག་འཛུགས་ནས་རང་དབང་མང་གཙོའི་ཡུལ་ལུང་ཁག་གི་སྲིད་གཞུང་དང་གྲོས་ཚོགས། བློ་འདོན་ལྟེ་གནས་ཁང་། གསར་འགྱུར་བརྒྱུད་ལམ་ཁག་ལ་གཞེན་སྐུལ་དོན་ཚན་བརྒྱད་ཞུས་འདུག
དང་བོ། བོད་རྒྱའི་རྩོད་རྙོག་གི་ངོ་བོ་ནི་རྒྱ་ནག་གི་ནང་སྲིད་ཀྱི་གནད་དོན་མ་ཡིན་པར། ཐག་ཆོད་མེད་པའི་རྒྱལ་སྤྱིའི་ཁྲིམས་ལུགས་ཀྱི་གནད་དོན་ཞིག་ཡིན་པར་ངོས་འཛིན་ཡོང་བ།
གཉིས་པ། སྔོན་འགྲོའི་ཆ་རྐྱེན་མེད་པར་གཉིས་སྨན་དབུ་མའི་ལམ་གྱི་ཐོག་ནས་བོད་རྒྱ་ཞི་མོལ་ཡོང་བར་རྒྱབ་སྐྱོར།
གསུམ་པ། རྒྱ་དམར་གཞུང་གི་མི་རིགས་རྩ་གཏོར་གྱི་སྲིད་བྱུས་ལ་འགོག་རྒོལ།
བཞི་བ། མ་འོངས་༸རྒྱལ་བའི་ཡང་སྲིད་ཐོག་རྒྱ་དམར་གཞུང་གིས་ཆབ་སྲིད་ཀྱི་ངན་བྱུས་གཤོམ་བཞིན་པའི་གནད་དོན་ཐེར་འདོན་དང༌། ངོས་ལེན་བྱེད་ཐལ་མི་ཡོང་བ།
ལྔ་པ། མ་འོངས་༸རྒྱལ་བའི་ཡང་སྲིད་ཐད་རྒྱ་དམར་གཞུང་གིས་བསྐོ་གཞག་བྱས་པའི་པཎ་ཆེན་རྒྱལ་མཚན་ནོར་བུ་དང༌། དེ་མཚུངས་བོད་ནང་གི་བླ་སྤྲུལ་གཞན་བེད་སྤྱོད་ལོག་པར་གཏོང་སྲིད་པར་གདོང་ལེན།
དྲུག་པ། ཀུན་གཟིགས་༧པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་མཆོག་གིས་ གཙོས་པའི་ཆབ་སྲིད་བཙོན་པ་རྣམས་རང་དབང་ཐོབ་ཐབས།
བདུན་པ། བོད་མི་རྣམས་རྒྱ་ནག་སྲིད་གཞུང་གི་མནར་གཅོད་འོག་ནས་གནོད་འཚེ་ཕོག་མཁན་ཁོ་ན་ཙམ་ཞིག་མ་ཡིན་པར། རྒྱ་ནག་བཟང་ཕྱོགས་སུ་འགྱུར་བ་གཏོང་བར་རོགས་ཟླ་བྱེད་མཁན་ཞིག་ཡིན་པར་ངོས་འཛིན་ཡོང་བ།
བརྒྱད་པ། འཛུགས་སྐྲུན་ལ་བསྙད་པའི་ཁོར་ཡུག་གཏོར་བཤིག་གི་བྱ་སྤྱོད་འགོག་སྡོམ་བཅས་ལ་གྲོས་ཆོད་དང༌། བསྒྲགས་གཏམ། དཔྱད་ཞིབ་དང་། གནས་ཚུལ་ཁྱབ་སྤེལ་བཅས་ཀྱི་ལམ་ནས་བདེན་པའི་རྒྱབ་ལངས་མུ་མཐུད་ཡོང་བའི་གཞེན་སྐུལ་དང་། དེ་བཞིན་བོད་མི་ཚོས་སྐབས་སོ་སོར་བདེན་པའི་ཞུ་སྐུལ་ནམ་ཞུས་ལ་དེ་བསྟུན་གྱི་རྒྱབ་སྐྱོར་ཡོང་བའི་རེ་སྐུལ་ཞུ་བཞིན་ཡོད།
གསར་འགོད་པ། སྐལ་བཟང་སྦྱིན་པ།
