གཞན་དཔེ་རྗེས་འགེབས་ཀྱི་སྲིད་ཇུས། – རྡོ་རྗེ་རིན་ཆེན།

ཉེ་ལམ་དམངས་གཙོ་དུས་དྲན་ཐེངས་ལྔ་བཅུའི་སྐབས་བཀའ་ཁྲིས “དེ་རིང་གི་འདུན་ས་འདིར་བཀའ་ཤག་གིས་ད་ལྟའི་གནས་སྐབས་སུ་བཙན་བྱོལ་བོད་མིའི་ཆབ་སྲིད་ཀྱི་རང་བཞིན་དང༌། སྒྲོམ་གཞི་ཡང་དག་པའི་མང་གཙོའི་ལམ་སྲོལ་མཚན་ཉིད་དང་ཆ་ལག་ཚང་བ་ཞིག་གི་ནང་དུ་སླེབས་ཟིན་ཅིང༌། མང་གཙོའི་ན་ཚོད་ཡོངས་སུ་སྨིན་པ་ལ་མངོན་དུ་ཕྱོགས་པ་ཡིན། ཞེས་ཚིག་ཐག་ཆོད་པོ་དང༌། སྐད་གསང་མཐོན་པོས་འགན་ཁུར་ཡོད་པའི་ཐོག་ནས་བརྗོད་རྒྱུ་ལ་ཐེ་ཚོམ་གང་ཡང་མེད་ཅེས་ཞུ་རྒྱུ་ཡིན། འོན་ཀྱང་ད་དུང་ལེགས་བཅོས་དང་ཡར་རྒྱས་མུ་མཐུད་དགོས་པ་དང༌ཡོང་རྒྱུའང་ཡིན་པ་སྨོས་མ་དགོས།” ཞེས་པ་ལྟར༌། ང་ཚོ་གོམ་གང་མདུན་སྤོས་ཀྱིས་ན་ཚོད་མ་སྨིན་པའི་དམངས་གཙོ་དེ་ན་ཚོད་སྨིན་ཐབས་དང༌། ཇི་ལྟར་ལེགས་བཅོས་དང་ཡར་རྒྱས་འབྱུང་ཐབས་ལ་བསམ་གཞིགས་བྱ་དགོས་སམ།

མིག་སྔར་ང་ཚོའི་མདུན་དུ་ལྷག་པའི་གནད་དོན་གཙོ་བོ་ཞིག་ནི། ཡོང་ལ་ཉེ་བའི་བཀའ་སྤྱི་གཉིས་ཀྱི་འོས་བསྡུ་ཆེན་མོ་དེ་ཡིན་པ་དང༌། ང་ཚོས་སྐད་ཤོར་ས་དང་དམངས་གཙོའི་ཆ་ལག་ཡོངས་སུ་ཚང་གི་མེད་པའི་གནད་དོན་ལྷག་ས་གཞན་ཞིག་ཀྱང༌། ང་ཚོ་བོད་མི་ཚང་མས་འོས་བསྡུའི་ལས་རིམ་ནང་ཆ་ཤས་ལེན་གྱིན་མེད་པ་དེ་རེད། འོ་ན་ང་ཚོས་ཇི་ལྟར་ཞན་ཆ་འདི་ཡོ་བསྲང་ལེགས་བཅོས་དང་ཡར་རྒྱས་འབྱུང་ཐབས་ལ་བརྩོན་རྒྱུ་ཡིན་ནམ།

ངས་བལྟས་ན་འོས་བསྡུ་ལས་ཁུངས་ཀྱིས་འོས་བསྡུའི་ལས་རིམ་ཐད་དམིགས་བསལ་ཁྲིམས་དང་སྒྲིག་གཞི་ཞིག་བསྐྱར་གནོན་བྱ་དགོས་པར་མཐོང༌། འོས་བསྡུའི་ལས་རིམ་འདི་དམིགས་བསལ་ཁྲིམས་དང་སྒྲིག་གཞི་འཕར་མ་ཞིག་གི་འོག་རྐང་ཚུགས་ཐུབ་པ་ཡིན་ན། ད་ལྟ་ང་ཚོར་འཕྲད་བཞིན་པ་སྟེ་བཙན་བྱོལ་བོད་མིའི་སྤྱི་འབོར་མང་ཤོས་ཀྱིས་འོས་བསྡུའི་ལས་རིམ་ནང་ཆ་ཤས་མི་ལེན་པའི་དཀའ་ངལ་འདི་ཡོང་མི་སྲིད་པ་ཞིག་རེད་འདོད།

