བོད་ཀྱི་དུས་བབ་ཟིན་བྲིས་པ་རྩེ་སྐར་གྱི་ཟིན་བྲིས་ལས་བཤུས།
འུ་ཚོའི་བོད་ཡིག་འདི་སློབ་དཔོན་ཐོན་མི་མཆོག་གིས་གསར་གཏོད་མཛད་ཙམ་ནས་རང་རེ་བོད་མི་རིགས་ཀྱི་སྤྱི་ཚོགས་ཁྲོད་བཀོལ་སྤྱོད་བྱས་ཏེ་ལོ་རབས་མང་པོ་ཞིག་འགོར་ཡོད་ནའང་། བོད་ཡིག་འདི་བཞིན་དུས་ཡུན་རིང་པོ་ཞིག་ལ་ལག་བྲིས་ཁོ་ན་ལ་བརྟེན་པ་དང་། ཡང་ན་ཤིང་ངོས་ལ་བརྐོས་ཏེ་ཤིང་དཔར་བྱེད་པ།ལྕགས་ངོས་ལ་བརྐོས་པའི་ལྕགས་དཔར་གྱི་སྲོལ་བཅས་དར་བ་ཙམ་ལས་གཞན་བཀོལ་སྤྱོད་ཀྱི་ཐད་ནས་ཁྱབ་རྒྱ་ཆེན་པོ་མ་བྱུང་བར་ཡུན་རིང་པོར་ལྷག བར་སྐབས་ཤིག་ཚན་རྩལ་རིག་གནས་དར་ཁྱབ་ཆེན་པོ་བྱུང་བ་དང་བསྟུན་བོད་ཡིག་གི་བསྟན་པའང་དེར་བསྟུན་གྱིས་དར་ཏེ། གློག་ཀླད་ནང་བཀོལ་སྤྱོད་ཀྱིས་དཔེ་དེབ་པར་སྐྲུན་སོགས་བོད་ཀྱི་རིག་གཞུང་ལ་གཞོགས་འདེགས་མི་དམན་པ་ཞིག་བསྐྲུན་ཐུབ་པ་བྱུང་། ཡིན་ནའང་བོད་ཡིག་འདི་དབྱིན་ཡིག་སོགས་ཡིག་རིགས་གཞན་དང་བསྡུར་ན་ཁྱབ་རྒྱ་ཆེན་པོ་མེད་པར་ཟུར་ཞིག་ན་ཁུ་སིམ་དུ་ལྷག་སྟེ། མང་པོ་ཞིག་གིས་བོད་ཡིག་གིས་ས་རྒྱ་མི་ཆོད་པ་དང་བོད་ཡིག་ནི་མི་རིགས་གཞན་པའི་ཡིག་རིགས་མང་པོ་ཞིག་གི་གྲལ་མཐའ་ཡིིན་པ་སོགས་ཕངས་སེམས་དང་བློ་ཕམ་གྱི་ངུ་སྨྲེ་ཡང་ཤོར་མྱོང་།
དེང་གི་ཆ་འཕྲིན་དུས་རབས་སུ་ཁད་ཀྱིས་སླེབས་ཏེ་དྲ་ཐོག་ནས་རིག་གནས་སྤེལ་བ་གཙོ་བོར་གྱུར་པའི་སྐབས་འདི་བསྟུན། བོད་ཡིག་གི་བསྟན་པ་སྔར་ལས་ཇེ་དར་གྱིས་གློག་ཀླད་ནང་བོད་ཡིག་ཡིག་གཟུགས་མང་པོ་ཞིག་བཀོལ་སྤྱོད་བྱེད་ཐུབ་བྱུང་བ་དང་། ལྷག་པར་ཡིག་གཟུགས་གཞན་ལས་ཁྱད་ཆོས་འབུར་ཐོན་གྱི་རྒྱལ་སྤྱིའི་ཨང་བསྒྲིགས་ཚད་ཅན་གྱི་ཧི་མ་ལ་ཡ་ཡིག་གཟུགས་དང་། སྨོན་ལམ་ཡིག་གཟུགས །ཇོ་མོ་གླང་མའི་ཡིག་གཟུགས་སོགས་ད་ལྟའི་གླེང་མོལ་མཉེན་ཆས་ yahoo དང་ QQ སོགས་དང་།གཞན་ད་རུང་ facebook དང་། twitter སོགས་དྲ་ངོས་ཟིན་བྲིས་མང་པོ་ཞིག་ཏུ་དབྱིན་ཡིག་སོགས་ཡིག་རིགས་གཞན་ནང་བཞིན་བཀོལ་སྤྱོད་བྱེད་ཐུབ་བྱུང་ཡོད་པ་ནི་དགའ་འོས་པ་ཞིག་རེད་དེ། ཡིན་ནའང་འུ་ཚོས་གང་ཡོད་པ་དེ་བེད་སྤྱོད་གཏོང་མ་ཤེས་པར་ད་དུང་ཡང་ཅི་མི་སྙམ་པར་མགོ་འཐོམ་ནས་བསྡད་འདུག ཁ་ཡར་གྲགས་ལ་བོད་ཀྱི་སྐད་ཡིག་སྲུང་སྐྱོབ་བྱེད་དགོས་ཚུལ་དང་། ཁ་མར་གྲགས་ལ་བོད་ཀྱི་སྐད་ཡིག་བཀོལ་སྤྱོད་བྱེད་དགོས་ཚུལ་གླེང་མཁན་མང་པོ་ཞིག་ཡོད་ནའང་འུ་ཚོས་བོད་ཀྱི་སྐད་ཡིག་བཀོལ་སྤྱོད་དང་དར་སྤེལ་གཏོང་མ་ཤེས་པར་སྔོན་དང་བསྡུར་ན་ཡང་འུ་ཚོས་འུ་ཚོའི་སྐད་ཡིག་ལ་དམའ་ཕབ་ནས་ཟུར་ཞིག་ལ་གཡུགས་འདུག
རྒྱུ་མཚན་ཆ་འཕྲིན་དུས་རབས་ཀྱི་སྐབས་འདིར་འུ་ཚོ་ཡང་དྲ་ངོས་སུ་འཛུལ་ཞུགས་ཀྱིས་དྲ་ཐོག་ནས་ཕན་ཚུན་བསམ་ཚུལ་བརྗེ་རེས་ཀྱི་གཏམ་གླེང་སྤེལ་བའི་དུས་ཚོད་མང་པོ་ཞིག་གཏོང་གིན་ཡོད་ནའང་། དུས་ཚོད་དེའི་རིང་དྲ་ཐོག་ནས་བཀོལ་སྤྱོད་བྱེད་པའི་ཡི་གེ་ནི་གཞན་གྱི་ཡི་གེ་སྟེ། རྒྱ་ཡིག་དང་དབྱིན་རྐྱང་ཡིན་པ་ཀུན་གྱིས་ཤེས་གསལ་རེད། ཁོ་བོར་མཚོན་ན་དུས་རྒྱུན་དྲ་ངོས་སུ་ཞུགས་ནས་གཞན་ག་ས་གང་གི་གྲོགས་པོ་དང་གྲོགས་མོ་ཚོར་གླེང་མོལ་མཉེན་ཆས་སོགས་བརྒྱུད་གཏམ་གླེང་གིས་ཕན་ཚུན་བསམ་ཚུལ་སྤེལ་རེས་བྱེད་རྒྱུར་ཧ་ཅང་དགའ།
