དགོན་པ་བླ་མར་མི་དབང་བའི་རྒྱ་གཞུང་གི་སྲིད་བྱུས།

རྒྱ་ནག་གཞུང་གིས། ༧གོང་ས་མཆོག་གིས་ངོས་འཛིན་གནང་པའི་སྤྲུལ་སྐུ་རྣམས་ལ་རང་གི་དགོན་པར་བདག་སྐྱོང་དང་མི་མང་ལ་ཕན་པའི་སྲི་ཞུ་བསྒྲུབ་པའི་ཆོག་མཆན་མེད་པར་བཟོས་སྟབས། ངས་སྦྱར་ཡིག་བཀྲམས་ཏེ་ངོ་རྒོལ་བྱས་པ་ཡིན་ཟེར།

ཕྱི་ཚེས་ ༡༦ ཉིན་འདི་གའི་གསར་འགོད་པ་ཉེ་ཆར་བོད་ནས་གསར་དུ་འབྱོར་ཞིང་ད་ལྟ་ངྷ་ས་དབུས་སྣེ་ལེན་ཁང་དུ་ཡོད་པའི་ཡུན་ནན་བདེ་ཆེན་བོད་རིགས་རང་སྐྱོང་ཁུལ་རྒྱལ་ཐང་རྫོང་དགོན་གསལ་བཀྲ་ཤིས་བསམ་གཏན་གླིང་གི་འཛའ་ཧཱ་སྤྲུལ་སྐུ་ངག་དབང་དགའ་ལྡན་ལགས་ལ་མཇལ་ཞིང། བདེ་ཆེན་བོད་རིགས་རང་སྐྱོང་ཁུལ་གྱི་མི་མང་གི་འཚོ་བ་དང་དགོན་པའི་གནས་སྟངས་སྐོར་ལ་རྒྱུས་ལོན་བྱེད་སྐབས། ཁོང་གིས་གསུངས་དོན། དགོན་གསལ་བཀྲ་ཤིས་བསམ་གཏན་གླིང་ནི་རྒྱལ་མཆོག་ལྔ་བའི་སྐབས་ནས་ཡོད་པའི་དགོན་པ་ཞིག་ཡིན་ཞིང་། བཅིངས་འགྲོལ་མ་ཐོབ་གོང་དགོན་པ་དེར་གྲྭ་པ་ ༡༨༠༠ ལྷག་ཡོད་པའི་བཤད་སྲོལ་ཡོད་པ་རེད།  ང་ཡང་དགོན་པ་དང་ས་གནས་མི་མང་གིས་སྤྲུལ་སྐུ་ཞིག་ཏུ་ངོས་འཛིན་བྱས་ཤིང་  ༡༩༨༥ ལོར་ཐེངས་དང་པོར་རྒྱ་གར་ལ་བཙན་བྱོལ་དུ་འབྱོར་ཏེ་གནས་སྟངས་སྐྱོ་བོའི་འོག་ཁྲི་འདོན་སོགས་ཅི་ཡང་བྱས་མེད། ཕྱིས་སུ་ཕ་ཡུལ་མི་མང་གིས་ཐེངས་གང་མང་ལ་རེ་བ་དང་འབོད་སྐུལ་བྱས་མཐར་ ༡༩༩༢ ལོར་ཕྱིར་ཕ་ཡུལ་གྱི་དགོན་པར་ལོག་སྟེ། རྒྱ་གཞུང་གིས་དགོན་པ་དང་ང་རང་སྤྲུལ་སྐུ་ཡིན་པའི་ངོས་ལེན་བྱེད་པར་ཧུར་བརྩོན་བྱས་ཤིང་།  ༢༠༠༠ ལོར་སྙན་ཞུ་ཐེངས་མང་ཕུལ་མཐར་རྒྱ་ནག་ཆོས་སྲིད་ལས་ཁུངས་དང་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོལ་ཁུལ་སྲིད་གཞུང་བཅས་ཀྱིས་དགོན་པར་མཆོག་མཆན་དང་ང་རང་སྤྲུལ་སྐུ་ཡིན་པའི་ངོས་ལེན་ཡི་གེ་སྤྲད་པ་རེད། ༢༠༠༣ ལོར་ངས་རྒྱ་སྒོར་ཁྲི་ཕྲག་མང་པོའི་འགྲོ་གྲོན་བཏང་སྟེ་དགོན་པ་སླར་གསོ་བྱས་པ་ཡིན། ཡིན་ནའང་། རྒྱ་གཞུང་གིས་གྲྭ་བ་ ༨༠༠ ལས་བསྡུ་མི་ཆོག་པའི་སྒྲིག་ཁྲིམས་གཏན་འབེབས་བྱས་པ་དང་། ༧གོང་ས་མཆོག་གིས་ངོས་འཛིན་གནང་བའི་སྤྲུལ་སྐུར་ངོས་ལེན་མི་བྱེད་པར་མ་ཟད། སེ་འབྲས་དགའ་གསུམ་ནང་སློབ་གཉེར་གནང་སྟེ་དགེ་བཤེས་དམ་བཅའ་བཞག་པའི་དགེ་བཤེས་དག་ཕྱིར་རང་དགོན་དུ་ཕེབས་སྐབས་ཁས་ལེན་མི་བྱེད་པ་སོགས་ཀྱིས། གྲྭ་བའི་གྲངས་འབོར་ཙམ་ལས་མཚན་ཉིད་དང་གཞུང་ལུགས་ཕར་ཞོག  གྲྭ་པ་ཚོས་བོད་ཡིག་གི་ཀློག་འདོན་ཙམ་ལས་ནང་དོན་དང་དག་ཆ་གསལ་བོར་ཤེས་ཀྱིན་མེད་པ་དང་། བོད་རང་གི་ལོ་རྒྱུས་སོགས་ཤེས་ཡོན་གྱི་གནས་ཚད་ཧ་ཅང་སྐྱོ་བོ་ཡིན་པ་སོགས་དགོན་པའི་ནང་ཆོ་ག་ཕྱག་ལེན་ཙམ་ལས་ཅི་ཡང་མི་ཤེས་པའི་གྲྭ་ཚོགས་ཤིག་གསོ་སྐྱོང་བྱེད་བཞིན་ཡོད་པ་དང་། ༧གོང་ས་མཆོག་གི་སྐུ་པར་བཀྲམ་མི་ཆོག་པ་དང་། ཁོང་ལ་ཁ་རྡུང་གཏོང་དགོས་པ་སོགས་ང་ཚོའི་ཆོས་ལུགས་དད་མོས་རང་དབང་ལ་རྩིས་མེད་རྡོག་རོལ་བཏང་སྟེ། དགོན་པའི་གནས་སྟངས་ཧ་ཅང་དཀའ་ཁག་གི་གནས་སུ་བསྐྱལ་བ་རེད་ཅེས་དང་། ཁོང་གིས་མུ་མཐུད་གསུངས་དོན། གནས་སྟངས་དེ་དག་སེམས་ཀྱིས་མ་བཟོད་པར་ ༢༠༠༧ ལོའི་ཕྱི་ཟླ་ ༡༢ པའི་ཚེས་ ༡༩ ཉིན་ངས་སྲོང་བཙན་གླིང་དགོན་པའི་གྱང་ངོས་སུ་རྒྱ་ཡིག་གི་ལམ་ནས་འདས་པའི་ལོ་རྒྱུས་ནང་བོད་འདི་རང་བཙན་གྱི་རྒྱལ་ཁབ་ཅིག་ཡིན་པ་དང་། བདེ་ཆེན་བོད་རིགས་རང་སྐྱོང་ཁུལ་གྱི་བླ་སྤྲུལ་གཙོས་དགེ་འདུན་པ་དང་མི་མང་ཡོངས་ཀྱིས་སྲིད་འཛིན་ཧུའུ་ཅིན་ཐའོ་གཙོས་པའི་རྒྱ་ནག་གཞུང་ཕྱོགས་ཀྱི་དྲང་བདེན་མ་ཡིན་པའི་སྲིད་བྱུས་ལ་ཁ་གཏད་གཅོག་རྒྱུ་དང་། ༧གོང་ས་མཆོག་ལ་རྒྱབ་སྐྱོར་གནང་དགོས་པ། བོད་ལ་རང་བཙན་གྱི་ཉི་མ་ཞིག་འཆར་བའི་སྨོན་འདུན་དང་རང་ཉིད་ཀྱི་མིང་དང་བཅས་ཤོག་བུ་དམར་པོ་ཞིག་སྟེང་བྲིས་ཏེ་སྦྱར་བ་ཡིན། ཉིན་བཅུའི་རྗེས་སུ་ངས་རང་ཉིད་ཡིན་པ་ཁས་ལེན་བྱས་མཐར་བདེ་ཆེན་རྒྱལ་ཐང་རྫོང་གི་བཙོན་ཁང་དུ་ལོ་ ༡ དང་ཟླ་དྲུག་རིང་བཙོན་འཇུག་བྱས་པ་རེད། ངས་སྦྱར་ཡིག་བཀྲམས་དོན་ནི་རྒྱ་ནག་གིས་རྩ་ཁྲིམས་ནང་ཆོས་ལུགས་དད་མོས་རང་དབང་སྤྲོད་དགོས་ཚུལ་བརྗོད་ཡོད་ནའང་། ང་ཚོར་དེ་ལས་ལྡོག་སྟེ་སྲིད་བྱུས་འདྲ་མིན་ལག་བསྟར་བྱས་མཐར། ངས་རྒྱ་གཞུང་ལ་ཆོས་དད་རང་དབང་སྤྲོད་དགོས་པའི་འབོད་སྐུལ་བྱ་ཆེད་ངོ་རྒོལ་བྱས་པ་ཡིན་ཞེས་གསུངས།

