ཟླ་འདིའི་ཕྱི་
རྒྱ་རིགས་ཀྱི་དྲི་བ། སྐུ་ཉིད་ང་ཕོད་ངག་དབང་འཇིགས་མེད་ཐོག་གཟིགས་ཚུལ་གང་འདྲ་ཡོད་པ་དང་། ཁོང་ནི་ཁྱེད་ཀྱིས་བཏང་པའི་སྐུ་ཚབ་ཡིན་ལ། ཀྲུང་དབྱིང་དང་གྲོས་མཐུན་དོན་ཚན་བཅུ་བདུན་བཞག་ཡོད། ཁྱེད་ཀྱིས་ཁོང་ལ་དེ་འདྲའི་དབང་ཆ་སྤྲད་མེད་ཀྱང་རྗེས་སུ་ཁྱེད་ཀྱིས་གྲོས་མཐུན་དེ་ཁས་ལེན་གནང་ཡོད། འོན་ཀྱང་རིམ་གྱིས་ང་ཕོད་ཁྱེད་ཀྱི་ཁ་གཏད་དུ་ལངས་ཏེ་བོད་ཀྱི་གནད་དོན་ཐོག་རྒྱ་གཞུང་གི་མགྲིན་ཚབ་པ་ལྟ་བུར་གྱུར་འདུག
ྋགོང་ས་མཆོག་གི་བཀའ་ལན། ངོས་ཀྱི་ང་ཕོད་ནི་ ༡༩༥༠ ལོའི་གོང་ནས་ངོ་ཤེས་ཀྱི་ཡོད། སྐབས་དེར་ང་ཕོད་ལ་རྒྱུས་ཡོད་མཁན་ཚོས་བརྗོད་ན། ང་ཕོད་ནི་མི་དྲང་པོ་དང་། ལྷག་བསམ་རྣམ་དག་ཅན་ཞིག་ལ་ངོས་འཛིན་བྱེད་ཀྱི་འདུག ངོས་ནས་ཀྱང་ང་ཕོད་ནི་གསར་བརྗེའི་བསམ་བློ་ཡོད་མཁན་ཞིག་ཏུ་མཐོང་སྟེ་ངེད་གཉིས་བློས་ཐུབ་ཏུ་གྱུར་ཏེ། ངོས་ནས་ཡིད་ཆེས་དང་ཆ་འཇོག་བྱེད་ས་གཙོ་བོ་དེ་ཆགས་ཡོད། གྲོས་མཐུན་བཞག་རྗེས་ལྷ་སར་ཐོག་མར་ཐུག་སྐབས་ང་ཕོད་ཀྱིས་ང་རང་ལ། གྲོས་མཐུན་དེ་འདྲ་ཞིག་མི་འཇོག་ཐབས་མེད་བྱུང་སོང་། གང་ཡིན་ཟེར་ན་གྲོས་མཐུན་དེ་འདྲ་ཞིག་མ་བཞག་ན་དྲག་པོའི་བཅིངས་བཀྲོལ་ཐོག་འགྲོ་རྒྱུ་ལས་མི་འདུག དེར་བརྟེན། དྲག་པོའི་བཅིངས་བཀྲོལ་ལས་ཞི་བའི་བཅིངས་བཀྲོལ་དགའ་བར་མཐོང་སྟེ། གྲོས་མཐུན་བཞག་པ་ཡིན། འོན་ཀྱང་མཐའ་མའི་དམ་ཕྲུག་རྒྱག་སྐབས་མདོ་སྤྱིའི་དམ་ཕྲུག་ཁྱེར་ཡོད་ཀྱང་། ཁོང་ཚོས་དམ་ཕྲུག་གསར་པ་ཞིག་བཟོས་ཏེ་བརྒྱབ་པ་ཡིན་ཞེས་ངོ་སྤྲོད་གནང་བྱུང་། མངོན་གསལ་དོད་ཤོས་ཤིག་ལ་ ༡༩༧༩ ལོར་ཏིན་ཞའོ་ཕིན་གྱིས་རླབས་ཆེན་གྱི་བསམ་བློ་གུ་ཡངས་ཤིག་བཏང་བ་དང་། ངོས་ནས་ཀྱང་བོད་དུ་ལྟ་སྐོར་ཚོགས་པ་ཞིག་བཏང་བ་ཡིན། སྐབས་དེར་སྐུ་ཚབ་ཚོགས་པ་ང་ཕོད་ལ་ཐུག་སྐབས་ང་ཕོད་ཀྱིས། དེ་སྔ་ཆིང་རྒྱལ་རབས་སྐབས་ཡིན་ན་འདྲ་ལ། གོ་མིན་ཏང་གི་སྐབས་ཡིན་ནའང་འདྲ། དགའ་ལྡན་ཕོ་བྲང་གི་ཁྱབ་ཁོངས་ནས་ཁྲལ་འཇལ་བ་དེ་འདྲ་རྩ་བ་ཉིད་ནས་བྱུང་མེད་པ་དེ་མཁྱེན་དགོས་པ་རེད། ཅེས་རྗོད་ཀྱི་འདུག གང་ལྟར། མི་རིགས་ཀྱི་བསམ་བློ་ཡོད་པའི་རྣམ་འགྱུར་གསལ་པོ་རེད། ༡༩༨༩ ལོར་ལྷ་སར་མི་མང་འཐུས་མིའི་ཚོགས་ཆེན་ཐོག་ང་ཕོད་ཀྱིས་ྋརྒྱལ་བ་རིན་པོ་ཆེ་གསེར་ཁྲི་མངའ་གསོལ་དང་། དེའི་གོང་གི་ཏཱ་ལའི་བླ་མའི་ཡང་སྲིད་ངོས་འཛིན་ཐག་གཅོད་བྱེད་ཕྱོགས་ནན་ཅིན་ཀྲེང་ཧྥུ་ (གོ་མིང་ཏང་སྲིད་གཞུང་) ནས་ཐག་གཅོད་བྱས་པ་རེད། ཅེས་པའི་ཡིག་ཆ་ཞིག་ཡོད་པ་དེའི་སྐོར་དེ་འདྲ་མ་རེད་ཅེས་དང་། ཏཱ་ལའི་བླ་མའི་ཡང་སྲིད་ནི་བོད་ཀྱི་རྒྱལ་ཚབ་ཀྱིས་ཐག་གཅོད་བྱས་པ་དང་། ཆོས་ཕྱོགས་ཀྱི་ལམ་ལུགས་ཐོག་ནས་ཐག་གཅོད་བྱས་པ་ཞིག་རེད། གསེར་ཁྲི་མངའ་གསོལ་སྐབས་མཛད་སྒོའི་གཙོ་སྐྱོང་པ་མེད། དེ་ནི་སྐབས་དེའི་གོ་མིན་ཏང་གི་ལས་ཀ་བྱེད་མཁན་གྱི་རྫུན་བཟོ་བྱས་པ་ཞིག་རེད། ཅེས་བཤད་པ་ནི་བདེན་པ་རེད། གསེར་ཁྲི་མངའ་གསོལ་སྐབས་ང་ལོ་ཆུང་ཆུང་ཡིན་ཡང་ངས་གསལ་པོ་དྲན་གྱི་འདུག མཛད་སྒོའི་སྐབས་རྒྱ་གར་དབྱིན་གཞུང་སྐུ་ཚབ་དང་། དེའི་རྗེས་སུ་རྒྱ་ནག་གི་སྐུ་ཚབ་དང་བལ་པོའི་སྐུ་ཚབ། འབྲུག་གི་སྐུ་ཚབ་བཅས་གྲལ་སྟར་གཅིག་ལ་སྡོད་ཀྱི་ཡོད་པ་ངས་གསལ་པོ་དྲན་གྱི་འདུག དེ་འདྲ་ཡིན་དུས་དེ་རིགས་ང་ཕོད་ཀྱིས་གང་ཐུབ་ཅི་ཐུབ་ཀྱིས་བདེན་པའི་གནས་ཚུལ་བཤད་ནས་གསལ་པོ་བཟོས་ཡོད། དེར་བརྟེན། ཐ་མ་ཁོ་རང་གཤེགས་རྗེས་ང་ཚོས་ཁོང་ལ་རྗེས་དྲན་བྱས་པ་ཡིན། འོན་ཀྱང་གྲོགས་པོ་ཁག་གཅིག་གིས་ང་ཕོད་ལ་རྗེས་དྲན་བྱས་པ་མ་འགྲིག་པ་རེད་ཅེས་ཤོད་མཁན་བྱུང་། དངོས་ཡོད་ཀྱི་གནས་ཚུལ་ལ་སྐབས་རེར་ཞེད་སྣང་གི་འོག་ནས་སྐད་ཆ་འདྲ་ཆགས་པོ་མ་བཤད་རང་བཤད་ཡོང་གི་ཡོད་པ་དེ་དག་ང་ཚོས་ཤེས་གསལ་རེད། དེ་འདྲ་ཡིན་དུས་ངོས་རང་ང་ཕོད་ལ་ཡིད་ཆེས་གཙང་མ་ཡོད། ད་ཆ་ཁོང་གྲོངས་ཟིན་ཀྱང་ངས་རྟག་ཏུ་ཁོང་ལ་སྨོན་ལམ་རྒྱག་གི་ཡོད།
རྒྱ་རིགས་ཀྱི་དྲི་བ། བཙན་བྱོལ་བོད་མི་ཁ་ཤས་ཀྱི་བྱ་སྤྱོད་ལ་ཁྱེད་ཀྱིས་སྟངས་འཛིན་གནང་ཐབས་བྲལ་བ་ཆགས་ཡོད་སྐོར་བདེན་པ་ཡིན་མིན་དང་། དེ་ལྟའི་གནས་ཚུལ་བྱུང་བར་ཁྱེད་ལ་གཟིགས་ཚུལ་གང་ཡོད་དང་། ཇི་ལྟར་གནང་རྒྱུ་ཡིན་ནམ།
