ཉིན་འདི་འགར་བྷེ་བྷེ་སི་གཙོས་པའི་རྒྱལ་སྤྱིའི་གསར་ལམ་ཁག་ཅིག་ཏུ་གནས་ཚུལ་ཐོན་པ་ལྟར་ན། རྒྱ་ནག་ནང་གི་ཨ་རིའི་གཞུང་ཚབ་པ་སྐུ་ཞབས་ཇོན་ཧང་ཙི་མཱན་ Jon Huntsman ལགས་དང་། ཁོང་གི་སྐུ་ཟླ་ལྕམ་ཧང་ཙི་མཱན་རྣམ་གཉིས་ཟླ་འདིའི་ཚེས་ ༡༠ ནས་བོད་ཀྱི་རྒྱལ་ས་ལྷ་སར་གཟིགས་སྐོར་དུ་ཕེབས་བཞིན་ཡོད་འདུག་ལ། ཁོང་ནི་ཉིས་སྟོང་གཉིས་ནས་ད་ལྟའི་བར་གྱི་ཨ་རིའི་གཞུང་ཚབ་ལྷ་སར་ཕེབས་མཁན་ཐོག་མ་དེ་ཆགས་ཡོད་འདུག ལྷ་ས་ནི་དེ་སྔོན་ཨ་རིའི་གཞུང་གིས་རྒྱ་ནག་ནང་ཨ་རིའི་གཞུང་གི་སྐུ་ཚབ་དོན་གཅོད་གསར་པ་ཞིག་འཛུགས་འདུན་ཡོད་པའི་ས་གནས་གཉིས་གདམ་ག་བྱས་ཡོད་པའི་ནང་གི་གཅིག་ཡིན་ཡང་། སྐབས་དེར་རྒྱ་གཞུང་གིས་ངོས་ལེན་བྱས་མེད་སྟབས། ད་ལྟའི་ཆར་ཨ་རིའི་ཕྱི་འབྲེལ་དོན་གཅོད་ཡན་ལག་ཅིག་རྒྱ་ནག་གི་གྲོང་ཁྱེར་ཁྲིན་ཏུའུ་རུ་བཙུགས་ཡོད།
ཨ་རིའི་སྐུ་ཚབ་ཧང་ཙི་མཱན་ནི། བོད་རྒྱའི་གནད་དོན་གྱིས་མཚོན་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་ལ་དོ་ཁུར་ཆེན་པོ་བྱེད་མཁན་ཞིག་ཡིན་ཞིང་། ཁོང་གིས་ཨ་རིའི་གྲོས་ཚོགས་ལ་ཕུལ་བའི་སྙན་ཐོའི་ནང་། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། ཡ་རབས་གོམས་གཤིས་སོགས་བོད་མིའི་ངོ་བོ་སྲུང་སྐྱོང་ཡོང་རྒྱུར། ངའི་ངོས་ནས་རྒྱ་ནག་གཞུང་དང་ཏཱ་ལའི་བླ་མའི་སྐུ་ཚབ་བར་འབྲེལ་མོལ་བརྒྱུད་བོད་ཀྱི་ས་ཁུལ་ཁག་ཅིག་ནང་དུས་ཡུན་རིང་པོར་གནས་ཡོད་པའི་བློ་ཚབ་རང་བཞིན་གྱི་གནད་དོན་ཁག་སེལ་ཐབས་བྱ་རྒྱུ་དེ་གལ་གནད་ཆེན་པོར་མཐོང་གི་ཡོད། ཅེས་དང་། ང་ཚོའི་ཨ་རིའི་གཞུང་གིས་རྒྱ་ནག་གི་མགོ་ཁྲིད་ཚོར། རྒྱ་ནག་འོག་བོད་རིགས་ས་ཁུལ་བརྟན་ལྷིང་ཡོང་ཆེད་བོད་མིའི་ཆོས་དང་ཆབ་སྲིད། དཔལ་འབྱོར་དང་རིག་གཞུང་སོགས་ལ་དོ་ཁུར་གྱིས་གུ་ཡངས་ཀྱི་མདུན་ལམ་ཞིག་བསྐྲུན་རྒྱུར་རྒྱབ་རོགས་དང་སྐུལ་མ་བྱ་དགོས་ཀྱི་འདུག ཅེས་བཀོད་ཡོད་པ་རེད།
སྔར་ ༢༠༠༢ ལོར་སྐབས་དེའི་ཨ་རིའི་གཞུང་ཚབ་པ་སྐུ་ཞབས་ཁུ་ལར་ཀཱི་ Clark Randt བོད་ནང་དུ་བསྐྱོད་དེ། རྒྱ་ནག་གཞུང་དང་ཏཱ་ལེ་བླ་མའི་སྐུ་ཚབ་བར་བོད་རྒྱ་འབྲེལ་མོལ་ཐོག་ཤུགས་སྣོན་རྒྱག་དགོས་ཚུལ་དང་། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། བོད་པའི་སྐད་ཡིག་བཅས་ཀྱི་འཇིག་ཉེན་ལ་འཕྲལ་དུ་སྲུང་སྐྱོབ་དགོས་བའི་འབོད་སྐུལ་ཡང་ཞུས་ཡོད།
གསར་འགོད་པ། བནྟེ་སྐྱབས།
རེད་ཡཱ། ཕན་རེ་ཐོགས་ན་ཡག་པོ་རེད། དེ་མིན་ན་་་་་་་་་་་་་་་་་་་་་་་
་