ཡིན་ནའང་ཁོ་བོས་དུས་རྒྱུན་བོད་ཀྱི་སྐད་ཡིག་གཙོར་བཟུང་གིས་བོད་ཡིག་བཀོལ་སྤྱོད་ཀྱིས་གླེང་མོལ་མཉེན་ཆས་ཡཱ་ཧོ་དང་ཁེའུ་ཁེའུ་སོགས་སུ་བོད་པའི་གྲོགས་པོ་གང་མང་ཞིག་ལ་འབྲེལ་འདྲིས་བྱས་ཀྱང་། ཁོ་ཚོས་ནམ་རྒྱུན་དབྱིན་ཡིག་འཐར་འཐོར་ཞིག་དང་རྒྱ་ཡིག་འཁྱར་འཁྱོར་ཞིག་བྲིས་ནས་འདུག་པ་ལས་བོད་ཡིག་བཀོལ་སྤྱོད་བྱེད་མཁན་ནི་རེ་ཟུང་ལས་མི་འདུག་པས་བློ་ཕམ་དུ་བཅུག་སོང་ལ། ཡིད་ཆད་དུ་བཅུག་སོང་།
བསམ་བློ་ཞིག་བཏང་ན་ཁོ་ཚོའི་ཁྲོད་བོད་ཡིག་མི་ཤེས་པ་འགའ་རེ་ཡོད་སྲིད་མོད།འོན་ཀྱང་བརྒྱ་ལ་ནི་དེ་འདྲ་ག་ལ་ཡིན། དྲ་ངོས་ལ་འཛུལ་ཞུགས་བྱེད་པའི་བོད་པ་ཞིག་ཡིན་ཕྱིན་ཆུང་དུས་ནས་རྒྱ་སོགས་མི་རིགས་གཞན་གྱི་སློབ་གྲྭ་རྐྱང་འགྲིམ་མཁན་ཞིག་ཡིན་ན་མ་གཏོགས་བོད་ཡིག་འབྲི་ཀློག་མི་ཤེས་མཁན་ཞིག་མེད་པ་ནི་རིག་པས་དཔྱད་སྟོབས་ཀྱིས་ཤེས་ཐུབ།
དུས་རྒྱུན་དྲ་ངོས་སུ་འཛུལ་ཞུགས་ཀྱིས་གླེང་མོལ་བྱེད་མཁན་དག་གིས་གཞན་གྱི་ཡི་གེ་བཀོལ་ནས་གླེང་མོལ་བྱེད་རྒྱུ་གོམས་གཤིས་ལྟ་བུ་ཞིག་ཆགས་ཏེ་བོད་རང་གི་ཡི་གེ་བཀོལ་སྤྱོད་ལག་ལེན་དུ་བསྟར་གྱི་མེད་པ་མ་ཟད། དེ་ལ་དོ་སྣང་ཡང་སྤུ་ཙམ་བྱེད་ཀྱི་མེད་པ་དེ་ནི་ནོར་འཁྲུལ་ཞིག་རེད། སྣང་ཚུལ་དེར་བསམ་བློ་ཞིབ་ཏུ་བཏང་ན་རང་ཅག་ལ་ཡི་གེ་ཡོད་བཞིན་དུ་གཞན་གྱི་ཡི་གེ་བཀོལ་སྤྱོད་བྱེད་པ་ནི་ངོ་ཚ་དགོས་པ་ཞིག་དང་། རང་ཅག་གི་ཡི་གེ་བཀོལ་སྤྱོད་བྱེད་ཐུབ་བཞིན་དུ་གཞན་གྱི་ཡི་གེ་ལ་བརྟེན་ནས་འདུག་པ་ནི་གླེན་རྟགས་ཤིག་རེད་སེམས།
ད་དུང་བོད་མི་འགའ་རེ་ནས་སྐད་ཆ་འདི་འདྲ་ཞིག་བཤད་ཀྱིན་འདུགདྲ་ངོས་སུ་དུས་རྒྱུན་འཛུལ་ཞུགས་གླེང་མོལ་བྱེད་པ་ནི་དབྱིན་ཡིག་དང་རྒྱ་ཡིག་གི་ཤེས་ཚད་ཡར་རྒྱས་སུ་གཏོང་བའི་ཆེད་དུ་ཡིན་ཟེར། གཞན་གྱི་སྐད་ཡིག་སྦྱོང་རྒྱུ་ནི་རིག་གནས་སློབ་སྦྱོང་གི་རྣམ་པ་ཞིག་ཡིན་སྟབས་དེ་ནི་མི་འགྲིགས་པ་ཞིག་མ་རེད། འོན་ཏང་ཕ་མེས་ཡང་མེས་ནས་བརྒྱུད་རང་ཉིད་བོད་མིའི་རྒྱུད་གཤིས་ཅན་ཞིག་ཡིན་པའི་ངོས་ནས་བོད་སྐད་བཤད་རྒྱུ་དང་བོད་ཡིག་འབྲི་རྒྱུ་ནི་མི་རིགས་གཞན་ཀྱི་སྐད་ཡིག་ལས་རྩ་ཆེན་གལ་ཆེན་དུ་འཛིན་དགོས་པའི་གནས་ལུགས་འདི་ཤེས་སུ་ཆུག་ལ། རང་ཉིད་ནི་བོད་པ་ཞིག་ཡིན་སྟབས་རང་གི་བུ་རབས་ཚ་རྒྱུད་དང་བཅས་པ་བོད་མི་གཙང་མ་ཞིག་བྱེད་འཇུག་རྒྱུའི་འདུ་ཤེས་ཀུན་སློང་དེ་ནམ་ཡང་འདོར་མི་རུང་།
ད་རེས་ཁོ་བོས་དྲ་ངོས་ཟིན་བྲིས་ཁག་ཏུ་འཛུལ་ཞུགས་ཀྱིས་ཕན་ཚུན་གླེང་མོལ་བྱེད་མཁན་གྱི་བོད་རིགས་གྲོགས་པོ་དག་ལ་རེ་སྐུལ་ཞིག་ཞུ་རྒྱུ་ཡོད། འུ་ཚོས་ཉེ་ལམ་ཙམ་ཞིག་ནས་བོད་གཞིས་བྱེས་གཉིས་སུ་བོད་ཀྱི་སྐད་ཡིག་ལ་སྲུང་སྐྱོབ་རྒྱུན་འཛིན་བྱེད་རྒྱུར་དམིགས་ཏེ། མང་པོ་ཞིག་གིས་བོད་རང་སྐད་ནང་གཞན་སྐད་ཀྱི་སླད་སྐྱོན་མི་བསྲེས་ཆེད་བོད་སྐད་གཙང་མ་བཤད་རྒྱུར། རང་རང་གི་ས་ནས་ཆོད་སེམས་སྒྲིག་བཀོད་ཀྱིས་ལག་བསྟར་བྱེད་མཁན་མང་པོ་ཞིག་བྱུང་དང་འབྱུང་བཞིན་ཡོད་པ་ནི་རླབས་ཆེན་གྱི་དོན་བཟང་ཞིག་རེད། ཚུལ་དེ་བཞིན་དྲ་ངོས་སོགས་སུ་འཛུལ་ཞུགས་ཀྱིས་གླེང་མོལ་བྱེད་སྐབས་སུའང་ཕྱོགས་གཉིས་ཀ་བོད་མི་ཞིག་ཡིན་ཕྱིན། བོད་ཡིག་བཀོལ་སྤྱོད་ཀྱིས་གླེང་མོལ་བྱ་རྒྱུ་དེ་ཡང་བོད་ཀྱི་སྐད་ཡིག་ལ་མཐོང་ཆེན་དང་སྲུང་སྐྱོབ་རྒྱུན་འཛིན་བྱེད་ཐབས་ཤིག་ཡིན་པས་ངེས་པར་དུ་དེའི་ཕྱོགས་ལ་དོ་འཁུར་གྱིས་འབད་དགོས་ཀྱི་འདུག་ཟེར་བ་དེ་ཡིན།