ྋགོང་ས་མཆོག་གི་བཀའ་ལན། བོད་མི་བཙན་བྱོལ་བ་ཆིག་འབུམ་ལྔ་ཁྲི་ལྷག་ཙམ་ཡོད། བོད་སྤྱིའི་སེམས་ཁུར་ལེན་རྒྱུ་དང་ལྷག་བསམ་བཅང་རྒྱུའི་ཐད་ཕལ་ཆེར་བརྒྱ་ཆ་དགུ་བཅུ་གོ་དགུ་བློ་རྩེ་གཅིག་རེད། བསམ་ཚུལ་འདྲ་མིན་ངེས་པར་ཡོང་གི་རེད། དེ་ནི་ཡོང་དགོས་ངེས་ཤིང་ཀྱང་རེད། གང་ཡིན་ཟེར་ན་ང་ཚོ་འདིར་མང་གཙོའི་ཐོག་འགྲོ་ཡི་ཡོད། དངོས་གནས་གཏམ་བརྗོད་རང་དབང་དང་། བསམ་བློ་རང་དབང་། ག་རེ་ཡིན་ཡང་བཤད་ཆོག་པ་དང་ཤོད་དགོས་པ་རེད་ཅེས་འབོད་སྐུལ་བྱེད་ཀྱི་ཡོད། དེ་འདྲ་ཡིན་དུས་བསམ་ཚུལ་འདྲ་མིན་ཡོང་གི་ཡོད། དཔེར་ན་གཞོན་ནུ་ཚོགས་པར་མཚོན་ན་རང་བཙན་རྩོད་ཀྱི་ཡོད། ང་ཚོའི་དབུ་མའི་ལམ་ལ་ཁོང་ཚོས་སྐྱོན་བརྗོད་བྱེད་ཀྱི་ཡོད། སྐབས་རེར་ངས་ཁོང་ཚོར་ཐུག་གི་ཡོད་དེ་དུས་ངས་ཁོང་ཚོར། གལ་སྲིད་ཀྲུང་དབྱང་སྲིད་གཞུང་གི་རེ་བ་ལྟར་ན། ངས་ཁྱེད་ཚོ་མི་ཁག་ཅིག་འཛིན་བཟུང་དོ་དམ་བྱེད་དགོས་ཀྱི་ཡོད། འོན་ཀྱང་ང་ཚོ་རང་དབང་ལུང་པའི་ནང་དེ་འདྲ་བྱེད་སྲོལ་ཡོད་པ་མ་རེད། ངོས་ནས་དེ་འདྲ་ནམ་ཡང་བྱེད་ཀྱི་མ་རེད་ང་ཚོ་གཏམ་བརྗོད་རང་དབང་རེད་ཅེས་བརྗོད་ཀྱི་ཡོད།
རྒྱ་རིགས་ཀྱི་དྲི་བ། ངས་སློབ་དཔོན་ཁྱེད་ལ་བཀའ་འདྲི་ཞུ་རྒྱུར། འཚེ་མེད་ཞི་བ་དང་བདེན་པའི་ཨུ་ཚུགས་ (མཉམ་འབྲེལ་མི་བྱེད་པ་) ཀྱི་འཐབ་རྩོད་ཀྱིས་རྒྱ་དམར་ལ་ཁ་གཏད་གཅོག་སྐབས་ཕན་ནུས་ཡོད་དམ། ཡོད་ན་བོད་མི་ལ་འཚེ་མེད་ཞི་བ་དང་བདེན་པའི་ཨུ་ཚུགས་ཀྱིས་དངོས་ཡོད་ཀྱི་ཕན་འབྲས་ཅི་ཞིག་བྱུང་ཡོད་དམ།
ྋགོང་ས་མཆོག་གི་བཀའ་ལན། ངས་བོད་མི་ཚོར་རྟག་ཏུ་དེ་ལྟར་བརྗོད་ཀྱི་ཡོད། ང་ཚོས་མཐའ་གཅིག་ཏུ་འཚེ་བ་མེད་པ་མ་རྩར་བཞག་པའི་དབུ་མའི་ལམ་དུ་སྐྱོད་པ་འདིས་རྒྱ་ནག་གཞུང་དང་གྲོས་མོལ་བྱས་ཏེ། སྙིང་པོ་རྡོག་རྡོག་ཐོན་པ་ཞིག་བྱུང་མེད་ཀྱང་རྒྱ་རིགས་ཤེས་ཡོན་ཅན་དང་། སློབ་ཕྲུག དངོས་ཡོད་གནས་ཚུལ་ལ་དོ་སྣང་གིས་ཤེས་རྟོགས་ཡོད་མཁན་ཚོའི་ཁྲོད་དུ་རྒྱབ་སྐྱོར་ཧ་ཅང་ཤུགས་ཆེན་ཐོབ་ཡོད། དེ་ནི་ངའི་གྲུབ་འབྲས་ཀྱང་ཡིན། རྒྱ་ནག་གཞུང་ལ་འབྲེལ་བ་བྱ་རྒྱུར་དཀའ་ངལ་ཡོད་ཀྱང་། རྒྱ་རིགས་ཤེས་ཡོན་ཅན་དང་མི་མང་ནང་ང་ཚོས་འབྲེལ་བ་རྒྱ་ཆེན་པོ་བྱ་མ་ཐུབ་པ་མ་གཏོགས་ང་ཚོའི་ལངས་ཕྱོགས་ཀྱི་ཐོག་ལ་རྒྱ་ནག་མི་མང་གི་རྒྱབ་སྐྱོར་ཐོབ་ཐུབ་རྒྱུ་དང་མུ་མཐུད་གོང་འཕེལ་འགྲོ་ཐུབ་པ་ཞིག་ལ་མཐོང་གི་ཡོད། སྔོན་མ་གནམ་བདེ་སྒོ་མོ་ཆེའི་ཐང་ཆེན་གྱི་གནས་ཚུལ་བྱུང་རྗེས་ངོས་རང་ཨ་རིར་སླེབས་སྐབས་ཤིག་ལ་ཧ་ཝཌ་གཙུག་ལག་སློབ་གྲྭ་ཆེན་མོར་རྒྱ་རིགས་གྲོགས་པོ་འགའ་ཤས་ཐུག་པ་ཡིན། སྐབས་དེར་ང་ཚོའི་ལངས་ཕྱོགས་འགྲེལ་བཤད་བརྒྱབ་རྗེས་ཁོང་ཚོས། ྋརྒྱལ་བ་རིན་པོ་ཆེས་བརྗོད་བཞིན་པའི་ལངས་ཕྱོགས་འདི་རྒྱ་ནག་མི་མང་གིས་ཤེས་ཐུབ་པ་ཡིན་ན་རྒྱ་ནག་མི་མང་ཚང་མས་རྒྱབ་སྐྱོར་ཐོབ་པ་རེད་ཅེས་བརྗོད་བྱུང་།
རྒྱ་རིགས་ཀྱི་དྲི་བ། སྐུ་ཉིད་ཀྱིས་ཏཱ་ལའི་བླ་མའི་ཡང་སྲིད་ཀྱང་བཅོས་བསྒྱུར་ཆོག་པའི་སྐོར་ལ་འགྲེལ་བཤད་ཅིག་གནང་རོགས། དེ་ལྟར་བཅོས་བསྒྱུར་བྱས་ན་སངས་རྒྱས་ཀྱི་བཀའ་དང་འགལ་གྱི་ཡོད་དམ།
ྋགོང་ས་མཆོག་གི་བཀའ་ལན། ངོས་ནས་དང་ཐོག་དྲི་བ་འདི་འདོན་མཁན་ཁོང་ལ་སངས་རྒྱས་ཀྱི་བཀའ་བསྟན་འགྱུར་ཕྲན་བུ་ཀློག་རོགས་ཞེས་བརྗོད་འདོད་བྱུང་། རྒྱ་གར་དུ་བླ་མའི་ཡང་སྲིད་ངོས་འཛིན་བྱེད་པའི་ལུགས་སྲོལ་བྱུང་མེད། དེ་བཞིན་ཐའེ་ལན་ཌི་དང་འབར་མ། རྒྱ་ནག་སོགས་ནང་པའི་ལུང་པ་མང་པོ་ཞིག་ལ་བླ་མའི་ཡང་སྲིད་ངོས་འཛིན་བྱེད་སྲོལ་དར་མེད། སྐྱེས་བུ་དམ་འདི་དང་འདིའི་སྐུ་སྐྱེ་རེད་ཅེས་བརྗོད་དེ་ངོས་འཛིན་བྱེད་སྲོལ་ཡོད་པ་ལས། བླ་མའི་ཡང་སྲིད་ངོས་འཛིན་གྱིས་སྤྲུལ་སྐུ་ཟེར་བའི་ལུགས་སྲོལ་དེ་མེད། བོད་དུ་ཐོག་མར་ཕྲུ་གུ་ཆུང་ཆུང་ཞིག་གིས་སྐྱེ་བ་སྔོན་མ་ཧ་ཅང་གསལ་པོ་དྲན་ཏེ་ར་འཕྲོད་གསལ་པོ་བྱུང་བར་བརྟེན་ཡང་སྲིད་དུ་ངོས་འཛིན་བྱས་པ་རེད། དེའི་རྗེས་ག་ལེར་ག་ལེར་ཡང་སྲིད་ངོས་འཛིན་གྱི་ལམ་སྲོལ་དེ་སྤྱི་ཚོགས་ནང་གི་གྲལ་རིམ་ལྟ་བུ་ཆགས་གྲབས་བྱས་པ་རེད། དེར་བརྟེན། ངོས་ནས་ཡོངས་གྲགས་བྱས་ཏེ་སྤྲུལ་སྐུ་དང་བླ་མ་གཉིས་ལ་ཁྱད་པར་ཡོད། བླ་མ་ཡིན་ལ་སྤྲུལ་སྐུ་མ་ཡིན་པ་དང་། སྤྲུལ་སྐུ་ཡིན་ལ་བླ་མ་མ་ཡིན་པ། ཡང་གཉིས་ཀ་ཡིན་པ་ཡང་ཡོད་ཅེས་བཤད་ཡོད། སོ་སོས་སློབ་སྦྱོང་དང་ཉམས་ལེན་བྱས་ཏེ་ཚད་ལོངས་པ་ཞིག་ཡོད་པ་དེ་ལ་བླ་མ་ཟེར་གྱི་ཡོད། སྤྲུལ་སྐུ་ནི་དེ་འདྲའི་སློབ་སྦྱོང་གི་ཚད་ལོངས་པ་ཞིག་མེད་ཀྱང་བླ་མ་གོང་མ་ཚོའི་མིང་གི་ཐོག་ནས་སྤྱི་ཚོགས་ནང་གྲལ་རིམ་གྱི་ཐོབ་ཐང་ཡོད་སྟབས། རང་ཉིད་ལ་བླ་མའི་ཡོན་ཏན