ཨ་རིའི་སློབ་ཡོན་ནང་ལ་ཕེབས་མཁན་ཚོ་བཙན་བྱོལ་བོད་གཞུང་དང་། སྤྱི་ཚོགས་ཁྲོད་ཀྱི་མི་དྲག་གྲས་ཚོ་ཆགས་ཡོད། འོ་མའི་སྙིང་བོ་ལྟ་བུ་རེད། འོན་ཀྱང་ཕར་ཕེབས་ཚར་རྗེས་སོ་སོའི་འཚོ་བའི་ནང་མགོ་འཁོར་བསྡད་པ་ཡིན་ན། བོད་སྤྱི་པ་ལ་གྱོང་ཆགས་ཡོད་པ་མ་ཟད། སོ་སོ་སྒེར་ལ་མཚོན་ནའང་མི་ཚེ་སྐྱེལ་ཐབས་ཙམ་མ་གཏོགས། མི་ཚེ་སྐྱེལ་སྟངས་དེ་རྣམ་དཔྱོད་ལྡན་པ་ཞིག་མ་རེད། ཅེས་ཤེས་རིག་བཀའ་བློན་མཆོག་གིས་གསུངས་ཡོད།
དེ་རིང་སྔ་དྲོའི་ཆུ་ཚོད་ ༡༡ སྟེང་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། ཨ་རིའི་བོད་མིའི་སློབ་ཡོན་ལས་གཞིའི་སློབ་ཟུར་ཚོགས་པའི་དབྱིན་ཡིག་གི་དྲ་རྒྱ་གསར་པ་( www.tsapalumni.com ) དེ་དབུ་འབྱེད་ཀྱི་མཛད་སྒོ་ཚོགས་ཡོད་ལ། མཛད་སྒོའི་སྐུ་མགྲོན་གཙོ་བོར་ཤེས་རིག་བཀའ་བློན་ཐུབ་བསྟན་ལུང་རིག་མཆོག་ཕེབས་འདུག ཐོག་མར་ཨ་རིའི་བོད་མིའི་སློབ་ཡོན་ལས་གཞིའི་སློབ་ཟུར་ཚོགས་པའི་ཚོགས་གཙོ་སྒྲོལ་དཀར་དབང་མོ་ལགས་ཀྱིས་ཨ་རིའི་སློབ་ཡོན་སློབ་ཟུར་ཚོགས་པའི་གནས་བབ་ངོ་སྤྲོད་གནང་དོན། ཨ་རིའི་བོད་མིའི་སློབ་ཡོན་ལས་གཞིའི་སློབ་ཟུར་ཚོགས་པ་དེ་ཐོག་མ་ ༡༩༨༨ ལོར་མགོ་འཛུགས་གནང་འདུག སློབ་ཡོན་དེ་ཨ་རིའི་གཞུང་གིས་བོད་གཞུང་ཤེས་རིག་ལས་ཁུངས་ལ་གནང་སྟེ། ད་བར་སློབ་ཕྲུག་ ༣༦༤ ཙམ་ལ་སློབ་ཡོན་ཕུལ་འདུག དེ་དག་ཁྲོད་ཀྱི་སློབ་ཟུར་ ༡༢༥ ཙམ་གྱིས་ད་ཆར་བཙན་བྱོལ་བོད་གཞུང་གི་ལས་ཁུངས་ཁག་དང་རང་དབང་ཅན་གྱི་སྡེ་ཚན་ཁག གཞུང་འབྲེལ་མིན་པའི་ཚོགས་པ་སྒྲིག་འཛུགས་ཁག་བཅས་སུ་ཕྱག་ལས་གནང་མུས་རེད། སློབ་ཟུར་ ༢༩ ཙམ་གྱིས་ཨ་རིར་སློབ་སྦྱོང་མུ་མཐུད་གནང་བཞིན་འདུག ཡིད་སྐྱོ་བ་ཞིག་ལ་སློབ་ཟུར་ ༧ ཙམ་འདས་གྲོངས་སུ་ཕྱིན་འདུག སློབ་ཟུར་ ༡༤༠ ཙམ་གྱིས་ལོ་འགའ་རེར་ཞབས་ཞུ་ཞུས་མཐར་སྒེར་གྱི་བྱ་བའི་དགོས་དབང་གིས་ཕྱི་རྒྱལ་ཁག་ལ་ཕེབས་འདུག སློབ་ཕྲུག་ ༧༠ ཙམ་གྱིས་སློབ་ཡོན་བླངས་རྗེས་རྩ་བ་ནས་ཕྱིར་ལོག་མི་འདུག ཅེས་གསུངས་བྱུང་།
