སྒྱུ་རྩལ་རྩོམ་རིག་གི་ཧམ་སེམས་ཀྱི་ངོས་ནས་བཤད་ན། དོན་འགྲུབ་རྒྱལ་གྱི་ལང་ཚོའི་རྦབ་ཆུ་དེ་རྐ་ཆུ་ཞིག་ཏུ་ང་རང་ཉིད་ཀྱིས་ཀྱང་བསམ་གིན་ཡོད། དེ་བས་ང་ཚོས་རྩོམ་རིག་ཟེར་པ་འདིའི་འགྱུར་མཚམས་དང་འཕེལ་འགྱུར་གྱི་ཕྱོགས་ལ་བསམ་བློ་ཞིག་ངེས་བར་དུ་གཏོང་དགོས་ཀྱི་འདུག་ཅེས་རྩོམ་པ་པོ་རས་པ་ལགས་ཀྱིས་བཤད།
ཟླ་འདིའི་ཚེས་༡༠་ཉིན་ན་གཞོན་རྩོམ་པ་པོ་གཉན་པོ་དང་བོན་རྒྱ་བསྟན་འཛིན་རབ་རྒྱས་གཉིས་ཀྱི་བཀོད་སྒྲིག་འོག་ཤེས་རབ་ཀྱི་ནམ་མཁར་ཕྱོགས་ཏེ་སྙན་ངག་གི་མཆོད་པ་འབུལ་བ་ཞེས་པའི་སྙན་ངག་གྱེར་འདོད་གྱི་འདུ་འཛོམས་ཤིག་ནོར་གླིང་མཐོ་སློབ་ནང་བསྡུས་ཡོད་པ་དང་། ཉིན་དེར་སྙན་ངག་པ་རྣམས་ཀྱིས་ཤེས་རབ་ཀྱི་ནམ་མཁར་ཕྱོགས་པ་ཞེས་པའི་ཁ་བྱང་གཅིག་པའི་སྙན་ངག་བཅུ་ཕྲག་ལྷག་གིས་༸གོང་ས་མཆོག་ལ་སྙན་ངག་གི་མཆོད་པ་ཕུལ་ཞིང་དཀར་ཟས་རྐྱང་བར་རོལ་ཏེ་ཞི་བདེའི་དུས་དྲན་ཐེངས་ཉི་ཤུ་བ་དེ་རྣམ་པ་མི་འདྲ་བ་ཞིག་སྲུང་གཙི་བྱས་ཡོད་འདུག སྐབས་དེར་སྙན་ངག་པ་བེ་རུ་འཇིགས་མེད་དང་། རྨོག་རུ་བསྟན་པ། ཨ་འཇམ། རས་པ། ན་རོ། སྤྲིན་དཀར། གཉན་མདང་ཕོ་ཉ། མེ་འོད། ཉི་ཟེར། ནོར་གླིང་མཐོ་སློབ་ཀྱི་བོན་རྒྱ་བློ་བཟང་བཀྲ་ཤིས་དང་རྫ་སྲས་བདེ་ཆེན། ཤེས་རབ་དགའ་ཚལ་གླིང་གི་སློབ་ཕྲུག་འབྲུག་འབུམ་དང་རྨོག་རུ་ཤེས་རབ་རྡོ་རྗེ་སོགས་སྙན་ངག་པ་བཅོ་ལྔ་ཙམ་འདུ་འཛོམས་ཀྱིས་རང་རང་གི་རྩོམ་རིག་ཐད་ཀྱི་ལྟ་ཚལ་བརྗོད་ཡོད་པ་རེད། ཉིན་དེར་སྙན་ངག་པ་ཨ་འཇམ་ལགས་ཀྱིས་ང་ཚོས་ང་ཚོ་ཆབ་སྲིད་སྐྱབས་བཅོལ་བ་ཞིག་ཡིན་ཞེས་པའི་བསམ་བློ་དེ་ཁུར་ནས་སྙན་ངག་ཟེར་དུས་སྟོང་བསམ་དང་འཁྲུལ་སྣང་རྐྱང་བ་བཤད་ཀྱིན་འདུག་སྙམ་པའི་བསམ་ཚུལ་ཁུར་ནས་སྙན་ངག་གི་ཤུགས་རྐྱེན་མ་ཐུབ་པ་དང་། སྙན་ངག་གི་ཁོར་ཡུགམེད་སོང་བས་ལས། ང་ཚོའི་བསམ་པའི་ནང་ལ་སྒྱུ་རྩལ་གྱི་སེམས་ཁམས་མེད་སོང་བ་མ་རེད། ང་ཚོའི་སྒྱུ་རྩལ་གྱི་སེམས་ཁམས་དེ་སྤྱི་ཚོགས་ཀྱི་ཁོར་ཡུག་ཅིག་ལ་བརྟེན་ནས་བརླགས་ཀྱིན་འདུག་སྙམ་པའི་སེམས་ཁྲལ་ཆེན་པོ་ཡོང་གི་འདུག ང་ཚོ་བཙན་བྱོལ་ལ་མཚོན་ན། སྔོན་མ་བོད་མིའི་རང་དབང་དང་ཤེས་བྱ་དུས་དེབ་ནང་ནའང་སྙན་ངག་ཏོག་ཙམ་ཏོག་ཙམ་འཁོད་ཡོང་གི་ཡོད་པ་རེད། རིམ་གྱིས་རིམ་གྱིས་མེད་པ་ཆགས་སོང་། འདི་ལྟར་ང་ཚོ་སྙན་ངག་གི་ཁོར་ཡུག་དེ་ཆུང་ངུར་ཕྱིན་ནས་རྦད་དེ་མེད་པ་པ་ཆགས་མི་ཡོང་ངམ་དེ་འདྲ་ཞིག་མཐོང་གི་འདུག
ང་ཚོ་ལ་དུས་དེབ་དང་ཚགས་པར་མང་པོ་སླེབས་ཀྱིན་ཡོད་པ་རེད། ་ཡིན་ནའང་། ཐུན་མོང་གི་ཁོར་ཡུག་ཅིག་ཆགས་ཐུབ་ཀྱི་མི་འདུག དེའི་དཀའ་ངལ་ག་རེ་རེད། དགོན་པ་ཞིག་ནས་དཔར་ན་དགོན་པ་རང་དང་། ་སློབ་གྲྭ་ཞིག་ནས་དཔར་ན་སློབ་གྲྭ་རང་ནས་བཏོན་གྱིན་ཡོད་པ་རེད། བོད་ནང་ལའང་དེ་འདྲཡོད་པ་རེད། ཡིན་ནའང་། དགོན་པ་ནས་བཏོན་ན། ཐ་ན་གྲོང་པ་མི་ཚང་ཞིག་གིས་བཏོན་དེ་སྤྱི་ཚོགས་ལ་ཁ་གཏད་ནས་སྤྱི་ཚོགས་སྟེང་གི་རྩོམ་པ་པོ་ཚང་མ་མཉམ་གཅིག་ཏུ་བསྡུས་ཏེ་ཁོ་རང་སྒེར་ལ་ལེ་ཚན་རེ་བཟོས་ནས་ཐུན་མོང་གི་རྩེད་ར་རེ་ཡོད་ན་ཡག་པོ་འདུག་སྙམ། ང་ཚོ་སྤྱི་ཚོགས་དང་སློབ་གྲྭའི་ཁོར་ཡུག་འབྲེལ་མཐུད་རྒྱག་མ་ཐུབ་པར་ང་ཚོར་ཐུན་མོང་གི་ཁོར་ཡུག་ཅིག་གྲུབ་མ་ཐུབ་པའི་དཀའ་ངལ་འཕྲད་བཞིན་ཡོད་པ་འདྲ།
