དེ་རིང་གི་དུས་བབ་དྲ་བའི་མདུན་ངོས་ཀྱི་《མང་ཚོགས་ཀྱི་རེ་འདུན་ལ་ལྟ་འདོད་ཡོད》ཅེས་པའི་དྲི་བ་ཁག་དང་དེའི་ཡར་སྔོན་གྱི་རྩོམ་སྒྲིག་པའི་《དགའ་ལྡན་དགོན་པའི་ཤུལ་གཉིས་པ》ཞེས་པའི་ཆེད་རྩོམ་གཉིས་ཀྱི་བར་ན་དཀྲོལ་མི་བཏུབ་པའི་དཀའ་གནད་གང་ཡང་མེད་པའི་ངོས་འཛིན་དང་། རྩོམ་ཡིག་སྔ་མ་དེའི་ཁྲོད་ཀྱི་འཇིག་ཉེན་དང་ཕྱི་མ་འདིའི་ཁྲོད་ཀྱི་འཇིག་ཉེན་ཡང་ཐ་དད་དུ་སོང་ཡོད་པར་མཐོང་བས། བདག་གིས་དགེ་བསྟན་ལགས་ཀྱིས་དེ་དང་འབྲེལ་བར་སྨྲ་བའི་དྲི་བ་ཁག་བདུན་ལ་ལན་གཅིག་འདི་འབུལ་བར་འདོད།
རྩོམ་སྒྲིག་པ་མཆོག་གི་རྨི་ལམ་འདིས། འདས་པའི་མི་ལོ་ལྔ་ཅུའི་ཡར་སྔོན་གྱི་འཇིག་པ་ཞིག་ངོས་བཟུང་སྟེ་མ་འོངས་པའི་མི་ལོ་དུ་མ་ཞིག་ལ་རྗེས་དཔག་གི་རིག་པས་དཔྱད་ཡོད། འདིས་ཅི་ཞིག་ལ་ཕན་དང་གང་ཞིག་ལ་གནོད་པའི་དོགས་སློང་གི་རྣམ་པ་བསྟན་མེད། རྒྱུ་མཚན་དེའི་ཕྱིར་ན། ཁྱེད་ཀྱིས་དེ་དང་འབྲེལ་བ་དམ་ཟབ་ཡོད་པར་འདོད་པའི་དྲི་བ་དང་དེའི་ཤུགས་ཀྱི་རྣམ་འགྱུར་དེ་སྤྱིར་བཏང་བ་ཞིག་དང་ཐ་དད་ཙམ་དུ་སོང་འདུག
དེ་བས་ཀྱང་དགའ་ལྡན་དགོན་པ་དང་སེ་ར་དགོན་པ་སོགས་ཀྱི་མ་འོངས་པའི་འཇིག་ཉེན་གྱི་རྗེས་དཔག་གི་བསམ་བློ་འདིས་ཁྱེད་ལྟར་དུ་རྩོམ་སྒྲིག་པ་མཆོག་གིས་ཀྱང་དྲི་བ་ཞིག་བཏོན་ཡོད། དྲི་བ་དེ་རྩོམ་ཡིག་གང་བཀླགས་གྲུབ་རྗེས་རང་གིས་རང་སེམས་ལ་འདྲི་དགོས་པ་ཞིག་ཡིན། མ་གཞི་གསེར་འོད་ལམ་ལམ་་གྱི་སྔ་མའི་དགའ་ལྡན་དགོན་པ་དེ་ཅིའི་ཕྱིར་ད་ལྟའི་འདི་ལྟར་དགོན་ཤུལ་ཙམ་དུ་ཆགས་པ་ཡིན། དེ་ནི་ལོ་རྒྱུས་ཀྱི་གྲུ་ཟུར་ཞིག་བོད་གངས་ཅན་དང་ལྷག་པར་དུ་སངས་རྒྱས་ཀྱི་བསྟན་པར་ཕོག་པར་ངོས་འཛིན་འོས་ན།
