རྒྱ་ནག་གུང་ཁྲན་ཏང་གིས་བོད་ཀྱི་ས་ཁུལ་ཡོངས་རྫོགས་བཙན་དབང་གིས་དབང་བསྒྱུར་བྱས་པའི་རྒྱུ་རྐྱེན་ལ་བརྟེན་ནས་ལྷ་སའི་སྡེ་བ་གཞུང་གི་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་དེ་རྒྱ་གར་གྱི་རྡ་རམ་ས་ལར་གནས་སྤོར་བྱས་ཤིང་། དེང་རབས་ཅན་གྱི་རྒྱལ་སྤྱིའི་སྤྱི་ཚོགས་ཀྱི་དམངས་གཙོའི་ལམ་ལུགས་ཀྱི་དགེ་མཚན་ཕུན་སུམ་ཚོགས་པའི་ཁྱད་པར་ལ་གཟིགས་ཏེ། བོད་ཀྱི་མ་འོངས་པའི་མཐར་ཐུག་གི་དམིགས་ཡུལ་མངོན་འགྱུར་བྱེད་པར་མེད་དུ་མི་རུང་བའི་དགོས་མཁོའི་མདུན་ལམ་ལ་དགོངས་པ་ཟབ་མོ་བཞེས་ནས། གནའ་བོའི་སྲོལ་རྒྱུན་སྲིད་སྐྱོང་གི་ལམ་ལུགས་ལ་རང་དབང་གིས་བཅོས་བསྒྱུར་མཛད་ཅིང་། འཛམ་གླིང་རྒྱལ་ཁབ་ཁག་གི་ཆབ་སྲིད་ཀྱི་རིག་པའི་གཞུང་ལུགས་དང་བསྟུན་ནས་བོད་རིགས་མི་དམངས་ཀྱིས་དགའ་ལྡན་ཕོ་བྲང་གི་སྲིད་དབང་དབང་བསྒྱུར་བྱེད་པའི་དམངས་གཙོའི་སྲོལ་བཟང་གསར་བཏོད་གནང་སྟེ། བོད་མི་དམངས་སྤྱི་འཐུས་ལྷན་ཚོགས་དབུ་བརྙེས་ཤིང་དུས་ཡུན་རིང་བོའི་རྒྱུད་རིམ་ཁྲོད་དུ་དེང་རབས་ཀྱི་སྲིད་སྐྱོང་ལས་དོན་གྱི་སྒྲིག་འཛུགས་མཐའ་དག་ལེགས་གྲུབ་བྱུང་སྟེ། བཙན་བྱོལ་དུ་བཞུགས་པའི་བོད་རིགས་མང་ཚོགས་ཀྱིས་ཐད་ཀར་རང་མོས་ཀྱིས་བོད་གཞུང་གི་སྲིད་སྐྱོང་བཀའ་བློན་ཁྲི་བ་འོས་འདེམ་གནང་ནས་དམངས་གཙོའི་ཆབ་སྲིད་ཀྱི་སྒོ་འཕར་ཡངས་པོར་ཕྱེ་ཡོད།
གོང་ས་༸སྐྱབས་མགོན་ཆེན་པོ་མཆོག་གིས་འདས་ཟིན་པའི་ལོ་ངོ་བཅུ་ཕྲག་འགའི་རིང་དུ་བོད་མི་དམངས་ཀྱི་རང་དབང་དང་བདེ་སྐྱིད་ཀྱི་ལས་འགན་མཐའ་དག་དང་དུ་བཞེས་ནས་སྐུ་ངལ་དང་ཐུགས་ངལ་སྣ་ཚོགས་ཁྱད་དུ་བསད་དེ། ཕྱི་ནང་བོད་རིགས་མང་ཚོགས་ཀྱི་ད་ལྟའི་དགོས་མཁོ་དང་འཚམས་ཤིང་དེང་རབས་ཅན་གྱི་རྒྱལ་སྤྱིའི་གནས་བབ་དང་མཐུན་པར་བོད་ཀྱི་མ་འོངས་པའི་རྒྱལ་ཁའི་མདུན་ལམ་ལ་རག་ལས་པའི་དབུ་མའི་ལམ་གྱི་རིགས་པའི་གཞུང་ལུགས་གསར་དུ་བཏོད་ནས་ལོ་རྒྱུས་ཀྱི་འགྱུར་ལྡོག་དང་འཕེལ་རྒྱས་ཀྱི་བགྲོད་ལམ་ལ་འབད་བརྩོན་བྱེད་དགོས་པར་བསམ་བློའི་མཛུབ་སྟོན་གནང་ཡོད།
