བཀའ་སྤྱི་བཙལ་བའི་བརྒྱུད་ལམ་གསུམ་དང་འགན་འཁྲི་གསུམ། ཨ་རིག་འགྱུར་མེད།

སྐབས་གསུམ་པའི་བཀའ་བློན་ཁྲི་པ་དང་སྐབས་བཅོ་ལྔ་བའི་བོད་མི་མང་སྤྱི་འཐུས་གང་ཡིན་རུང་། བརྒྱུད་ལམ་གསུམ་ལ་བརྟེན་ནས་བཀའ་སྤྱིར་སླེབས་དགོས་ལ། མང་ཚོགས་ཀྱིས་བརྒྱུད་ལམ་དེ་གསུམ་ངོས་གསལ་བོར་ཟིན་སོང་ན། བཀའ་སྤྱི་གང་ཡིན་རུང་ཚད་ལྡན་དང་སྤུས་དག ཤེས་འཇོན་ལྡན་པ་ཞིག་ཡོང་རྒྱུར་གདོན་མི་ཟ། དེ་གཉིས་གང་ཡིན་རུང་བྱ་གཅིག་གི་གཤོག་པ་ཟུང་ལྟར་༧གོང་ས་མཆོག་དང་མང་གཙོའི་ལྟ་བའི་ཕྱག་གཡས་པ་དང་གཡོན་པ་ཡིན་སྟབས། གཉི་ག་གལ་ཆེན་ཡིན། གཉི་ག་ངེས་པར་དུ་སྤུས་དག་པོ་དགོས། གཤོག་ཡ་གཅིག་ལ་སྐྱོན་དང་ཉམ་ཞན་ཡིན་ན་མི་ཆོག

དེར་བརྟེན། མང་ཚོགས་ཀྱིས་བཀའ་སྤྱི་གཉིས་བཙལ་དུས་བརྒྱུད་ལམ་གསུམ་ཡོད་པ་དེ་གཏན་ནས་བརྗེད་མི་རུང་། གཅིག་བྱས་ན་ངས་སྐད་ཆ་འདི་དྲན་གསོ་ཙམ་གྱི་ཕྱིར་དུ་ཕན་ཡང་སྲིད།
བརྒྱུད་ལམ་དང་པོ། བཀའ་སྤྱི་གཉི་གའི་གང་ཡིན་རུང་བརྒྱུད་ལམ་དང་པོ་འདི་ཧ་ཅང་གི་གལ་ཆེན་པོ་དང་མི་སྤུས་ལེགས་རྙེད་པའི་ལམ་བུ་ཆེས་བཟང་ཤོས་དེ་ཡིན། དེ་ནི་བཀའ་སྤྱི་གཉི་གའི་གང་གི་འོས་མིར་ལངས་འདོད་མཁན་གྱི་མི་སུ་ཡིན་རུང་། རང་འགུལ་གྱིས་སྤྱི་ཚོགས་ཐོག་བུད་ནས་རང་གི་འཇོན་ནུས་དང་ལངས་ཕྱོགས་གསལ་སྟོན་བྱ་དགོས་ལ། རང་གིས་རང་ཉིད་སྤྱི་ཚོགས་ལ་ངོ་སྤྲོད་བྱ་དགོས་པ་མ་ཟད། མ་འོངས་ལོ་ལྔའི་ནང་རང་གིས་ད་ལྟའི་བོད་མི་རིགས་ཀྱི་གནས་བབ་འདི་དང་སྤྱི་ཚོགས་འདིར་འགན་ལེན་ཅི་ལྟ་བུ་ཞིག་བྱ་ཐུབ་མིན་ཁྱབ་བསྒྲགས་བྱེད་པ། ལས་ཀ་ཅི་ཞིག་བྱེད་ཐུབ་མིན་གྱི་དམ་བཅའ་འཇོག་པ་བཅས་རེད། དེ་ལྟར་བྱས་ན་རང་ཉིད་བཀའ་སྤྱིའི་འོས་འདེམས་ཁྲོད་རྒྱལ་ཁ་ཐོབ་ཐུབ་རྒྱུར་མ་ཟད། མང་ཚོགས་ཀྱིས་ཀྱང་ཁྱོད་ལ་གདེང་ཚོད་རྙེད་པ་དང་ཡིད་ཆེས་བྱ་ཆོག་པ་ཡིན།

