ཧྥ་རན་སིའི་སྲིད་འཛིན་སཱར་ཀོ་ཛི་ Niclos Sarkozy ཉིན་བཞིའི་རིང་རྒྱ་གར་ནང་གཟིགས་སྐོར་དུ་ཡོང་ཡོད་ཅིང་། ཁོང་གིས་ཐེངས་འདིར་རྒྱ་གར་སྲིད་བློན་མན་མོ་ཧན་སིན་དང་མཇལ་འཕྲད་ཀྱིས་རྡུལ་ཕྲན་ཚོང་འབྲེལ་དང་རྒྱལ་དོན་བདེ་འཇགས་སྐོར་ལ་གྲོས་མོལ་བྱ་འཆར་ཡོད་འདུག
དེ་རིང་རེ་གཟའ་ཟླ་བའི་ཉིན་སྲིད་འཛིན་སཱར་ཀོ་ཛི་དང་སྲིད་བློན་མན་མོ་ཧན་གཉིས་རྒྱ་གར་གྱི་རྒྱལ་ས་ལྡི་ལིར་རྒྱལ་དོན་གྲོས་མོལ་སྐོར་ནས་མཇལ་འཕྲད་གནང་གི་ཡོད་ཅིང་། གྲོས་མོལ་འདི་བརྒྱུད་ཧྥ་རན་སིའི་རྡུལ་ཕྲན་ལས་རིགས་རྒྱ་སྐྱེད་བཏང་སྟེ། རྒྱ་གར་ནང་བརྟེན་གཞི་གསར་འཛུགས་ཀྱིས་ ༢༠༥༠ ལོར་གློག་ཤུགས་བརྒྱ་ཆ་ ༢༥ རྡུལ་ཕྲན་ནུས་ཤུགས་ལ་རྟེན་ནས་མཁོ་གཏོང་ཐུབ་ཐབས་བྱ་རྒྱུ་དང་། ཕྱོགས་གཉིས་ཀྱི་དམགས་དོན་མཉམ་ལས་བྱ་རྒྱུ། དེ་བཞིན་རྒྱལ་སྤྱིའི་ཚོང་རྫས་ཀྱི་རིན་གོང་དང་དངུལ་གཏོང་ལམ་ལུགས་སྙོམ་སྒྲིག་ཐབས་ཐད་གྲོས་མོལ་བྱ་རྒྱུ་ཡིན་འདུག
ཁ་སང་གཟའ་ཉི་མའི་ཉིན་སྲིད་འཛིན་སཱར་ཁོ་ཛི་དང་ཁོང་གི་བཟའ་ཟླ་བྷི་རོ་ནེ Carla Bruni གཉིས་དུས་རབས་ ༡༧ པའི་ནང་མུ་གལ་མངའ་བདག་ཤཱ་ཇཱ་ཧན་གྱིས་ཁོང་གི་བཙུན་མོར་དྲན་རྟེན་དུ་བཟོ་སྐྲུན་བྱས་པ། འཛམ་གླིང་ནང་སྙན་གྲགས་ཆེ་བའི་དྲན་རྟེན་བང་སོ་ཏཱ་ཇི་མ་ཧལ Taj Mahal ལ་གཟིགས་སྐོར་དུ་ཕྱིན་ཡོད་ཅིང་། སྲིད་འཛིན་ཁོང་གཉེན་སྒྲིག་བྱས་ཏེ་ཡུན་རིང་ཕྱིན་མེད་སྐབས་ཏེ་ ༢༠༠༨ ལོར་རྒྱ་གར་དུ་ཕེབས་དུས། ཐེངས་རྗེས་མར་བཟའ་ཟླ་དང་ལྷན་དུ་ཏཱ་ཇི་མ་ཧལ་ལ་གཟིགས་སྐོར་དུ་ཡོང་རྒྱུའི་དམ་བཅའ་བྱས་ཡོད་འདུག
གསར་འགོད་པ། བནྡེ་སྐྱབས།