ཡང་ང་ཚོས་ཆབ་སྲིད་སྙན་ངག་མ་འབྲི་ཞེས་པ་ནི་སྤྱི་ཚོགས་ཀྱི་ཆབ་སྲིད་གནོད་ཤུགས་ལ་གདོང་ལེན་གྱི་སྙན་ངག་མ་འབྲི་ཟེར་གྱིན་ཡོད་པ་མ་རེད། ཆབ་སྲིད་ཟེར་བ་མི་ཞིག་ལ་མགོ་སྐོར་བཏང་ནས་སྐྱིད་པོ་བཤད་དེ་སོ་སོའི་བསམ་བློའི་ཚོར་བ་མེད་པ་དང་། ཕར་ཕྱོགས་ངོ་སྲུང་ཁོ་ནའི་ཆེད་དུ་འབྲི་བ་དེ་དེ་ཆབ་སྲིད་སྙན་ངག་རེད། དེ་མ་འབྲི་ཟེར་གྱིན་ཡོད་པ་རེད། ང་ཚོས་སྙན་ངག་བྲིས་ན་སྤྱི་ཚོགས་ལ་ནུས་པ་མི་ཐོན་པ་དེ་འདྲ་མ་རེད། བཀྲ་ཤིས་དོན་འགྲུབ་ཀྱི་ཉིས་སྟོང་བརྒྱད་ལྟ་བུའི་གཞས་པ་མང་པོ་ཞིག་ཐོན་ཡོད་པ་རེད་དེ། བོད་ནང་གི་གདོང་དམར་བ་དང་། ཁྲག་ཡིག་དང་། ཚེ་རིང་འོད་ཟེར་གྱི་བོད་ལྗོངས་ཟིན་ཐོ། གཉན་གྱི་ཁྲག་རྩའི་སྦུབས་སུ་འཚང་བའི་ཞེ་སྡང་ལྟ་བུ་སྤྱི་ཚོགས་ལ་འགུལ་སྐྱོད་ཆེན་པོ་ཐེབས་མཁན་ཡོད་པ་རེད། དེའི་ཕྱིར་ངས་སྙན་ངག་དེ་གལ་ཆེན་ཞིག་ལ་མཐོང་བསྡད་ཡོད། ཡིན་ནའང་། ང་ཚོས་སྤྱི་ཚོགས་ལ་ཤུགས་རྐྱེན་སྤྲད་མ་སྤྲད་ལ་རག་ལས་ཡོད་པ་རེད། ཅེས་དང་གཉན་པོ་ལགས་ཀྱིས་དེ་རིང་ང་ལ་མཚོན་ན་དོན་ཚན་ནམ་དམིགས་ཡུལ་གསུམ་གྱི་སྟེང་བསམ་ཚུལ་བཤད་འདོད་བྱུང་། དང་བོ་ནི་ཕྱི་ཕྱོགས་ཀྱི་ང་ཚོ་རྩོམ་རིག་ལ་འཇུག་སྟངས་དང་ང་ཚོའི་རྩོམ་རིག་གི་ཁ་ཕྱོགས་གང་འདྲ་ཞིག་གི་སྟེང་དུ་འགྲོ་མིན་དེ་ཡིན།ཕྱི་ཕྱོགས་ལ་མཚོན་ན་རྩོམ་ཡིག་འབྲི་མཁན་ནི་མང་བོ་ཞིག་ཡོད་ཀྱི་རེད་དེ་འཕེལ་རྒྱས་དང་སྤུས་ཀའི་ཆ་ནས་ཡིད་ཚིམ་པ་ཞིག་ཁྱོན་ནས་རེད་མི་འདུག ཤེས་ཡོན་པ་འམ་ཤེས་ཡོན་གྱི་ལས་རིགས་གཉེར་མཁན་དག་གིས་ང་ཚོའི་ཕྱི་ཕྱོགས་ཀྱི་རྩོམ་རིག་གི་གནས་བབ་དང་ཁ་ཕྱོགས་འདི་ཇི་ལྟར་བྱས་ཏེ་གོང་འཕེལ་དུ་གཏོང་བར་བསམ་བློ་གཏོང་དགོས་ཀྱི་འདུག སྲོལ་རྒྱུན་རྩོམ་རིག་དང་དེང་རབས་སྙན་ངག་ལྟ་བུ་གང་ཡིན་ཡང་སྤུས་ཀ་དང་ཚད་གཞི་ཅན་ཞིག་ཨེ་འཁྱོངས་ལ་འབད་དགོས་ཀྱི་འདུག
གཉིས་པ་ནི་ཤེས་ཡོན་པའི་སྡེ་འམ་རྩོམ་པ་པོ་དག་གི་ངོས་ནས་རང་གི་སྤྱི་ཚོགས་ལ་ཤུགས་རྐྱེན་ཇི་ལྟར་ཐེབས་དགོས་ཀྱི་འདུག ཤུགས་རྐྱེན་ཐེབས་ཚད་ཇེ་མགྱོགས་སུ་ཇི་ལྟར་བྱས་ནས་གཏོང་དགོས་ཀྱི་འདུག ཤེས་ཡོན་པའི་ཤུགས་རྐྱེན་མ་ཐེབས་པའི་སྤྱི་ཚོགས་དེ་ལ་ཡར་རྒྱས་འབྱུང་ཐབས་ཧ་ཅང་དཀའ་བའི་སྐོར་སྔོན་ཆད་ཀྱང་བཤད་མྱོང་། བསམ་བློའི་གོརྟོགས་དམའ་བའི་སྤྱི་ཚོགས་སམ་བསམ་བློའི་གོ་རྟོགས་ངེས་བར་དུ་ཡར་རྒྱས་སུ་གཏོང་དགོས་པའི་སྤྱི་ཚོགས་ཞིག་ལ་མཚོན་ན་ཤེས་ཡོན་པའི་བསམ་བློའི་ཤུགས་རྐྱེན་ཐེབས་རྒྱུ་དེ་ཧ་ཅང་གལ་ཆེན་པོ་རེད་དྲན་གི་ཡོད། ངས་བལྟས་ན་ད་སྐབས་ཤེས་ཡོན་པའི་སྡེ་ནས་མང་ཚོགས་ལ་ཤུགས་རྐྱེན་ཐེབས་པའི་ཚད་གཞི་སྐྱོ་བོ་རེད་བསམ་གྱིན་ཡོད། གསུམ་པ་དེ་གང་ཡིན་ཟེར་ན་ངས་བསམ་ན་ཕྱི་ཕྱོགས་ཀྱི་སྙན་ངག་པའི་སྡེ་དང་རྩོམ་འབྲི་བ་མང་བོ་ཞིག་གི་ཁ་ཕྱོགས་མི་གསལ་བ་འམ་ཡང་ན་མེད་པའི་ཚོར་བ་ཡོང་གི་འདུག རྩོམ་པ་པོ་རྒན་རབས་པ་དག་ལ་ཡང་ངར་ཤུགས་ཡལ་ཚར་འདུག་པ་ལྟ་བུ་དྲན་གྱི་འདུག དེ་བས་ང་ཚོས་བོད་ནང་ཕྱོགས་སུ་ཁ་ཕྱོགས་ཏེ་ལག་ཆ་ལན་པ་དང་བསམ་བློ་བརྗེ་རེས་བྱེད་པ། དཔེར་ན་སེམས་ཁམས་ཀྱི་ཆ་དང་རྩོམ་རིག་གི་བསམ་བློའི་བསམ་བློའི་ཆ། རྩོམ་སྟངས་དང་མཚོན་ཐབས་སོགས་ཕྱོགས་མང་བོ་ཞིག་ བོད་ནང་ལ་མིག་དཔེར་བལྟས་ཏེ་ཕྱི་ཕྱོགས་སུ་བོད་ནང་ལོགས་ཀྱི་རྩོམ་རིག་གི་ཤུགས་རྐྱེན་ཐེབས་ཐབས་ལ་འབད་བརྩོན་ངེས་པར་དུ་བྱེད་དགོས་ཀྱི་འདུག་སྙམ། ཞེས་དང་རས་པ་ལགས་ཀྱིས་ན་ནིང་ལོ་གསར་ཚེ་གཅིག་ཉིན་མོར་ཡང་ང་ཚོ་ཁ་ཤས་ཀྱིས་ཐུག་སྐམ་འཐུང་སྟེ་སྙན་ངག་གི་ཕྱོགས་ནས་ལྟ་ཚུལ་འདྲ་བོ་བཤད་ནས་བསྡད་པ་ཡིན། ང་རང་གི་བསམ་པར་རྩོམ་པ་པོ་ཕན་ཚུན་ལ་འབྲེལ་འདྲིས་དང་། བརྩམས་ཆོས་བྱེ་བྲག་པ་གཅིག་གི་སྟེང་ལ་དཔྱད་བསྡུར་བྱས་ཏེ་ལེགས་པའི་ཆ་དང་མི་ལེགས་པའི་ཆ་གང་དང་ཅི་ཡོད་གསལ་འདོན་བྱས་ནས་དེ་ལ་བསམ་ཚུལ་ཚང་མས་བཤད་ན་དགེ་མཚན་ཆེ་བར་འདོད་པའི་བསམ་ཚུལ་ཞིག་དུས་རྒྱུན་ང་ལ་ཡོད། དེ་ནས་བཙན་བྱོལ་གྱི་ཁྲོད་ནས་མི་ཁ་ཤས་ཀྱིས་རྩོམ་རིག་གི་ས་མིག་མ་རྙེད་པའམ། ཡང་ན་རྩོམ་རིག་ལ་མཐོང་མེད་པ་ལྟ་བུ་བཤད་མཁན་མང་བོ་འདུག