དེ་ཡང་བཙན་བྱོལ་བོད་མིའི་བཅའ་ཁྲིམས་དོན་ཚན་བཅུ་གསུམ་པ་ནི་ཡུལ་མིའི་ལས་འགན་ཞེས་པ་དེ་ཡིན་པ་དང༌། དེའི་ནང་གསེས་གསུམ་པ་བོད་དོན་བདེན་མཐའ་གསལ་ཐབས་ལ་འབད་བརྩོན་བྱ་རྒྱུ་ཞེས་པ་དེ་བོད་ཀྱི་མི་སེར་ཡོད་དོ་ཅོག་ལ་ཐུན་མོང་དུ་ཁྱབ་ཡོད་པ་ཞིག་རེད། དེས་ན་ད་ལྟ་ང་ཚོའི་སྲིད་གཞུང་དམངས་གཙོའི་ལམ་དུ་སྐྱོད་ཀྱིན་པ་དང་ང་ཚོ་བོད་རིགས་མི་རེ་ངོ་རེས་དམངས་གཙོའི་ཁེ་དབང་སྲུང་སྐྱོབ་བྱ་རྒྱུ་ནི་བོད་དོན་བདེན་མཐའ་སེལ་ཐབས་ཀྱི་སྔོན་འགྲོའི་འབེབས་སྟེགས་ཤིག་དང་བོད་མི་རང་ཉིད་ཀྱི་ལས་འགན་དེ་ཅི་ལ་མིན་ནམ།

ཡིན་ནའང་རང་རིགས་མི་ཉུང་བ་ཞིག་གིས་འོས་བསྡུའི་ལས་རིམ་ནང་ཆ་ཤས་ལེན་ཀྱིན་མེད་པ་དེ། ཁ་ཁོག་པས་མ་གསང་ཞིང་བློ་རྒྱུ་མ་མ་བསྐུམས་པར་ཞུས་ན། ལ་ལ་ཞིག་གནད་དོན་གཞན་གྱིས་ཡིན་སྲིད་མོད་འདི་ཙམ་གྱི་ལས་འགན་འཁུར་བར་ཡང་སྒྱིད་ལུག་པའམ་ངལ་བ་བྱེད་འདོད་མེད་པའི་རིགས་ཀྱང་གང་མང་ཞིག་ཡོད་པ་རེད།

དེར་བརྟེན་ང་ཚོས་ཀྱང་གཞན་དཔེ་རྗེས་འགེབས་ཀྱི་སྲིད་ཇུས་ཤིག་ལག་བསྟར་བྱ་དགོས་པར་འདོད། དེ་ཡང་གཞན་དཔེ་རྗེས་འགེབས་ཀྱི་སྲིད་ཇུས་དེ་གང་འདྲ་ཞིག་ཡིན་ནམ་ཞེ་ན། ཕྱི་ལོ་ ༢༠༠༤ ལོར་རྒྱ་གར་གཞུང་འཛིན་BJPཚོགས་པ་ཕམ་ཉེས་བྱུང་རྗེས། གཞུང་འཛིན་ Congress ཚོགས་པ་ཆགས་པ་རེད། སྐབས་དེ་ཙམ་ཞིག་ནས་རྒྱ་གར་གྱི་མངའ་སྡེ་ West Bengal   ཁོངས་ཀྱི་ཀ་རྡོར་ཁུལ་དུ་ Grokha National Liberation Front (GNLF) ཞེས་པའི་ཚོགས་པ་རྙིང་བ་དེ།  གསར་དུ་ཚུགས་མ་ཐག་པའི་GorkhaJanamuktiMorcha(GJM) ཞེས་པའི་ཆབ་སྲིད་ཚོགས་པ་གསར་བ་ཞིག་གིས་ཕམ་ཉེས་བཏང་བ་རེད།

ཚོགས་པ་གསར་བ་དེས་མི་དམངས་སྐུལ་སློང་བྱས་ཏེ་ཀ་རྡོར་ཁུལ་དུ་གོར་ཥ་རང་སྐྱོང་རྩོད་ལེན་བྱས་པ་དང༌། ཁོང་ཚོས་རང་གི་མངོན་འདོད་དེར་དབུས་གཞུང་གི་གྲོས་ཚོགས་ནང་རྒྱབ་སྐྱོར་རག་པར་ཐབས་ཇུས་འདི་འདྲ་ཞིག་ལག་བསྟར་བྱས་ཡོད། དེ་སྔ་གཞུང་འཛིན་ BJP སྐབས་བློན་ཆེན་རིམ་པ་སྣང་མྱོང་མཁན་གྱིས་JaswantSingh མཆོག་དབུས་གཞུང་གི་གྲོས་ཚོགས་འོག་མའི་ཁོངས་འཐུས་མི་ཟླ་བ་ཤར་པའི་ཚབ་ཏུ་འདེམས་པ་རེད། ཁོང་ཚོས་ JaswantSingh མཆོག་ལ་འོས་ཤོག་འཐོབ་ཐབས་སུ་ས་གནས་སྲིད་གཞུང་དང་ཆབ་སྲིད་ཚོགས་པ་ཟུང་འབྲེལ་ཐོག ཀ་རྡོར་ཁུལ་གྱི་མི་དམངས་ཚང་མས་ངེས་པར་འོས་ལྡུག་དགོས་པ་དང༌། གལ་སྲིད་ཀ་རྡོར་ཁུལ་གྱི་མི་དམངས་སུ་ཞིག་ཐེངས་འདིའི་འོས་བསྡུའི་ལས་རིམ་ནང་མ་ཞུགས་ན། འོས་འདེམས་ཚོགས་ཆུང་གི་ElectionCommissionofIndiaIdentityCard ཞེས་པའི་འོས་འདེམས་བྱང་བུ་དེ་མ་དེབ་ཁོངས་ནས་མིང་གཞུང་གསུབ་སྟེ། རྗེས་སོར་སྤྱོད་སྒོ་མི་ཆོག་པ་བཟོ་རྒྱུ་ཡིན་ཚུལ་ཁྱབ་བསྒྲགས་ཤུགས་ཆེན་བྱས། སྦིར་གྲགས་དེ་ལ་བརྟེན་ནས་ཀ་རྡོར་ཁུལ་གྱི་མི་ངོ་སུ་ཞིག་ས་གནས་གང་དུ་ཡོད་ཀྱང་འོས་ལྡུག་པའི་ཉིན་དེར་མི་ཡོང་ག་མེད་ཆགས་ཏེ། མཐའ་མ་JaswantSingh མཆོག་ལ་གྲོས་ཚོགས་ཀྱི་རྐུབ་སྟེགས་དེ་ཐོབ་པ་རེད།

