རྒྱལ་མཚན་ནོར་བུའི་ལས་ཀ་གསར་པ།

ཁ་སང་ཕྱི་ཚེས་ ༤ ཉིན་རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ཡིས་ལྷ་ལྡན་གཙུག་ལག་ཁང་གི་ཇོ་བོ་ཤཱཀྱ་མི་ནེའི་སྐུ་མདུན་དུ་གསེར་བུམ་དཀྲུག་འདོན་མཛད་དེ། ཕྱི་ལོ་ ༢༠༠༥ ལོར་ལྷོ་ཁ་ལྷུན་རྩེ་རྫོད་དུ་འཁྲུངས་བའི་ཡབ་སྐལ་བཟང་དབང་འདུས་དང་། ཡུམ་པངྨ་ལྷ་འཛོམས་གཉིས་ཀྱི་བུ་བློ་བཟང་རྡོ་རྗེ་ཞུ་བ་སྡེ་དྲུག་སྐུ་ཕྲེང་ལྔ་བའི་ཡང་སྲིད་དུ་ངོས་འཛིན་བྱས་ཡོད་འདུག

ཐེངས་འདིར་པཎ་ཆེན་རྒྱལ་མཚན་ནོར་བུས་ངོས་འཛིན་བྱས་པའི་༼ སྡེ་དྲུག ༽ ཞུ་བའི་སྤྲུལ་སྐུ་དེའི་མཚན་གནས་དང་ལོ་རྒྱུས་སྐོར། དུང་དཀར་ཚིག་མཛོད་ཆེན་མོའི་ཤོག་ངོས་ ༣༨༣ ནང་བཀོད་དོན། དགའ་ལྡན་ཁྲི་ཐོག་དོན་དྲུག་པ། སྡེ་དྲུག་ཧོ་ཐོག་ཐུ་སྐུ་ཕྲེང་དང་པོ་ཁྲི་ཆེན་མཁྱེན་རབ་དབང་ཕྱུག སྐུ་གཞོན་ནུའི་དུས་སུ་འབྲས་སྤུངས་བློ་གསལ་གླིང་རྒྱལ་རོང་ཁང་ཚན་དུ་ཆོས་ཞུགས་ཐོག་གཞུང་ཆེན་སློབ་གཉེར་ལེགས་པར་གྲུབ་སྟེ། དགེ་བཤེས་ལྷ་རམས་པའི་མཚན་བཏགས་དང་དེ་ནས་རྒྱུད་སྨད་དུ་ཞུགས་ཏེ། གསང་སྔགས་ཀྱི་སློབ་གཉེར་དང་གསན་བཞེས་རྒྱ་ཆེར་མཛད། རིམ་བཞིན་བླ་མ་དབུ་མཛད་དང་། མཁན་པོ། བྱང་རྩེ་ཆོས་རྗེ་བཅས་ཀྱི་ཁྲིར་ཕེབས། རབ་བྱུང་བཅུ་བཞི་པའི་ཆུ་གླིང་ ༡༨༥༣ ལོར་དགའ་ལྡན་གྱི་ཁྲིར་ཕེབས་ཏེ། ཁྲི་ལོ་བདུན་རིང་གི་མཛད་སྒོ་རྣམས་ལེགས་པར་གྲུབ་ནས་ཟུར་བཞུགས་གནང་མུས་སུ་ཏཱ་ལའི་བླ་མ་སྐུ་ཕྲེང་བཅུ་གཉིས་པ་འཕྲིན་ལས་རྒྱ་མཚོའི་ཡོངས་འཛིན་དུ་ཕེབས། རབ་བྱུང་བཅུ་བཞི་པའི་ཤིང་བྱི་ ༡༨༦༤ ལོར་ཡོངས་འཛིན་ཁྲི་ཟུར་མཁྱེན་རབ་དབང་ཕྱུག་ལ་གནས་སྐབས་རིང་སྲིད་སྐྱོང་གི་ལས་དོན་གནང་རྒྱུའི་སྐོར་སོགས་བོད་བཞུགས་ཨན་བན་གྱིས་ཐག་གཅོད་བྱས་ཐོག གོང་མ་ཐུང་ཁྲི་ལ་སྙན་ཞུ་ཕུལ་བ་བཞིན་རབ་བྱུང་བཅུ་བཞི་པའི་ཤིང་གླེང་ ༡༨༦༥ ལོར་སྲིད་སྐྱོང་ངོ་མའི་ཆོ་ལོ་དང་སྦྲགས་བསྐོ་གཞག་གནང་དོན་ལྟར། ལོ་བདུན་རིང་སྲིད་སྐྱོང་གནང་ཞིང། ལོ་ངོ་དྲུག་སོང་བའི་ལྕགས་ལུག་ ༡༨༦༡ ལོར་སྤྱི་ཁྱབ་མཁན་པོ་དཔལ་ལྡན་དོན་གྲུབ་དང་། བཤད་སྒྲ་བཀའ་བློན་ཚེ་རིང་དབག་ཕྱུག་མཉམ་འབྲེལ་ཐོག་བསླངས་པའི་དགའ་ལྡན་ཟིང་འཁྲུགས་ཟེར་བ་བྱུང་། དེར་ས་གནས་སྲིད་གཞུང་གིས་དྲག་གནོན་བྱས་རྗེས། དེའི་ཕྱི་ལོར་སྲིད་སྐྱོང་སྡེ་དྲུག་རིན་པོ་ཆེ་ཉིད་ཀྱང་སྐུ་གཤེགས། དེའི་རྗེས་སྐུ་ཕྲེང་རིམ་པར་བྱུང་བ་སྡེ་དྲུག་ཧོ་ཐོག་ཐུ་ཞུ་བ་དེ་ཡིན། ཁྲི་ཆེན་འདིའི་ལོ་རྒྱུས་སྐོར། འབྲེལ་ཡོད་བླ་མ་ཁག་གི་རྣམ་ཐར་ནས་ཟུར་ཙམ་ལས་མི་གསལ་ཞིང་། དེ་མིན་ལོ་རྒྱུས་ཡིག་ཆ་གཞན་དག་མ་རྙེད། ཅེས་བཀོད་འདུག

གོང་གི་གནས་ཚུལ་དེའི་ནང་དོན་ཞིབ་ཕྲ་བོད་ལྗོངས་ཆ་འཕྲིན་ལྟེ་གནས་སུ་བཀོད་དོན། སྡེ་དྲུག་སྐུ་ཕྲེང་ལྔ་པའི་ཡང་སྲིད་གསེར་བུམ་དཀྲུག་འདོན་བྱས་ནས་ངོས་འཛིན་ཞུ་བའི་མཛད་སྒོ་དེ་ཟླ་ ༧ པའི་ཚེས་ ༤ ཉིན་ལྷ་སའི་ལྷ་ལྡན་གཙུག་ལག་ཁང་ཆེན་མོའི་ཤཱཀྱ་མུ་ནེའི་སྐུ་མདུན་དུ་གཟབ་ནན་སྒོས་སྤེལ་བ་རེད། ༢༠༠༥ ལོའི་ཟླ་ ༡༡ པའི་ཚེས་་ ༣༠ ཉིན་ལྷོ་ཁ་ས་ཁུལ་ལྷུན་རྩེ་རྫོང་དུ་སྐུ་འཁྲུངས་ཤིང་། ཡབ་ཀྱི་མིང་ལ་སྐལ་བཟང་དབང་འདུས་དང་། ཡུམ་གྱི་མིང་ལ་པདྨ་ལྷ་འཛོམས་ཞེས་སུ་འབོད་པའི་བུ་ཕྲུག་བློ་བཟང་རྡོ་རྗེར་གསེར་བུམ་དཀྲུག་འདོན་བྱུང་བས་བོད་རང་སྐྱོང་ལྗོངས་མི་དམངས་སྲིད་གཞུང་ལ་ཆོག་མཆན་ཞུས་རྗེས་སྡེ་དྲུག་སྐུ་ཕྲེང་དྲུག་པར་ངོས་འཛིན་ཞུ་རྒྱུ་རེད།  བོད་རང་སྐྱོང་ལྗོངས་ཏང་ཨུའི་རྒྱུན་ཨུ་དང་བོད་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། བོད་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ། བོད་རང་སྐྱོང་ལྗོངས་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་བློ་བཟང་རྒྱལ་མཚན་གསེར་བུམ་དཀྲུག་པའི་མཛད་སྒོར་ཞུགས་གནང་ཡོད་པ་རེད། བོད་རང་སྐྱོང་ལྗོངས་མི་དམངས་སྲིད་གཞུང་གི་ཆེད་མངགས་འཐུས་མི་བློ་བཟང་འཇིགས་མེད་ཀྱིས་བོད་རང་སྐྱོང་ལྗོངས་མི་དམངས་སྲིད་གཞུང་གི་ཚབ་ཞུས་ཏེ་གསེར་བུམ་དཀྲུག་པར་མོས་མཐུན་བྱུང་བའི་འབྲེལ་ཡོད