དེ་ཡང་རང་རང་གིས་འགན་དང་འཁུར་དུ་བླངས་ཏེ་སོ་སོ་རང་ཉིད་ལ་ཡོད་པའི་གློག་ཀླད་རྩིས་འཁོར་ནང་གླེང་མོལ་མཉེན་ཆས་ཡཱ་ཧོ་དང་ཁེའུ་ཁེའུ་སོགས་ཀྱི་ནང་བཀོལ་སྤྱོད་ཆོག་པའི་རྒྱལ་སྤྱིའི་ཨང་བསྒྲིགས་ཚད་ཅན་གྱི་ཧི་མ་ལ་ཡ་ཡིག་གཟུགས་དང་། སྨོན་ལམ་ཡིག་གཟུགས། ཇོ་མོ་གླང་མའི་ཡིག་གཟུགས་སོགས་སྒྲིག་འཇུག་ངེས་པར་དུ་བྱེད་དགོས་པ་མ་ཟད། ཉེ་འཁོར་གྱི་རང་ཉིད་དུས་རྒྱུན་འགྲོ་སའི་དྲ་ཁང་དག་གི་གློག་ཀླད་དུའང་བོད་ཡིག་དེ་དག་ངེས་པར་སྒྲིག་འཇུག་བྱེད་བཅུག་སྟེ། བོད་ཡིག་གི་ལམ་ནས་གླེང་མོལ་བྱེད་རྒྱུའི་ཐབས་ལ་འབད་དགོས། བྱ་གཞག་འདི་གཙིགས་ཆེན་དུ་བཟུང་སྟེ་ཕན་ཚུན་གྲོགས་དང་གྲོགས་མོ་བཟང་ས་དང་རྒྱན་སའི་ངོས་ཙམ་མ་ཡིན་པར་ཚང་མས་ཕན་ཚུན་ལ་བོད་ཡིག་ཇི་ལྟར་སྒྲིག་འཇུག་བྱེད་སྟངས་དང། གང་འདྲ་བྱས་ནས་བཀོལ་སྤྱོད་བྱེད་སྟངས་སོགས་བརྒྱུད་སྤྲོད་རོགས་འདེགས་མི་དམན་པ་བྱ་རོགས།
དེ་ལྟར་བྱས་པ་ཡིན་ན་འུ་ཚོས་བོད་རང་གི་སྐད་ཡིག་ལ་མཐོང་ཆེན་བྱས་པ་མ་ཟད། བོད་ཡིག་སྤྱོད་ཁྱབ་ཀྱི་བསྟན་པ་སྔར་ལས་ཕུན་སུམ་ཚོགས་པོ་དང་དར་རྒྱས་ཆེན་པོ་བྱུང་སྟེ་བོད་ཡིག་གིས་ཀྱང་འཛམ་གླིང་གི་ཚད་མཐོའི་ཡིག་རིགས་གཞན་རྣམས་ཀྱི་གྲས་སུ་ས་རྒྱ་འཛིན་པའི་གོམ་པ་སྤོ་ཐུབ་ཀྱི་རེད་སེམས་སོ།།
རྩེ་སྐར་ལགས།
qqཞེས་པའི་དྲ་བའི་ངོས་ལ་བོད་ཡིག་འབྲི་ཐུབ་ཀྱང་ཕར་ཕྱོགས་ཀྱི་གཟིགས་ཐུབ་ཀིན་མི་འདུག་པས་དེ་ལ་ཐབས་ལམ་འདྲ་ཡོད་དམ།
གང་qqཞེས་པའི་ནང་བོད་ཡིག་བཏང་ན་འགྲོ་གིན་མི་འདུག
རྩེ་དཀར་ལགས། ཁྱེད་ཀྱི་དགོངས་ཚུལ་ལ་རྒྱབ་སྐྱོར་གཙང་མ་ཡོད། ཆ་འཕྲིན་ཀྱི་དུས་རབས་འདིར་ང་ཚོའི་རྒྱལ་སྤྱིའི་ཨང་རྟགས་ཅན་གྱི་ཡིག་གཟིགས་དར་ནས་ལོ་ཤས་རིང་གི་གྲུབ་འབྲས་ལ་གཞིགས་ཚེ་ཧ་ལས་པའི་བོད་ཡིག་གི་བཀོད་སྤྱོད་དྲྭ་ཐོག་ཏུ་དར་ཁྱབ་ཆེན་པོ་བྱུང་འདུག