འབྲོག་དམངས་གྲོང་རྡལ་དང་ཕྱུགས་ཟོག་གཞུང་གཅིག

ཉེ་བའི་ལོ་འགའི་སྔོན་ནས་བཟུང་རྒྱ་ནག་གིས་བོད་མཐོ་སྒང་གི་འབྲོག་པ་མང་ཚོགས་རྣམས་ཞང་དང་རྫོང་རིམ་པར་གྲོང་བརྡལ་གྱི་རྣམ་པར་སྒྱུར་བཞིན་ཡོད་པ་དང་། ད་ཆར་ཕྱུགས་ཟོག་ཀྱང་གཞུང་གཅིག་ཅན་དུ་བསྒྱུར་མགོ་བརྩམས་ཡོད་འདུག  

ཕྱི་ཚེས་ ༢༦ ཉིན་གྱི་དགོང་མོར་མིང་བརྗོད་འདོད་མེད་པའི་ཨ་རིག་དགོན་དགའ་ལྡན་ཆོས་འཕེལ་གླིང་གི་གྲྭ་པ་ཞིག་གིས་འདི་གའི་གསར་འགོད་པར་ཁ་པར་བརྒྱུད་བརྗོད་པ་ལྟར་ན། ཉེ་བའི་ལོ་འགའི་གོང་ནས་བཟུང་མཚོ་བྱང་ཁུལ་མདོ་ལ་རྫོང་གི་འབྲོག་པ་མང་ཚོགས་སྒེར་གྱི་ཕྱུགས་ཟོག་སྤྱི་རྒྱུ་ཅན་དུ་བསྒྱུར་ཏེ། འབྲོག་པ་རྣམས་ཞང་དང་རྫོང་རིམ་པར་གནས་སྤོར་བྱེད་པ་དང་། གྲོང་གསར་འཛུགས་སྐྲུན་ཞེས་པའི་ལས་གཞི་ཞིག་མགོ་བརྩམས་འདུག དེང་སྐབས་ཨ་རིག་ཞང་གི་གྲོང་ཁྱེར་ཞོལ་གྱི་སློབ་གྲྭ་ཡོད་ས་ནས་གྲོང་གསར་འཛུགས་སྐྲུན་ཞེས་པའི་ལས་གཞི་མགོ་བརྩམས་ཏེ།  གྲོང་གསར་གྱི་ཁང་པ་སྐོར་ཁག་སྐོར་ཁག་བྱས་ཏེ་འཛུགས་སྐྲུན་བྱས་དང་བྱེད་ཀྱིན་པར་མ་ཟད། འབྲོག་པ་མང་ཚོགས་མི་ཉུང་བ་ཞིག་གིས་རྒྱལ་ཁབ་ཀྱི་སྲིད་ཇུས་འདིའི་མཇུག་འབྲས་མ་གཏོགས་པར་གྲོང་གསར་ཁང་པའི་ནང་དུ་གནས་སྤོར་བྱས་འདུག གྲོང་གསར་གྱི་ཁང་པའི་ནང་དུ་སྤོར་སྐབས་རྒྱལ་ཁབ་ཀྱིས་ཁང་པ་འཛུགས་སྐྲུན་གྱི་འགྲོ་གྲོན་ཕྱེད་ཀ་བཏང་བ་དང་། མང་ཚོགས་རང་གིས་ཕྱེད་ཀ་གཏོང་དགོས་ཀྱི་འདུག དེར་བརྟེན་སྔོན་ཆད་ཞང་གི་གྲོང་ཁྱེར་ནང་རྒྱ་རིགས་མང་བ་ཡོད་ཀྱང་། དེང་སྐབས་འབྲོག་པ་མང་ཚོགས་གནས་སྤོར་བྱས་ཏེ་ཞང་གི་ཁྱིམ་ཚང་བརྒྱ་ཆ་བདུན་ཅུ་ནས་བརྒྱད་ཅུ་ལྷག་བོད་མི་ཡིན་འདུག

རྒྱལ་ཁབ་ཀྱིས་འགྲེལ་བརྗོད་བྱས་པ་ལྟར་ན། དེ་ལྟར་འབྲོག་པ་མང་ཚོགས་ཞང་དང་རྫོང་རིམ་པར་གནས་སྤོར་བྱེད་དོན། འབྲོག་ཕྱོགས་ས་ཁུལ་གྱི་ས་ཆར་སྲུང་སྐྱོབ་དང་རི་སྐྱེས་སྲོག་ཆགས་སྲུང་སྐྱོབ། ཁོར་ཡུག་སྲུང་སྐྱོབ་སོགས་ཀྱི་ཆེད་དུ་ཡིན་སྐོར་བརྗོད་འདུག་ལ། ཕྱུགས་ཟོག་ཚང་མ་མཉམ་ཏུ་བསྲེས་ཏེ་རྫི་བོ་འཇོག་པ་དང་། དེའི་ཤུལ་གྱི་འབྲོག་པ་མང་ཚོགས་གཞན་རྣམས་ལས་ཀ་འཚོལ་དུ་འགྲོ་དགོས་ཀྱི་ཡོད་འདུག་ལ། དབྱར་དུས་དབྱར་རྩྭ་དགུན་འབུ་རྐོ་རུ་འགྲོ་བ་དང་། ས་ལས་རྡོ་ལས་བྱེད་པ། ཚོང་ལས་དང་གླ་ལས་སོགས་བྱས་ཏེ་ཐུན་མོང་གིས་གསག་པའི་ཡོང་སྒོ་ཚང་མ་ཐུན་མོང་ལ་བགོ་བཤའ་རྒྱག་རྒྱུ་ཡིན་སྐོར་བརྗོད་ཀྱི་འདུག