བོད་ཀྱི་བཙན་བྱོལ་གཞུང་དམངས་གཉིས་ཀྱིས་ཡང་དག་པའི་དམངས་གཙོའི་ལམ་ནས་གཏན་ལ་ཕབ་པའི་དབུ་མའི་ལམ་གྱི་སྲིད་ཇུས་ནི། བོད་ཕྱི་ནང་གི་ད་ལྟའི་སྤྱི་ཚོགས་ཁྲོད་ཀྱི་རྒྱ་ཆེའི་མང་ཚོགས་ཀྱི་འདོད་བློ་དང་མཐུན་པར་མ་ཟད། དེར་བོད་རྒྱ་མི་རིགས་གཉིས་མ་འོངས་པར་མཉམ་གནས་བྱེད་པའི་རྒྱལ་ཁབ་ཀྱི་གོང་བུ་གཅིག་གྱུར་དང་། མི་རིགས་མཐུན་སྒྲིལ་གྱི་རླབས་ཆེ་བའི་བྱ་གཞག་མཐའ་དག་ཉམས་སུ་བསྟར་བར་དགེ་མཚན་ཟབ་མོ་ལྡན་ཡོད། དེའི་ཕྱིར། བོད་རྒྱ་མི་རིགས་གཉིས་ཀྱིས་དེའི་དགོངས་དོན་ལ་ལྷག་བསམ་ཟོལ་མེད་ཀྱི་སྒོ་ནས་ཐུགས་སྣང་མཛད་ཅིང་མཁྱེན་རྟོགས་ཡོང་བའི་སླད་དུ་ཕན་ཚུན་བརྩི་བཀུར་དང་མཛའ་མཐུན་དང་མཐུན་སྒྲིལ་གྱི་ངང་ནས་མཉམ་ལས་དང་སློབ་གསོའི་བྱེད་སྒོ་སྤེལ་དགོས་ཤིང་། རང་རེའི་བཀའ་ཁྲི་གསར་བས་བོད་རྒྱ་མི་རིགས་གཉིས་ཀྱི་མ་འོངས་པའི་མཛའ་བརྩེ་ལྡན་པའི་མཐུན་སྒྲིལ་མཉམ་གནས་བྱེད་པའི་ལས་དོན་ལ་གྲུབ་འབྲས་གསར་བ་ལེན་པའི་ཐབས་ཇུས་གསར་བ་གསར་གཏོད་བྱེད་དགོས།
རླབས་ཆེ་བའི་མ་འོངས་བའི་ལས་དོན་དག་ལེགས་འགྲུབ་འབྱུང་བ་ལ་བཀའ་ཁྲི་གསར་བས་བསྒྲུབ་དགོས་པའི་དོན་གནད་བཅུ་ཡོད་པར་བསམས་ཏེ།
དང་པོ། བོད་ཀྱི་དམངས་གཙོའི་ཆབ་སྲིད་སྲ་བརྟན་གཏོང་བ་དང་བཅའ་ཁྲིམས་ལྟར་འཛིན་སྐྱོང་བྱེད་པའི་དེང་རབས་ཚན་རིག་གི་སྲིད་སྐྱོང་ལམ་ལུགས་འཐུས་སྒོ་ཇེ་ཚང་དུ་བཏང་སྟེ་དངོས་ཡོད་ཀྱི་ལུགས་མཐུན་མ་ཡིན་པའི་ལས་དོན་བྱེད་ཕྱོགས་ཁག་དོར་ནས་རྒྱ་ཆེའི་མང་ཚོགས་རྣམས་ཀྱིས་གཞུང་གི་དཔོན་རིགས་ཚོར་འཛིན་པའི་ལྟ་ཚུལ་ངན་པ་དར་ཁྱབ་ཏུ་མི་འགྲོ་བར་སྔོན་འགོག་བྱེད་དགོས།
