རྟ་ལམ་བོང་བུས་བཅད་འདུག པ་སངས།

པ་སངས་(སེ་ར)

ལོ་འདིའི་སྤྱི་ཟླ་ ༡༡ པའི་ཚེས་ ༡༢ ཉིན་དབུས་སྤྱི་ཁྱབ་འོས་བསྡུ་ལྷན་ཁང་ནས་མི་མང་གིས་ཐད་ཀར་འོས་བསྡུ་བྱས་པའི་བཀའ་སྤྱིའི་སྔོན་འགྲོའི་འོས་མི་ཁག་དང་གྲངས་འབོར་གྱི་གྲུབ་འབྲས་ཁག་གསལ་བསྒྲགས་བྱས་སོང་། ཐེངས་འདིའི་འོས་བསྡུའི་བརྒྱུད་རིམ་ནང་། སྤྱི་ཡོངས་ནས་བལྟས་ན་དེ་སྔ་ལས་ཚགས་ཚུད་དང་གྲུབ་འབྲས་ཡག་ཏུ་ཕྱིན་ཡོད་ཀྱང་། སྟབས་མ་ལེགས་པ་ཞིག་ལ། ཆོལ་ཁ་སོ་སོའི་སྤྱི་འཐུས་ཀྱི་འོས་མིའི་ནང་དུ། རང་ཡུལ་བརྗེད་ཅིང་རང་སྐྱོན་མི་མཐོང་བའི་མི་དང་། རང་གཤིས་བརླག་ཅིང་རང་གི་སྐད་ཡིག་ཀ་མད་སུམ་ཅུ་ཀློག་མི་ཤེས་མཁན་ཡང་ཡང་བསླེབས་འདུག་ལ། ཁ་རྡོག་རྩ་ཆིག་སྒྲིལ་དང་ཁོག་ཆོལ་ཁ་ཕྱོགས་རིས་ཅན་གྱི་མི་དང་། ཁ་ཆོལ་ཁའི་བདེ་སྡུག་དང་ལག་ལེན་ཆོལ་ཁ་གཏོར་བཤིག་བཏང་བའི་མི་ཡང་དེ་བས་མང་པ་ཞིག་བསླེབས་འདུག །

དེ་དག་སྤྱི་འཐུས་ཀྱི་འོས་མིར་ཇི་ལྟར་བསླེབས་པ་དེ། རྒྱུ་ཤུགས་དང་དབང་ཤུགས། ཡང་ན། འོས་བླུགས་པའི་ཐོབ་ཁུངས་སོ་སོའི་མི་མང་ལ་དམངས་གཙོའི་གོ་རྟོགས་ཞན་དྲགས་པ་ཡིན་ནམ། ཕྱོགས་འཐེན་སྒེར་གཅོད་ཀྱི་ར་བཟི་ཐེབས་པ་ཡིན། གང་ལྟར་མདོར་བསྒྲིལ་ན། དེ་ནི་རྒྱབ་ལ་ཆོལ་ཁའི་ཕྱོགས་རིས་ལྗིད་ཏིག་གེ་བའི་འབོག་སྒྲིལ་ཁུར་ཏེ་དབུགས་ཧལ་ནས་འགྲོ་ཐུབ་ལ་མི་ཐུབ་ལའི་མི་མང་རྣམས། མི་ཤུགས་དང་རྒྱུ་ཤུགས། དབང་ཤུགས། ཡང་ན་གོང་ལ་སྐྱབས་རྟེན་ཕུལ་བ་དང་། འོག་ལ་རྔན་པ་སྤྲད་པར་དགའ་བའི་མི་ག་གེ་མོ་དག་གིས་རྒྱབ་ནས་དེད་དེ། ཆེས་རིན་ཐང་བྲལ་བའི་དུས་ཡུན་ལོ་ལྔ་དེ་ཡང་བསྐྱར་ཆུད་ཟོས་སུ་གཏོང་འདོད་པ་དེ་རེད།

