རྐྱེན་ངན་བྱུང་ཚར་ཡོད་སྟབས་ཁྱེད་རང་ཚོས་སེམས་ཤུགས་མི་ཆག་པར་མི་ཚེ་གསར་པ་ཞིག་འགོ་འཛུགས་བྱ་རྒྱུའི་བློ་སྤོབས་བསྐྱེད་པ་དང་ཆབས་ཅིག་སྨོན་ལམ་རྒྱག་དགོས་ལ། ངས་ཀྱང་སྨོན་ལམ་བརྒྱབ་ཆོག
ཟླ་འདིའི་ཕྱི་ཚེས་ ༡༣ ཉིན་༸གོང་ས་མཆོག་ཇམ་མུ་ཀཱ་ཤི་མིར་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་ངག་དབང་རིག་འཛིན་ཇོ་རཱ་ལགས་གཙོས་པའི་ས་གནས་འབྲེལ་ཡོད་མི་སྣ་དང་དད་ལྡན་མང་ཚོགས་ཀྱིས་ཕེབས་བསུའི་ཁྲོད་ལ་དྭགས་ཀྱི་རྒྱལ་ས་སླེ་རུ་ཞབས་སོར་བཀོད་ཅིང་། ལྕོག་ལམ་གསར་གྱི་སོ་ལར་ཀོ་ལོ་ནེ་ Solar Colony ཞེས་པའི་གྲོང་ཚོའི་ནང་ཆིབས་སྒྱུར་བསྐྱངས་ཏེ་ཆུ་ལོག་གི་གོད་ཆག་ཕོག་པའི་རྗེས་ཤུལ་ནང་མི་སྤུན་མཆེད་རྣམ་ལ་ཐུགས་གསོ་གནང་ཡོད་ལ། རྒྱལ་ས་སླེ་རུ་ཡོད་པའི་ཇོ་ཁང་དུ་ཆུ་ལོག་གི་གནོད་སྐྱོན་ཁྲོད་འདས་གྲོངས་སུ་སུ་གྱུར་བ་རྣམས་ཀྱི་ཆེད་དུ་ཐུགས་སྨོན་གསོལ་འདེབས་གནང་ཡོད།
ལམ་སྒྲོན་སློབ་གྲྭའི་རྩེད་ཐང་དུ་མང་ཚོགས་ ༢༥༠༠༠ ལྷག་ལ་བཀའ་སློབ་གནང་དོན། ཐེངས་འདིར་རྐྱེན་ངན་བྱུང་ཚར་བ་རེད། དེ་ལྟར་ཡང་ཁྱེད་རང་ཚོ་རྗེས་ཤུལ་ནང་མི་སྤུན་མཆེད་ཚོས་ངའི་ནང་མི་ཚང་མ་འདས་གྲོང་ཕྱིན་སོང་། ང་ལ་གང་ཡང་ལྷག་མ་སོང་བསམ་སྟེ་སེམས་ཤུགས་མི་ཆག་པར་མི་ཚེ་གསར་པ་ཞིག་མགོ་འཛུགས་བྱ་རྒྱུའི་བློ་སྤོབས་བསྐྱེད་དགོས་བ་རེད་ལ། དེ་དང་ཆབས་ཅིག་སྨོན་ལམ་གང་ཐུབ་རྒྱག་དགོས་པ་རེད། ངས་ཀྱང་སྨོན་ལམ་རྒྱག་དགོས། སྔོན་མ་ང་རང་ལ་མཚོན་ནའང་རྒྱལ་ཡུམ་ཆེན་མོ་མཆོག་དགོངས་པ་རྫོགས་སྐབས་མ་ཎི་འབུམ་དྲུག་ཙམ་བསགས་བསྒྲུབ་གནང་ཡོད། ཁྱེད་རང་ཚོས་ཀྱང་རབ་བྱུང་ན་མ་ཎི་འབུམ་དྲུག་ཙམ་གསོག་སྒྲུབ་གནང་དགོས་པ་རེད། དེ་ལྟར་མ་བྱུང་ཡང་ཉུང་མཐར་མ་ཎི་འབུམ་རེ་གསོག་སྒྲུབ་གནང་དགོས་པ་རེད་ཅེས་ཐུགས་གསོ་དང་ལམ་སྟོན་གནང་ཡོད། ༸གོང་ས་མཆོག་གིས་ཐེངས་འདིའི་གོད་ཆག་ཁྲོད་རྩ་སྟོང་དུ་ཕྱིན་པའི་སྡོད་ཁང་སླར་གསོ་ཆེད་ཧིན་སྒོར་འབུམ་ཉེར་ལྔའི་ཞལ་འདེབས་གནང་ཡོད་ལ། དེར་ཡོད་མི་མང་དང་ལྷན་དུ་སྨན་བླ་དང་སྒྲོལ་མ། མ་ཎི། བཛཱ་གུ་རུ། མི་འཁྲུག་པ་བཅས་ཀྱི་ཟུངས་སྔགས་གསོག་སྒྲུབ་མཛད་པ་དང་། བཟང་སྤྱོད་སྨོན་ལམ་སོགས་གསུངས་ཡོད།།
གསར་འགོད་པ། དོན་གོ།