ངས་བལྟས་ན་གལ་ཆེ་ཤོས་ཏེ་རྩོམ་པ་པོ་རང་ཉིད་ཀྱིས་རྩོམ་རིག་གི་ཁྱད་ཆོས་དངོས་དེ ་སྤྱི་ཚོགས་སྟེང་མངོན་དུ་འཇུག་མ་ཐུབ་པས་ལན་ཡོད་པར་འདོད། དང་བོ་རང་གི་བརྩམས་ཆོས་གང་དང་གང་སྤེལ་ཡང་རྩོམ་ཡིག་རང་གི་ཁྱད་ཆོས་དེ་སྤྱི་ཚོགས་སྟེང་ཚུར་མངོན་ཐུབ་པ་ཞིག་བྱུང་བ་ཡིན་ན། བཙན་བྱོལ་རྩོམ་རིག་གི་ཁ་ཕྱོགས་དང་ལམ་ཁ་ཡང་དག་པ་དང་ལེགས་པོ་ཞིག་ཡོང་ཐུབ་པར་འདོད། དེ་ནས་ང་རང་ལ་མཚོན་ན་རྩོམ་རིག་ཟེར་བ་དེ་བཤད་བཤད་དེ་འདུག་རྒྱུ་རྐྱང་བ་ཞིག་མ་ཡིན་པར། རྩོམ་རིག་ལ་རྩོམ་རིག་ཁོ་རང་གི་འགྲོ་སྟངས་ཤིག་ཡོད་པས། རྩོམ་རིག་ལྗིད་ཁོག་ཅན་དང་བརྩམས་ཆོས་དོན་སྙིང་ཅན་གྱི་རྣམ་པ་ཞིག་སྐྲུན་རྒྱུ་དེ་ཧ་ཅང་གལ་ཆེན་པོ་རེད་འདོད། སྔོན་མའི་དོན་འགྲུབ་རྒྱལ་གྱི་ལང་ཚོའི་རྦབ་ཆུ་ལྟ་བུར་མཚོན་ན་དུས་རབས་སྔོན་མའི་ལོ་རབས་བརྒྱད་ཅུ་བའི་སྐབས་སུ་ང་ཚོའི་འགོ་འཛུགས་ས་འདྲ་བོ་རེད། ཡིན་ན་ཡང་། དེ་རིང་ཁ་སང་བོད་ནང་གི་རྩོམ་པ་པོ་མང་བོ་ཞིག་གིས་དོན་འགྲུབ་རྒྱལ་གྱི་ལང་ཚོའི་རྦབ་ཆུ་དེ་རྐ་ཆུ་ཞིག་རེད་ལྟ་བུ་ཟེར་གི་འདུག གཅིག་བྱས་ན་སྐད་ཆ་འདི་དགོད་བྲོ་བ་ཞིག་ཡིན་སྲིད་མོད། སྒྱུ་རྩལ་རྩོམ་རིག་གི་ཧམ་སེམས་ཀྱི་ངོས་ནས་བཤད་ན་དོན་འགྲུབ་རྒྱལ་གྱི་ལང་ཚོའི་རྦབ་ཆུ་དེ་རྐ་ཆུ་ཞིག་ཏུ་ང་རང་ཉིད་ཀྱིས་ཀྱང་བསམ་གིན་ཡོད། དེ་བས་ང་ཚོས་རྩོམ་རིག་ཟེར་པ་འདིའི་འགྱུར་མཚམས་དང་འཕེལ་འགྱུར་གྱི་ཕྱོགས་ལ་བསམ་བློ་ཞིག་ངེས་བར་དུ་གཏོང་དགོས་ཀྱི་འདུག་ཅེས་དང་གཉན་མདང་ཕོ་ཉ་ལགས་ཀྱིས་སྙན་ངག་པ་ཡིན་ན་ཡང་འདྲ་ཤེས་ཡོན་ཅན་ཡིན་ན་འདྲ་ཚང་མས་འགན་རེ་ཁུར་ཏེ་སྤྱི་ཚོགས་ལ་འཇུག་རྒྱུ་གལ་ཆེན་པོ་རེད། དཔེར་ན་བོད་ནང་ལ་མཚོན་ན་གཞས་པ་ཚོས་ཀྱང་སྤྱི་ཚོགས་ལ་འགན་ཁུར་བ་དང་ཁ་ཕྱོགས་ཏེ་སེམས་པ་སྐྱོ་དགོས་ལ་མིག་ཆུ་བཞུར་འགྲོ་བའི་གནས་སྟངས་དེ་འདྲ་འདུག བཙན་བྱོལ་གྱི་གཞས་པ་འདི་ཚོར་དེ་འདྲ་ཅང་མཐོང་རྒྱུ་མི་འདུག བོད་ནང་གི་དཀའ་ངལ་དེ་འདྲའི་ཐོག་ལ་ང་ཚོ་ཤེས་ཡོན་པའི་སྡེ་འམ་སྙན་ངག་པའི་ཕྱོགས་ནས་དམིགས་བསལ་གྱི་འགན་རེ་ཡོད་པར་བསམ་གྱིན་ཡོད། དེ་རིང་ང་ཚོ་ཤེས་རབ་ཀྱི་ནམ་མཁར་ཕྱོགས་པ་ཞེས་པའི་འདུ་ཚོགས་འདི་འདྲར་མཉམ་འཛོམས་བྱུང་བར་ཧ་ཅང་དགའ་བོ་བྱུང་། དེ་མིན་རྒན་བེ་རི་འཇིགས་མེད་ལགས་ཀྱིས་གསུངས་པ་ནང་བཞིན་མ་འོངས་པར་ཡང་འདི་འདྲ་ཚོགས་རྒྱུར་གཞི་འཛུགས་ས་འདྲ་བོ་ཡོང་ན་བསམ་གྱིན་ཡོད། དེ་ངའི་རེ་བ་ཡིན་ཞེས་སོགས་དེར་ཡོད་ཀྱི་རྩོམ་པོ་རྣམས་ཀྱིས་རང་རང་གི་ལྟ་ཚུལ་བཤད་ཡོད་པ་རེད།
གསར་འགྱུར་མཁོ་གཏོང་བ་བོན་རྒྱ་དང་གཉན་པོ།
ཨ་ལེ། འོ་དེ་ལྟར་གསལ་བཤད་བྱེད་དང༌། སྤྱིར་བོད་ལ་མིང་གཅིག་པ་མང་པོ་ཡོད་པ་དང་ད་ལྟ་སྙན་ངག་པ་དེ་ཚོའི་མིང་ཡང་གཅིག་པ་ཆགས་འགྲོ་གིན་འདུག །
རྨོག་རུ་ཤེས་རབ་རྡོ་རྗེ་དང་ན་རོ་ལགས་རྣམ་གཉིས་དེ་སྔ་མི་རབས་གསུམ་པའི་ཁྲོད་ཡོད་པ་དེ་དང་ཧི་གཟུགས་ཟིན་བྲིས་སུ་ཡོད་པ་གཉིས་མ་རེད་ལགས། གཟིགས་མཁན་རྣམ་པ།
རྒན་རབ་གསལ་དང་བཙན་པོ་གཉིས་ཀྱིས་བསམ་ཚུལ་འོས་སྦྱོར་གནང་བར་ཐུགས་རྗེ་ཆེ། སང་ཉིན་གྱི་བགྲོ་གླེང་ལ་ངེས་ཕེབས་ཀྱི་འབོད་སྐུལ་ཡང་མཉམ་དུ་ཞུ་རྒྱུ་ཡིན།
དྲ་གྲོགས་ཚེ་རིང་སྐྱིད་ལགས་ཀྱིས་མ་བསྐུལ་དང་བླངས་ཀྱིས་འགྲོ་གྲོན་ཞལ་བཞེས་གནང་བ་དང་། དེ་བཞིན་དྲ་གྲོགས་མང་བོ་ཞིག་གིས་བསམ་ཚུལ་རྒྱས་བཤད་གནང་བར་ཐུགས་རྗེ་ཆེ། ཉིན་དེར་སྙན་ངག་པ་བཅུ་གསུམ་གྱིས་སྙན་ངག་གྱེར་འདོན་དང་སྙན་ངག་པ་བཅུ་གཅིག་གིས་རང་རང་གིས་སྙན་ངག་དང་རྩོམ་རིག་གི་ཐད་ལ་ལྟ་ཚུལ་བཏོན་ཡོད་ལ་ངེད་བཀོད་སྒྲིག་པ་གཉིས་ཀྱིས་ཚགས་པར་ཁང་དག་ལ་ཁག་བགོས་བྱས་བཏང་ཡོད། ཚགས་པར་དག་བཀྲམ་ཚར་བ་དང་ཆ་ཚང་ཟིན་བྲིས་ནང་འགོད་རྒྱུ་ཡིན། དེ་ལྟར་ཐུགས་འཇགས་འཚལ།
ཁ་བརྡ་ནས་གཤམ་གསལ་དྲངས་པ་ཡིན།
http://www.khabdha.org/?p=16
སྙན་ངག་གིས་སྤྱི་ཚོགས་ལ་འགན་ཅི་ཞིག་ཁུར་ཐུབ།
རབ་འབྱོར་གྱིས།
སྙན་ངག་གིས་སྤྱི་ཚོགས་ལ་འགན་འཁུར་དགོས་མིན་གྱི་དྲི་བའི་སྔོན་ལ། དེས་སྤྱི་ཚོགས་ལ་འགན་གང་ཞིག་འཁུར་ཐུབ་རྒྱུ་ཡིན་པ་འདི་འདྲི་འོས། སྤྱི་ཚོགས་ལ་འཁུར་རྒྱུའི་འགན་ཁོངས་ནི་ཧ་ཅང་རྒྱ་ཆེན་པོ་རེད། དང་པོ་སྤྱི་ཚོགས་ཀྱི་ཕོ་བ་རྒྱག་དགོས་པ་དང་རྒྱབ་དྲོ་དགོས་པ་དེ་རེད། དེ་ནི་མི་སྒེར་དང་རིམ་པ་སོ་སོའི་སྲིད་གཞུང་གི་འགན་འཁུར་རེད། དེ་ནས་སྤྱི་ཚོགས་ལ་རྐུན་ཇག་སོགས་ཀྱི་འཇིགས་པ་མེད་པའི་བདེ་འཇགས་རེད། དེ་ནི་སྤྱི་བདེ་དང་བདེ་འཇགས་ལས་ཁུངས་ཀྱི་ལས་འགན་རེད། དེ་ནས་སྤྱི་ཚོགས་ལ་ན་བ་ཚ་བ་ཉུང་ཞིང་བདེ་ཐང་ཡིན་དགོས་པ་དེ་རེད། དེ་ནི་འཕྲོད་བསྟེན་ལས་ཁུངས་དང་སྨན་ཁང་སོ་སོའི་ལས་འགན་རེད། དེ་ནས་སྤྱི་ཚོགས་ཀྱི་ཤེས་འཇོན་ཡར་རྒྱས་གཏོང་རྒྱུ་དེ་རེད། དེ་ནི་སློབ་གསོའི་ལས་ཁུངས་དང་སློབ་གྲྭ་རྣམས་ཀྱི་འགན་འཁུར་རེད། ད་དུང་སྤྱི་ཚོགས་ལ་དགོས་པ་ནི་དྲང་བདེན་དང་འདྲ་མཉམ་རེད། དེ་ནི་ཁྲིམས་ཁང་དང་ཁྲིམས་བཟོ་ལས་ཁུངས་སོགས་ཀྱི་འགན་འཁུར་རེད། འདི་དང་འདི་ལྟ་བུའི་སྤྱི་ཚོགས་ཀྱི་རྩ་བའི་དགོས་མཁོ་སྐོར་ཞིག་ཡོད་པ་ལས་སྙན་ངག་གི་འགན་དུ་འབབ་པ་དང་འགན་ལེན་ཐུབ་པ་གང་ཡོད་དམ།
ང་ཚོའི་རྩོམ་རིག་སྨྲ་བ་རྣམས་ཀྱིས་རྩོམ་རིག་གིས་སྤྱི་ཚོགས་ལ་གཤེགས་བཅོས་བྱེད་དགོས་ཞེས་ཏེ་སྤྱི་ཚོགས་མཚང་འབྱིན་གྱི་ལས་འགན་ཞིག་རྩོམ་རིག་གི་ཐོག་ལ་འགེལ་བ་ལ་ལོབས་ཡོད། གཅིག་བྱས་ན་དོན་གནད་འདི་འདྲ་ཞིག་གི་ཐོག་ནས་སྙན་ངག་གིས་སྤྱི་ཚོགས་ལ་འགན་འཁུར་མིན་གླེང་བ་ཡིན་ནམ། ཡིན་ན་ཡང་དམངས་གཙོའི་རྒྱལ་ཁབ་ཅིག་གི་ནང་དུ་འདི་ཡང་ཚགས་པར་དང་རླུང་འཕྲིན། བརྙན་འཕྲིན་བཅས་ཀྱི་འགན་འཁུར་རེད། རྒྱུད་ལམ་དེ་དག་གིས་རྟོག་བཟོའི་ཆ་ལ་གཡོལ་གང་ཐུབ་ཀྱིས་སྤྱི་ཚོགས་ཀྱི་ཆ་ཞིག་གི་སྐྱོན་ཇི་མ་ཇི་བཞིན་དུ་བཏོན་ཏེ་སྤྱི་ཚོགས་དང་འབྲེལ་ཡོད་སྡེ་ཚན་གྱི་དོ་སྣང་འདྲེན་ཐབས་བྱེད་ཀྱི་ཡོད་པ་རེད།
ཀྲུང་གོ་ལ་རྒྱུད་ལམ་རྣམས་ནི་གུང་ཁྲན་ཏང་གི་ཁ་ལྕེ་ཡིན་སྟབས་རང་དབང་གི་སྒོ་ནས་སྤྱི་ཚོགས་ཀྱི་སྐྱོན་འདོན་བྱེད་པའི་དབང་ཆ་མེད་པ་དེ་བདེན་པ་རེད། དེ་དུས་གཞུང་འཛིན་པའི་ཁ་ལྕེར་མ་གྱུར་བ་ཞིག་གིས་སྐྱོན་འདོན་བྱེད་དགོས་ཤིང་། ང་ཚོའི་བོད་ལ་མཚོན་ན་ལས་འགན་དེ་རྩོམ་རིག་གིས་ལེན་ཐབས་བྱེད་ཀྱི་ཡོད། ཡིན་ན་ཡང་། ཕངས་པ་ཞིག་ལ། ངས་བལྟས་ན་ང་ཚོས་རྩོམ་རིག་གི་འགན་འཁུར་མ་ཡིན་པ་ཞིག་རྩོམ་རིག་ལ་འགེལ་གྱི་ཡོད་པ་འདྲ། རྩོམ་རིག་ནི་ཇི་འདྲའི་དངོས་དོན་ཡིན་ཞེ་ན་ཡང་རྟོག་བཟོ་དང་མ་འདྲེས་པ་ཞིག་ཤིན་ཏུ་དཀའ་ལ། ང་ཚོས་རྩོམ་རིག་བརྩམས་ཆོས་ཤིག་གི་བཟང་ངན་བརྗོད་པ་ཡང་དོན་དངོས་སུ་རྩོམ་པ་པོའི་རྟོག་བཟོའི་ནུས་རྩལ་གྱི་བཟང་ངན་བརྗོད་པ་ཡིན། དོན་དག་གང་ཞིག་ཡིན་ཡང་རྩོམ་རིག་གི་བརྗོད་གཞིར་གྱུར་ཚར་རྗེས། དེ་ལ་དོན་དངོས་ཀྱི་ནུས་པ་ཤོར་ཚར་བ་རེད། སྐྱོན་འདོན་བྱས་པ་གཞིར་བཟུང་གིས་སྐྱོན་བཅོས་བྱེད་མཁན་གྱི་སྲིད་གཞུང་ཞིག་ཡོད་པའི་དབང་དུ་བཏང་ན་ཡང་། དེས་གསར་འགོད་ཀྱི་རྒྱུད་ལམ་འདྲ་མིན་ལས་ཐོན་པའི་གནས་ཚུལ་དང་། དོན་དག་གང་ཞིག་ལ་དམིགས་བསལ་གྱིས་བྱས་པའི་རྟོག་དཔྱོད་ཀྱི་ཡིག་རིགས་ལྟ་བུ་ལ་ཆ་འཇོག་གིས་སྐྱོན་སེལ་བྱེད་རྒྱུ་རེད་མ་གཏོགས་སྙན་རྩོམ་ལ་བརྟེན་ནས་སྐྱོན་སེལ་བྱེད་པ་ནི་ཡོང་མི་སྲིད་པ་ཞིག་རེད།