་གང་ཡང་མ་ཚང་བར་ཞབས་འདྲེན་ཞུ་མཁན་མང་པོ་ཡོང་གི་ཡོད། དེ་འདྲ་ཡིན་དུས་ངོས་ཀྱིས་ལོ་བཞི་བཅུ་ཙམ་གྱི་གོང་ནས་ང་ཚོ་བོད་ཀྱི་སྤྱི་ཚོགས་ནང་སྤྲུལ་སྐུ་ངོས་འཛིན་བྱེད་རྒྱུ་ཏོག་ཙམ་ཚོད་འཛིན་བྱ་དགོས་པ་དང་། ཚད་ལོངས་པ་དེ་འདྲ་མ་གཏོགས་གཞན་ཚད་ལྡན་མིན་པ་དེ་འདྲ་མང་དྲགས་ན་ཡག་པོ་མི་འདུག་ཅེས་བརྗོད་མྱོང་། ངོས་ནས་སྤྲུལ་སྐུའི་སྐོར་དོ་སྣང་བྱེད་པ་དེ་ནི་བསྟན་པའི་ཞབས་འདེགས་སྒྲུབ་པའི་ཆ་རྐྱེན་ཞིག་ཏུ་བརྩི་ཡི་ཡོད། ཏཱ་ལའི་བླ་མའི་ཡང་སྲིད་ལ་མཚོན་ན་ཕྱི་ལོ་ ༢༠༠༡ ལོར་མི་མང་གིས་འོས་བསྡུ་བྱས་ཏེ་ཆབ་སྲིད་ཀྱི་མགོ་ཁྲིད་བསྐོས་པ་ནས་བཟུང་སྟེ། ལོ་བཞི་བརྒྱ་ལྷག་གི་ལོ་རྒྱུས་ཡོད་པའི་ཏཱ་ལའི་བླ་མའི་ཆོས་སྲིད་གཉིས་ཀྱི་མགོ་ཁྲིད་ཀྱི་འགན་འཁུར་བའི་དུས་ཚོད་རྫོགས་པ་རེད། ༡༩༦༩ ལོར་ངོས་ནས་གཞུང་འབྲེལ་གྱི་གཏམ་བཤད་བྱེད་སྐབས། ཏཱ་ལའི་བླ་མའི་བླ་བྲང་དགོས་དང་མི་དགོས་མི་མང་གིས་ཐག་གཅོད་བྱེད་ཀྱི་རེད་ཅེས་ཡོངས་གྲགས་སུ་བཤད་པ་ཡིན། མ་འོངས་པར་ཏཱ་ལའི་བླ་མའི་ཡང་སྲིད་དགོས་དང་མི་དགོས་དང་། གལ་སྲིད་དགོས་ན་བྱེད་ཕྱོགས་གང་འདྲ་བྱ་དགོས་མིན་སོགས་སྔ་ལམ་རྐྱང་རྐྱང་ལ་བསམ་བློ་མ་བཏང་བར་དངོས་ཡོད་གནས་ཚུལ་ལ་བསམ་བློ་གཏོང་ཆོག་གི་རེད། དེ་ནི་སངས་རྒྱས་ཀྱི་དགོངས་པ་དང་ཡོངས་སུ་མཐུན་པ་ལས་དགོངས་པ་དང་མི་མཐུན་པ་མེད། ངོས་ནས་སྤྱིར་བླ་མའི་ཡང་སྲིད་དང་། ཡང་སྒོས་ཏཱ་ལའི་བླ་མའི་ཡང་སྲིད་སྐོར་ཡོང་སྲིད་པ་དེ་འདྲའི་འགྲེལ་བཤད་བྱེད་སྐབས་ཕལ་ཆེར་ཆོས་ལུགས་དང་འགལ་གྱི་ཡོད་པ་ལྟ་བུ་བོད་ནང་ཡོད་པའི་བོད་མི་འགའ་རེས་ཤོད་ཀྱི་འདུག ཉེ་ཆར་རྒྱ་རིགས་གྲོགས་པོ་འགའ་ཐུག་སྐབས་ཁོང་ཚོས་ཀྱང་འདིའི་སྐོར་དྲིས་བྱུང་། ནང་ཆོས་སྐོར་ཁྱོད་ཚོ་ལས་ངས་ཡག་པ་ཤེས་ཀྱི་ཡོད་ཅེས་བཤད་ཡོད།
རྒྱ་རིགས་ཀྱི་དྲི་བ། ད་ལྟ་རྒྱ་ནག་ཏུ་ཁྱེད་ཀྱི་ཐོག་ལ་ཁོང་ཁྲོ་དང་ཐ་ན་འཁོན་སེམས་གཏིང་ཟབ་ཡོད་པའི་མི་མང་པོ་ཞིག་ཡོད། དེ་དག་ལ་ཁྱེད་ཀྱིས་གང་ཞིག་གསུང་རྒྱུ་ཡོད་དམ།