མ་འོངས་པར་ཡང་དགའ་ལྡན་དགོན་པའི་ཤུལ་གཉིས་པ་ཞིག་བོད་ཀྱི་ལོ་རྒྱུས་དང་། ཡང་ན་སངས་རྒྱས་ཀྱི་བསྟན་པའི་དར་རྒུད་ལ་འགྲོགས་ནས་མངོན་པར་འགྱུར་ངེས། རྗེས་དཔག་གི་རིག་པ་འདིའི་སྒྲུབ་བྱེད་ཡང་དག་ནི། ད་ལྟའི་བོད་ཕྱི་ནང་གི་གྲྭ་རྒྱུན་དང་ཧི་མ་ལ་ཡའི་རི་བརྒྱུད་ཀྱི་གྲྭ་བའི་སྐོར་འཁྱུག་ཙམ་གསུང་བ་འདིས་བསྟན་ཡོད། ངས་བལྟས་ན་དགེ་བསྟན་ལགས་ཀྱི་གོང་གི་དྲི་བ་ཁག་བདུན་བཏང་བའི་གནད་དོན་གྱི་ལན་ཞིག་ནི་འདི་ལས་གདའ་མེད།
ཡང་རྩོམ་སྒྲིག་པ་མཆོག་གིས་གསུངས་དོན། འཇིག་ཉེན་འདི་དག་གི་རྩ་བའི་གནད་དོན་གཞན་ཞིག་ནི་ཆོས་བརྒྱུད་སྤྱི་འཐུས་ལ་ཐུག་ཡོད། ཆོས་བརྒྱུད་སྤྱི་འཐུས་འདི་ཡང་མཐར་གཏུགས་ན་རྒྱ་གར་གྱི་གྲོས་ཚོགས་སུ་འགྲོ་བ་ལས་ང་ཚོའི་ཆབ་སྲིད་ཀྱི་ར་བར་ཁྲིད་ཡོང་ཐབས་མེད་པ་ཞིག་ཆགས་འགྲོ་བ་དེ་རེད།དེའི་སྟབས་ཀྱིས་ཁོང་གི་རྨི་ལམ་དེ་དང་ཆོས་བརྒྱུས་ཀྱི་སྤྱི་འཐུས་གཉིས་ཀྱི་བར་མཚུངས་རྟགས་ཤིག་དང་འགལ་བ་ཅི་ཞིག་ཡོད་མིན་གྱི་དྲི་བ་དེ་རེད།
དེ་ལྟར་ན་དགེ་བསྟན་ལགས་ཀྱི་སེམས་འཚབ་དང་བཅས་པའི་དྲི་བ་ཁག་བདུན་དེས། རྒྱུ་མཚན་དང་གནས་ལུགས་གཞན་ཞིག་གི་ངོས་ནས་རང་གི་སེམས་ཚོར་བསྟན་པ་ལས་《དགའ་ལྡན་དགོན་པའི་ཤུལ་གཉིས་པ》དང་ཅི་ཞིག་འབྲེལ་མིན་བདག་ལ་མ་ངེས།
མཐའ་དོན། བདག་གི་བསམ་ཚུལ་ཐུང་ངུ་འདི་ལོག་འགྲེལ་ཞིག་ཏུ་གྱུར་ཡོད་ཀྱང་སྲིད། ཡིན་ནའང་ཁྱད་དུ་འཕགས་པའི་རྩོམ་སྒྲིག་པའི་《དགའ་ལྡན་དགོན་པའི་ཤུལ་གཉིས་པ》ཞེས་པའི་ཆེད་རྩོམ་ཐུང་ངུ་འདིར་མཇལ་བའི་རང་གི་མྱོང་འགྲེལ་ཞིག་ནི་ཅིས་ཀྱང་ཡིན། དེའི་སྟབས་ཀྱིས་རྩོམ་ཡིག་འདི་བཀླགས་རྗེས་བརྗོད་ཐབས་་བྲལ་བའི་ཚོར་བ་ཞིག་ཡོང་ནའང་། དེ་ནི་རང་ཉིད་གཅིག་བུའི་ཚོར་བ་ཞིག་ཏུ་ངོས་བཟུང་ནས་སྡོད་པའི་སྐབས་སུ། མྱོང་སྟོབས་ལྡན་པའི་ཀློག་པ་པོ་དགེ་བསྟན་ལགས་ཀྱིས་ཀྱང་འདི་དང་འབྲེལ་བའི་དྲི་བ་ཁག་བདུན་བཏང་བྱུང་བས། བདག་གིས་ཀྱང་དེར་ལན་གྱི་དོད་དུ་འདི་ཙམ་ཕུལ་བའོ།།