ངའི་གོང་གསལ་གྱི་བསམ་བློ་གཏོང་སྟངས་ལྟར་ན། རྩོམ་རིག་གིས་སྤྱི་ཚོགས་ལ་འགན་འཁུར་དགོས་མིན་གྱི་གཏམ་དེ་ནི་ཡོང་དོན་མེད་པ་ཞིག་རེད། ཡིན་ན་ཡང་བོད་ནང་གི་རྩོམ་པ་པོ་དང་རྩོམ་རིག་སྨྲ་བ་རྣམས་ཀྱི་ངག་ལ་བརྗོད་གཞི་འདི་ཁྱབ་རྒྱ་ཆེ། གཅིག་བྱས་ན་ངའི་གོང་གི་བསམ་བློ་གཏོང་སྟངས་དེ་སླ་དྲག་པ་དང་། ཁོང་ཚོ་ལ་དེ་ལས་ལྷག་པའི་གནས་ལུགས་རྣལ་མ་རེ་བཤད་རྒྱུ་ཡོད་ལས་ཆེ། ཡིན་ན་ཡང་ད་བར་དུ་གནས་ལུགས་རྣལ་མ་དེ་འདྲ་ཡིག་ཐོག་ནས་མཐོང་མ་བྱུང་ལ། སྤྱི་ཚོགས་ཀྱི་དངོས་དོན་གྱིས་ཀྱང་འདི་ལ་རྒྱབ་སྐྱོར་ཆུང་།
ལོ་རབས་བརྒྱད་ཅུའི་ནང་ལ་བོད་ཀྱི་རྩོམ་རིག་གསར་པའི་འགོ་ཚུགས་པ་ནས་བཟུང་། བོད་ཀྱི་རྩོམ་པ་པོ་གང་མང་ཞིག་གིས་བོད་རང་གི་སྤྱི་ཚོགས་ལ་བླང་དོར་སྟོན་པའི་འབད་བརྩོན་བྱས་ཡོད། དེ་ནི་ཁོང་ཚོས་རྗོད་བཞིན་པའི་སྤྱི་ཚོགས་ལ་འགན་འཁུར་བ་ཟེར་བ་དེ་ཡིན་རྒྱུ་རེད། ཁོང་ཚོས་འབྲོག་པས་རྩྭ་ས་རྩོད་པ་དང་། ཕ་མ་རྣམས་ཀྱིས་རང་རང་གི་བུ་ཕྲུག་སློབ་གྲྭར་མི་གཏོང་བ། གཉེན་སྒྲིག་གི་རང་དབང་མེད་པ་བཅས་ལ་སྐྱོན་བརྗོད་བྱེད་པའི་སྙན་རྩོམ་དང་སྒྲུང་རྩོམ་གང་མང་སྤེལ་ཡོད། ཡིན་ན་ཡང་། རྩོམ་རིག་གིས་སྐྱོན་བརྗོད་བྱས་པ་ལ་བརྟེན་ནས་རྩྭ་ས་རྩོད་གྲངས་ཇེ་ཉུང་དུ་སོང་བ་དང་། ཡང་རྩོད་མཚམས་ཆད་པའི་གཏམ་ཞིག་གོ་མྱོང་ངམ། ངས་གོ་ཚུལ་ལ། རྩྭ་ས་སྒེར་ལ་བགོས་པ་ནས་བཟུང་སྔར་གྱི་རྩྭ་ས་རྩོད་པའི་ཐོག་ལ་ཕ་མ་གཅིག་པའི་སྤུན་ཟླའི་བར་ལ་ཡང་རྩྭ་ས་རྩོད་གླེང་བྱུང་ཡོད་པ་རེད་ཟེར།
བོད་ཀྱི་རྩོམ་པ་པོ་རྣམས་ཀྱིས་ལོ་ངོ་བཅུ་ཕྲག་ལྷག་ལ་རྩྭ་ས་རྩོད་གླེང་ལ་སྐྱོན་བརྗོད་བྱས་བྱས་པའི་མཐར། ད་ལྟ་གཞི་ནས་རྩྭ་ས་རྩོད་གླེང་ཇེ་ཉུང་ངམ་རྩོད་མཚམས་ཆད་རྒྱུའི་རེ་བ་ཞིག་མངོན་ཡོང་གི་ཡོད་པ་འདྲ། ཕངས་པ་ཞིག་ལ་འདི་ནི་བོད་ཀྱི་རྩོམ་པ་པོ་རྣམས་ཀྱིས་བླང་དོར་བསྟན་པའི་འབྲས་བུ་མ་ཡིན་པར། རྩྭ་སའི་བདག་པོ་རྣམས་རྩྭ་ས་ནས་གྲོང་ལ་ཕབ་དང་འབེབས་བཞིན་པ་འདིས། རྩྭ་ས་རྩོད་འདོད་ཀྱང་རྩོད་རྒྱུ་མེད་པ་ཞིག་ཡོང་གི་ཡོད་པ་དེས་ཡིན་ནོ།།
(འདས་ལོར། བོད་དུ་བཏོན་པའི་བོད་ཡིག་གི་དྲ་རྒྱ་ཞིག་ཏུ་སྙན་ངག་གིས་སྤྱི་ཚོགས་ལ་འགན་འཁུར་དགོས་མིན་གྱི་སྐོར་ལ་གླེང་མོལ་ཞིག་བྱས་སོང་། གཤམ་གསལ་གྱི་རྩོམ་འདི་ནི་དེ་དུས་བྲིས་པ་འདི། བོད་ཀྱི་རྩོམ་རིག་ལ་ཐུགས་སྣང་ཅན་མང་པོས་གཟིགས་མེད་སྙམ་གྱིས་ད་རེས་ཡང་སྐྱར་འདོན་བྱས་པ་དགོངས་འཇགས་ཞུ།)
ན་རོ་དང་རྨོག་རུ་ཤེས་རབ་རྡོ་རྗེ་གཉིས་བོད་ནང་གི་སྙན་ངག་པ་དེ་གཉིས་ཨེ་རེད།ཤེས་མཁན་ཞིག་གིས་ལན་སྐྱོན་རོགས།
བཅོས་ནོར། ཁྱེད་ཚོས་རྦབ་ཆུ་ཆུ་རྐ་ཟེར། འདི་ན་དུག་ཟེར་གིན་འདུག
ཀྱེད་ཚོས་རྦབ་ཆུ་ཆུ་རྐ་ཟེར། འདི་ནི་དུག་ཟེར་གིན་འདུག
ཨ་རིའི་བོད་པའི་ཟེན་བྲིས་ལས་འདིར་བླངས་པ་ཡིན
ལང་ཚོའི་རྦབ་ཆུའི་བླ་རྡོལ་དང་དུག
སྔོན་བརྗོད
བོད་ཀྱི་གཞོན་རབས་མི་ཉུང་བ་ཞིག་ལ་དོན་གྲུབ་རྒྱལ་གྱིས་ཤུགས་རྐྱེན་ངེས་ཅན་ཞིག་བཞག་ཡོད།ཤུགས་རྐྱེན་དེ་བཟང་བོ་དང་ངན་པ་གང་ཡིན་མིན་དཔྱད་པ་བྱེད་དགོས་པ་ཞིག་རེད། དོན་གྲུབ་རྒྱལ་མིང་སྙན་པའི་དམངས་གཙོའི་བཅོས་བསྒྱུར་ནང་སྐྱེས་ཤིང་།སྐད་གྲགས་ཅན་གྱི་རིགས་གནས་གསར་བརྗེ་ཆེན་མོའི་ནང་སློབ་སྤྱོང་གི་མ་ལག་ཆགས་ནས་བསྒྱུར་བཅོས་སྒོ་འབྱེད་ཀྱི་མགོ་སྟོད་དུ་རྩོམ་ཡིག་སྤེལ་མཁན་ཞིག་ཡིན་པ་འདི་ལ་བསམ་བློ་བཏང་ན་དོན་རྒྱལ་གྱི་བསམ་བློའི་གྲུབ་ཆ་རེ་རེ་རིག་གསར་དང་དེའི་སྔ་བཞུག་གི་འཁོར་ཡུག་གིས་བསྐྲུན་པ་ཤེས་ཐུབ་ལ།ད་དུང་བསམ་བློ་དེའི་རང་མདངས་ཕྱི་རོལ་ལ་འཕྲོས་བ་ནི་ཁོའི་རྩོམ་ཡིག་དེ་དག་ཡིན་པར་མ་ཟད།ལང་ཚོའི་རྦབ་ཆུ་ནི་དེ་དག་གི་ནང་སྙིང་ལྟ་བུ་ཡིན་པ་དེང་སང་གི་མཁས་པ་ཡིན་ཟེར་མཁན་མང་ཆེ་བ་ཁ་མཐུན།