གང་ལྟར། བྱེད་ཐབས་འདིར་བལྟས་ན་དེ་སྔོན་མའོ་ཙེ་ཏུང་སྐབས་ཀྱི་མཉམ་ལས་སྲིད་ཇུས་དང་འདྲ་བོ་འདུག ཡང་རྒྱ་ནག་གི་སྲིད་ཇུས་འདིའི་མཇུག་མཐའི་དམིགས་ཡུལ་གང་ཡིན་མ་གཏོགས་པར། ཁྱིམ་ཚང་མང་བོ་ཞིག་གིས་ཕྱུགས་ཟོག་ཐུན་མོང་ཅན་དུ་བསྒྱུར་རྗེས་རང་ལ་དེའི་སྟེང་ནས་དམིགས་བསལ་གྱི་ཡོང་འབབ་མེད་པ་དང་། གཞུག་ཕྱོགས་རང་གི་འཚོ་བར་དཀའ་ཁག་འབྱུང་རྒྱུ་ཡིན་པ་སོགས་ལ་སྐྲག་སྟེ། ཕྱུགས་ཟོག་མང་བོ་ཕམ་བཙོང་བྱེད་མཁན་ཡང་འདུག  ཡང་སྲིད་གཞུང་གིས་སྔར་བགོས་པའི་རྩྭ་ས་རང་འཇགས་འཇོག་རྒྱུ་ཡིན་སྐོར་བསྒྲགས་པ་ལྟར། འབྱོར་ལྡན་ཁྱིམ་ཚང་མང་པོ་ཞིག་གིས་ཁྱིམ་ཚང་གཞན་གྱི་ས་ཆ་ཉོ་བ་སོགས་བྱེད་ཀྱིན་འདུག དེ་ལྟར་དེང་སྐབས་ཕ་ཡུལ་གྱི་གྲོང་གསར་འཛུགས་སྐྲུན་གྱི་ཁ་གཡང་འོག་འབྲོག་པ་མང་ཚོགས་ཞང་དང་རྫོང་རིམ་པར་གནས་སྤོར་བྱེད་པའི་སྲིད་ཇུས་གསར་བ་ཞིག་ལག་བསྟར་བྱེད་ཀྱིན་པ་དང་། མང་ཚོགས་ཁྲོད་དེའི་སྐོར་གྱི་སྐད་ཆ་འདྲ་མིན་སྣ་ཚོགས་གོ་རྒྱུ་འདུག་ཀྱང་། སྲིད་ཇུས་གསར་བ་འདིའི་རྒྱབ་ལྗོངས་ཀྱི་གནས་ཚུལ་ངོ་མ་སུ་གཅིག་ཀྱིས་ཀྱང་ཤེས་ཀྱི་མི་འདུག ཅེས་བརྗོད་བྱུང་།  