དགེ་བཤེས་ལགས་ཀྱིས་ལྗགས་ལན་གནང་བར་ཐུགས་རྗེ་ཆེ། ཡིན་ནའང་ངས་སྐུ་ཉིད་ཀྱི་དྲི་བ་ཁག་བདུན་ལ་ལན་གཅིག་བཏབ་པས་མ་མགུ་བ་ནི་དགོངས་དག སྤྱིར་ཀློག་པ་པོ་ཞིག་གི་ངོས་ནས་བཤད་ན། གཞན་གྱི་ཕུལ་དུ་བྱུང་བའི་རྩོམ་ཡིག་ཅིག་ལ་རོལ་མྱོང་བྱེད་སྐབས། དེར་མཐའ་གཅིག་ཏུ་ཚད་གཞི་གཅིག་དང་ཚད་ཐིག་གཅིག་གི་སྒང་ནས་བལྟས་ན་ནོར་བར་ངོས་འཛིན་ཆོག དེའི་སྟབས་ཀྱིས་ང་ཚོས་ཉེ་སྔོན་གྱི་རྩོམ་སྒྲིག་པའི་《དགའ་ལྡན་དགོན་པའི་ཤུལ་གཉིས་པ》ཀློག་སྐབས་ངེས་པར་དུ་ཆབ་སྲིད་གཅིག་བུའི་དྲང་ཐད་ལ་བཞག་ནས་བལྟ་རྒྱུ་མ་ཡིན་པར། དེར་སྒྱུ་རྩལ་དང་རིག་སྟོབས་གཞན་མང་བོ་ཞིག་གི་ལྗིད་ཁོག་བཀལ་ནས་བལྟས་ན་ད་གཟོད་མྱོང་རྒྱུ་ཞིག་དང་བསམ་རྒྱུ་ཞིག་ཡོད་པ་དེ་ཡིན། དེ་ཡིན་དུས་དེ་ལ་ཁ་ཐུག་གི་དྲི་བ་འདོན་པ་དང་ཚིག་གི་ངོ་གདོང་ལ་འཇུས་ནས་བསམ་ཚུལ་བཤད་པ་ནི་སྣང་ཚུལ་སྙིང་རྗེ་ཞིག་མིན། མ་གཞི་ཀློག་པ་པོ་ཞིག་ལ་ཆ་མཚོན་ན། རང་ཉིད་ལ་གཞན་གྱི་ཕུལ་དུ་བྱུང་བའི་རྩོམ་ཡིག་དེ་ཀློག་པའི་རྣམ་དཔྱོད་དང་ཤེས་རབ་ཁྱད་པར་བ་ཞིག་དགོས་པ་བརྗོད་ག་ལ་དགོས། དེའི་སྟབས་ཀྱིས་དེ་ལྟར་དུ་དཔྱད་བརྗོད་བྱེད་པ་ལའང་གོང་མཚུངས་ཀྱི་ཁྱད་ཆོས་ཡོངས་སུ་མཚུངས་དགོས། དེ་མ་ཡིན་པར་གང་དྲན་དྲན་ཞིག་བརྗོད་པ་ནི་ཀློག་པ་པོའི་ཚད་གཞི་མིན། ངས་རྒྱུ་མཚན་འདི་འདྲ་ཞིག་ལ་བརྟེན་ནས་དགེ་བཤེས་ལགས་ཀྱི་དགོངས་ཚུལ་ཡིན་ལ་དྲི་བའང་ཡིན་པའི་གོང་གི་རྩོམ་ཡིག་དེ་རྩོམ་སྒྲིག་པའི་ཆེད་རྩོམ་དེ་དང་འབྲེལ་བ་ཅང་མི་འདུག་པར་བསྟན་པ་ཙམ་ཡིན། ཡིན་ནའང་ཁྱེད་ཀྱི་དགོངས་ཚུལ་དེ་དྲི་བ་རེད་ལ། སེམས་འཚབ་ཀྱང་རེད། ཡིན་ནའང་འབེན་གྱི་ལྡོག་ཕྱོགས་སུ་གཟས་པའི་མདའ་མོ་ཞིག་ནི་ཅིས་ཀྱང་ཡིན་པར་སྣང་། འདི་ཙམ་བྱ། རྗེས་མར་མཇལ།
