ས་མིང་རིག་གནས།

འདི་ལོའི་ཕྱི་ཟླ་ ༩ ཚེས་ ༢༧ ཉིན་མཚོ་སྔོན་མཚོ་ལྷོ་ཁུལ་གྱི་བོད་སྐད་ཡིག་ལས་དོན་སྡེ་ཁག་གིས་གཙོ་སྒྲུབ་གནང་བའི་༼ མཚོ་ལྷོ་ཁུལ་ས་མིང་རིག་གནས་བརྡ་འགྲེལ༽ གྱི་མཐའ་དཔྱོད་ཚོགས་འདུ་ཟེར་བ་ཞིག་མཚོ་ལྷོ་བོད་རིགས་རང་སྐྱོང་ཁུལ་གྱི་ཆབ་ཆ་རུ་སྐོང་ཚོགས་གནང་ཡོད་འདུག སྐབས་དེར་ས་མིང་རིག་གནས་བརྡ་འགྲེལ་ཞེས་པའི་ཚིག་མཛོད་ཀྱི་དཔེ་དེབ་ཅིག་ཀྱང་འདོན་སྤེལ་བྱས་ཡོད་འདུག་ཅིང༌། དཔེ་དེབ་དེའི་ནང་མཚོ་ལྷོ་ས་ཁུལ་གཙོ་བོར་བཟུང་སྟེ། སྡེ་བ་ཚོ་བ་དང༌། དགོན་པ། རི་ཁྲོད། རི་བྲག་ནག་གསུམ་དང༌། ཆུ་བོ། མཚོ་དང་མཚེའུ་སོགས་ལ་བོད་རང་གི་གདོད་མའི་ས་མིང་ཆུ་མིང་བརྡ་མ་འགྱུར་བ་དང་གཞན་སྐད་ཀྱི་ཤན་མ་ཞུགས་པ། དཔྱད་གཞིའི་ཡིག་ཆ་ཧ་ཅང་མང་པོ་སྔོག་བཤེར་དང༌། དམངས་ཁྲོད་མྱུལ་ཏེ་ངག་རྒྱུན་འཚོལ་བསྡུ་སོགས་བྱས་ཏེ་ཕྱོགས་བསྒྲིགས་བྱས་པ་ཞིག་ཡིན་འདུག

ཚོགས་འདུ་དེར་མཚོ་ལྷོ་ཁུལ་འཐབ་ཕྱོགས་གཅིག་གྱུར་ཁང་གི་འགན་འཛིན་སྟག་འབུམ་རྒྱལ་ལགས་ཀྱིས་གཙོ་སྐྱོང་གནང་བ་དང༌། མཚོ་ལྷོ་ཁུལ་གྱི་ཁུལ་དཔོན་གཞོན་པ་བསོད་ནམས་རྒྱལ་ལགས་ཀྱིས་མཚོ་ལྷོ་ཁུལ་གྱི་གཞི་རྩའི་གནས་ཚུལ་ངོ་སྤྲོད་དང༌། མཚོ་ལྷོ་ཁུལ་གྱི་ས་མིང་རིག་གནས་ལས་དོན་ཀྱི་དགོས་དམིགས་སྐོར་རྒྱས་བཤད་བྱས་ཡོད་འདུག

ཚོགས་ཞུགས་པའི་གྲས་སུ་པེ་ཅིན་ཀྲུང་དབྱང་མི་རིགས་སློབ་ཆེན་བོད་རིག་པ་སློབ་གླིང་གི་སློབ་སྤྱི་དགེ་བའི་བཤེས་གཉེན་ཚེ་རིང་ཐར་ལགས་དང༌། མཚོ་སྔོན་ཉིན་རེའི་ཚགས་པར་ཁང་གི་འགན་འཛིན་གཞོན་པ་དང་ལོ་ཙཱ་ལྷན་ཚོགས་ཀྱི་ཚོགས་གཙོ་དགེ་བསྙེན། ཀྲུང་གོའི་བོད་རིག་པ་ཞིབ་འཇུལ་ལྟེ་གནས་ཀྱི་ཆོས་ལུགས་ཞིབ་འཇུག་ཁང་གི་ཞིབ་འཇུག་མཁན་གསང་བདག ནུབ་བྱང་མི་རིགས་སློབ་ཆེན་གེ་སར་ཞིབ་འཇུག་པ་དང་འབུམ་རམས་པའི་སློབ་དཔོན་ལྷ་མཆོག་རྒྱལ། ནུབ་བྱང་མི་རིགས་སློབ་ཆེན་བོད་རིག་པ་སློབ་གླིང་གི་སློབ་དཔོན་ཆེན་མོ་བཀྲ་ཤིས་ཚེ་རིང༌། ལན་གྲུ་སློབ་ཆེན་གྱི་ལོ་རྒྱུས་རིག་གནས་སློབ་གླིང་གི་སློབ་དཔོན་འབྲུག་ཐར། ཀྲུང་གོའི་སྤྱི་ཚོགས་ཚན་རིག་ཁང་འཛམ་གླིང་ཆོས་ལུགས་ཞིབ་འཇུག་ཁང་གི་ཞིབ་འཇུག་མཁན་སྐལ་བཟང་རྒྱལ། མཚོ་སྔོན་དགེ་འོས་སློབ་ཆེན་དང་མི་རིགས་དགེ་འོས་སློབ་གླིང་གི་སློབ་གཙོ་གཞོན་པ་བཀྲ་བྷོ་སོགས་ཆེད་མཁས་པ་ ༢༧ ཙམ་ཐེངས་འདིའི་མཐའ་དཔྱོད་ཀྱི་ཚོགས་འདུའི་སྟེང་མཉམ་ཞུགས་གནང་སྟེ་གཏམ་བཤད་གནང་ཡོད་འདུག

གསར་འགོད་པ། དོན་འགྲུབ་བཀྲ་ཤིས།