བོད་ཀྱི་རིག་གཞུང་འཛིན་སྐྱོང་ཁང་།

གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཕྱི་ཚེས་  ༢༠ ཉིན་བྷེལ་ཇམ་བོད་ཀྱི་རིག་གཞུང་འཛིན་སྐྱོང་ཁང་བཙུགས་ནས་ལོ་ངོ་གཉིས་འཁོར་བའི་མཛད་སྒོ་ཞིག་ཚོགས་ཡོད་འདུག་ཅིང་། མཛད་སྒོའི་སྐུ་མགྲོན་གཙོ་བོར་བྷེལ་ཇམ་ནང་བཅའ་བཞུགས་བོད་གཞུང་སྐུ་ཚབ་དོན་གཅོད་བཀྲ་ཤིས་དབང་འདུས་མཆོག་གིས་དབུས་བོད་རིགས་ཚོགས་པའི་ཚོགས་གཙོ་གཞོན་གཉིས། ས་གནས་ཆུ་བཞི་སྒང་དྲུག་གི་ཚོགས་གཙོ་ཚོགས་གཞོན། ས་གནས་གཞོན་ནུ་ཚོགས་པའི་ཚོགས་གཙོ་ཚོགས་གཞོན། བོད་རྒྱ་མཛའ་འབྲེལ་ཚོགས་པའི་དྲུང་ཆེ་བཅས་ཆེད་ཕེབས་གནང་ཡོད་པ་དང་། གཞན་སློབ་མའི་ཁྱིམ་བདག་དང་མི་མང་བཅས་མི་གྲངས་བརྒྱ་ལྷག་མཉམ་ཞུགས་གནང་ཡོད་འདུག མཛད་སྒོའི་ཐོག་མར་བོད་ཀྱི་སྲོལ་རྒྱུན་ལྷ་མོ་བཀྲིས་ཞོལ་པའི་གླུ་སྒྲའི་ཁྲོད་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་གདན་འདྲེན་ཞུས་ཏེ། ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་དང་རྒྱལ་གཅེས་དཔའ་བོ་དཔའ་མོ་ཚོའི་ཆེད་སྐར་མ་གཅིག་རིང་ངག་བཅད་གུས་འདུད་ཞུས་རྗེས། བྷེལ་ཇམ་བོད་ཀྱི་རིག་གཞུང་འཛིན་སྐྱོང་ཁང་གི་ཚོགས་གཙོ་བློ་བཟང་དབང་འདུས་ཀྱིས་དུས་དྲན་ངོ་སྤྲོད་དང་ཚོགས་པའི་ལས་བསྡོམས་སྒྲོག་སྦྱང་གནང་སོང་།

དེའི་རྗེས་སྐུ་མགྲོན་གཙོ་བོ་བོད་གཞུང་སྐུ་ཚབ་དོན་གཅོད་བཀྲིས་དབང་འདུས་མཆོག་གིས་བོད་ཀྱི་ཆོས་དང་རིག་གཞུང་གི་ཐད་ནས་བོད་ཕྲུག་ཚོར་ཆུང་ངུའི་དུས་ནས་སློབ་གསོ་སྤྲོད་རྒྱུ་དེ་གལ་ཆེན་ཡིན་པ་དང་། ལོ་ཆུང་བྱིས་པ་དེ་དག་ལ་མ་འོངས་པར་བོད་པའི་ངོ་བོ་མ་བརླག་པ་ཞིག་བྱེད་དགོས་ན། རེས་གཟའ་སྤེན་པ་དང་ཉི་མའི་བོད་ཡིག་འཛིན་གྲྭ་ཁོ་ནས་སྒྲུབ་ཐབས་མེད། དེར་བརྟེན། སྤྱི་ཚོགས་ཁྱོན་ཡོངས་དང་། ལྷག་པར་ཁྱིམ་བདག་ཚོས་རང་གི་ནང་དུ་བོད་ཀྱི་རིག་གཞུང་གལ་ཆེ་བའི་རྒྱུ་མཚན་བརྗོད་དགོས་ལ། རང་གི་ཕྲུ་གུར་ངེས་པར་དུ་བོད་སྐད་ཁོ་ན་རྒྱག་རྒྱུ་དེ་ཤིན་ཏུ་ནས་གལ་ཆེན་པོ་ཡིན། ད་དུང་གལ་ཆེ་བ་ཞིག་ནི་ད་ལྟ་ང་ཚོ་བྷེལ་ཇམ་ཁུལ་གྱི་སློབ་གྲྭ་ཁག་གི་བོད་ཡིག་སློབ་ཚན་གཅིག་འགྱུར་ཐོག་སློབ་ཁྲིད་བྱེད་བཞིན་ཡོད་པ་དེ་གཞི་རྩར་བཟུང་སྟེ། མ་འོངས་པར་དམིགས་བསལ་གྱི་ཕྱི་རྒྱལ་དུ་སྡོད་མཁན་སློབ་མ་ཚོར་དམིགས་ཏེ། སློབ་དེབ་ཞིག་བསྒྲིགས་ཐུབ་ན་ལེགས་པོ་ཡོད་པ་སོགས་ཀྱི་ལམ་སྟོན་གནང་ཡོད་འདུག