གནམ་ལྕགས་ཞེས་པའི་སྨྱུག་མིང་འཛིན་པ་པོ་ལགས། དྲི་བ་བདུན་ལ་ལན་འཐུས་སྒོ་ཚང་བ་ཞིག་གནང་ཡོད་པའི་ཚོར་སྣང་མ་བྱུང་ཡང་ལན་གནང་དང་དགོངས་ཚུལ་བཏོན་པ་ཙམ་གྱིས་བོད་མི་རིགས་རིག་གཞུང་དང་བཅས་པར་ཐུགས་ཞེན་དཀར་བར་མཚོན་པས་ཐུགས་རྗེ་ཆེ་ཞུ་རྒྱུ་ཡིན། སྤྱིར་རྩོམ་སྒྲིག་པས་ཆོས་ལུགས་སྤྱི་འཐུས་ཀྱི་གནད་དོན་དེ་དགའ་ལྡན་དགོན་པའི་ཤུལ་གཉིས་པ་དང་འབྲེལ་ནས་བཤད་ཡོད་ལ། དགའ་ལྡན་དགོན་པའི་ཤུལ་གཉིས་པ་ཇི་ལྟར་འབྱུང་མིན་དེ་བོད་རིགས་གྲྭ་རྒྱུན་ཉུང་དུ་འགྲོ་བཞིན་པ་ལ་འབྲེལ་བ་ཡོད། དེའི་ཕྱིར། བོད་རིགས་གྲྭ་རྒྱུན་ཉུང་དུ་འགྲོ་བའི་རྒྱུ་རྐྱེན་དེ་བོད་རིགས་ཡོངས་ནས་རིག་གཞུང་ལ་བཅངས་པའི་འདུ་ཤེས་དང་གོ་རྟོགས་ལ་འབྲེལ་བ་ཡོད་པར་བརྟེན་དྲི་བ་འདི་དག་བཏོན་པ་ཡིན་པས།མི་རིགས་ཤིག་གི་འབྱུང་འགྱུར་དང་རིག་གཞུང་ཞིག་གི་མདུན་ལམ་གྱི་ཐད་ནས་བསམ་ན་སྤྱིར་བཏང་གི་སྐད་ཆ་ཞིག་མིན།་དེའི་སྟབས་ཀྱིས་གུས་པའི་དྲི་བ་འདི་དག་རྩོམ་སྒྲིག་པའི་རྩོམ་ཡིག་དང་འབྲེལ་བ་དམ་ཟབ་ཡོད་པར་སྙམ།
སྐུ་ཞབས་ལུང་རིགས་ལགས།
སྔོན་བྱོན་དམ་པ་དག་གིས་ཕྱི་ནས་ནང་འདྲེན་བྱས་པ་ཙམ་མ་ཡིན་པར་ལོ་ངོ་སྟོང་ཕྲག་ལྷག་གི་རིང་ལ་རྒྱུད་འཛིན་དམ་དོན་གནང་སྟེ་་བོད་མི་རིགས་ལ་བདག་ཐོབ་ངེས་ཅན་ཡོད་པའི་མཛད་རྗེས་བླ་བཞག་ཡོད་ལ། དེ་ཡང་དཔལ་ཎཱ་ལནྜའི་མཁས་པའི་ཡང་རྩེ་དག་གིས་དག་པར་མཛད་པའི་ཚང་ལ་མ་ནོར་བའི་ཆོས་ཚུལ་ཟབ་མོ་དེ་བོད་གཅིག་བུ་ལ་མ་གཏོགས་ད་ལྟའི་མེད་ཅེས་བཤད་ཆོག
སྐུ་ཉིད་གསུང་བ་བཞིན་བཙོང་མཁན་དེ་བོད་མི་དང་ཉོ་མཁན་དེ་མི་རིགས་གཞན་ཡིན་སྟབས་དེའི་སྟེང་ནས་ཀྱང་གཞན་ལ་མེད་པའི་བདག་ཐོབ་ཅིག་ཡོད་པ་ཤེས་ཐུབ།