ཁོང་མོས་མུ་མཐུད་དུ་གསུངས་དོན། སྤོབས་པའི་ཐོག་ནས་ཞུ་རྒྱུ་ཞིག་ལ། གཞུང་ལ་ཞབས་ཞུ་སྒྲུབ་བཞིན་པའི་སློབ་ཕྲུག་ཁྲོད། སྤྱི་འཐུས་ནང་དུ་འདུག་ཅིང་། བཀའ་བློན་གནང་བཞིན་པའང་ཡོད། བཙན་བྱོལ་ནང་གི་སྨན་ཁང་ཁག་གི་དྲུང་ཆེ་མང་ཆེ་བ་སློབ་ཟུར་ཚོ་རེད། གཞན་སློབ་གྲྭ་ཁག་ཏུ་དགེ་རྒན་དང་དབུ་འཛིན། གཞུང་འབྲེལ་མིན་པའི་ཚོགས་པ་ཁག་བཅས་སུ་སྤྱི་ཚོགས་ཞབས་ཞུས་ལས་དོན་སྒྲུབ་བཞིན་འདུག འདི་དག་ཡོངས་རྫོགས་ཨ་རིའི་སློབ་ཡོན་ལས་གཞིའི་སློབ་ཟུར་ཚོགས་པའི་ཚོགས་མིར་ངོས་འཛིན་བྱེད་ཀྱིན་ཡོད། སློབ་ཟུར་ཚོགས་པ་འདི་ ༡༩༩༩ ལོར་གསར་འཛུགས་གནང་འདུག་ལ། ང་ཚོ་སློབ་ཟུར་ཚོགས་པའི་རྒྱུན་ལས་སྐབས་དྲུག་པ་ཆགས་ཡོད། ད་ལོའི་ཕྱི་ཟླ་ ༥ ཚེས་ ༢ ལ་ང་ཚོའི་དུས་ཡུན་རྫོགས་ཏེ་རྒྱུན་ལས་གསར་འདེམ་གྱི་མཛད་སྒོ་ཞིག་ཚོགས་གཏན་འཁེལ་ཡོད། སློབ་ཟུར་ཚོགས་པ་འདིར་ལས་དོན་མང་པོ་ཞིག་ཡོད་པ་རེད། ལས་ཁུངས་མེད་སྟབས་ཐོག་མར་ལས་ཁུངས་ཤིག་འཛུགས་རྒྱུར་འབད་བརྩོན་བྱས་ཀྱང་། དེའི་ཐད་ང་ཚོར་སུས་ཀྱང་རོགས་རམ་གནང་མ་སོང་། ང་ཚོར་རྒྱུན་ལས་མི་གསུམ་ལས་མེད་སྟབས། དཀའ་ངལ་ཆེ་ཤོས་ཚོགས་མི་ཕན་ཚུན་འབྲེལ་བ་བྱ་རྒྱུ་དེ་རེད། དྲ་ཚིགས་ཤིག་བཟོས་པ་ཡིན་ན་དཀའ་ངལ་དེ་སེལ་རྒྱུར་ཕན་ཐོགས་ངེས་ཅན་ཞིག་ཡོད་སྟབས། ཨ་རིའི་བོད་ཀྱི་ཐེབས་རྩ་ཁང་ལ་རེ་འདུན་ཞུས་པ་ལྟར། རོགས་རམ་ཐོབ་སྟེ་དྲ་ཚིགས་འདི་བཟོ་ཐུབ་པ་བྱུང་བ་རེད། དྲ་ཚིགས་འདི་བརྒྱུད་དེ་སློབ་ཟུར་ཚོས་བོད་པའི་སྤྱི་ཚོགས་ནང་ལས་དོན་གང་བྱས་པ་གསལ་བོ་ཡོང་བའི་རེ་བ་ཡོད། ཅེས་གསུངས་ངོ་སྤྲོད་གནང་སོང་།