དེ་རྗེས་བྷེལ་ཇམ་ཁུལ་གྱི་སྐབས་དང་པོའི་དབྱར་དུས་བོད་ཀྱི་རིག་གཞུང་ཟབ་སྦྱོང་གི་སྐོར་འཁོད་པའི་བརྙན་འཕྲིན་འོད་སྡེར་ཞིག་དབུ་འབྱེད་དང་།  ༧གོང་མཆོག་དང་ཀུན་གཟིགས་པཎ་ཆེན་རིན་པོ་ཆེའི་བཀའ་སློབ། བོད་ཀྱི་རིག་གཞུང་གི་གལ་ཆེའི་རང་བཞིན་གྱི་ནང་དོན་ལྡན་པའི་བོད་ནང་གི་གཞས་པ་དག་གི་གླུ་གཞས་ཀྱི་གློག་བརྙན་གཟིགས་འབུལ་བྱས་པ། གཞན། བོད་ཀྱི་རྒྱལ་རབས་ལོ་རྒྱུས་དང་ནང་ཆོས། སྐད་ཡིག བཙན་བྱོལ་བོད་གཞུང་གི་སྐོར་སོགས་ཀྱི་དྲི་བ་དྲི་ལན་སོགས་གནང་མཐར་སློབ་ཕྲུག་དང་གཞས་པ་སྐོར་ཞིག་གིས་གླུ་གཞས་བཏང་ཡོད་འདུག

བྷེལ་ཇམ་བོད་ཀྱི་རིག་གཞུང་འཛིན་སྐྱོང་ཁང་དེ་ནི། ཐོག་མར་ཕྱི་ལོ་ ༢༠༠༨ ལོར་དངོས་སུ་བཙུགས་པ་ཞིག་ཡིན་ཞིང་། ད་ཡོད་དགེ་ལས་ཁྱོན་བསྡོམས་གྲངས་༨ དང་སློབ་མ་ ༥༠ ཙམ་ཡོད་འདུག་ལ། དེ་དག་བོད་རིགས་འདུས་སྡོད་ས་གནས་ཆེ་ཁག་གསུམ་གྱི་ནང་སློབ་འཁྲིད་བྱེད་བཞིན་ཡོད་པ་དང་། དགེ་རྒན་དང་ལས་བྱེད་ཚང་མ་དང་བླངས་ཐོག་ལས་འཁུར་བཞེས་བཞིན་ཡོད་འདུག འཛིན་སྐྱོང་ཁང་དང་འབྲེལ་ལས་དོན་ཆེད་ས་གནས་གང་དུ་སྐྱོད་ཀྱང་ལམ་གྲོན་ཚང་མ་རང་ངོས་ནས་གཏོང་དགོས་ཤིང་། འདི་ལོ་ནས་བཟུང་སློབ་གྲྭ་ཁག་གསུམ་གྱི་སློབ་ཚན་གཅིག་འགྱུར་བཟོས་ཡོད་ཅིང་། ལོ་གཅིག་ལ་ཡིག་རྒྱུགས་ཐེངས་གཉིས་བཏང་སྟེ་གྲུབ་འབྲས་སློབ་གྲྭའི་མཛད་སྒོའི་ཉིན་གསལ་བསྒྲགས་བྱ་རྒྱུ་བྱས་ཡོད་འདུག

གནས་ཚུལ་མཁོ་གཏོང་བ་ལྷག་པ་ཚེ་རིང་།