གཉིས་པ། བོད་མི་དམངས་སྤྱི་འཐུས་ལྷན་ཚོགས་དང་དེའི་རྒྱུན་ལས་གཉིས་ཀྱི་ཁོངས་མི་གྲུབ་ཚུལ་ཁག་ཚད་ལྡན་དང་དམངས་གཙོའི་ལྟ་གྲུབ་དང་མི་མཐུན་པ་རྣམས་ཡོངས་སུ་སྤངས་ནས་ཡང་དག་པའི་དམངས་གཙོ་ཅན་དུ་བསྒྱུར་བ་དང་བཀུར་འོས་སྤྱི་འཐུས་མི་སྣ་ཚོས་ཁྲིམས་བཟོ་རིག་པའི་ཤེས་ཡོན་ལ་སློབ་གཉེར་དང་སྦྱོང་བརྡར་མཛད་དེ་ཕན་ནུས་ལྡན་པའི་བཅའ་ཁྲིམས་བཟོ་བའི་ལས་དོན་ལ་ཉམས་མྱོང་ ལྡན་པ་དང་ནང་བྱན་ཆུད་པར་ཤུགས་སྣོན་བརྒྱག་དགོས།
གསུམ་པ། རང་རེའི་བཙན་བྱོལ་སྤྱི་ཚོགས་ནང་དུ་དེང་རབས་སྲིད་སྐྱོང་རིག་པ་སློབ་གཉེར་བྱེད་པའི་ཆེད་སྦྱོང་སློབ་གྲྭ་གསར་དུ་བཙུགས་ཏེ་ཆབ་སྲིད་རིག་པའི་ལས་དོན་ལ་དོ་སྣང་སྤྲོད་པ་དང་བཀའ་བློན་ཁྲི་བའི་རྒྱུན་འཛིན་པ་དང་གཞུང་གི་སྲིད་དོན་སྒྲུབ་མཁན་གྱི་ཕུལ་བྱུང་མི་སྣ་མང་པོ་གསོ་སྐྱོང་དང་སྐྱེད་སྲིང་བྱས་ཏེ་བོད་ཀྱི་མ་འོངས་པའི་སྲིད་སྐྱོང་གི་སྒྲིག་གཞི་དར་རྒྱས་དང་ཆོས་སྲིད་ལུགས་གཉིས་ཟུང་དུ་འབྲེལ་བའི་སྲོལ་བཟང་གི་སྲིད་འཛིན་ལམ་ལུགས་སྲ་བརྟན་དུ་གཏོང་དགོས།
བཞི་བ། བོད་ནང་གི་གནད་དོན་ཁག་ལ་ཞིབ་འཇུག་དང་འབྲེལ་གཏུག་བྱེད་པ་དང་བོད་རྒྱ་ཞི་མོལ་འབྲེལ་མཐུད་བྱེད་པའི་བཙན་བྱོལ་གཞུང་གི་སྐུ་ཚབ་མཚོན་པའི་བཀའ་བློན་དང་དེའི་ལས་ཁུངས་ཤིག་གསར་འཛུགས་མཛད་དེ་བོད་ནང་གི་རྒྱ་ཆེའི་བོད་རིགས་རྣམས་ཀྱིས་བསྒྲུབ་དགོས་པའི་ལས་དོན་ལ་ཐད་ཀར་འབོད་སྐུལ་དང་བཀོད་མངག་གནང་ཞིང་། སྐབས་ཐོག་གི་ཛ་དྲག་གི་གནས་བབ་སྐོར་ལ་དངོས་ཤུགས་བརྒྱུད་གསུམ་ནས་ལྟ་སྐྱོང་བྱེད་པ་དང་བོད་རྒྱ་མི་རིགས་གཉིས་ལ་དབུ་མའི་ལམ་གྱི་རང་སྐྱོང་གི་ལྟ་གྲུབ་སོགས་གསལ་བཤད་བྱས་ཏེ་ཐུན་མོང་གི་གོ་རྟོགས་མཐོར་འདེགས་དང་རྡོག་རྩ་གཅིག་སྒྲིལ་གྱིས་དབུ་མའི་ལམ་ལ་རྒྱབ་སྐྱོར་གནང་དུ་བཅུག་དགོས།