ྋགོང་ས་མཆོག་གི་བཀའ་ལན། བར་སྐབས་ཤིག་ནས་ཏཱ་ལའི་བླ་མ་བདུད་རེད་ཟེར་མཁན་ཡོད་པ་གོ་སོང་། ཏཱ་ལའི་བླ་མ་བདུད་རེད་ཟེར་བ་དེ་ལ་ཁྱེད་རང་དགོངས་འཆར་གང་ཡོད་ཅེས་ང་ལ་སྐད་ཆ་འདྲི་མཁན་བྱུང་། ངས་ཁོང་ཚོར་རྩེད་མོ་དང་སྦྲགས་ཏེ། ང་བདུད་ཡིན། ངའི་མགོ་ལ་རྭ་ཅོ་ཡོད་ཅེས་ལབ་པ་ཡིན། ཁོང་ཚོར་ཡང་ཁག་ཡོད་པ་མ་རེད། ཁོང་ཚོས་ཕྱོགས་གཅིག་གི་གནས་ཚུལ་སྒྲོ་བཏགས་པ་དེ་ལས་གཞན་ཤེས་ཀྱི་མེད། དཔེར་ན། ཨོ་ལིམ་ཕིག་རྩེད་འགྲན་གྱི་དཔལ་འབར་སྐོར་སྐྱོད་སྐབས། ངས་ཆེད་མངགས་འབྲེལ་ཡོད་ཚོར་འབོད་སྐུལ་བྱས་ཏེ། ཨོ་ལིམ་ཕིག་རྩེད་འགྲན་ནི་རྒྱ་ནག་མི་མང་དུང་ཕྱུར་བཅུ་གསུམ་གྱི་སྤོབས་པ་ཡིན། དེ་ལ་ང་ཚོས་རྙོག་དྲ་བཟོ་བ་སོགས་རྩ་བ་ནས་བྱེད་མི་རུང་ཞེས་བརྗོད་ཡོད། ཐ་ན་ལོ་ཤས་གོང་ང་རང་ཨ་རིའི་རྒྱལ་ས་ཝ་ཞིན་ཊོན་ལ་ཡོད་སྐབས་ཤིག་ལ་གསར་འགོད་པ་ཁག་གཅིག་གིས་ང་ལ། ད་ཆར་ཨོ་ལིམ་ཕིག་རྩེད་འགྲན་རྒྱལ་ཁབ་གང་ཞིག་ཏུ་ཚུགས་ན་བཟང་མིན་གོ་བསྡུར་བྱེད་ཀྱི་ཡོད། འགའ་ཤས་ཀྱིས་རྒྱ་ནག་ཡག་པོ་ཡོད་སྐོར་བརྗོད་མཁན་འདུག་སྟབས། ཁྱེད་ལ་དགོངས་ཚུལ་གང་འདྲ་ཡོད་མེད་དྲིས་བྱུང་། ངས་ཁོང་ཚོར་རྒྱ་ནག་ནི་མི་འབོར་མང་ཤོས་དང་། ལོ་རྒྱུས་དང་རིག་གཞུང་ཕྱུག་པོ་ཡོད་པའི་རྒྱལ་ཁབ་ཅིག་ཡིན་པས། དེ་ལ་འོས་པ་རེད་ཅེས་བརྗོད་པ་ཡིན། དེ་ནི་དངོས་ཡོད་གནས་ཚུལ་ཡིན། འོན་ཀྱང་རྒྱ་ནག་གཞུང་གིས་ང་ཚོས་ཨོ་ལིལ་ཕིག་རྩེད་འགྲན་ལ་འགོག་རྐྱེན་བཟོ་བཞིན་འདུག་ཅེས་ཁྱབ་བསྒྲགས་ཤུགས་ཆེན་བྱས་ཡོད། གནས་ཚུལ་ཆ་ཚང་བ་ཤེས་ཀྱི་མེད་པ་འདིའི་ཐད་ནས་ཁོང་ཚོར་ཁག་མེད། ཚུར་ཕྱོགས་འཛམ་གླིང་གི་ས་ཕྱོགས་གང་སར་ང་ལ་དགའ་པོ་བྱེད་མཁན་ཧ་ཅང་མང་པོ་ཡོད། དེར་བརྟེན། ངས་ཁྱེད་རང་ཚོར་ཕྱོགས་ཚང་མའི་གནས་ཚུལ་ལ་རྟོགས་ཞིབ་ཡག་པོ་དང་ཞིབ་འཇུག་མཐིལ་ཕྱིན་པ་བྱེད་རོགས་ཞེས་བརྗོད་འདོད་བྱུང་། ང་རྒྱ་རིགས་སློབ་ཕྲུག་ཚོར་ཐུག་སྐབས་ཀྱང་། ཁྱེད་ཚོས་རང་དབང་ལུང་པའི་ནང་མིག་གཉིས་ཀ་དང་། རྣ་བ་གཉིས་ཀ་བེད་སྤྱོད་བྱེད་དགོས་ཅེས་ལབ་བསྡད་ཡོད།
རྒྱ་རིགས་ཀྱི་དྲི་བ། ང་ཚོས་ཤེས་གསལ་ལ། ཏཱ་ལའི་བླ་མའི་ཡང་སྲིད་ངོས་འཛིན་དང་ཁྲི་འདོན་མཛད་སྒོའི་ཐོག་ཀྲུང་ཧྭ་མི་སེར་རྒྱལ་ཁབ་ཀྱི་ཀྲུང་དབྱང་མཉམ་ཞུགས་བྱས་ཡོད། དེས་ན་༸གོང་ས་མཆོག་ཁྱེད་ཀྱིས་ད་ལྟ་ཐེ་ཝན་ལ་ཡོད་པའི་ཀྲུང་ཧྭ་མི་སེར་རྒྱལ་ཁབ་ངོས་འཛིན་གནང་གི་ཡོད་དམ། ཐེ་ཝན་གཞུང་གིས་ཡང་སྲིད་ངོས་འཛིན་གྱི་ལམ་ལུགས་ནང་བསྐྱར་དུ་ནུས་པ་གང་འཚམས་འདོན་ཐུབ་པར་དགོངས་ཀྱི་ཡོད་དམ།