དེའི་རྗེས་སྐུ་མགྲོན་གཙོ་བོ་ཤེས་རིག་བཀའ་བློན་ཐུབ་བསྟན་ལུང་རིག་མཆོག་གིས་གསུང་བཤད་གནང་དོན། དེང་སྐབས་དུས་ཚོད་དང་མཉམ་དུ་འགྲོ་དགོས་སྟབས། མི་རེ་རེར་ཡི་གེ་བྲིས་ཏེ་གཏོང་བའི་དུས་ཚོད་ཡོལ་ཚར་བ་རེད། གནས་ཚུལ་གཏོང་མཁན་ཞིག་ཡིན་ན་ཁོངས་སོ་སོའི་དྲ་རྒྱའི་སྟེང་བཞག་སྟེ། དོ་བདག་སོ་སོས་དྲ་རྒྱ་བསྔོགས་ཏེ་གནས་ཚུལ་ལྟ་ཀློག་བྱེད་པའི་དུས་ཚོད་ལ་སླེབས་ཡོད་སྟབས། ཐེངས་འདིར་ཨ་རིའི་སློབ་ཡོན་སློབ་ཟུར་ཚོགས་པའི་དྲ་རྒྱ་དབུ་འབྱེད་གནང་བ་དེ་དུས་ལ་བབ་པ་ཞིག་རེད། གོང་དུ་གསུངས་པ་ལྟར་ན། སློབ་མ་ཟུར་པ་ཚོས་བོད་གཞུང་གི་ལས་ཁུངས་ཁག་དང་། གཞུང་འབྲེལ་མིན་པའི་ཚོགས་པ་ཁག་ཏུ་ལས་ཀ་བྱེད་ཀྱིན་ཡོད་ས་རེད། དེ་དག་ཧ་ཅང་ཡག་པོ་རེད། ཐུགས་རྗེ་ཆེ་ཞུ་འདོད་བྱུང་། གང་ཡིན་ཟེར་ན་ད་ལྟའི་ཆར་ང་ཚོར་མི་གང་འཚམ་ཡོད་ཀྱང་། དགོས་མཁོ་ཅན་གྱི་མི་ཞིག་འཚོལ་དགོས་ན་དཀོན་པོ་ཆགས་ཡོད། ཨ་རིའི་སློབ་ཡོན་ནང་ལ་ཕེབས་མཁན་ཚོ་བཙན་བྱོལ་བོད་གཞུང་དང་། སྤྱི་ཚོགས་ཁྲོད་ཀྱི་མི་དྲག་གྲས་ཚོ་ཆགས་ཡོད། འོ་མའི་སྙིང་བོ་ལྟ་བུ་རེད། འོན་ཀྱང་ཕར་ཕེབས་ཚར་རྗེས་སོ་སོའི་འཚོ་བའི་ནང་མགོ་འཁོར་བསྡད་པ་ཡིན་ན། བོད་སྤྱི་པ་ལ་གྱོང་ཆགས་ཡོད་པ་མ་ཟད། སོ་སོ་སྒེར་ལ་མཚོན་ནའང་མི་ཚེ་སྐྱེལ་ཐབས་ཙམ་མ་གཏོགས། མི་ཚེ་སྐྱེལ་སྟངས་དེ་རྣམ་དཔྱོད་ལྡན་པ་ཞིག་མ་རེད། ཅེས་གསུངས་སོང་།
མཇུག་མཐར་ཁོང་གིས་སློབ་ཟུར་ཚོ་ཕྱིར་བོད་པའི་སྤྱི་ཚོགས་ནང་ལོག་སྟེ། ཕྱག་ལས་གནང་བཞིན་ཡོད་པ་ཚོར་བསྔགས་བརྗོད་གནང་དོན། སོ་སོའི་སྤྱི་ཚོགས་ནང་ཕྱིར་ལོག་སྟེ་ཞབས་ཞུ་སྒྲུབ་མཁན་ཚོ་ཧ་ཅང་རྩ་ཆེན་པོ་རེད། དེ་དག་༧གོང་ས་མཆོག་གི་ཞབས་ཞུ་ཆགས་ཡོད་ལ། བོད་གཞུང་དམངས་ཀྱི་ཞབས་ཞུའང་རེད། ཆོས་ཀྱང་དེ་རེད། སྔར་༧གོང་ས་མཆོག་གིས་ང་རང་ཆོས་པ་ཞིག་རེད་དེ། རྒྱབ་བྲག་ལ་སྦྱར་ཏེ་ཆོས་བྱེད་ཐུབ་ཀྱིན་མི་འདུག་མོད། བོད་པའི་རྩ་དོན་སྒྲུབ་པ་དེ་ཆོས་ཆགས་ཡོད། བོད་པའི་རྩ་དོན་དེ་བོད་གཅིག་པུའི་དོན་མིན་པར་འཛམ་གླིང་ཞི་བདེའི་ཆེད་ཡིན་སྟབས། བོད་དོན་བྱེད་པ་དེ་ཆོས་རེད་ཅེས་གསུངས་ཡོད། དེར་བརྟེན། སློབ་གྲྭ་ཐོན་རྗེས་བོད་པའི་སྤྱི་ཚོགས་ནང་ལོག་སྟེ་སྲི་ཞུ་སྒྲུབ་མཁན་ཚོར་ཐུགས་རྗེ་ཆེ་ཞུ་འདོད་བྱུང་སོང་། གོང་ནས་དཀའ་ངལ་ཁ་ཤས་གསུངས་སོང་། དེའི་ཐད་ཚོགས་མི་ཚང་མ་མཉམ་རུབ་ཐོག་ལས་དོན་བྱས་པ་ཡིན་ན་བསྒྲུབ་ཐུབ་པ་ཞིག་རེད་སྙམ། ཚོགས་མི་ཚོ་ཕྱི་རྒྱལ་ཁག་ལ་ཕེབས་ཏེ་དུས་ཚོད་དམ་འཛིན་བྱེད་སྟངས་དང་། ལས་ཀར་ཧུར་ཐག་བྱེད་ཕྱོགས་མཁྱེན་གྱིན་ཡོད་པ་རེད། ཚོགས་པ་ཞིག་ཡིན་ན། དམིགས་ཡུལ་ངེས་ཅན་ཞིག་དགོས་པ་རེད། དམིགས་ཡུལ་ངེས་ཅན་དེའི་འོག་ནས་ལས་ཀ་གང་ཞིག་བྱས་ཀྱང་སྟབས་བདེ་བ་དང་ཁ་གསལ་བ། གྲུབ་འབྲས་ལྡན་པ་ཞིག་ཡོང་གི་རེད། ཅེས་གསུངས་སོང་།
དོན་འགྲུབ་བཀྲ་ཤིས་ལགས། ངས་ཁྱོད་ལ་ཁ་རྡོང་བྱེད་པ་མེད། ཡིན་ཡང་། ད་ལྟའི་གནས་སྐབས་འདིར་ང་ཚོའི་ཚང་མས་འཐབ་བྱོས་གཅིག་སྦྱོར་བྱེད་ནས་མཉམ་ལས་བྱེད་དགོས་པ་ཞིག་རེད་མ་གཏོགས་ལོ་ངོ་མང་པོ་སྔོན་གྱི་ལྟ་བ་རྙེང་བཞེན་རིགས་རུས་མཐོ་སྨད་དག་བཤོད་བསྡོད་པ་ཡིན་ན་སྤྱིར་དོན་ལ་གནོད་པར་ཚབ་ཆེན་སྐྱེས་པ་མ་ཟད་མང་གཙོག་གི་ལམ་ལུགས་དང་ཡང་འགལ་བ་རེད་སྙམ།
དགོངས་འགལ་མེད་པ་འཚལ།
མགོ་རུལ་ལགས་ཀྱིས་བར་སྟོང་བཞག་ནས་རིག་པ་བཏོན་འདུག་ཀྱང་འདིར་མཆན་ཀློག་མཁན་རྣམས་ལ་གཅོད་མཚམས་ཀྱི་སྐུ་ངལ་ཡོད་མ་རེད་སྙམ། སྐུ་ངལ་ཡོད་པ་རྣམས་དུས་བབ་དྲྭ་རྒྱར་པེབས་ཀྱི་མ་རེད་ལ་དུས་བབ་དྲྭ་རྒྱ་ཟེར་བཤད་ན་་་་་་ཨཱ་་ག་རེ་རེད། ཟ་ཡག་རེད་པས། ཟེར་རྒྱུའི་ཉེན་ཁ་ཡོད།
ཕྱི་རྒྱལ་ ནས་ སློབ་གྲྭ་ ཐོན་ རྗེས་ ཕྱིར་ རང་ གི་ རྒྱལ་ཁབ་ ཏུ་ མི་ ལོག་པའི་ གནད་དོན་ འདི་ནི་ རང་རེའི་ ཞན་ཆ་ ཞིག་ མ་ཡིན་པར་ རྒྱལ་ཁབ་ གང་མང་ ཞིག་ལ་ འཕྲད་ བཞིན་པའི་ དཀའ་རྙོག་ ཅིག་ རེད།
I hope those ་ཨ་རིའི་གཞུང་གི་སློབ་ཡོན་འོག་ཕྱི་རྒྱལ་སློབ་གྲྭ་ཁག་ཏུ་སློབ་སྦྱོང་ཐོབ་མྱོང་མཁན་བོད་མིའི Indian conception can change to real Tibetan conception!