ཡིན་ཡང། ད་དུང་ཡར་རྒྱས་གཏོང་དགོས་པ། བོད་ཀྱི་སྤྱི་ཚོགས་སྤྱི་ཡོངས་ལ་ཁྱབ་རྒྱུར་ལྷག་འདུག་ལ། ང་ཚོའི་མི་རབས་འདིས་བོད་སྐད་ཀྱི་་ཁ་ཕྱོགས་གང་ལ་བསྒྱུར་རྒྱུའི་འགན་དབང་ཆ་ཚང་ཡོད་པ་བརྗོད་དགོས་པ་མེད་ཀྱང། རང་ཡུལ་བཙན་འོག་ཏུ་ཡོད་པ་དང་ཕྱི་རུ་བོད་ཡིག་བཀོད་སྤྱོད་བྱེད་སའི་ཁོར་ཡུག་མེད་པས་དབང་གིས་ལྷོད་ཡང་དུ་ཕྱིན་པར་འདོད། གང་ལྟར་ང་ཚོས་ལེ་འདེད་དང་སྡུག་སྐད་ཤོར་མི་ཆོག་པར་བོད་མི་རིགས་འདི་གནས་དགོས་ན། སྐད་ཡིག་ལ་བདག་པོ་རྒྱག་རྒྱུར་ཁ་ཚ་དགོས་གཏུགས་ཀྱིས་ལས་བྱ་དང་པོར་ཆགས་འདུག་པས་རང་ཉིད་ཀྱིས་བོད་སྐད་གཙང་མ་ཞིག་བཤད་རྒྱུ་དང་དྲྭ་ཐོག་ཏུ་བོད་པ་ག་གེ་མོ་ཞིག་ལ་ཕྲད་སྐབས་བོད་ཡིག་བེད་སྤྱོད་གཏོང་རྒྱུ་དེ་རང་ཉིད་ཀྱིས་འགོ་འཛུགས་དང་རང་ཉིད་ལ་བསྒྱུར་བཅོས་བྱེད་རྒྱུ་ཡིན་པའི་ཁས་ལེན་དང་དམ་བཅའ་བཞག་ཡོད། དེ་ནི་ངའི་དྲིན་ཆེན་གྱི་ཕ་མ་གཉིས་ལ་འཇལ་འདོད་པའི་བཀའ་དྲིན་ཡང་ཡིན། སྤྱིར་ང་ནི་ཤེས་འཇོན་གྱི་དབེན་པའི་འཁྱམས་པོ་བ་ཞིག་ཡིན།
དྲ་སྟེང་དུ་ཉོག་གཏམ་ལབ་ནས་བསྡད་ན་བོད་ཡིག་འཕེལ་རྒྱས་སུ་གཏོང་ག་ལ་ཐུབ། ད་ལྟའི་གནས་སྟངས་འདི་འདྲ་ཡིན་ན་རྒྱུ་ཆ་གུ་དོག་པའི་བོད་ཡིག་གི་དྲ་རྒྱ་ལ་ཤི་འཐམས་རོ་འཐམས་བྱས་ནས་བསྡད་ན་ཁྱེད་ཉིད་མགོ་རྨོངས་པ་ཞིག་ཏུ་གྱུར་ངེས།
རྩེ་སྐར་ལགས་ཀྱིས་དགོངས་ཚུལ་ཡག་པོ་གསུངས་འདུག ང་ཚོ་བོད་ཡིག་ཕྲན་བུ་ཤེས་མཁན་ཚོས་བོད་ཡིག་འཛིན་སྐྱོང་སྤེལ་གསུམ་བྱེད་ཐུབ་ན་དོན་གྱིས་སོ་སོའི་མི་རིགས་དང་། རིག་གཞུང་ལ་སྲུང་སྐྱོབས་བྱས་པ་རེད་སྙམ།
ད་ལྟའི་གནས་སྟངས་འདིར་ང་ཚོ་ཚང་མས་རང་ནུས་གང་ཡོད་ཀྱིས་མི་རིགས་ལ་ཞབས་འདེགས་ཞུ་རྒྱུ་ཤིན་ཏུ་གལ་ཆེ།