༡ རྦབ་ཆུ་ཡི་བཅིངས་གྲོལ་དམག་མི།
རྦབ་ཆུ་ནི་རྒྱའི་གནའ་སྲོལ་རི་མོའི་ནང་མཐོང་རྒྱུ་ཡོད་ལ། རྒྱའི་སྙན་རྩོམ་གྱི་ནང་ལ་ཡང་འདི་ཡང་ཡང་བེད་སྤྱོད་བྱས་ཡོད་པས།རྒྱའི་རིག་གནས་ནང་རྦབ་ཆུས་གོ་གནས་གལ་ཆེན་ཞིག་བཟུང་ཡོད།དེ་ནི་བོད་ཡུལ་ན་གངས་རི་མང་བ་བཞིན་རྒྱ་ཡུལ་ན་རྦབ་ཆུ་མང་བ་དེས་རྐྱེན་ཞིག་ལོས་ཡིན། བོད་ཀྱི་ཐ་སྙད་ནང་རྦབ་ཆུ་ཡོད་པ་ཙམ་ལས་བེད་སྤྱོད་ཆེན་པོ་མེད་མོད། དོན་གྲུབ་རྒྱལ་གྱིས་རྒྱ་ནང་ནས་སློབ་གྲ་ཐོན་རྗེས་རྦབ་ཆུ་བོད་ཡུལ་གྱི་རྩོམ་རིག་གི་ཐ་སྙད་གལ་ཆེན་ཞིག་ཆགས། དེ་ནས་བཟུང་རྦབ་ཆུ་ཡང་བོད་ལ་རོགས་སྐྱོར་བྱེད་དུ་ཡོང་བ་ཡིན་ཟེར་བའི་དམག་མི་ཚོ་ནང་བཞིན་བོད་ཀྱི་རིགས་གཞུང་ནང་གི་བཅིངས་གྲོལ་དམག་མི་ཞིག་ཉན།
༢ སྨྱོན་པའི་བླ་རྡོལ་གྱི་རྦབ་ཆུ།
ལང་ཚོའི་རྦབ་ཆུ་ལ་ཚིག་རྐང་བརྒྱ་དང་སུམ་ཅུ་ལྷག་ཡོད་པ་མང་ཆེ་བ་ལ་ཚིག་ཚོགས་བཟོས་ནས་ཚིག་ཚོགས་ཀྱི་མགོར་འབོད་ཚིག་དང་འདི་ནི།ཁྱེད་མེད་ན་ཟེར་བ་སོགས་ཚགས་བར་གཉིས་ལྡན་དང་སུམ་ལྡན་རེ་སྤྱར་ཏེ་བརྗོད་པ་དེས།
བྲག་ངོད་གཟར་བོ་ནས་ཆིལ་ཆིལ་དུ་ཤར་སེ་འབབ་པ་ལྟ་བུའི་ཚིག་གི་བརྗོད་ལྟངས་ལ་བསྒྲིག་གཞི་མེད་པར་རང་གིས་འདོད་པ་ལྷུགས་པར་བརྗོད་པའི་ནུབ་ཕྱོགས་ཀྱི་རང་དབང་སྙན་ངག་ལྟར་མ་ཡིན་པར་(རྦབ་ཆུ་འདི་རང་དབང་སྙན་ངག་རེད་ཟེར་མཁན་མང་པོ་ཡོད་)བྲག་ངོས་ཐ་མེ་ཐེམ་མེ་ན་རྦབ་ཆུ་ཆ་ལེ་ཆོ་ལེ་འབབ་པ་ལྟ་བུ་ཞིག་བཟོས་འདུག་པར་མ་ཟད། ཚིག་ཚོགས་མང་པོ་ལ་བསྒྲིག་ཁྲིམས་དམ་པོ་བཟོས་འདུག དཔེར་ན། སྔོ་ཞིང་བསངས་པའི་ནམ་མཁའ། དྲོ་ཞིང་འཇམ་པའི་ཉི་འོད། ཡངས་ཤིང་ཆེ་བའི་ས་གཞི། མཛེས་ཤིང་སྡུག་པའི་མེ་ཏོག མཐོ་ཞིང་བརྗིད་པའི་ལྷུན་པོ། ཟེར་བའི་ཚིག་རྐང་ཚིག་ཚོགས་འདིའི་ཚིག་རྐང་རེ་རེ་ཚིག་གཉིས་པ་དང་བཞི་པ་ལ་ཞིང་སྒྲ་རེ་དང་པའི་སྒྲ་རེ་སྦྱར་ནས་ཚིག་རྐང་ཚིག་ཚོགས་འདི་ལ་བསྒྲིག་ཁྲིམས་ཉིས་བརྩེགས་ཤིག་འཁུར་དུ་བཅུགས་འདུག སྔོ་ཞིང་བསངས་པའི་ནམ་མཁའ་ཟེར་བའི་ཚིག་རྐང་ཚིག་ཚོགས་ནི་བོད་ཀྱི་རྒན་པོ་ཚོའི་བསང་བརྩི་ལྟངས་འདྲ་བོ་ཡིན་ལ། སྤྱིར་རྩོམ་འདིའི་སྤྱི་ཁོག་བསང་རྩི་ལྟངས་དང་འདྲ་ས་མང་པོ་ཡོད་ནའང་། སྐབས་རེ་བཀྲ་ཤིས་པའི་ཉི་མ།དགེ་ལེགས་འབྱུང་བའི་ཉི་མ།དོན་གྲུབ་པའི་ཉི་མ་ཟེར་བའི་སྟོན་བཤད་བཤད་ལྟངས་ལ་ཁ་ཏོག་ཙམ་བསྒྱུར་འདུག དེ་མིན། མཚམས་མཚམས་སྙན་ངག་གི་རྟ་མཆོག་སྐོམ་པས་གདུངས་ན་ཇི་ལྟར་བྱ་ཟེར་བ་སོགས་མེ་ལོངས་མའི་རྒྱན་གྱི་འགྲོ་སྲོལ་ལྟར་བརྗོད་པ་དང་། ལྟོས་དང་།ཉོན་དང་ཟེར་ནས་ཀློག་མཁན་ཚོར་འདི་ནི་རྦབ་ཆུ་ཡག་པོ་དང་སྙན་པོ་ཞིག་ཡིན་ཚུལ་ལབ་ཆེན་རྒྱག་བཞིན་པའི་སྐབས།ཁྱེད་ལ་དང་ཁྱེད་མེད་ན་ཁྱེད་ཀྱི་ཟེར་ནས་གང་ཟག་གཉིས་པ་ཞིག་ལ་སྟོད་པ་ལུང་ནག་གང་བྱེད་ཀྱིན་བྱེད་ཀྱིན་ང་ཚོ་སྟེ་ཟེར་ནས་གང་ཟག་དང་པོ་ཞིག་བཤད་ཀྱིན་འདུག དེ་ནས་ཡང་ལྟོས་དང་ཉོན་དང་དེ་ནི་འདི་ནི་ཟེར་ནས་གཞན་ཞིག་བཤད་ཀྱིན་འདུག་པ་འདི་དག་ཚང་མ་ཚིག་དོན་གཉིས་ཀར་རང་དབང་གི་སྒྱུ་རྩལ་ཞིག་ཡིན་ཟེར་གྱིན་ཡོད་ཁུལ་ཡིན་མོད། དོན་གྱིས་དེ་ནི་ཉ་ཉོག་བསྲེས་ནས་སྨྱོན་པའི་བླ་རྡོལ་རང་བྱས་འདུག
༣ རིག་གསར་གྱི་དུག་དང་འགྲོགས་པའི་ཁ་སང་གི་རྦབ་ཆུ།