སྤྱིར་ཡུལ་ལ་བདེ་སྐྱིད་བྱུང་ན། རྒྱལ་པོ་ཨ་ནེས་བྱས་ཀྱང་ཆོག་མོད། ལམ་འདི་ནི་རྩེད་མོ་རྩེ་ས་ཞིག་མ་རེད་ལ། མི་རྒྱུ་དབང་གསུམ་གྱི་ཤུགས་ཚད་ས་ཡང་མ་རེད། ཆེ་ཚུགས་དང་སྦམ་མདོག་སྟོན་ས་མ་རེད་ལ། ཁ་བདེ་པོ་དང་མགོ་བདེ་བོ་བྱེད་ས་དེ་བས་ཀྱང་མ་རེད། འདི་ནི་མི་མང་གི་སྐུ་ཚབ་མཚོན་ཐུབ་པར་བྱ་ས་དང་། མི་མང་གི་དངོས་ཤུགས་བརྒྱུད་གསུམ་གྱི་རེ་འདོད་གླེང་སའི་སྟེགས་བུ། རང་གི་སྤྱོད་ཡོན་འཇོན་གསུམ་རྩལ་དུ་བཏོན་ཏེ་བོད་སྤྱི་བའི་དོན་དུ་ལས་ཀ་བྱེད་ས་དང་། བོད་པའི་བདེན་མཐའ་སེལ་བའི་ཐབས་ལམ་བསྐྲུན་ས་ཞིག་ཆགས་ཡིན། ཁེ་ཕན་ཆུང་ཆུང་ཙམ་གྱི་དོན་དུ་སོ་སོ་དམག་མིའི་ལག་གི་མེ་མདའ་བཞིན་ཁ་གང་ལ་སྟོན་སྟོན་ཞིག་ཏུ་གྱུར་ན་མི་འགྲིགས། འགན་འདི་ནི་མཐོ་མགོ་པ་དང་། དམའ་མི་དམངས་བྱིངས་ཀྱི་ཡན་ཆད་ཚང་མར་གཅིག་མཚུངས་ཀྱིས་འཁྲི་བ་ཞིག་ཡིན།  

ང་ཚོས་དབུགས་རིང་ནར་ནར་གྱིས་མི་སྡོད་པར་བསླེབ་ལ་ཉེ་བའི་དངོས་གཞིའི་འོས་བསྡུའི་སྐབས། གཞན་གྱི་བཀོལ་བྱུས་དང་ལུང་ཚན་ཕྱོགས་འཐེན། དགའ་ཁ་འཁྱེར་ཕྱོགས་དང་བློ་གཉིས་ཐེ་ཚོམ་མི་བྱེད་པར། བློ་རྩེ་གཅིག་གིས་ཆོལ་ཁ་སོ་སོའི་སྔོན་འགྲོའི་གསལ་བསྒྲགས་སྤྱི་འཐུས་ཀྱི་འོས་མི་ལྔ་བཅུའི་ནང་ནས། ཡང་ན། ཉེར་ལྔའི་ནང་ནས་གོང་དུ་སྐྱོན་ཡོད་པ་དག་རྩལ་དུ་བཏོན་ནས་ཐེར་འདོན་ངེས་པར་དུ་བྱ་དགོས། དེ་ནི་མང་ཚོགས་ཚོས་རང་རང་གི་འཐུས་མི་འོས་འདེམས་ཀྱི་འགན་དབང་ཡིན། གལ་སྲིད་དེ་ལྟར་མ་བྱས་ན་འདས་ཟིན་པའི་སྐྱུག་བྲོ་བའི་ཟློས་གར་དེ་ལྟ་བུ། སྤྱི་འཐུས་ལྷན་ཁང་གི་གར་སྟེགས་སྟེང་ནས་སླར་ཡང་དགྲ་དགའ་གཉེན་སྡུག་གི་འཁྲབ་སྟོན་ཞིག་འབྱུང་མི་སྲིད་པའི་ངེས་པ་མེད། ད་ནི་དངོས་གཞིའི་འོས་བསྡུ་སྐབས་སུ་ང་ཚོས་ཟ་ཨེ་བློ་སྣ་དང་གྱོན་ཨེ་བློ་ལུས་ལ་བལྟ་ཆོག ཛ་དྲག་གི་དུས་ཚོད་ཐུང་ཐུང་ནང་མང་ཚོགས་མི་རེ་ངོ་རེ་ནས་དམངས་གཙོའི་ཁེ་དབང་ལོངས་སུ་སྤྱད་པ་དང་དུས་མཉམ། དམངས་གཙོའི་འགན་དབང་ཕྲག་ཏུ་བླངས་ཏེ། ཡར་རྒྱབ་སྐྱོར་དགོས་སར་རྒྱབ་རོགས་བྱ་རྒྱུ་དང་། མར་ཐེར་འདོན་དགོས་སར་ཟུར་འདོན་གནང་རྒྱུ་གལ་ཆེའོ།།