འཛམ་བུའི་གླིང་ལ་དྲ་རྒྱའི་ཁ་བྱང་རྫོགས་གྲབས་འདུག

ད་ནས་ལོ་གཅིག་མི་འགོར་བར་འཛམ་གླིང་སྟེང་དུ་དྲ་རྒྱའི་ཁ་བྱང་རྫོགས་རྒྱུ་རེད། ད་ལྟ་དྲ་བྱང་ས་ཡ་ ༢༣༢ མ་གཏོགས་མི་འདུག་ཅེས་ཆེད་ལས་པས་ལུང་དུ་བསྟན་འདུག

དྲ་ཚིགས་ཕལ་ཆེ་བས་སྤྱོད་ཀྱིན་པའི་ IPv4 ཞེས་པ་དེས་དྲ་བྱང་དུང་ཕྱུར་ ༤ མཁོ་སྤྲོད་བྱས་ཏེ། གྲངས་གནས་ ༣༢ ཡོད་པའི་ཐུན་མིན་གྱི་གྲངས་ཀ་འདིས་གློག་ཀླད་རེ་རེ་དང་། དྲ་རྒྱ་རེ་རེ། དྲ་ཚིགས་ལ་མཐུད་ཡོད་པའི་འཛིན་ཆས་མཐའ་དག་རེ་རེ་བཞིན་ངོས་འཛིན་བྱེད་ཀྱིན་ཡོད།

ལོ་ ༣༠ ཡར་སྔོན་ལ་ IPv4 གསར་གཏོད་བྱས་དུས་དྲ་བྱང་ས་ཡ་ ༤ ནི་འདང་ངེས་ཤིག་ལ་བསམ་ཡོད་ལ། སྐབས་དེ་དུས་སྒེར་གཉེར་གློག་ཀླད་ཀྱི་རིགས་བྱུང་མེད་པས་ཡིན་འདུག ད་སྐབས་དྲ་བྱང་ས་ཡ་ ༢༣༢ ལྷག་འདུག་ལ། འདི་དག་གིས་ཉིན་ ༣༤༠ ལ་མ་གཏོགས་མི་འདང་བར་བཤད།

གལ་སྲིད་དྲ་བྱང་རྫོགས་པ་དང་། ཐབས་ལམ་གསར་པ་ཞིག་མ་བརྩམས་ཚེ། དྲ་བྱང་གི་ཐད་ནས་ནག་ཚོང་གི་ཁྲོམ་ར་འཐོན་རྒྱུར་ཉེན་ཁ་ཆེ་ལ། གལ་སྲིད་དེ་ལྟར་བྱུང་བ་ཡིན་ན་ད་སྐབས་དྲ་རྒྱ་འདི་གཞུང་གཉེར་ནས་སྒེར་གཉེར་གྱི་རིམ་པར་ཡོད་པ་འདི་ཡང་ཡོངས་སུ་བསྡུ་དགོས་པར་འཁེལ་གྱིན་ཡོད་ཅེས་ཀྱང་ཟེར།

ཆེད་ལས་པ་དག་གིས་བཤད་དོན། ད་ནི་ངེས་པར་གྲངས་གནས་ ༡༢༨ ཡོད་པའི་ IPv6 ཞེས་པ་ཞིག་བཟོ་དགོས་ལ། དེ་མ་བཟོས་ཚེ་དྲ་རྒྱའི་ཁྱབ་རྒྱ་དང་གསར་གཏོད་ཀྱི་ལས་དོན་ཕྱོགས་གང་ཐད་ལ་ཚད་འཛིན་ཐེབས་རྒྱུ་རེད་ཟེར། ཐབས་ལམ་འདི་ཡོད་ཀྱང་ལག་ལེན་ལ་བསྟར་མཁན་གྱི་འགྱུར་བ་དལ་དྲགས་འདུག་ཟེར། དྲ་བྱང་ IPv6 ཅན་ལ་བསྒྱུར་བ་ཡིན་ན་མི་རེ་རེ་ལ་དྲ་བྱང་དུང་ཕྱུར་ ༤ རེ་དགོས་ཀྱང་འདང་གི་རེད་ཟེར།

IPv4 ཞེས་པ་ནི་དྲ་ལམ་ཐོན་ ༤ པ་ཟེར་བ་དང་། IPv6 ཞེས་པ་ནི་དྲ་ལམ་ཐོན་ ༦ ཞེས་པའི་དོན་རེད།

གང་མགྱོགས་ཀྱིས་དྲ་ལམ་ཐོན་ ༤་ (IPv4)  ནས་དྲ་ལམ་ཐོན་ ༦ (IPv6) ལ་བརྗེ་སྒྱུར་མ་བྱས་ཚེ། དྲ་རྒྱའི་སྤྱོད་སྒོ་དང་མ་ལག དྲ་རྒྱ་སྤྱོད་མཁན་བཅས་ལ་ག་ས་གང་ནས་ཚད་བཀག་ཐེབས་རྒྱུ་ཡིན་འདུག

ད་སྐབས་དྲ་བྱང་ IPv4  ནས་ IPv6 ལ་བརྗེ་སྒྱུར་བྱེད་བཞིན་པ་ནི་གྷོ་གྷལ་ཡིན་འདུག་ལ། ངོ་དེབ་ཀྱིས་ཀྱང་ IPv6 སྤྱོད་མགོ་བརྩམས་ཡོད་འདུག

དྲ་རྒྱའི་ཞབས་ཞུ་མཁོ་སྤྲོད་བྱེད་མཁན་གྱི་སྤྱི་གཉེར་ཁང་ཆེ་ཤོས་གཉིས་ཏེ། Verizon དང་ Comcast གཉིས་ཀྱིས་ཀྱང་གོང་གི་དྲ་བྱང་འདི་ལ་ཚོད་ལྟ་བྱེད་བཞིན་པའི་སྒང་ཡིན་འདུག

གསར་འགྱུར་སྤེལ་མཁན། ལུང་རིགས་རྒྱལ།