དུས་སྟོན་གྱི་མགོ་ཚུགས་པ། རྩོམ་སྒྲིག་པས།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༤༨༦ སྟེང་གི་རྩོམ་སྒྲིག་པའི་གཏམ།

བཤད་སྲོལ་ལ། འོས་འཕེན་གྱི་ཉིན་མོ་ནི་དམངས་གཙོའི་མི་སེར་རྣམས་ལ་ཧ་ཅང་གལ་ཆེ་བའི་དུས་སྟོན་གྱི་ཉིན་མོ་དེ་ཡིན་ཟེར། འོ་ན། ཕྱི་ཚེས་ ༡༨ ཉིན་ནས་བཟུང་བཙན་བྱོལ་བོད་མི་ཚོས་ཀྱང་དུས་སྟོན་གལ་ཆེན་ཞིག་ལ་གྲ་སྒྲིག་གི་མགོ་བཙུགས་པ་རེད་དམ།

འདི་ནི་ངེས་པར་དུ་ཡིན་དགོས་ཏེ། རང་དབང་དང་འདྲ་མཉམ། ཐོབ་ཐང་། འོས་འགན་བཅས་མིའི་རིགས་ལ་ཁྲག་འབྱར་རྣག་འབྱར་དུ་ཡོང་བའི་ཐ་སྙད་བརྗིད་པོ་འདི་དག་ནི་དམངས་གཙོའི་མི་སེར་གྱི་གཞི་རྩའི་འཚོ་བ་དང་། མི་ཚེའི་རྩ་དོན་དང་འབྲེལ་ཡོད་ལ། འདི་དག་ཚིག་དོན་ཇི་བཞིན་མངོན་འགྱུར་བྱུང་ཡོད་མེད་ཀྱི་ཚད་འཇལ་ས་གཙོ་བོ་ཞིག་ནི་རང་དབང་གི་འོས་འདེམས་ཆེན་མོ་དེར་ཐུག་ཡོད། དེར་བརྟེན། འོས་འཕེན་གྱི་ཉིན་མོ་འདི་ནི་དམངས་གཙོའི་མི་སེར་རྣམས་ཀྱིས་ཆེས་རྩ་ཆེར་བརྩི་བའི་རང་དབང་གི་དུས་སྟོན་ཉིན་མོ་ཡིན་ལ། དཔེར་ན། རང་ཅག་གིས་མི་ལོ་སྟོང་གི་རིང་རྩ་ཆེར་བརྩི་མྱོང་བའི་ས་ག་ཟླ་བའི་དུས་ཆེན་དང་། ཡང་ན། ལྷ་ལྡན་སྨོན་ལམ་ཆེན་མོ་ལས་ཀྱང་གལ་ཆེ་བར་གྱུར་མེད་ན་ཡང་ཆུང་བར་གྱུར་མེད།

ཕྱི་ཚེས་ ༡༨ ཉིན་ནས་བཟུང་། རང་ལོ་ ༡༨ ཡན་ཟིན་པའི་བཙན་བྱོལ་བོད་མི་ཆིག་འབུལ་ལྷག་གིས་འོས་བསྡུ་ཆེན་མོར་འོས་འཕེན་གྱི་ཐོ་འགོད་བྱེད་མགོ་བཙུགས་ཡོད། ཉིན་དང་པོ་དེར་བཞུགས་སྒར་ངྷ་ས་ནས་མི་ ༢༠༠ ལྷག་གིས་ཐོ་འགོད་དེབ་སྐྱེལ་བྱས་ཚུལ་བདེ་དོན་འགན་འཛིན་གྱིས་འདི་ག་གསར་ཁང་ལ་གསུངས་ཡོད། ཉིན་འདིའི་ཐོ་འགོད་ཀྱི་གྲངས་འབོར་ལ་དཔག་ན་བོད་མི་ཚོའི་གྲ་སྒྲིག་ཀྱང་གང་འཚམ་ཡག་པོ་རེད་འདོད་ལ། ཁོང་ཚོ་ནི་བཙན་བྱོལ་བོད་མིའི་དམངས་གཙོའི་དུས་སྟོན་ལ་མཉམ་ཞུགས་བྱེད་མཁན་གྱི་མི་སྣ་ཐོག་མའི་གྲས་རེད་ལ། རང་དབང་དང་འདྲ་མཉམ། ཐོབ་ཐང་དང་འོས་འགན་བཅས་ཀྱི་ཁ་གཡང་གི་འོག་ན་ཤར་སྐྱོད་བྱེད་བཞིན་པའི་ང་ཚོ་བོད་པའི་དམངས་གཙོའི་མི་སེར་རྣམས་རེད།

འདི་ག་གསར་ཁང་གིས་ཕྱོགས་མཐའ་ཁག་ལ་ལྟ་ཉན་བྱས་སྐབས། དུས་མཉམ་ལྟ་བུའི་གྲ་སྒྲིག་གི་ངང་འགྲོ་ཐུབ་གི་མེད་ན་ཡང་། ས་གནས་སོ་སོ་ནས་དུས་ཚོད་རྒྱས་བཅད་ཀྱི་ནང་དུ་ལས་རིམ་སྒྲིག་འདུག་སྟབས་དུས་སྟོན་འདི་ཚགས་ཚུད་པོ་དང་གྲ་རྒྱས་པོ་ཡོང་བའི་རེ་བ་ཞིག་ངང་གིས་མཐོང་།

མི་ལོ་ ༥༠ རྗེས་ལ། བཙན་བྱོལ་བོད་མི་ཚོས་ཀྱང་དམངས་གཙོའི་དུས་སྟོན་འདིའི་གལ་ཆེའི་རང་བཞིན་དེ་རང་ཅག་ལའང་ཤ་འཐིམ་རུས་འཐིམ་གྱི་ཚུལ་དུ་ངོ་འཕྲོད་ཡོད་པའི་ཁུངས་སྐྱེལ་རེ་བྱེད་དགོས་པར་འདོད།།