ལྔ་བ། རྒྱ་གར་དུ་ཡོད་པའི་གཞིས་ཆགས་ཁག་ཏུ་ཕྱི་རྒྱལ་གྱི་ཆེད་ལས་མཁས་པ་གདན་འདྲེན་གནང་སྟེ་སོ་ནམ་ཞིང་ལས་བྱེད་སྟངས་ལ་རིམ་གྱིས་བཅོས་བསྒྱུར་མཛད་ཅིང་དངོས་ཡོད་གནས་ཚུལ་དང་མཐུན་པར་བཟོས་ཏེ་ཚན་རིག་གི་ཐབས་ལམ་དང་ལྡན་པར་ཞིང་ལས་ཀྱི་ཐོན་ཁུངས་གསར་བ་བསྐྲུན་དགོས་པར་མ་ཟད། གཞིས་ཆགས་ཆེ་ཁག་དང་རྒྱ་གར་གྱི་གྲོང་ཁྱེར་དག་ཏུ་དེང་རབས་ཀྱི་ཚན་རྩལ་བཟོ་ཚོང་ཁང་མང་པོ་་གསར་འཛུགས་གནང་ཞིང་བཟོ་ལས་དང་ཚོང་ལས་ཅན་དུ་འགྱུར་བའི་ཐོན་སྐྱེད་ནུས་པ་གོང་མཐོར་བཏང་ནས་གཞིས་ཆགས་སྲ་བརྟན་དང་འཚོ་བ་ཇེ་ལེགས་སུ་གཏོང་དགོས། གཞན་ཡང་། ཕྱི་རྒྱལ་ཡུལ་གྲུ་ཁག་ནང་དུ་བོད་ཀྱི་ཆོས་ལུགས་དང་རིག་གཞུང་། མིའི་རྒྱུད་བཅས་ཉམས་རྒུད་དུ་མི་འགྲོ་བའི་ཆེད་དུ་བོད་རིགས་ཁ་འཐོར་དུ་གནས་པ་རྣམས་ཀྱང་ས་ཁུལ་གཅིག་དུ་བསྡུ་རུབ་གནང་སྟེ་འཚོ་བ་མཉམ་དུ་སྐྱེད་པ་དང་དེ་དག་གི་ཆེད་དུ་གཞུང་འབྲེལ་གྱི་བཟོ་ཚོང་ཁེ་ལས་ཁག་གསར་འཛུགས་བྱས་ཏེ་མཉམ་དུ་འབད་བརྩོན་བྱེད་པའི་ཐུན་མོང་གི་སྟོབས་ཤུགས་ལ་བརྟེན་ནས་བཙན་བྱོལ་སྤྱི་ཚོགས་ཁྲོད་ཀྱི་གཞུང་དམངས་གཉིས་ཀྱིས་གཞན་གྱི་རོགས ་དངུལ་གྱི་རྒྱབ་རྟེན་མི་འཚོལ་བར་རང་ཁ་རང་གསོ་བྱེད་པའི་ཕྱོགས་བསྡུས་ཀྱི་དཔལ་འབྱོར་ནུས་པ་གོང་འཕེལ་དུ་གཏོང་བའི་སྒྲིག་སྲོལ་འཛུགས་དགོས།
དྲུག་པ། བོད་ཀྱི་བཙན་བྱོལ་སྤྱི་ཚོགས་ཁྲོད་ཀྱི་གཞུང་སྒེར་ཚོགས་སྡེ་ཁག་གི་ནང་དུ་རང་གི་རིག་གཞུང་ལ་དགའ་མོས་བྱེད་པའི་ལྟ་བའི་སློབ་གསོའི་དྲིལ་བསྒྲགས་རྒྱ་ཆེན་དུ་སྤེལ་ཏེ་རང་གི་སྐད་ཡིག་ཁོ་ན་བེད་སྤྱོད་བྱེད་པར་ཤུགས་སྣོན་རྒྱག་པ་དང་ཕྱི་རྒྱལ་ཡུལ་གྲུ་ཁག་ཏུ་རང་གི་ཡུལ་སྲོལ་གོམས་གཤིས་དང་རིག་གཞུང་བཅས་རྒྱུན་འཛིན་བྱེད་པར་བོད་རིགས་གཞོན་སྐྱེས་ཚོར་གཞུང ་འབྲེལ་གྱི་བོད་ཡིག་སློབ་ཁྲིད་ཀྱི་འཛིན་གྲྭ་གསར་འཛུགས་གནང་དགོས། ལྷག་དོན་དུ། རང་རེའི་གཞིས་ཆགས་ཁག་གི་ཁ་ཐོར་དུ་གནས་པའི་སློབ་གྲྭ་རྣམས་ཟླ་སྒྲིལ་བཏང་ནས་སློབ་སྦྱོང་གི་མཐུན་རྐྱེན་ཇེ་ལེགས་སུ་གཏོང་བ་དང་སློབ་ཕྲུག་ཚོའི་བློ་ཁ་དང་མཐུན་པར་བོད་ཀྱི་རིག་གཞུང་གི་སློབ་གཞི་ཁག་གཅིག་མཐུན་དུ་གསར་བཟོ་གནང་སྟེ། དེང་རབས་ཚན་རིག་གི་སློབ་སྦྱོང་གི་ཉམས་མྱོང་དང་ལྡན་པའི་སྒོ་ནས་སློབ་ཁྲིད་བྱེད་དགོས་པར་མ་ཟད། སློབ་གྲྭ་ཁག་གི་འཛིན་སྐྱོང་གི་ཁྱབ་ཁོངས་ཀྱང་གཅིག་གྱུར་གཏོང་བ་བཅས་ཀྱི་ཐབས་ཇུས་གསར་བ་ལག་ལེན་བསྟར་དགོས།
བདུན་པ། བོད་ཀྱི་བླ་སྤྲུལ་རྣམས་ཀྱི་སྤྲུལ་སྐུའི་ངོས་འཛིན་བྱེད་སྟངས་ཀྱི་སྒྲིག་གཞི་གཏན་འཁེལ་གནང་སྟེ་དེ་དག་གི་སྤྲུལ་སྐུའི་ངོས་འཛིན་ལ་ཚོད་འཛིན་དང་སྤུས་ཀ་ཇེ་ལེགས་སུ་གཏོང་ཞིང་། ལྷག་པར་དུ་གོང་ས་༸མཆོག་གི་མ་འོངས་པའི་སྤྲུལ་སྐུའི་སྐོར་ལ་བོད་ཕྱི་ནང་གཉིས་ཀྱི་མང་ཚོགས་ལ་གོ་བསྡུར་མཛད་ཅིང་བོད་མི་དམངས་སྤྱི་འཐུས་ལྷན་ཚོགས་སམ་ཡང་ན་བོད་བཙན་བྱོལ་བའི་ཆོས་དོན་ལྷན་ཚོགས་སུ་བསམ་པ་གཅིག་མཐུན་གྱི་སྒྲིག་གཞི་གཏན་འབེབས་བཟོས་ཏེ་སྒྲིག་ཁྲིམས་ཀྱི་ངོ་བོར་བསྒྱུར་བ་དང་འཛམ་གླིང་ཡོངས་སུ་སྔོན་བསྒྲགས་བྱས་ནས་རྒྱལ་ཁབ་ཁག་གིས་རྒྱབ་སྐ ྱོར་དང་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་ལོ་རྒྱུས་རང་བཞིན་ལྡན་པའི་སྲོལ་རྒྱུན་གྱི་ཆོ་ཁའི་ལག་ལེན་ལ་ངོས་ལེན་དང་བརྩི་བཀུར་བྱེད་དུ་འཇུག་དགོས།
བརྒྱད་པ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་འགལ་ཞིང་མི་རིགས་ས་ཁོངས་རང་སྐྱོང་གྱི་བཅའ་ཁྲིམས་དང་མཐུན་པའི་རྒྱ་ནག་རྒྱལ་ཁབ་ཀྱི་ནང་དུ་བོད་རིགས་ཡོངས་ལ་མི་རིགས་ས་ཁོངས་རང་སྐྱོང་གྱི་གནས་བབ་ཚད་ལྡན་ཏེ་བཙན་བྱོལ་གཞུང་གི་དབུ་མའི་ལམ་གྱི་རང་སྐྱོང་གི་དགོས་དོན་ཁག་ལ་རྒྱ་ནག་གཞུང་གིས་ངོས་ལེན་ཡོད་མེད་ལ་མ་བལྟོས་པར་རྒྱལ་སྤྱིའི་ཁྲིམས་ལུ གས་དང་འཛམ་གླིང་རྒྱལ་ཁབ་ཁག་གི་ཁྲིམས་ཐོག་ནས་རྩོད་ལེན་དང་རྒྱབ་སྐྱོར་ཐོབ་པའི་སླད་དུ་བོད་ཀྱི་ཆེད་གཉེར་ཁྲིམས་རྩོད་ཚོགས་ཆུང་གསར་འཛུགས་གནང་ནས་ཁྲིམས་རྩོད་ཀྱི་ལས་དོན་ལ་འབད་བརྩོན་དང་ཤུགས་སྣོན་བརྒྱབ་སྟེ་བོད་རྒྱ་མི་རིགས་གཉིས་མཛའ་མཐུན་གྱི་མཉམ་གནས་ཡོང་བར་ངེས་པར་དུ་ཁྲིམས་ལུགས་ཀྱི་ཐབས་ལམ་གསར་བ་གསར་གཏོད་མཛད་དགོས།
དགུ་བ། བཀའ་ཁྲི་གསར་བས་གོང་ས་༸སྐྱབས་མགོན་མཆོག་གི་བཀའ་གསུང་དང་བོད་ཕྱི་ནང་མི་དམངས་ཀྱི་མངོན་འདོད་མཐའ་དག་དང་ལེན་དང་ལག་བསྟར་མཐར་ཕྱིན་གནང་སྟེ་གོང་ས་༸མཆོག་གི་སྲིད་དོན་གྱི་མཛད་སྒོའི་ཐུགས་འགན་ལྗིད་མོ་ཇེ་ཡང་དུ་གཏོང་ཞིང་སྐུ་ངལ་དང་ཐུགས་ངལ་གསོ་བར་བཞུགས་སུ་གསོལ་ནས་མིང་དོན་མཚུངས་པའི་བཀའ་ཁྲི་གསར་བའི་འགན་དབང་དང་ལེན་བྱེད་པའི་གསར་གཏོད་ཀྱི་ནུས་པ་ལྡན་པར་བྱེད་དགོས།
བཅུ་བ། བོད་ཀྱི་བཙན་བྱོལ་སྤྱི་ཚོགས་ནང་གི་སློབ་ཐོན་མི་སྣ་དང་ཤེས་ལྡན་མི་སྣའི་ཁྲོད་ཀྱི་ལས་མེད་པ་རྣམས་ཀྱི་ཆེད་དུ་རྒྱ་གར་དང་རྒྱལ་སྤྱིའི་ཁྲོད་དུ་ཤེས་རིག་ལྟེ་གནས་ཁང་མང་པོ་གསར་འཛུགས་མཛད་དེ་བོད་མི་རིགས་ཀྱི་ལས་ཀའི་འགན་དབང་བཀོད་སྒྲིག་དང་རང་རེའི་མེས་པོ་རྣམས་ཀྱིས་རླབས་ཆེན་གྱི་མཛད་རྗེས་སུ་བཞག་པའི་ཆོས་དང་རིག་གཞུང་། བསམ་བློའི་གོམས་གཤིས་སོགས་འཛམ་གླིང་གི་མི་དམངས་ལ་ངོ་སྤྲོད་དང་འབྲེལ་ལམ། དར་སྤེལ་དུ་གཏོང་བའི་སྲིད་ཇུས་གཏན་འབེབས་བྱེད་དགོས་པ་བཅས་ཀྱི་དོན་གནད་བཅུ་ནི་བཀའ་ཁྲི་གསར་བའི་མཚན་ཉིད་དུ་འཐད་པར་འདོད་དོ། །
བསམ་ཚུལ་ཡག་པོ་འདུག་། ད་དུང་མང་ཙམ་བྲི་རོགས།
དཀར་མཚོ་ལགས། སེམས་འཁུར་དང་ལེན་གནང་བར་ཐུགས་རྗེ་ཆེ།
ལྷག་པར་རྣམ་དཔྱོད་རྩལ་དུ་བཏོན་པའི་དགོས་འདུན་གྱི་འོས་ཆོས་དག་ཀྱང་ངེས་པར་དགོས་མཁོ་ཡོད་པ་ཤ་སྟག་རེད།