སྐབས་དེར་ངེད་ནས་བྱེད་སྟངས་དེ་ནི་ཧ་ཅང་ལེགས་པོ་ཞིག་ལ་བསམས་མྱོང༌། རྒྱུ་མཚན་གང་ཡིན་ཞེ་ན་འོས་ཤོག་སུ་ལ་ལྡུག་མིན་དེ་རང་དབང་ཡིན་ཆོག་ཀྱང༌། རང་ཉིད་རྒྱལ་ཁབ་ཅིག་གི་ཆབ་འབངས་ཡིན་སྟབས་རྒྱལ་ཁབ་ཀྱི་ངོས་ནས་རག་རྒྱུའི་ཐོབ་ཐང་གཅིག་པོར་མིག་གཟས་ནས་བསྡད་ན་ངོ་ཚ་དང༌། རང་ཉིད་ཀྱིས་ཀྱང་རྒྱལ་ཁབ་ལ་འགན་འཁྱེར་བའི་བྱ་སྤྱོད་དེ་ཙམ་ཞིག་སྟོན་ཐུབ་དགོས་པ་རེད།

དཔེ་དེ་བཞིན་ང་ཚོས་ཀྱང་ཐོབ་ཐང་གཅོག་འཕྲིའི་ཁྲིམས་དང་སྒྲིག་གཞི་ཞིག་གཏན་འབེབས་བྱ་དགོས་པར་མཐོང༌། རང་གི་རྒྱལ་ཁབ་དང་མི་རིགས་ལ་ལར་ཞེན་ཡོད་མཁན་ཞིག་ཡིན་ཚེ་ལོ་ལྔའི་མཚམས་སུ་ཐེངས་གཅིག་ལ་མ་གཏོགས་མི་ཡོང་བའི་བཀའ་སྤྱིའི་འོས་བསྡུའི་ལས་རིམ་ཁྲོད་ཆ་ཤས་ལེན་དགོས་ངེས་ཤིག་ཡིན། ཡིན་ནའང་དེ་ཙམ་ལའང་དང་འདོད་མེད་པ་དང་། ཐོབ་ཐང་གང་ཡོད་ཐད་སྐེ་དང་བོར་བསྲངས་ཡོང་མཁན་རྣམས་ལ། ཐོབ་ཐང་གང་ཞིག་བཀའ་སྤྱིའི་འོས་བསྡུའི་ལས་རིམ་ནང་ཞུགས་ཟིན་པའི་དག་མཆན་མེད་ཚེ། གང་ཟག་དེ་ཐེངས་རྗེས་མའི་བཀའ་སྤྱིའི་འོས་བསྡུའི་ལས་རིམ་ནང་མ་ཞུགས་པར་ཐོབ་ཐང་དེ་གཅོག་འཕྲི་བྱེད་པའི་སྲིད་ཇུས་ཤིག་འཛིན་དགོས་པར་འདོད། དེ་སྐོར་ཞིབ་ཚགས་པར་ཤེས་ལྡན་རྣམས་ཀྱིས་བགྲོ་གླེང་གནང་ན་འོས།

ང་ཚོས་འདི་ལྟར་འོས་བསྡུ་ལས་རིམ་དེ་ཁྲིམས་དང་སྒྲིག་གཞི་ཞིག་ལ་བརྟེན་ནས་སྲུང་སྐྱོབ་མ་བྱས་ཚེ། ན་ཚོད་མ་སྨིན་པའི་ང་ཚོའི་དམངས་གཙོའི་གཞུང་འདི་ན་ཚོད་སྨིན་རྒྱུར་ཧ་ཅང་འགོར་ཡུན་རིང་བར་བསམ་ལ། དེ་ལྟར་བྱས་ན་ད་གཟོད་ང་ཚོ་བོད་མི་སྤྱི་འབོར་མང་ཤོས་དེ་འོས་བསྡུའི་ལས་རིམ་ནང་གོམ་པ་མཉམ་སྤོ་བྱེད་ཐུབ་པོ། །