་མཆན་འགོད་སྒྲོག་འདོན་གནང་བར་མ་ཟད། གསེར་བུམ་དཀྲུག་པའི་མཛད་སྒོའི་ཐད་ལ་ལྟ་ཞིབ་གནང་བ་རེད། བོད་རང་སྐྱོང་ལྗོངས་མི་དམངས་སྲིད་གཞུང་གི་ཆེད་མངགས་འཐུས་མིས་གཙོ་སྐྱོང་གནང་ཞིང་། རྒྱལ་ཡོངས་སྲིད་གྲོས་ཀྱི་ཨུ་ཡོན་དང་ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོ་མཆོག་གིས་གསེར་བུམ་དཀྲུག་གནང་བ་རེད། དེ་རིང་ནི་བོད་ལུགས་ཀྱི་ལྕགས་སྟག་ལོའི་ཟླ་ ༥ པའི་ཚེས་ ༢༣ ཡིན་ལ། རྟེན་འབྲེལ་ཀུན་འགྲིག་གི་ཉིན་མོ་ཞིག་ཡིན་པ་རེད། ཞོགས་པ་སྔ་མོའི་དུས་སུ་ཇོ་བོ་ཤཱཀྱ་མུ་ནེའི་མཆོད་ཁང་ནང་དུ་བླ་མ་སྐྱེས་ཆེན་རྣམས་ལྷན་ཏུ་འཛོམས་ནས་མཆོད་མེ་མཐའ་དག་སྒྲོན་པ་ལས། གཟབ་ནན་གྱི་རྣམ་པ་ཞིག་མངོན་ཡོད་པ་དང་བཀྲ་ཤིས་པའི་མཁའ་དབུགས་ཤིག་གིས་ཁྱབ་ཡོད་པ་རེད། ལོ་རྒྱུས་ཀྱི་གཏན་འཁེལ་དང་ཆོས་ལུགས་ཆོ་ག་ལྟར། གསེར་བུམ་དཀྲུག་པར་བཀོལ་བའི་གསེར་བུམ་དེ་དག་ཇོ་བོ་ཤྰ་ཀྱ་མུ་ནེེའི་སྐུ་མདུན་དུ་བཤམས་ཡོད་ཅིང་། དགེ་འདུན་པ་རྣམས་ཀྱིས་བསྟུད་མའི་ཉིན་གསུམ་རིང་ལ་བྱིན་གྱིས་བརླབས་པ་དང་མཆོད་འཇལ་སྣ་ཚོགས་ཞུས་པ་བརྒྱུད་དེ་མཆོད་མེའི་གཟི་འོད་འོག་ཏུ་གསོན་ཉམས་ཀྱིས་ཕྱུག་ཡོད་པ་རེད། དུས་ཚོད་ལྔ་ཡས་མས་སུ་གསེར་བུམ་དཀྲུག་པའི་མཛད་སྒོ་མགོ་བརྩམས་ཤིང་། ལྷོ་ཁ་ས་ཁུལ་ཆོས་ལུགས་མཐུན་ཚོགས་ཀྱི་ཚོགས་གཙོ་དང་ཡང་སྲིད་སྤྲུལ་སྐུ་འཚོལ་ཞིབ་ཚོགས་པའི་ཚོགས་གཙོ་ཟླ་བ་ཚེ་རིང་གིས་སྡེ་དྲུག་སྤྲུལ་སྐུའི་ཡང་སྲིད་ཞིབ་འཚོལ་སྐོར་གྱི་གནས་ཚུལ་ངོ་སྤྲོད་གནང་བ་རེད། ཅེས་དང་།

གནས་ཚུལ་དེའི་ནང་མུ་མཐུད་བཀོད་དོན། བོད་རང་སྐྱོང་ལྗོངས་མི་དམངས་སྲིད་གཞུང་གི་ཆེད་མངག་འཐུས་མི་དང་བོད་རང་སྐྱོང་ལྗོངས་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རེན་བློ་བཟང་འཇིགས་མེད་ཀྱིས་བོད་ཡིག་དང་རྒྱ་ཡིག་གཉིས་ལ་བརྟེན་ནས་བོད་རང་སྐྱོང་ལྗོངས་མི་དམངས་སྲིད་གཞུང་གི་གསེར་བུམ་དཀྲུག་ཆོག་པར་མོས་མཐུན་བྱུང་བའི་སྐོར་གྱི་མཆན་འགོད་སྒྲོག་འདོན་གནང་བ་རེད