བརྒྱུད་ལམ་གཉིས་པ། མང་ཚོགས་ཀྱིས་གན་དང་འདི་ན་མི་འདི་དང་དེ་ལྟ་བུ་ཞིག་འདུག་དང་། ཕ་གི་དང་ཡ་གིར་འཇོན་ཐང་དང་ཤེས་ཡོན་ཡོད་ཟེར་ནས་ཕར་བཙལ་རྒྱུ་དེ་རེད། འདས་པའི་ལོ་མང་རིང་རང་ངོས་ནས་མང་ཚོགས་དང་སྤྱི་ཚོགས་ལ་ཁ་ཞེ་གཉིས་མེད་ཀྱིས་ཞབས་འདེགས་བསྒྲུབ་མཁན་ཞིག་ཡིན་ན། མང་ཚོགས་ཀྱིས་ཀྱང་གང་འཚམ་ངོ་ཤེས་ཀི་རེད་ལ། ཕལ་ཆེར་རྙེད་ཡོང་གི་རེད། ལྷག་པར་དུ་ནུས་པ་དང་འཇོན་ཐང་ལྡན་པའི་མི་སྤུས་ལེགས་ཤིག་མང་ཚོགས་ཀྱིས་ཏན་ཏན་རྙེད་མདོག་ཁ་བ་རེད། དེའི་རིགས་བཀའ་སྤྱིའི་འོས་མིར་ལངས་འདོད་མེད་སྲིད་ནའང་མང་ཚོགས་ཀྱིས་འཕུད་རྒྱག་གཏོང་ཐུབ་ཀི་རེད། ཡིན་ནའང་། མང་ཚོགས་མི་རེ་ངོ་རེ་ནས་ཅིག་གིས་ཚུར་ངོ་སྤྲོད་བྱས་པ་མིན་པར་རང་གིས་ཕར་མི་སྤུས་དག་ཅིག་བཙལ་དགོས།

བརྒྱུད་ལམ་གསུམ་པ།  མང་བོ་ཞིག་རང་འགུལ་གྱིས་བཀའ་སྤྱིར་ལངས་ཡོང་གི་ཡོད། ཡིན་ནའང་། ཁོང་ཚོ་ལངས་སྟངས་ལ་བལྟས་ན་བཀའ་སྤྱིར་འོས་པའི་མི་དེ་དག་ཡིན་མིན་བཤད་ཚོད་དཀའ། ཁོང་ཚོ་ལངས་སྟངས་ནི་བྱེད་ཐབས་ཤིག་བེད་སྤྱོད་པའམ། ཁ་གཞན་ཞིག་དང་ལག་པ་གཞན་ཞིག ཡང་ན་མི་གཞན་ཞིག་བེད་སྤྱད་ནས་རང་ཉིད་བཀའ་སྤྱིར་ལངས་ཐབས་བྱེད་པ་དེ་རེད། གཅིག་བྱས་ན་མང་གཙོའི་སྤྱི་ཚོགས་ཀྱི་འགྲོ་སྟངས་ལེགས་པོ་ཆགས་མེད་པའི་སྤྱི་ཚོགས་ཤིག་ལ་དེ་ལྟ་བུའི་གནད་དོན་འབྱུང་བ་རྒྱུན་ལྡན་ལྟ་བུ་ཡིན་སྲིད། ཡིན་ནའང་། ཁོང་ཚོ་རང་གིས་རང་ཉིད་ལ་གདེང་ཚོད་འདི་དང་གན་ཡོད་པ་དང་། མང་ཚོགས་ཀྱིས་རང་ཉིད་བཀའ་སྤྱིར་གདམ་ཚེ་གཞུག་ཕྱོགས་བྱ་བ་འདི་དང་དེ་བྱ་ཐུབ་ཀི་ཡོད་ཅེས་བཤད་ཀྱི་མེད་པར། མི་གཞན་གྱི་ཁ་བེད་སྤྱད་ཀྱིས་ཁོས་བྱ་བ་གན་དང་འདི་བསྒྲུབ་མྱོང་བ་དང་། ཁོ་ལ་དམིགས་འདུན་དེ་དང་འདི་ལྟ་བུ་ཞིག་འདུག་པས། ཁོ་བླུགས་ན་ནོར་མེད་ཚུལ་འགྲེལ་གྱིན་ཡོད། ཡང་ན། ལོ་ལྔའི་བཀའ་སྤྱིའི་འོས་བསྡུ་ཆེན་མོ་སླེབས་ལ་ཉེ་སྐབས་འདིར་ཁོང་ཚོས་ཞོགས་སྔ་ལངས་དང་དགོང་འཕྱི་ཉལ་གྱིས་འགུལ་སྐྱོད་བྱེད་ཀྱིན་ཡོད་སྲིད། དེ་ནི་རང་ཉིད་འོས་འདེམས་ཁྲོད་ཞུགས་པའི་སྟ་གོན་ཡིན་ནའང་། མང་ཚོགས་ཀྱིས་དེའི་ཕན་གྱི་ལོ་རྒྱུས་དངོས་དེ་སྣང་མེད་དུ་འཇོག་མི་ཉན།

གོང་གི་བརྒྱུད་ལམ་འདི་གསུམ་མང་ཚོགས་ཀྱིས་ངེས་པར་དུ་ཤེས་དགོས། དེ་བཞིན་མང་ཚོགས་ལ་དེ་བས་ཀྱང་འགན་འཁྲི་མ་འདྲ་གསུམ་ཡོད། མང་ཚོགས་མི་རེ་ངོ་རེས་རང་གི་འགན་འཁྲི་ཐེག་སོང་ན་བཀའ་སྤྱི་གཉི་གའི་གང་ཡིན་རུང་སྤུས་དག་པོ་དང་འཇོན་ནུས་ལྡན་པ་ཞིག་བྱ་ཐུབ།

འགན་འཁྲི་དང་པོ། རང་ལོ་བཅོ་བརྒྱད་ཡན་གྱི་མི་ཚང་མས་ངེས་པར་བཀའ་སྤྱིའི་འོས་བསྡུའི་ཁྲོད་འོས་བསྡུའི་ཆ་ཤས་ལེན་དགོས། ཆ་ཤས་བླངས་པ་ཙམ་གྱིས་འགན་འཁྲི་ཐེག་མེད། ཁྱོད་ཀྱིས་བཀའ་བློན་ཁྲི་པར་མི་སུ་གདམ་ན་དང་ཐོག་ཁྱོད་རང་ཐོག་ནས་མི་དེའི་ལོ་རྒྱུས་སྤུས་དག་པོ་དང་ཁུངས་བཙུན་པོ་ཤེས་དགོས། བཤད་སྟངས་བསྒྱུར་ན་ཁྱོད་རང་ཉིད་མི་དེ་དང་ཆ་ཡོད་རྒྱུས་ཡོད་ཡིན་དགོས། ཁྱོས་རང་གི་འོས་མིར་གདེང་ཚོད་རྙེད་པ་དང་ཡིད་ཆེས་ཆོག་ན་དེས་ཕལ་ཆེར་ཁྱོད་ཀྱང་བསླུ་མི་སྲིད། སྤྱི་འཐུས་ཀྱང་དེ་མཚུངས་ཡིན། ཁྱོས་རང་གི་སྤྱི་འཐུས་འོས་མིར་མི་སུ་གདམ་ན་དེ་ལ་གདེང་ཚོད་དང་ཡིད་ཆེས་རྙེད་དགོས།

འགན་འཁྲི་གཉིས་པ། གོང་ཞུས་ལྟར་ཁྱོད་རང་ངོས་ནས་བཀའ་བློན་ཁྲི་པ་སྤུས་དག་ཅིག་རྙེད་དགོས་པ་ཨ་ཅང་ཅང། ཁྱོད་ཀྱིས་འོས་བསྡུ་མ་བྱས་པའི་སྔོན་དུ་ངེས་པར་དུ་བརྒྱུད་ལམ་གཞན་མིན་པར་རང་ཉིད་ཀྱི་ངོས་ནས་སྤྱི་འཐུས་འོས་མི་སྤུས་དག་བཅུ་རྙེད་དགོས། ཁྱོད་ཀྱིས་སྤྱི་འཐུས་ལ་འོས་ལྡུག་སྐབས་མི་གཅིག་ལ་མ་གཏོགས་འོས་མ་བླུགས་ན། ཁྱེད་ཀྱིས་གདམ་འདོད་པའི་མི་དེ་སྤྱི་འཐུས་སུ་སླེབས་ཐུབ་སྲིད་མོད། གཅིག་བྱས་ན་ཁྱོད་ཀྱིས་གདམ་པའི་མི་གཅིག་པོའི་ཕན་གྱི་འཐུས་མི་དགུ་སྤུས་མི་དག་པ་དང་། བརྒྱུད་ལམ་སྣ་ཚོགས་བེད་སྤྱད་ནས་ཡོང་ཡོད་ཚེ། ཁྱོས་གདམ་པའི་མི་གཅིག་པོས་ནུས་པ་ཆེན་པོ་འདོན་མི་ཐུབ། དེ་ངེས་པར་དུ་ཤེས་དགོས།

