གྲྭ་པ་གཉིས་བརླག་འདུག

རྔ་པ་སྒོ་མང་དགོན་གྱི་གྲྭ་འབྲོག་རུ་ཚུལ་ཁྲིམས་དང་། ཁོང་གི་གྲོགས་པོ་གྲྭ་སྐལ་བཟང་ཚུལ་ཁྲིམས་གཉིས་དེང་སྐབས་གང་དུ་བཀག་ཉར་བྱས་ཡོད་མེད་ཤེས་ཀྱི་མི་འདུག་ཟེར།

དེ་རིང་ཞོགས་པར་འབྲོག་རུ་ཆོས་གྲགས་ལགས་ཀྱིས་འདི་གའི་གསར་འགོད་པར་ཁ་པར་བརྒྱུད། གནས་ཚུལ་མཁོ་སྤྲོད་བྱས་པ་ལྟར་ན། འདི་ལོའི་ཟླ་ ༥ ཚེས་ ༢༥ ཉིན་ཉེན་རྟོག་པས་འཇུས་པས་རྔ་པ་སྒོ་མང་དགོན་གྱི་གྲྭ་འབྲོག་རུ་ཚུལ་ཁྲིམས་ལགས་དང་། ཚེས་ ༢༠ འཇུས་པའི་ཁོང་གི་གྲོགས་པོ་གྲྭ་སྐལ་བཟང་ཚུལ་ཁྲིམས་ལགས་གཉིས་འདས་པའི་ཟླ་གཅིག་ལྷག་རིང་གང་དུ་བཀག་ཉར་བྱས་ཡོད་མེད་ཤེས་རྟོགས་ཐུབ་ཀྱི་མེད་པར་བརྟེན། ཉིན་འགའི་སྔོན་ཁོང་གི་ནང་མི་རྣམས་ཀྱིས་དགོན་པའི་ལས་སྣེ་བརྒྱུད་ནས་ས་གནས་ཉེན་རྟོག་པར་སྐད་ཆ་དྲིས་སྐབས། ས་གནས་ཉེན་རྟོག་པས་ང་ཚོས་ཤེས་ཀྱི་མེད། ང་ཚོར་རྔ་པ་རྫོང་དུ་ཁྱེར་ཤོག་ཟེར་གྱིན་འདུག་པས་རྫོང་ཐོག་ཏུ་རྩིས་སྤྲོད་བྱས་ཡོད་ཅེས་བརྗོད་ལ། ཡང་རྫོང་ཐོག་ཏུ་སོང་ནས་དྲིས་སྐབས་རྫོང་གི་ཉེན་རྟོག་པས་ང་ཚོར་འབར་ཁམས་ཁུལ་དུ་སྐྱོལ་ཤོག་ཟེར་གྱིན་འདུག་པས་དེ་གར་བསྐྱལ་ཟིན་པ་ཡིན། ད་ལྟ་གང་དུ་ཡོད་མེད་ཤེས་ཀྱི་མེད་ཅེས་བརྗོད་འདུག

ལྷག་པར་དུ་ཁོང་ཚོས་འབར་ཁམས་ཁུལ་གྱི་ས་གནས་གང་དུ་བསྐྱལ་མིན་སོགས་དྲང་བཤད་བྱས་མེད་པར་བརྟེན། ནང་མི་རྣམས་ལ་སེམས་འཚབ་ཆེན་པོ་འབྱུང་བཞིན་པ་དང་ཁོང་ཚོས་གྲྭ་པ་དེ་གཉིས་དེང་སྐབས་གང་དུ་ཡོད་མེད་དང་བདེ་འཇགས་ཀྱི་གནས་སྟངས་ལ་སེམས་ཁྲལ་ཆེན་པོ་བྱེད་ཀྱིན་འདུག་ཅེས་ཟེར།

གྲྭ་འབྲོག་རུ་ཚུལ་ཁྲིམས་ལགས་ནི་ཟླ་ ༥ ཕྱི་ཚེས་ ༢༤ ཉིན་ཉེན་རྟོག་པ་བཞི་ལྔ་ཞིག་གིས་རང་ཤག་ནས་བཟུང་བ་དང་། གྲྭ་ཤག་སྔོག་བཤེར་སྐབས་ཁོང་གིས་བྲིས་པའི་རྩོམ་ཡིག་འགའ་ལག་ཏུ་ཚུད་ཡོད། འབྲོག་རུ་ཚུལ་ཁྲིམས་ལགས་ཀྱི་གྲོགས་པོ་གྲྭ་སྐལ་བཟང་ཚུལ་ཁྲིམས་འབོད་པ་ཚེས་ ༢༠ ཉིན་བཟུང་འདུག ཁོང་ད་ལྟ་རང་ལོ་ ༢༢ ཡིན་པ་དང་ཕ་ཡུལ་ཐུན་ཏེ་འབའ་ཁ་སྒང་དང་རྔ་པ་སྒོ་མང་དགོན་གྱི་གྲྭ་པ་ཡིན་འདུག

གསར་འགོད་པ། ཨ་རིག་འགྱུར་མེད།