ཕྱི་རྒྱལ་ཁག་ནས་བོད་ཕྲུག་ཆེད་སློབ་ཡོན་གྱི་མཐུན་འགྱུར་གནང་བ་ནི་དགའ་དགོས་པའི་གནས་ཚུལ་ཞིག་ཡིན་ཀྱང་དེང་སྐབས་ང་ཚོའི་སྤྱི་ཚོགས་སྟེང་མགོ་བདེ་རླགས་ཚོང་བ་འགས་རང་དོན་ཁོག་བཅུགས་ཀྱི་བོད་མིའི་ཐོབ་ཐང་ཕྱི་མི་ལ་ཚོང་འགྱུར་བྱ་བཞིན་ཡོད་པ་དག་ལ་མདོང་ལེན་དང་དོ་སྣང་བྱ་དགོས་པ་སེམས། དཔེར་ན། བལ་ཡུལ་ནང་བོད་གཞུང་གི་བཏགས་འཛིན་འོག་སློབ་གྲྭ་ཁག་ནང་བོད་ཕྲུག་བརྒྱ་ཆ་གསུམ་བཅུ་ལས་བརྒྱ་ཆ་བདུན་བཅུ་ཕྱི་མི་ཡིན་བཞིན་དེ་དག་གིས་བོད་ཕྲུག་གི་ཐོབ་ཐང་བཙན་འཕྲོག་བྱ་བཞིན་ཡོད་པ་མ་ཟད་ཐ་ན་སློབ་གྲྭའི་འཛིན་སྐྱོང་ཡང་ཕྱི་མིར་ཤོར་ཉེ་རྟེན་གནས་སྟངས་དེ་དག་ནི་གང་ནས་མཐུད་ཤོར་སོང་བ་ནི་ཉམས་ཞིབ་བྱས་ནས་ཐག་གཅོད་ནན་མོ་བྱ་དགོས་པ་སེམས།
མི་ལོ་མང་པོ་མང་པོ་འདས་སོང་བའི་བརྒྱུད་རིམ་ནང་།
བོད་མི་མང་ངོས་ནས་ཆ་སྙོམ་གྱི་ཆིག་སྒྲིལ་གྱི་ནུས་པ་འདོན་མ་ཐུབ་པ་བདེན་པ་རེད་ལ།
སྒེར་དོན་གྱི་འཚོ་བ་ཞིག་དང་སྤྱི་སེམས་ཆུང་སོང་བའང་ཧ་ཅང་བདེན་པ་རེད།
དེ་དག་གི་མཉམ་མྱོང་མང་པོའི་ལོ་རྒྱུས་བསྐྲུན་པ་དང་སྟབས་བསྟུན་ནས་ང་ཚོ་མཐུན་སྒྲིལ་གྱིས་ལག་གདང་སྦྲེལ་ནས་མདུན་བསྐྐྱོད་བྱེད་ངེས་ཀྱང་།
ད་དུང་སྔར་བཞིན་མཛད་གཙོ་རྣམས་དང་ཤེས་ཡོན་པའི་དམངངས་ཀྱི་བདེ་སྡུག་ལ་བསམ་གཞིག་མེད་པ།
བསློབ་གསོས་མ་འདང་བའི་གནད་དོན་གྲངས་ལས་འདས་པ་འདིའང་ཤིན་ཏུ་སེམས་ཕངས་དགོས་གནས་ཞིག་ལོས་ཡིན།
དོན་གྲུབ་བཀྲ་ཤིས་ལགས། ཨ་རིའི་གཞུང་ནས་བོད་རིགས་ལ་ཤེས་རིག་ལས་ཁུངས་བརྒྱུད་སློབ་ཡོན་གནང་བའི་དགོས་པ་རྒྱུ་མཚན་གང་ཡིན་མཁྱེན་གྱི་ཡོད་དམ། ད་དུང་སློབ་ཡོན་ཐོབ་ཀྱང་ཕྱིར་མི་ལོག་མཁན་གྱི་མི་དེ་དག་གིས་ཐོག་མར་ངག་རྒྱུགས་གཏོང་སྐབས་སྐད་ཆ་གང་འདྲ་བཤད་མིན་མཁྱེན་གྱི་ཡོད་དམ། སྐབས་དེ་དུས་བཤད་པའི་སྐད་ཆ་སྒྲ་ཕབ་ནང་བཅུག་ཡོད་ན་ངོ་མ་གཞུང་ངོས་ནས་ཕྱིར་བསྒྲགས་བྱས་ན་པྱིས་སུ་སློབ་ཡོན་ཞུས་ཏེ་ཚུར་ལོག་མིན་གྱི་དཀའ་སེལ་ཐུབ་སྙམ་མོ།།
