རྟ་ཐོག་སྤོ་ལོ་འགྲན་པ།

སྟོན་ཟླ་མགོ་མའི་ཚེས་ཤར་དང་ཕྱི་ཟླ་བདུན་པའི་ཟླ་མགོར་མདོ་སྨད་རྨ་ཆུའི་རྩྭ་ཐང་དུ་ལོ་རྒྱུས་ཀྱི་ཆུ་རྒྱུན་རིང་ཞིང་། རིག་གནས་ཀྱི་དོན་སྙིང་ལྡན་པའི་༼ རྟ་ཐོག་སྤོ་ལོའི་རྩེད་འགྲན ༽ ཟེར་བའི་རྩེད་མོ་ཞིག་རྩེས་ཡོད་འདུག གནས་ཚུལ་ནང་བཀོད་པ་ལྟར་ན། ཉེ་ཆར་རྨ་ཆུ་རྫོང་རྨ་ཁུགས་ཀྱི་རྟ་ར་ནས་མདོ་སྨད་རྟའི་ཆོལ་ཀའི་རིགས་བཟང་རྒྱུད་གཙང་གི་རྟའི་རིག་གནས་གོང་སྤེལ་གཏོང་བ་དང་། གནའ་བོའི་ལུས་རྩལ་དེ་བོད་ཡུལ་ནས་ཉམས་པ་སླར་གསོ་བྱ་ཆེད། ནང་སོག་ནས་ཆེད་ལས་མཁས་པ་གདན་དྲངས་ཏེ། རྨ་ཆུ་ས་ཁུལ་གྱི་རྟ་རྩལ་ལ་བྱངས་པའི་གཞོན་ནུ་ལོ་ཆུང་ཚོར་རྟ་རྩེད་སྤོ་ལོའི་སྐོར་སློབ་སྟོན་བྱས་ཏེ། རྟ་ཐོག་སྤོ་ལོའི་རུ་ཁག་ ༨ རྩ་འཛུགས་ཀྱིས་འགྲན་བསྡུར་བྱས་ཡོད་པ་མ་ཟད། འབྱུང་འགྱུར་ཡང་འགྲན་སྡུར་གྱི་བྱེད་སྒོ་སྣ་ཚོགས་རབས་དང་རིམ་པར་སྤེལ་ཏེ། ལུས་རྩལ་དེའི་ས་བོན་དམངས་ཁྲོད་དུ་གདབ་པའི་མཐུན་རྐྱེན་ཕུན་སུམ་ཚོགས་པོ་བསྐྲུན། ཞེས་བཀོད་འདུག

གནས་ཚུལ་ནང་མུ་མཐུད་བཀོད་དོན། རྟ་ཐོག་སྤོ་ལོ་ནི་ལོ་རྒྱུས་རིང་བའི་གནའ་བོའི་ལུས་རྩལ་རིགས་ཤིག་ཡིན་ལ། རྗེས་སུ་ནུབ་ཕྱོགས་སུ་དར་ཏེ་ད་ལྟ་ཨ་རི་དང་དབྱིན་ཇི། ཕྱི་སོག རྒྱ་གར། ཨར་ཇེན་ཊི་ན། ཨེ་ཤ་ཡ་དཀྱིལ་མ་སོགས་ཤར་ནུབ་ཀྱི་རྒྱལ་ཁབ་མང་པོར་རྟའི་རིག་གནས་ཀྱི་མཚོན་བྱེད་ལུས་རྩལ་གཙོ་བོ་ཞིག་ཏུ་གྱུར་ཡོད། རང་རེའི་བོད་ལ་མཚོན་ན། བོད་བཙན་པོའི་སྐབས་ནས་བཟུང་རྟ་ཐོག་སྤོ་ལོ་རྩེ་བའི་སྲོལ་ཡོད་པ་ ༼ ཐང་ཡིག་གསར་མ ༽ སོགས་སུ་བཀོད་ཡོད་ལ། རྟ་ཐོག་སྤོ་ལོའི་ཆེས་ཐོག་མའི་མཆེད་ཁུངས་ཀྱང་རང་རེའི་བོད་ཡུལ་ཡིན་པར་འདོད་མཁན་ཡོད་ཀྱང། དེང་གི་དུས་འདིར་བོད་ཡུལ་ན་གདོད་མའི་ལུས་རྩལ་འདིར་གསལ་ཆ་ཡོད་མཁན་ཉིན་མོའི་སྐར་མ་ལྟ་བུར་གྱུར་ཡོད། ཅེས་དང་། རྨ་ཆུ་རྫོང་རྨ་ཁུགས་རྟ་རས་ལོ་ངོ་ལྔ་བཅུ་ལྷག་རིང་རྟ་གསོ་སྐྱོང་གི་ལས་ཀའི་རྒྱུན་བསྐྱངས་སྟབས། དེ་ནས་ཐོན་པའི་རྟ་ནི་ཀྲུང་གོའི་རྟ་རིགས་བཟང་བོ་གསུམ་གྱི་ཁོངས་སུ་གཏོགས་པ་དང་། རིགས་བཟང་ཞིང་། རྒྱུད་གཙང་བ། མགྱོགས་ཤིང་སྐྱེན་པ། རྫ་དུག་ཐུབ་པ། རི་ངོར་འཛེགས་ཐུབ་པ་སོགས་ཀྱི་ཡོན་ཏན་དང་ལྡན་པས་མདོ་སྨད་ཀྱི་འབྲོག་ཁུལ་མང་པོའི་གཅེས་ནོར་དུ་གྱུར་ཡོད་པ་མ་ཟད། འབྲུག་ཡུལ་དང་ཨུ་རུ་སུ་སོགས་སུའང་ཁྱབ་སྟེ། སྔོན་གྱི་འབྲུག་རྒྱལ་བོའི་ཆིབས་པར་ཡང་གྱུར་མྱོང་ཡོད་ཅེས་རྨ་ཁུགས་ཀྱི་རྟ་ལ་བསྟོད་བསྔགས་ཀྱང་བྱས་འདུག 