ང་ཚོར་ཡིག་གཟུགས་མི་འདྲ་བ་མང་པོ་ཞིག་འདུག་པ་དེ་ལེགས་པོ་ཞིག་རེད།ཡིན་ནའང་ཁ་ཤས་ཀྱིས་ཧི་མ་ལ་ཡའི་ཡིག་གཟུགས་བེད་སྦྱོད་གཏོང་གིན་འདུག།ཁ་ཤས་ཀྱིས་སྨོན་ལམ་ཡིག་གཟུགས་བེད་སྤྲོད་གཏོང་གིན་འདུག།ཡང་ཁ་ཤས་ཀྱིས་ཇོ་མོ་གླང་མའི་ཡིག་གཟུགས་བེད་སྤྱོད་གཏོང་གིན་འདུག་ཁ་ཤས་པཎྡིཏ་བེད་སྦྱོད་གཏོང་གིན་འདུག།
དེ་དག་ཚང་མའི་ནང་དུ་ཆེས་ཡི་གེ་གཏག་བདེ་བ་དང་ཡི་གེ་འཇུག་སླ་བ་ནི་པཎྡི་ཏ་ཡིན་པ་མ་ཟད་ད་དུང་ཁེ་ཁེ་སོགས་ནས་ཡང་བེད་སྤྱོད་གཏོང་ཐུབ་ཀྱི་འདུག།པཎྔི་ཏ་ཡིག་གཟུགས་འདི་བོད་ཕྱི་ནང་གཉིས་ཀས་བེད་སྤྱོད་གཏོང་གིན་ཡོད་ཙང་ང་ཚོ་ཚང་མས་ཐུན་མོང་གི་ཡིག་གཟུགས་གཅིག་བེད་སྤྱོད་གཏོང་བ་ཡིན་ན་དཀའ་ངལ་མང་པོ་ཞིག་སེལ་འགྲོ་ཡི་འདུག་ལ་ད་དུང་པཎྡི་ཏའི་ཡིག་གཟུགས་གཏག་ཤིན་ཏུ་སླ་བ་མ་ཟད་ཚིག་མཛོད་དང་བཅས་བ་འཆར་ཡོང་གི་འདུག།དེ་མིན་ཡིག་གཟུགས་མང་པོ་ཞིག་བེད་སྤྱོད་གཏོང་བསྡད་ན་ཡིག་གཟུགས་མ་མཐུན་པའི་དཀའ་ངལ་མང་པོ་ཞིག་འཕྲད་ཀྱི་འདུག་པས་ཚང་མས་འདི་སྐོར་ལ་བསམ་བློ་ཡག་པོ་ཞིག་ཐོངས་རོགས་ཞུ།
twitter སོགས་ནང་ལ་བོད་ཡིག་བྲིས་ཚེ་བོད་ཡིག་འཐོར་འགྲོ་བགྱིད་འདུག ཡིག་གཟུགས་འཐོར་མི་འགྲོ་བའི་ཐབས་ཤེས་སྟོན་དགོས་འདུག ངས་ཁ་བརྡའི་ནང་ལ་བྲིས་ནས་ཕར་དཔར་བཤུ་བྱས་ན་ཡག་པོ་ཡོང་བགྱིད་འདུག་ཀྱང་། ཚང་མ་ལ་དེལྟར་ཡོང་བགྱིད་མི་འདུག
ང་སྡུག་སྨེ་འདོན་པར་དགའ་བ་མིན་ཏེ། བོད་མི་ནི་བོད་མི་རང་ཡིན་སྟབས་དེ་ལ་འདི་འདྲའི་གྲོས་འདེབས་ཡག་པོ་བྱས་པ་ལ་དགོས་པ་མེད། དེ་ལས་ང་ཚོས་ཚོགས་བསག་སྒྲུབ་སྦྱོང་མ་བྱས་ན་བསོད་ནམས་རྫོགས་གྲབ་འདུག