ལང་ཚོའི་རྦབ་ཆུའི་མགོ་ནས་མཇུག་བར་ཐ་སྙད་སྤྱོད་ལྟངས་བོད་ཀྱི་འཚོ་བའི་ཁྲོད་ནས་བྱུང་བའི་སྐད་བརྡ་རྫ་ཆུ།གཡའ་ཆུ།ན་ཆུ་ཟེར་བ་སོགས་དང་མེ་ལོང་མའི་ཐ་སྙད་དྲི་ཟ་དང་།ཚངས་བ།དབྱངས་ཅན་ཟེར་བ་སོགས་ལ་གུང་བྲན་ཏང་གི་རྒྱུན་སྤྱོད་མིང་ཚིག་སྔོན་ཐོན་དང་།མདུན་བསྐྱོད།རྙིང་ཞེན་ཟེར་བ་སོགས་མཉམ་བསྲེས་བྱས་ནས་བྲིས་བ་འདིའི་ནང་གཞི་མེད་པའི་ལབ་རྒྱག་པ་དང་རིག་བཅུའི་མཚོན་པའི་རིག་གནས་ལ་སྤྱང་བརྩོན་དགོས་པར་ཁ་གཡང་བསྒྲོག་པ་ནི་ཕལ་བ་ལྟ་བུ་ཡིན་ལ།
ངོ་མ།མཚར་སྡུག་འོད་སྟོང་འབར་བའི་སྔོན་ཆད་ཀྱིས་ད་ལྟའི་ཚབ་བྱེད་མི་རུང་ཟེར་བ་ནས་བཟུང་རིག་གནས་གསར་བརྗེ་ཡི་དུག་བསྐྱར་བཤད་བྱས་པ་ནི་གཙོ་བོ་ལྟ་བུ་རེད། དེ་ཡང་སྔོན་ཆད་ཀྱི་རིག་གནས་ཀྱི་ད་ལྟའི་ཚབ་བྱེད་མི་རུང་ལ། དུས་(རིག་གསར་དང་དེའི་རྗེས་དུས་)དང་མཐུན་པའི་རིག་གནས་མ་སློབ་ན་ཡར་རྒྱས་འགྲོ་མི་སྲིད། སྔོན་ཐོན་ཆགས་མི་ཐུབ། ང་ཚོ་(1949་ལོའི་རྗེས་སུ་སྐྱེས་བའི་མི) སྟེ་བོད་གངས་ཅན་གྱི་མི་རབས་གསར་བའི་ནང་སྲོལ་རྒྱུན་རྙིང་ཞེན་པ་ཅན་དང་ཆོས་ལུགས་ལ་དད་པ་(ཁོ་ཚོས་དད་པ་ལ་རྨོངས་དད་ཟེར་)བྱེད་མཁན་ཚོ་འཇུག་ཡུལ་གཏན་ནས་མེད་ཟེར་ནས་བོད་པ་བྱིངས་ཁོ་ཚོ་དང་ལོགས་སུ་བཀར་ཏེ་རིག་གསར་གྱི་ལྷ་འདྲེ་གདོན་བཀག་ཟེར་བ་བསྐྱར་བསྒྲག་བྱས་འདུག
ལྷག་པར་ཏུ་ལག་དམར་བཙན་འཛུལ་བས་ང་ཚོའི་མགོར་བཙན་གྱིས་བཞག་པའི་བོད་པ་ཚོ་ནི་ཆེས་རྗེས་ལུས་དང་། ཆེས་ཀླ་ཀློ ཆེས་མུན་ནག ཆེས་ལོག་སྤྱོད་པ་ཡིན་པར་བོད་པའི་མ་ཎི་འདོན་པ་ལས་ཀྱང་གྲངས་མང་བ་བཤད་དང་བཤད་བཞིན་པ་དེ་དོན་གྲུབ་རྒྱལ་གྱིས་འདིར་དྲངས་ནས་ཁོ་ཚོའི་སྐུ་ཚབ་གནང་འདུག
༤ འདི་ནི་རྦབ་ཆུའི་དབྱེན་དཀྲུག་དང་དབྱངས་རྟའི་དྲངས་བའི་མིག་ཆུ་རེད་ཡ།
རྦབ་ཆུའི་ནང་དོན་རྒྱལ་གྱིས་གུང་ཇག་ཚང་གིས་བོད་སྤྱི་ཚོགས་ལ་གསར་རྙིང་གི་དབྱེ་བ་བཀར་ནས་ཁྲག་དཀྲུག་དཀྲུག་བྱས་པ་ནང་བཞིན་བོད་ནང་ལ་དུས་རབས་དང་མི་རབས་ལ་གསར་རྙིང་གི་དབྱེ་བ་བྱས་ནས་གསར་བ་ལ་་འུར་བསྟོད་དང་རྙིང་པ་་ལ་ཁ་རྡུང་བཏང་སྟེ་དབྱེན་དཀྲུག་བརྒྱབས་ཡོད།དེའི་ག་ལ་ཚད།ལང་ཚོའི་རྦབ་ཆུ་ནུབ་ཕྱོགས་ནས་ཨུ་རུ་སུ་བརྒྱུད་རྒྱའི་དམར་དམག་གིས་ཁྱེར་ཡོང་བའི་དྲག་རྩུབ་ཀྱི་དབྱིངས་རྟ་དེ་ལ་དྲངས་བའི་གྱེར་འདོན་ལ་ཉན་ནས་ཤ་འདར་སྤུ་འདར་བརྒྱབས་ཏེ་ཧ་ལས་ཧང་སང་མཁན་ཡང་བོད་གངས་ཅན་ན་ཉུང་ཉུང་མིན།དེ་ནི་དེ་སྔོན་མའོ་ཡི་འདྲ་དཔར་གྱི་སྔོན་དུ་ཤ་འདར་སྤུ་འདར་བརྒྱབས་ཏེ་མིག་ཆུ་གཏོང་མཁན་ཚོ་དང་གཅིག་པ་རེད།
མཇུག་མཐར།
དོན་གྲུབ་རྒྱལ་ནི་ནམ་ཡང་ཤེས་ཡོན་པ་དང་ལ་རྒྱ་ཅན་གྱི་དོན་གྲུབ་རྒྱལ་ཡིན་ན་ཡང་།ཁོའི་རིག་གསར་གྱི་དུག་དང་འདྲེས་བའི་ལྟ་བ་དེ་ང་ཚོའི་མི་རིགས་འདིའི་ནང་འཇུག་ཡུལ་གཏན་ནས་མེད།
སྙན་ངག་གྱེར་འདོན་གྱི་ཚོགས་འདུ་ཚོགས་པར་ཡིད་རངས་བྱེད། འོན་ཀྱང་ཞིབ་ཏུ་ཀློག་ཁོམ་མི་འདུག
རྨོག་རུ་ཤེས་རབ་རྡོ་རྗེ་བཙན་བྱོལ་ལ་འབྱོར་ཡོད་པར་བཀྲ་ཤིས་བདེ་ལེགས་ཞུ་རྒྱུ་ཡིན་ལ། ཡང་ཐེངས་འདིར་བཙན་བྱོལ་སྙན་ངག་པ་ཚོ་མཉམ་འཛོམས་བྱུང་བར་བཀྲ་ཤིས་བདེ་ལེགས་ཞུ་རྒྱུ་ཡིན།
ཡང་བུད་མེད་སྙན་ངག་འབྲི་མཁན་མི་འདུག་གཱ་ ང་མེད་ན་སྐལ་ཆད་འགྲོ་བ་ག་རེ་རེད་དམ། ཨ་ལ་ཀུ་རེ་ཡིན།
སྔར་ལོ་ཚེས་གཅིག་གི་ཉིན་དེར་ང་ཚོས་ཆེད་དུ་མི་རྐྱང་ཐུག་པ་འཐུང་དང་ཆུ་རྐྱང་འཐུང་ནས་རང་རང་གི་ངོས་ནས་མྱ་ངན་གྱི་རྣམ་པ་མཚོན་བྱེད་དང༌། ཡང་རང་རང་གི་དགའ་ཕྱོགས་གཅིག་པའི་སྙན་ངག་ལ་དགའ་མཁན་ཁ་ཤས་ལྷན་ཏུ་འཛོམས་ཏེ་བསམ་ཚུལ་གླེང་ཁུལ་བྱས་པའི་ཉིན་དེར་དུས་ནམ་ཡང་བརྗེད་པ་མེད་ལ། ད་དུང་གནམ་གཤིས་གྲང་ལ་ལམ་ཀ་རྫོབ་པའི་རྡ་སའི་གཡས་གཡོན་ནས་ང་ཚོ་མཉམ་དུ་འཛོམས་ཐེངས་དེ་དག་གིས་རང་སེམས་བག་ལྷོད་དང་ཞི་བདེ། འཚོ་བར་བཟུང་བའི་ལྟ་བ། སུན་སྣང་ལས་གྲོལ་བ་སོགས་གཞི་ནས་རང་ཉིད་ཀྱང་འཚོ་བར་སྤྲོ་དགའ་ཡིས་མཇུག་ཆོག་པ་ར་སྤྲོད་བྱས་མྱོང༌།
སྤྱི་ཚོགས་འདྲ་མིན་ཐོག་ནས་བྱ་འགུལ་གང་མང་ནང་ཞུགས་མྱོང་ཡོད་ཀྱང༌། རྒྱས་སྤྲོས་མེད་པའི་སྙན་ངག་ལ་དགའ་མཁན་ཚོ་མཉམ་དུ་འཛོམས་པའི་དུས་སྐབས་དེ་ནི་བརྗེད་ཐབས་མེད་པ་ཞིག་རེད། དེ་ལྟ་བུའི་རང་ཉིད་ཀྱི་འདོད་མོས་གླེང་སའི་གར་སྟེགས་ཆུང་ཆུང་ཞིག་བྱུང་བར་འཚོ་བར་བཟུང་བའི་བརྩེ་སེམས་ཀྱང་ཇེ་ཆེར་བུད་སོང༌།
དེ་བས་རངར་རང་ལ་དེ་ལྟ་བུའི་ཁོར་ཡུག་རེ་བསྐྲུན་རྒྱུ་ནི་གང་ལས་ཀྱང་གལ་ཆེ་བས། ངས་རྣམ་པ་ཚོས་འདི་ལྟ་བུའི་ལས་འགུལ་རེ་སྤེལ་བར་ཡི་རངས་དང་རྗེས་ཕྱོགས་ཡིན་ཡང་རང་ཚོད་ཀྱིས་གང་ཕྱོགས་ནས་རྒྱབ་སྐྱོར་བྱ་རྒྱུ་ཡིན། ལོ་རེར་སྙན་ངག་གི་འདུ་འཛོམས་ཆེན་པོ་རེ་འཚོགས་རྒྱུའམ་ཡང་ན་ག་རེ་བྱ་འཆར་ཡོད་ན་འགྲོ་སོན་སོགས་ཀྱི་ཐད་ནས་རོགས་རམ་བྱ་འདོད་ཡོད།
འཇིག་རྟེན་ནས་སྙན་ངག་རྒྱལ་གྱུར་ཅིག སྙན་ངག་པ་རྒྱལ་གྱུར་ཅིག
ངས་རྩོམ་དང་སྙན་ངག་གང་ཡང་མི་ཤེས་ཏེ་ཕྱི་ནང་གི་མཁས་དབང་མང་པོ་མཇལ་མྱོང་ལ་གསུངས་མང་པོ་ཐོས་མྱོང་ཡོད་རྩོམ་བྲིས་པའི་དོན་དག་ནི་རང་ཉིད་ཀྱི་བསམ་ཚུལ་སྤྱི་ཚོགས་ཤིག་ལ་བཤད་པ་རེད།
བཤད་སྟངས་དེར་ཁ་སྙན་པོའི་ཐོག་ནས་བཤད་ན་ཡང་འདྲ་ཚིག་རྩུབ་པོའི་ཐོག་ནས་བཤད་ན་ཡང་འདྲ་དོན་ངོ་མ་སྤྱི་ཚོགས་ཀྱིས་གོ་ཐུབ་པ་ཤིག་དགོས་འདུག་སྙམ།༔
སྔོན་མ་འབྲས་བློ་གླིང་གི་དགེ་བྱ་ཞ་ཡིས་ཁ་མཚར་དང་འདྲེས་ནས་ང་ཚོ་བོད་ཀྱི་མཁས་དབང་ཚོས་རྩོམ་འབྲི་དུས་མི་གཞན་གྱིས་མི་གོ་བ་ཚིག་མཁྲེགས་པོ་དང་དངོན་བརྗོད་སོགས་བེད་སྤྱོད་བྱེད་ནས་འབྲི་བ་དང་ཕྱི་རྒྱལ་ཁབ་ཀྱི་རྩོམ་པ་པོས་རྩོམ་འབྲི་དུས་མི་ཚང་མས་གོ་ཐུབ་པའི་མིང་ཚིག་བེད་སྤྱོད་བྱེད་ནས་འབྲི་གི་རེད་གསུངས་པ་དང།
མ་ཟད་ཁོང་གིས་གསུངས་དོན་བོད་པའི་རྩོམ་པ་པོས་རང་ཉིད་ཀྱི་ཡོན་ཏན་ངོམ་ཐབས་དང་ཕྱི་རྒྱལ་གྱི་རྩོམ་པ་པོས་རང་ཉིད་ཀྱིས་བསལ་ཚུལ་དེ་སྤྱི་ཚོགས་ཀྱིས་ཤེས་ཐབས་བྱེད་ཀྱི་རེད་གསུངས་པ་ལྟར་མཁས་དབང་ཁ་ཅིག་གིས་མ་གཏོགས་མི་གོ་བའི་རྩོམ་ཞིག་བྲིས་ན་དེས་སྤྱི་ཚོགས་ལ་ཤུགས་རྐྱེན་ཐོན་གྱི་ཕར་ཞོར་ང་ཅོ་རི་ལྟ་བུའི་བོད་མི་རྣམས་ཀྱིས་ཀློག་ཡང་མི་ཤེས་པ་བྱས་ནས་ཅི་ཕན།
ངས་བསམ་ཚུལ་རྩོམ་འབྲི་དུས་གོ་དགོས་མཁན་གྱི་སྤྱི་ཚོགས་ཀྱི་ཤེས་ཚད་དང་བརྟེན་ནས་འབྲི་ན་ཡག་པོ་མེད་འགྲོ་སྙམ།
བཀྲ་ཤིས་བདེ་ལེགས་མཁས་དབང་ཚོ།
ཁྱོད་ཚོས་ཚིག་གི་གཅོད་མཚམས་ལ་བསམ་བློ་རེ་གཏོང་གིན་མེད་དམ། ངས་མི་སུས་སྐད་ཆ་གང་ཞིག་བཤད་ཡོད་མེད་ཤེས་རྒྱུར་དཀའ་ངལ་འདུག མྱི་ལོ་ལོན་ལ་ཐུབ་ཚོད་མ་བཏང་ན་བཟང་གི་ཡ།
རྦབ་ཆུ་་་ལང་ཚོའི་རྦབ་ཆུ་་་་་
གངས་ལྗོངས་ན་ཚ་རླབས་བཞིན་འཕྱུར་བའི་རྦབ་ཆུ་ལགས།
དེ་རིང་ཁྱོད་བཙན་བྱོལ་ལ་སླེབས་དུས་རྐ་ཆུ་ཞིག་ཏུ་འགྱུར་དོན་ཅི།
གངས་ཅན་པ་རེ་རེའི་སེམས་ཁམས་ཡང་ཁྱོད་ཀྱི་རླབས་སྒྲ་བཞིན་འཕྱོ་བས།
དེ་རིང་འདི་ལྟར་རྐ་ཆུ་ཞིག་ཏུ་གྱུར་དོན་ཅི།
བོད་མི་རིགས་ཀྱི་མདུན་བསྐྱོད་ཀྱི་གོམ་ཁ་་་་་་་་་་་་་་་་་་ཆེ་བས།
དེ་རིང་ཁྱོད་ཀྱི་བཞུར་རྒྱུན་འཕགས་ཡུལ་དུ་སླེབས་དུས་རྐ་ཆུ་ཞིག་ཏུ་འགྱུར་དོན་ཅི།
བཙན་བྱོལ་ནང་གི་སྙན་ངག་པ་དང་རྩོམ་པ་པོ་དག་གི་སེམས་ཤུགས་དང་ལྷག་བསམ། འདུ་འཛོམ་གྱི་རྣམ་པ་འདི་ལ་དགའ་བསུ་ཡོད་ལ། རང་རང་གི་གང་གསུངས་པ་དེ་ལྟར་དུ་འགན་འཁྲི་ཡོད་མཁན་གྱི་མི་སྣ་ཞིག་ལ་སྙེགས་རྒྱུར་འབོད་སྐུལ་དང་། རྗེས་སོར་ཡང་ཡང་འདི་འདྲ་ཚོགས་ནས་གོ་བསྡུར་ལྷུག་པོ་ཡོང་བར་ཤོག