ཡང་ཁོང་གིས་བདེ་ཆེན་ཁུལ་གྱི་མི་མང་དང་སློབ་གྲྭའི་གནས་སྟངས་ཐད་བརྗོད་དོན།  མི་མང་ལ་མཚོན་ན་ད་ལྟའི་ཆར་འཚོ་བའི་ཐད་ནས་ཕྱུག་པོར་གྱུར་ཡོད་པ་རེད། ཡིན་ནའང་། བདེ་ཆེན་ཁུལ་གྱི་བོད་པ་ཚོས་བོད་སྐད་དང་བོད་ཡིག་མི་ཤེས། བོད་ཆས་གྱོན་མི་ཤེས། བོད་ཀྱི་ལོ་རྒྱུས་མི་ཤེས། ཐ་ན་གནད་དོན་ཞིག་འགྲེལ་བརྗོད་གནང་དགོས་ཀྱང་རྒྱ་སྐད་བཤད་དགོས། གནད་ཡོད་བོད་རིགས་ལས་བྱེད་མི་སྣ་ཡོངས་ཀྱིས་རང་མི་རིགས་ཀྱི་རིག་གཞུང་ལ་དོ་སྣང་མེད་པའི་གནས་སྟངས་ཆགས་ཡོད་པ་རེད། རྒྱ་ནག་གི་རྩ་ཁྲིམས་ནང་རང་སྐྱོང་ཁུལ་དུ་གྲངས་ཉུང་མི་རིགས་ཀྱིས་རང་གི་སྐད་ཡིག་བེད་སྤྱོད་བྱ་ཆོག་པའི་གཏན་འབེབས་བྱས་ཡོད་པ་དང་། ༸པཎ་ཆེན་སྐུ་ཕྲེང་བཅུ་བ་མཆོག་གིས་ཀྱང་བོད་ཡིག་གི་སློབ་འབྲིང་གསར་འཛུགས་གནང་ཡོད། དེ་ལྟར་ཡང་། གནད་ཡོད་མི་སྣ་ཚོས་དེ་དག་ལ་དོ་སྣང་བྱེད་ཀྱིན་མེད་སྟབས་བོད་སྐད་ཡིག་དེེ་ཧ་ཅང་ཉག་ཕྲ་བའི་གནས་སུ་གྱར་ཡོད་པ་རེད་ཅེས་གསུངས་བྱུང་།

རང་ལོ་ ༤༣ ཡིན་པའི་འཛའ་ཧཱ་སྤྲུལ་སྐུ་ངག་དབང་དགའ་ལྡན་ལགས་ནི། ཡུན་ནན་བདེ་ཆེན་བོད་རིགས་རང་སྐྱོང་ཁུལ་རྒྱལ་ཐང་རྫོང་གི་དགོན་བདག་ཡིན་པ་དང་། ༡༩༨༥ ལོར་བཙན་བྱོལ་དུ་ཐེངས་དང་པོར་འབྱོར་ཏེ་ལྷོ་ཕྱོགས་སེ་ར་དགོན་དུ་སློབ་གཉེར་གནང། ༡༩༩༢ ལོར་ཕྱིར་ཕ་ཡུལ་དུ་ལོག་རྗེས་བདེ་ཆེན་བོད་རིགས་རང་སྐྱོང་ཁུལ་སྲིད་གྲོས་ཀྱི་རྒྱུན་ལས་དང་བདེ་ཆེན་ཁོངས་ཀྱི་སྲིད་གྲོས་རྒྱུན་ལས། བདེ་ཆེན་ཁོངས་ཆོས་ལུགས་ཨུ་ཡོན་ལྷན་ཁང་གི་སྐུ་ཚབ་དང་རྒྱུན་ལས།  ཡུན་ནན་ཞིང་ཆེན་ཆོས་ལུགས་ཀྱི་སྐུ་ཚབ་མི་སྣ། རྒྱ་ནག་ཆོས་ལུགས་མཐུན་སྦྱོར་ཚན་ཁག་གི་སྐུ་ཚབ། དགོན་གསལ་བཀྲ་ཤིས་བསམ་གཏན་གླིང་གི་དགོན་བདག་བཅས་ཀྱི་ལས་སྣེ་གནང་ཡོད་འདུག