དེ་ཕྱིར་བསོད་ནམས་བསག་དགོས། བསོད་ནམས་ཀྱིས་ཁྱོག་ན་རིག་གཞུང་རྒྱུན་འཛིན་ཙམ་མ་ཟད་བོད་ཀྱི་བདེ་མཐའ་གསལ་ངེས་རེད་གླེང་ན། དེ་ལ་ཆ་འཇོག་དང་། བརྩི་བཀུར། དང་ལེན་བཅས་བྱེད་ངེས་ཡིན། དེ་མིན་ང་ཚོ་ནི་༸་གོང་ས་མཆོག་གི་མི་རིགས་རིག་གཞུང་དང་བཅས་པའི་བཀའ་སློབ་ལམ་སྟོན་འཕོངས་ཕྱིས་ཀྱི་རྡོ་བཞིན་དོར་རིགས་མཁན་གྱི་མི་རིགས་གླེན་ནག་དེ་མ་ཡིན་ནམ།
ང་ཚོར་ཡིག་གཟུགས་མི་འདྲ་བ་མང་པོ་ཞིག་འདུག་པ་དེ་ལེགས་པོ་ཞིག་རེད།ཡིན་ནའང་ཁ་ཤས་ཀྱིས་ཧི་མ་ལ་ཡའི་ཡིག་གཟུགས་བེད་སྦྱོད་གཏོང་གིན་འདུག།ཁ་ཤས་ཀྱིས་སྨོན་ལམ་ཡིག་གཟུགས་བེད་སྤྲོད་གཏོང་གིན་འདུག།ཡང་ཁ་ཤས་ཀྱིས་ཇོ་མོ་གླང་མའི་ཡིག་གཟུགས་བེད་སྤྱོད་གཏོང་གིན་འདུག་ཁ་ཤས་པཎྡིཏ་བེད་སྦྱོད་གཏོང་གིན་འདུག།
དེ་དག་ཚང་མའི་ནང་དུ་ཆེས་ཡི་གེ་གཏག་བདེ་བ་དང་ཡི་གེ་འཇུག་སླ་བ་ནི་པཎྡི་ཏ་ཡིན་པ་མ་ཟད་ད་དུང་ཁེ་ཁེ་སོགས་ནས་ཡང་བེད་སྤྱོད་གཏོང་ཐུབ་ཀྱི་འདུག།པཎྔི་ཏ་ཡིག་གཟུགས་འདི་བོད་ཕྱི་ནང་གཉིས་ཀས་བེད་སྤྱོད་གཏོང་གིན་ཡོད་ཙང་ང་ཚོ་ཚང་མས་ཐུན་མོང་གི་ཡིག་གཟུགས་གཅིག་བེད་སྤྱོད་གཏོང་བ་ཡིན་ན་དཀའ་ངལ་མང་པོ་ཞིག་སེལ་འགྲོ་ཡི་འདུག་ལ་ད་དུང་པཎྡི་ཏའི་ཡིག་གཟུགས་གཏག་ཤིན་ཏུ་སླ་བ་མ་ཟད་ཚིག་མཛོད་དང་བཅས་བ་འཆར་ཡོང་གི་འདུག།དེ་མིན་ཡིག་གཟུགས་མང་པོ་ཞིག་བེད་སྤྱོད་གཏོང་བསྡད་ན་ཡིག་གཟུགས་མ་མཐུན་པའི་དཀའ་ངལ་མང་པོ་ཞིག་འཕྲད་ཀྱི་འདུག་པས་ཚང་མས་འདི་སྐོར་ལ་བསམ་བློ་ཡག་པོ་ཞིག་ཐོངས་རོགས་ཞུ།
རྩེ་སྐར་ལགས་།་qqཞེས་པའི་ནང་བོད་ཡིག་ཡིག་གཟུགས་གང་སྤྱོན་ན་ཐད་ཀ་འབྲི་ཐུབ་གྱིན་འདུག་ བར་སྟོང་རེ་ཡོད་ན་ལམ་སྟོན་རེ་བྱེད་རོགས་ཞུ་རྒྱུ་ཡིན