འགན་འཁྲི་གསུམ་པ། ཕྱོགས་རིས་སྤང་དགོས། ལོ་རྒྱུས་ལ་འགན་འཁུར་དགོས། དམིགས་རྒྱང་རིང་བོར་གཏད་དགོས། ངས་དཔེ་འཇོག་ཅིག་གི་སྒོ་ནས་བཤད་ན། ངའི་ད་ལྟའི་སྡོད་གནས་ངྷ་ས་ཡིན། ངྷ་སའི་གཡས་གཡོན་གྱི་སྤྱི་འཐུས་འོས་མིར་རན་པའི་མི་ཚོ་ས་གནས་གཞན་གྱི་མིར་བལྟས་ན་ངས་གང་འཚམ་ངོ་ཤེས་ཀི་ཡོད་ལ། གཅིག་བྱས་ན་ང་ཁོང་ཚོ་དང་རྒྱུན་ཏུ་འབྲེལ་འདྲིས་ཟབ་མོ་ཡོད་ཀྱང་སྲིད། ཡིན་ནའང་། ངས་ངྷ་སའི་འོས་མིར་མ་གཏོགས་ས་གནས་གཞན་གྱི་འོས་མིར་རྒྱུས་ལོན་མ་བྱས་ན་ངའི་དམིགས་རྒྱང་ཐུང་སོང་བ་ཡིན་ལ། ཡང་ངས་རང་ཉིད་ཀྱི་འབྲེལ་ལམ་དང་ཡུལ་སྡེ་དང་ཚོགས་སྡེ་བྱེ་བྲག་པའི་ཕྱོགས་ཞེན་གྱི་དབང་གི་འོས་མིར་གདམ་ན་ལོ་རྒྱུས་ལ་འགན་མ་ཁུར་བ་དང་། ༧གོང་ས་མཆོག་གི་བཀའ་དང་རྒྱབ་འགལ། ཐ་ན་རང་ཉིད་ལ་མགོ་སྐོར་དང་བསླུ་བྲིད་བཏང་བ་ཡིན་པས་རང་ཉིད་བརྟན་པོ་བཟོ་དགོས།

ད་དུང་མཇུག་ཏུ་གསལ་འདེབས་ཤིག་ཀྱང་བྱེད་དགོས་པར་འདོད། བོད་མི་མང་སྤྱི་འཐུས་གྲོས་ཚོགས་སུ་ཆོལ་ཁ་རེ་ནས་མི་བཅུ་རེ་ཡོང་དགོས་སྟབས་ཤེས་ཡོན་དང་འཇོན་ནུས་སོགས་གང་གི་ཆ་ནས་ཀྱང་ཇི་ལྟར་སྣ་འཛོམས་ཡིན་ན་དེ་ལྟར་བཟང་ཆ་ཆེ། ཡིན་ནའང་། ཆོལ་རེ་ནས་མ་མཐར་ཡང་ཆབ་སྲིད་སྲིད་ཇུས་ལ་མཁས་པའི་མི་ལྔ་ངེས་པར་དུ་དགོས། དེ་ལྟར་བྱུང་ཚེ། ད་ལྟའི་འཛམ་གླིང་སྟེང་གི་བོད་ཀྱི་གནས་སྟངས་དང་རྒྱ་ནག་གི་འགྱུར་འགྲོས། དོན་ངོ་མར་བོད་དོན་འཐབ་རྩོད་ཀྱི་སྲིད་བྱུས་ཡང་དག་པ་ཞིག་ཇི་ལྟར་འཛིན་མིན་བཅས་ཀྱི་ཐད་ནས་ནུས་པ་ཆེན་པོ་ཐོན་སྲིད། དེ་ལྟར་མ་བྱུང་ཡང་༧གོང་ས་མཆོག་གི་རླབས་ཆེན་གྱི་དགོངས་བཞེད་ངོ་མ་རྟོགས་ཐུབ་པ་དང་ལག་ལེན་ཏུ་བསྟར་རྒྱུར་ཐེ་ཚོམ་མེད་པ་འབྱུང་སྲིད། དེའི་ཕན་གྱི་མི་ལྔ་སྙན་ངག་པ་དང་རྩོམ་པ་བོ། རིག་གནས་དགེ་རྒན་དང་ཉམས་ཞིབ་པ། ཡང་ན་ཤེས་ཡོན་མེད་ཀྱང་ལྷག་བསམ་ཡོད་པ་ལྟ་བུའི་སྣ་འདུས་རང་བཞིན་ཅན་ཡིན་ཡང་མི་ཆོག་ཆེར་མེད། ཡིན་ནའང་། སྡུག་ཤོས་སྐབས་འཚོལ་བ་ཚོ་གཏན་ནས་ཡོང་མི་ཉན། སྐབས་འཚོལ་བས་གྲོས་ཚོགས་ར་བ་རང་གི་ཁ་ཕོ་དང་མཚན་སྙན་ཙམ་ཙམ་སྲུང་བྱེད་ཀྱི་སྟེགས་བུ་ཞིག་ཏུ་ངོས་འཛིན་པ་ལས་དེའི་ཕན་ནས་འགན་ཆེན་པོ་མི་འཁུར། དེ་མཁྱེན་པ་གནོངས། །