ཡང་གོང་གསལ་གནས་ཚུལ་དང་གཅིག་པ་ཞིག་ནི། ངྷ་སར་གནས་སྡོད་ཚེ་རིང་རྡོ་རྗེ་ལགས་ཀྱིས་འདི་གའི་གསར་འགོད་པར་བརྗོད་དོན། དེང་སྐབས་ཕ་ཡུལ་དུ་ཁ་པར་གཏོང་སྐབས་ཕ་ཡུལ་གྱི་འབྲོག་པ་མང་ཚོགས་རྣམས་ཀྱིས་དེང་སྐབས་གོ་རྒྱུ་ཐོས་རྒྱུ་མང་བོ་འདུག་ཟེར་ལ། གཙོ་བོ་སྔོན་མ་རིག་གནས་གསར་བརྗེ་ཆེན་མོའི་སྐབས་ཀྱི་མཉམ་ལས་ཟེར་བ་ཕྱིར་འཛུགས་རྒྱུ་རེད་ཟེར་མཁན་འདུག ཡང་ཁག་ཅིག་གིས་ད་ལྟའི་ཆར་མཉམ་ལས་འཛུགས་ཀྱི་མིན་པ་འདྲ། རྒྱུ་མཚན་ནི་རྭ་རྒྱ་ས་ཁུལ་ནས་ཞིང་ཧེ་དང་འདྲིས་མཚམས་ཀྱི་ས་ཆའི་ནགས་རྫོངས་སུ་གློག་འཐེན་གྱིན་འདུག་ལ།  དེར་བལྟས་ན་ཕལ་ཆེར་འབྲོག་རུ་ཡོངས་རྫོགས་ད་དུང་གཏོར་གྱི་མིན་པ་འདྲ། འབྲོག་པའི་ཁྱིམ་ཚང་རེ་རེ་བཞིན་གློག་འཐེན་བཞིན་འདུག འོན་ཀྱང་། ད་ལྟ་སྲིད་ཇུས་གསར་བ་ཞིག་བསླེབས་ཏེ་མི་གཅིག་ལ་འབྲི་གཅིག་དང་མ་མོ་གཅིག་གི་བགོས་སྐལ་མ་གཏོགས་མེད་པར་བྱས་ཏེ། དེའི་ཤུལ་གྱི་ཕྱུགས་ཟོག་ཆ་ཚང་མེད་པར་གཏོང་དགོས་ཟེར་ནས་ཚོགས་འདུ་སྐོང་གི་ཡོད་འདུག གོ་ཐོས་བྱུང་བ་ལྟར་ན། ཐིན་ཏེ་དང་ཞིང་ཧེ་ས་ཁུལ་དུ་མཉམ་ལས་འཛུགས་སྐྲུན་བྱ་རྒྱུར་ཚོད་ལྟ་བྱེད་ཀྱིན་འདུག་ཟེར་མོད། གནས་ཚུལ་གསལ་བོ་ཤེས་རྟོགས་བྱུང་མ་སོང་ཟེར།  

དེ་བཞིན། ཕྱི་ཚེས་ ༡༧ ཉིན་ཀན་ལྷོ་ཁུལ་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། འདི་ལོའི་ཟླ་ ༧ པར་བསང་ཆུ་རྫོང་གི་རྣམ་པ་གསར་བའི་རོང་འབྲོག་སྡེའི་སྤྱི་ཚོགས་རྒན་གསོ་འགན་སྲུང་གི་ཚོད་ལྟའི་བྱ་བ་ལག་བསྟར་བྱས་པ་ནས་བཟུང་།  བླ་བྲང་གྲོང་རྡལ་ནང་ཁུལ་གྱི་ཞང་དང་ལས་སྒྲུབ་ཁང་ ༡༤ ཡིས་རྣམ་པ་གསར་བའི་རོང་འབྲོག་སྡེའི་སྤྱི་ཚོགས་རྒན་གསོ་འགན་སྲུང་ཁྱབ་གདལ་གཏོང་མགོ་བརྩམས་ཤིང་།   སྤྱིར་རྒན་གསོ་འགན་སྲུང་ནང་ཞུགས་དགོས་བའི་མི་ ༣༦༩༠༠ ཡོད།  ཟླ་ ༩  བའི་ཚེས་ ༣༠ ཉིན་བར།  བསང་ཆུ་རྫོང་གི་རོང་འབྲོག་དམངས་ ༥༢༦༥ རྒན་གསོ་འགན་སྲུང་གི་ནང་དུ་ཞུགས་ཟིན་པ་དང་།   རྫོང་ཡོངས་ཀྱི་ལོ་ ༦༠ ཡན་ཆད་ཀྱི་རོང་འབྲོག་སྡེའི་སྡོད་དམངས་ ༡༡༡༠༣ ལ་གཞི་རྩའི་རྒན་གསོའི་མ་དངུལ་སྔོན་རྩིས་བྱས་ཡོད།   ཟླ་ ༡༠ པ་ནས་བཟུང་བསང་ཆུ་རྫོང་གི་ངལ་རྩོལ་དང་སྤྱི་ཚོགས་འགན་སྲུང་སྡེ་ཁག་གིས་མུ་མཐུད་དུ་བྱ་བའི་འཕེལ་ཚད་ཇེ་མགྱོགས་སུ་བཏང་ཞིང་།  སྔོན་རྩིས་ལྟར་ན།  ད་ལོའི་ལོ་མཇུག་བར་དུ་རྒན་གསོ་འགན་སྲུང་གི་ནང་ཞུགས་ཚད་བརྒྱ་ཆ་ ༩༠ ཙམ་ལ་བསླེབ་སྲིད།  ༢༠༡༡ ལོར་བསང་ཆུ་རྫོང་གིས་རྣམ་པ་གསར་བའི་རོང་འབྲོག་སྡེའི་སྤྱི་ཚོགས་རྒན་གསོ་འགན་སྲུང་དེ་རོང་འབྲོག་སྡེའི་ལོ་ན་རན་པའི་སྡོད་དམངས་ཚང་མར་ཁེབས་པ་ཕལ་ཆེར་མངོན་འགྱུར་བྱེད་ཐུབ་ངེས་རེད་ཅེས་བརྗོད་འདུག

གསར་འགོད་པ། ཨ་རིག་འགྱུར་མེད།