། བོད་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་། ནང་བསྟན་ཆོས་ལུགས་མཐུན་ཚོགས་བོད་ལྗོངས་ཡན་ལག་གི་ཚོགས་གཙོ་སྒྲུབ་ཁང་ཐུབ་བསྟན་མཁས་གྲུབ་དང་། ལྷོ་ཁ་ས་ཁུལ་ནང་བསྟན་མཐུན་ཚོགས་ཀྱི་ཚོགས་གཙོ་ཟླ་བ་ཚེ་རིང་སོགས་གསེར་བུམ་དཀྲུག་སར་གདན་དྲངས་ཡོད་ཅིང་། གསེར་བུམ་སྲུང་བའི་བླ་མ་གཉིས་ཀྱིས་གསེར་བུམ་དེ་སྔོན་ལ་བཀོད་སྒྲིག་གནང་ཡོད་པའི་སྒྲོག་ཙེའི་སྟེང་དུ་འཇོག་པ་དང་། བོད་རང་སྐྱོང་ལྗོངས་མི་དམངས་སྲིད་གཞུང་གི་ཆེད་མངག་འཐུས་མི་བློ་བཟང་འཇིགས་མེད་དང་། ཀྲའོ་ཞོན་ཀྲུང་། ཆོས་ལུགས་ལས་དོན་གྱི་མི་སྣ་སྒྲུབ་ཁང་ཐུབ་བསྟན་མཁས་གྲུབ། འོས་སྤྲུལ་གྱི་གཉེན་ཉེ་བཅས་ཀྱིས་གསེར་བུམ་དཀྲུག་པར་ཞིབ་བཤེར་གནང་བ་མ་ཟད། ད་དུང་བོད་ཡིག་དང་རྒྱ་ཡིག་གི་ལམ་ནས་འོས་སྤྲུལ་སྤྲུལ་སྐུའི་མཚན་ཐོ་མཚན་བྱང་སྟེང་དུ་སྦྱར་ཏེ། གསེར་བུམ་དཀྲུག་སྣོད་དུ་བཞག་ཡོད་པ་རེད། དེ་མུར་ལས་དོན་པས་སྡེར་མ་ཡར་བཀྱགས་ནས་བོད་རང་ལྗོངས་མི་དམངས་སྲིད་གཞུང་གི་འཐུས་མི་ནས་མགོ་བརྩམས་ཏེ་རིམ་བཞིན་བླ་མ་སྐྱེས་ཆེན་དང་འོས་སྤྲུལ་གཉེན་ཉེ། ཡུལ་དངོས་ཀྱི་དགེ་འདུན་པ་དང་སེར་སྐྱ་མང་ཚོགས་ལ་ལྟ་རུ་བཅུག་ཅིང་། ཚང་མས་གཏན་འཁེལ་བྱས་ནས་མིང་རྟགས་ལ་ནོར་བ་མེད་པར་བྱས་རྗེས། ད་གཟོད་རས་སེར་གྱིས་ཁ་བཏུམས་པ་རེད། དེ་ནས་བྲེལ་མྱུར་ངང་ལྷོ་ཁ་ས་ཁུལ་ནང་བསྟན་མཐུན་ཚོགས་ཀྱི་ཚོགས་གཙོ་དང་ཡང་སྲིད་སྤྲུལ་སྐུ་འཚོལ་ཞིབ་ཚོགས་པའི་ཚོགས་གཙོ ཟླ་བ་ཚེ་རིང་གིས་ཤཱ་ཀྱ་མུ་ནེེའི་སྐུ་འདྲ་དང་གསེར་བུམ་ལ་ཕྱག་འཚལ་རྗེས་གཟབ་ནན་སྒོས་གསེར་བུམ་གྱི་ཁ་ཕྱེ་བ་དང་རྒྱན་འཕེན་བྱང་སྣོད་བླངས་ཏེ་མཚན་བྱང་དེ་བུམ་པའི་ནང་བཞག་ནས་བུམ་ཁ་བརྒྱབ་རྗེས་ཕྱིར་འདུག་གནས་རྐུབ་སྟེགས་སུ་ལོག་པ་རེད། དེ་རྗེས་བུམ་སྲུང་བླ་མ་གཉིས་ཀྱིས་གུས་འདུད་ཆེན་པོ་དང་བཅས་གསེར་བུམ་དེ་ཤཱ་ཀྱ་མུ་ནེའི་སྐུ་མདུན་དུ་བསྙེན་བཀུར་དང་བཅས་ཕུལ་གནང་བ་རེད། ཅེས་བཀོད་འདུག

གསར་འགོད་པ། དོན་འགྲུབ་བཀྲ་ཤིས།