དོན་གྲུབ་བཀྲ་ཤིས་ལགས། ཨ་རིའི་གཞུང་ནས་བོད་རིགས་ལ་ཤེས་རིག་ལས་ཁུངས་བརྒྱུད་སློབ་ཡོན་གནང་བའི་དགོས་པ་རྒྱུ་མཚན་གང་ཡིན་མཁྱེན་གྱི་ཡོད་དམ། ད་དུང་སློབ་ཡོན་ཐོབ་ཀྱང་ཕྱིར་མི་ལོག་མཁན་གྱི་མི་དེ་དག་གིས་ཐོག་མར་ངག་རྒྱུགས་གཏོང་སྐབས་སྐད་ཆ་གང་འདྲ་བཤད་མིན་མཁྱེན་གྱི་ཡོད་དམ། སྐབས་དེ་དུས་བཤད་པའི་སྐད་ཆ་སྒྲ་ཕབ་ནང་བཅུག་ཡོད་ན་ངོ་མ་གཞུང་ངོས་ནས་ཕྱིར་བསྒྲགས་བྱས་ན་པྱིས་སུ་སློབ་ཡོན་ཞུས་ཏེ་ཚུར་ལོག་མིན་གྱི་དཀའ་སེལ་ཐུབ་སྙམ་མོ།།
དེ་རིང་ཤེས་ནོ་ཡིན་ན། ལོ་ངོ་ ༣༢ རིང་ཨ་རིའི་གཞུང་གི་སློབ་ཡོན་འོག་ཕྱི་རྒྱལ་སློབ་གྲྭ་ཁག་ཏུ་སློབ་སྦྱོང་ཐོབ་མྱོང་མཁན་བོད་མི་ ༣༦༤ ཙམ་གྱི་ཁྲོད། ད་ཆར་བོད་པའི་སྤྱི་ཚོགས་ལ་ཞབས་ཞུ་སྒྲུབ་མཁན་ ༡༢༥ ཙམ་ལས་མེད་པ་གོ་སོང་། སློབ་ཡོན་གྱི་དངུལ་བླངས་ཏེ་ཕྱི་རྒྱལ་དུ་ཕྱིན་རྗེས་གོ་མེད་ཚོར་མེད་དུ་གྱུར་བ་ ༧༠ ཙམ་ཡོད་པ་ཤེས་སོང་། འོན་ཀྱང་། བཙན་བྱོལ་བོད་གཞུང་གིས་ཕྱིར་མ་ལོག་པ་དེ་དག་་ཧ་ཅང་ཚབས་ཆེན་དང་། ཕན་འབྲས་མ་བྱུང་བ་ཞིག་ལ་ངོས་འཛིན་བྱེད་ཀྱིན་ཡོད་ཀྱང་། ཨ་རིའི་གཞུང་གིས་སློབ་ཡོན་སྤྲོད་པའི་ཆ་རྐྱེན་དང་། བཙན་བྱོལ་བོད་གཞུང་གི་དམིགས་ཡུལ་གང་ཡིན་ཇི་ལྟར་ཡང་། བོད་པ་མི་རེ་ངོ་རེ་ཡར་ལངས་རྒྱུའི་ཆེ་སར་བསམ་བློ་བཏང་ན། དེ་ནི་གྲུབ་འབྲས་མེད་པ་ཞིག་མིན། གནད་དོན་གཙོ་བོ་གང་དུ་ལྷག་ཡོད་པ་རེད་ཟེར་ན། ཕྱི་རྒྱལ་སློབ་གྲྭ་ཁག་ནས་ཐོན་པའི་ཆེད་མཁས་པ་དག་བཙན་བྱོལ་སྤྱི་ཚོགས་ནང་དུ་ལས་གནས་མེད་པ་དང་། བཙན་བྱོལ་སྤྱི་ཚོགས་ནང་དགོས་མཁོ་ཆེ་བའི་ལས་གནས་དག་ལ་ཆེད་མཁས་པ་མི་རག་པའི་དཀའ་ངལ་དེ་རེད།