གནས་ཚུལ་དེའི་ནང་རྟ་རྩལ་སྤོ་ལོ་ལས་གཞན་པའི་རྟ་རྩལ་འགའ་ཡང་ངོ་སྤྲོད་གནང་དོན། ཐེངས་འདིར་རྟ་ཐོག་སྤོ་ལོའི་ལུས་རྩལ་དར་སྤེལ་གཏོང་བ་ལས་གཞན། སྒྲོག་སྦྱིན་དང་ཁ་བཏགས་གོང་ལེན། ཚང་རག་ལ་རྒྱུགས་པ་སོགས་སྔོན་ནས་ཡོད་པའི་རྟའི་ལུས་རྩལ་གོང་སྤེལ་གཏོང་བ་དང་།  རྨ་ཆུའི་རྨ་ཁུགས་རྟ་རའི་རྟའི་རིག་གནས་ཀྱི་འགྲེམས་སྟོན་ཁང་དང་། རྟའི་རིག་གནས་ཀྱི་གནས་སྐོར་ལྟེ་བ་འཛུགས་པའི་དྲ་སྒྲིག་ཡིན་སྟབས། ལས་ཀའི་བྲེལ་ཚེགས་དང་གྲོང་ཁྱེར་གྱི་ཟང་ཟིང་གིས་ཡིད་ཀུན་ནས་སུན་པའི་ཕྱོགས་བཞིའི་མགྲོན་པོ་དག་གིས་གནས་དེ་ནས་རང་བྱུང་ཁམས་ཆེན་པོའི་མཛེས་པ་དང་། མ་བཅོས་མ་བསླད་མ་བརྫུས་པའི་འབྲོག་པའི་རིག་གནས་ཀྱིས་སྐུ་ཉིད་ཀྱི་སེམས་ངལ་སོས་པའི་ལོངས་སྤྱོད་དུ་རྙེད་པར་གདོན་མི་ཟའོ།། ཞེས་བཀོད་འདུག ཡང་རྟ་རྩེད་སྤོ་ལོའི་སྐོར་དུང་དཀར་ཚིག་མཛོད་ནང་བཀོད་པ་ལྟར་ན། “རྟ་རྩེད་སྤོ་ལོ་ནི་ཉེ་བའི་དུས་རབས་སུ་རྟ་རྩེད་པོ་ལོ་རྒྱག་པ་མཐོང་རྒྱུ་མེད་ཀྱང་། གནའ་དུས་བོད་ལ་དར་བའི་ལུས་རྩལ་གྱི་རྣམ་གྲངས་ཤིག་ཡིན། གནའ་དུས་ཐང་བོད་བར་མཛའ་མཐུན་རྩེད་འགྲན་ཡང་བྱས་མྱོང” ཞེས་ཐང་དེབ་རྙིང་པའི་ནང་དོན་ལུང་འདྲེན་བྱས་འདུག  ༼ གོང་གི་གནས་ཚུལ་དང་པར་མཆོད་མེ་རྩོམ་རིག་དྲ་བ་ལས་བསྡུ་སྒྲིག་བྱས ༽

 བསྡུ་སྒྲིག་བྱེད་མཁན། དོན་འགྲུབ་བཀྲ་ཤིས།