ཞག་པོ་ཞེ་དགུ་འཁོར།

དེ་རིང་ཕྱི་ཚེས་ ༢༥ ཞོགས་པར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། མདོ་སྨད་དབུས་རྒྱུན་ལས་དང་ས་གནས་རྒྱུན་ལས་གཉིས་ཀྱི་གོ་སྒྲིག་འོག འབྲུག་ཆུ་ས་ཁུལ་ལ་རང་བྱུང་གི་གནོད་སྐྱོན་བྱུང་སྟེ་ཞག་ ༤༩ འཁོར་བའི་བསྔོ་སྨོན་མཆོད་འབུལ་ཞུས་ཡོད། བསྔོ་སྨོན་མཆོད་འབུལ་འདིའི་སྟེང་། རྒྱུད་སྟོད་གྲྭ་ཚང་གི་མཁན་རིན་པོ་ཆེ་ཚོགས་དབུར་ཕེབས་ཏེ། ངྷ་རམ་ས་ལ་ཁུལ་གྱི་གྲྭ་བཙུན་དང་མང་ཚོགས་བཅས་ནས་རང་བྱུང་གནོད་འཚེའི་འོག་རྐྱེན་འདས་སུ་ཕྱིན་པ་རྣམས་དང་། ཉེ་ཆར་རེབ་གོང་ལ་ཆུ་ལོག་གིས་གནོད་འཚེ་ཐེབས་པ་རྣམས་ཐར་བ་དང་ཐམས་ཅད་མཁྱེན་པའི་གནས་སུ་འགོད་ཐུབ་པ་དང་། ཤུལ་དུ་དཀའ་སྡུག་མྱོང་བཞིན་པ་དག་གང་མགྱོགས་ཁྱིམ་གཞི་བསྐྱར་འཛུགས་དང་འཚོ་བ་རྒྱུན་ལྡན་ཡོང་བའི་ཕྱིར་དུ་བསྔོ་སྨོན་མཆོད་འབུལ་ཞུས་སོང་།

སྐབས་དེར་མདོ་སྨད་རྒྱུན་ལས་ཀྱི་ངོས་ནས་བརྗོད་པ་ལྟར་ན། དང་པོ་འབྲུག་ཆུ་ས་ཁུལ་ལ་ཆུ་ལོག་གིས་གོད་ཆག་བྱུང་མཚམས་སུ་མདོ་སྨད་དབུས་རྒྱུན་དང་མདོ་སྨད་ཆོལ་ཁའི་མང་ཚོགས་ཀྱི་འགན་ཁུར་འོག ཛ་དྲག་གི་མཆོད་འབུལ་སྨོན་ལམ་ཚོགས་ཡོད་ལ། དེ་ནས་བདུན་ཚིགས་དང་པོར་༧གོང་ས་མཆོག་ཚོགས་མགོན་དུ་གདན་ཞུས་ཐོག སྨོན་ལམ་གསུངས་ཐུབ་པ་བྱུང་ཡོད། བདུན་ཚིགས་གཉིས་བ་དེ་འདི་ཕྱོགས་སུ་ཡོད་པའི་འབྲུག་ཆུ་དང་ཐེ་བོ་མི་མང་གིས་འགན་ཁུར་ཏེ། སྨོན་ལམ་མཆོད་འབུལ་ཞུས་ཡོད། བདུན་ཚིགས་གསུམ་པ་དང་བཞི་བར་མདོ་སྨད་ཀྱི་ངོས་ནས་མར་མེ་མཆོད་འབུལ་གང་ཐུབ་ཞུས་ཡོད། ཅེས་བརྗོད་བྱུང་།

གསར་འགོད་པ། བནྡེ་སྐྱབས།