བོད་ཀྱི་བཅུ་ཕྲག་རིག་པའི་གནས་འདི་དག་ཨ་རི་དང་ཡུ་རོབ་སོགས་ལ་ཡང་མེད་པ་ནས་ཡོད་པ་དང་། ཡོད་པ་ནས་ཇེ་རྒྱས་སུ་འགྲོ་བཞིན་པར་འདོད། ཅེས་པ་དེ་ཡང་གང་ནས་དར་བ་དང་མགོ་ཁུངས་སུ་ལ་གཏུགས་ཡོད་མེད་ཀྱི་སྟེང་ནས་ཤེས་ཐུབ། བོད་ཀྱི་སྐད་ཡིག་ནང་དུ་དར་བ་དེ་འདྲ་ཞིག་འདས་པའི་དུས་སུ་གཞན་སུ་ལ་དར་མེད་པ་ཤེས་མི་ཐུབ་པའི་གནད་དོན་ཞིག་མིན།
གཉིས་པ། དེ་འདྲ་ཡང་མ་རེད། འོན་ཀྱང་། ང་ཚོར་དེ་དག་ལོངས་སུ་སྤྱོད་རྒྱུའི་ཁོར་ཡུག་མེད་པ་རེད། ཅེས་པར། སྤྱིར་གང་ཉིད་ནས་ཁོར་ཡུག་མེད་ཅེས་པ་སློབ་གཉེར་གནང་སའི་ཁོར་ཡུག་མེད་ཅེས་པ་ཡིན་རྒྱུ་མ་རེད་སེ་འབྲས་དགའ་གསུམ་སོགས་སློབ་གཉེར་གནང་སའི་ཁོར་ཡུག་མང་པོ་ཡོད་པས་སོ། གལ་སྲིད་བོད་ནང་དུ་བཤད་པ་ཡིན་ན་ཅུང་བདེན་དུ་ཆུག་ཀྱང་ང་ཚོའི་གླེང་གཞི་ནི་འདི་ཕྱོགས་ཡིན། གལ་ཏེ་ང་ཚོ་གང་དུ་སོང་ཀྱང་གཞན་དབང་སྟབས་བསྟུན་བྱེད་དགོས་པའི་ཆ་ནས་ཁོར་ཡུག་ཆེན་པོ་མེད་ཅེས་བཤད་ཆོག་ཀྱང་། དོན་དངོས་ང་ཚོ་ཁོར་ཡུག་གི་བཀག་རྒྱ་མ་ཡིན་པར་སྐབས་འཕྲལ་གནས་བབ་ལ་ཁ་གཏད་གདོང་ལེན་བྱེད་མ་ཐུབ་པའི་གནད་དོན་དང་ཕུག་རྒྱང་རིང་བཟུང་གི་འདུ་ཤེས་ཕྲ་བའི་རྐྱེན་གྱིས་ཁོར་ཡུག་མེད་པར་གྱུར་བ་རེད།
སྐབས་དོན་དེ་ཙམ་ ཡིན་ཕྱིས་སུ་མཇལ་ཡོང།
བློ་གྲོས་རྒྱལ་པོ་ལགས། ཕྱོགས་གཅིག་བདེན་པ་རེད། དུས་རབས་དང་འཛམ་གླིང་གི་འགྱུར་འགྲོས་བསྟུན་ནས་བོད་ཀྱི་རིག་གཞུང་གི་རིན་ཐང་ལ་ཚན་རིག་པས་འདེང་འཇོག་དང་འབྲེལ་དོ་སྣང་བྱ་ཡུལ་གཙོ་གྲས་སུ་གྱུར་ཡོད། གནད་དོན་དེའི་སྟབས་ཀྱིས་རང་ཕྱོགས་ལ་དྲི་བ་འདི་དག་འདོན་དགོས་བྱུང་བ་རེད།
དྲ་གྲོགས་གནམ་ལྕགས་ལགས་ཀྱིས་ལན་ནམ་དགོངས་ཚུལ་ཡག་པོ་ཞིག་གསུང་འདུག་པས་དགའ་བསུ་ཡོད།