ྋགོང་ས་མཆོག་གི་བཀའ་ལན། ངས་གོང་དུ་ང་ཕོད་ཀྱི་ལོ་རྒྱུས་བཤད་པ་ལྟར་རེད། སྤྱི་ཡོངས་ཀྱི་ཆ་ནས་ང་ཐེ་ཝན་ལ་ཡོད་སྐབས་ངོས་ཀྱིས་རྒྱ་ནག་གཅིག་ཟེར་བ་དེ་ལ་རྒྱབ་སྐྱོར་བྱས་ཡོད། གང་ལྟར་མ་འོངས་པར་རྒྱ་ནག་སྐམ་ས་ཆེན་པོ་དང་ཐེ་ཝན་གཉིས་ཆིག་སྒྲིལ་བྱ་རྒྱུ་ཕྱོགས་ཁག་གཉིས་ཀྱི་མི་མང་གིས་ཐག་གཅོད་བྱ་དགོས་པ་ཞིག་རེད། ག་རེ་གལ་ཆེ་བ་འདུག་ཅེས་བརྗོད་ན། ཐེ་ཝན་ནང་མང་གཙོ་ཡོད་པ་དང་། དཔལ་འབྱོར་ཡར་རྒྱས་ཡག་པོ་ཡོད་པ། དེ་བཞིན་ཤེས་ཡོན་གྱི་གནས་ཚད་ཀྱང་ཡག་པོ་ཡོད་པ་དེ་དག་ངེས་པར་དུ་སྲུང་སྐྱོབ་ཡག་པོ་བྱ་དགོས། ཞེས་ངོས་ནས་དེ་ལྟར་བརྗོད་ཀྱི་ཡོད།
མཇུག་མཐར་ཝང་ལི་ཞོན་གྱིས་མཇུག་བསྡོམས་ཀྱི་ཚུལ་དུ་༧གོང་ས་མཆོག་ལ། ང་ཚོས་ཏཱ་ལའི་བླ་མ་མཆོག་དངོས་སུ་མཇལ་ཡང་། ཏཱ་ལའི་བླ་མ་མཆོག་གིས་གསུངས་པ་ལྟར་ཕན་ཚུན་ལུས་ཀྱི་དྲི་མ་སྣོམ་རྒྱུ་མེད་ནའང་། དུས་རབས་ཉེར་གཅིག་པའི་ནང་དྲྭ་ལམ་བརྒྱུད་ནས་ཏཱ་ལའི་བླ་མ་མཆོག་དང་མཉམ་དུ་བཀའ་མོལ་ཞུ་ཐུབ་པ་བྱུང་བ་འདི་ཧ་ཅང་རྩ་བ་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད། དེ་འདྲ་ཡིན་དུས་བཀའ་མོལ་གྱི་ལས་རིམ་དེ་རིགས་ཀྱིས་བོད་རྒྱ་གཉིས་ཀྱི་འབྲེལ་ལམ་དང་། ཕན་ཚུན་ཤེས་རྟོགས་ལ་ཕན་འབྲས་འདུག་དགོངས་ཀྱི་ཡོད་ན་མ་འོངས་པར་རྒྱ་རིགས་ཀྱི་ཤེས་ཡོན་ཅན་དང་། གནད་ཡོད་མི་སྣ་མང་པོ་ཞིག་དང་མཉམ་དུ་བཀའ་མོལ་གནང་ཐུབ་པ་ཡོང་གི་རེད་བསམ་གྱི་འདུག་ལ་དེ་ལྟར་རེ་བ་ཡང་བྱེད་ཀྱི་ཡོད། ཅེས་བརྗོད་པའི་ལན་དུ་༧གོང་ས་མཆོག་གིས་སླར་ཡང་། ཧ་ཅང་ཡག་པོ་འདུག ཁྱེད་ཚོར་སྟབས་བདེ་པོ་ཡོད་ན་ངོས་ནས་ག་དུས་ཡིན་ཡང་རྒྱ་རིགས་གྲོགས་པོ་ཚོ་དང་མཉམ་དུ་བརྡ་འཕྲིན་གྱི་ལམ་ནས་ཕན་ཚུན་དོགས་གཅོད་དང་། དྲི་བ་དྲིས་ལན་བྱ་རྒྱུར་གྲ་སྒྲིག་ཨང་གསར་ཡོད། ངོས་ནས་རྟག་ཏུ་ཧན་ཙང་ཏཱ་ཐོན་ཇའེ་ ༼རྒྱ་བོད་མི་རིགས་མཐུན་སྒྲིལ་༽ཞེས་བརྗོད་ཀྱི་ཡོད། ང་ཚོ་འདི་ལྟར་ཡང་ཡང་ཐུག་སྟེ་སྐད་ཆ་ཤོད་རྒྱུའི་གོ་སྐབས་བྱུང་ན། ཕན་ཚུན་དོན་དམ་གྱི་ཡིད་ཆེས་བསླེབ་རྒྱུ་དང་། ཕན་ཚུན་གནས་ཚུལ་ཤེས་རྟོགས་ཐུབ་པ་ཡོང་གི་རེད། ཐག་རིང་པོ་བྱས་ཏེ་བསྡད་ན་ང་ཚོ་ཕན་ཚུན་བར་ཡིད་ཆེས་བསླེབ་མི་ཐུབ་ལ། ང་ཚོ་ཕན་ཚུན་བར་གྱི་གནས་ཚུལ་ཇི་ཙམ་གསལ་པོ་བཤད་རེས་བྱས་པ་དེ་ཙམ་གྱི་ཕན་ཚུན་བར་ཡིད་ཆེས་ཡོང་རྒྱུ་དང་། ཡིད་ཆེས་བྱུང་བ་ཡིན་ན་མཐུན་སྒྲིལ་ཡོང་རྒྱུ། མཐུན་སྒྲིལ་བྱུང་ན་དཀའ་ངལ་གང་ཞིག་ཡིན་ཡང་སེལ་ཐུབ་པ་རེད། ཅེས་བཀའ་ལན་གནད་འདུག་ལ། མཐར་སྐུ་རྩེད་དང་སྦྲགས། ཁྱེད་ཚོས་ངའི་གདོང་པ་གསལ་པོ་མཐོང་གི་འདུག་གམ། ངའི་མིག་གི་རྫི་མ་དཀར་པོ་ཡིན་པ་མཐོང་གི་འདུག་གམ། ཞེས་ཕན་ཚུན་ལ་ཐུགས་རྗེ་ཆེ་ཞུས་འདུག
བོད་ཡིག་འཁོར་ཡུག་མ་ཉམས་པ་དང་ཕྱི་སྐད་ཡར་རྒྱས་དགོས་ན། སྔར་རྒྱ་གར་ལེགས་སྦྱར་སྐད་བོད་ཡིག་ཏུ་ཡོད་པ་དང་། མཐར་ཕྱིན་སྦ་སྦུས་བོད་རིགས་དོན་དུ། བོད་ཡིག་ཐོག་ལ་་ཧིན་སྐད་བྲིས་ཚར་བ་རེད། ཨིན་སྐད་བོད་ཡིག་ཏུ་དགོས་མི་དགོས་མོ་ཤེས་ཀྱང་། རྒྱ་ནག་སྐད་དེ་བོད་ཡིག་ཐོག་སྦྱོང་པའི་ཐབས་ལམ་བཙལ་དགོས་པ་རེད། གཟུ་གནས་བློ་ལྡན་ལགས། ཁྱེད་རང་གལ་སྲིད་གསར་འབྱོར་བ་རྒྱ་སྐད་ཤེས་མཁན་ཅིག་ཡིན་ན། ང་ལྟ་བུ་རྒྱ་ཡིག་སྦྱོང་འདོད་མེད་ལ། རྒྱ་སྐད་སྦྱོང་འདོད་ཡོད་མཁན་ཚོའི་ཆེད་དུ། བོད་ཡིག་ཐོག་རྒྱ་སྐད་འབྲི་་ཐུབ་ན་ང་ཚོར་ཞེ་དྲགས་ཕན་ས་རེད། དེ་མིན་ཁྱེད་རང་གིས་བཀའ་བཀྱོན་གཏོང་དགོས་དོན་ཧ་གོ་མ་སོང་། ད་དུང་གསལ་བཤད་ཅིག་ཡོད་པ་ཞུ། དོ་སྣང་གནང་བར་ཐུགས་རྗེ་ཆེ་ལགས།
ཀརྨ་རྡོ་རྗེ་ལགས། དེ་ནི་༸གོང་ས་མཆོག་གི་གསུང་ཇི་བཞིན་ཡིག་ཐོག་ཕབ་པ་ལས། རྒྱ་ཡིག་མ་ཤེས་པར་སྒྲ་བསྒྱུར་བྱས་པ་མ་རེད་སྙམ། འོ་ན་ཝང་ལི་ཞུང་དང། ཐེན་པེའོ། ཅཱང་ཐེན་ཡུང་བཅས་ཀྱི་མིང་རྒྱ་ཡིག་ནང་བྲིས་པ་ཡིན་ན་ཡུལ་འགྱར་དུ་ཡོད་པའི་བོད་རིགས་ག་ཚོད་ཙམ་གྱིས་གོ་དོན་རྟོགས་ཐུབ་ཀྱི་རེད། དེ་ལ་ཐུགས་བསམ་བཞེས་མྱོང་ངམ། སེམས་ལ་བསམ་ཚད་མཛུབ་མོས་མ་གཏག་ན་བཟང་།
Wan Li Xion ལགས་ལ་སྙིང་ཐག་པ་ནས་ཐུགས་རྗེ་ཆེ་ཞུ། སྐུ་ཉིད་ཀྱིས་ད་བར་བོད་དོན་དང་རྒྱ་བོད་མི་རིགས་ཀྱི་གནས་སྟངས་ཐག་གཅོད་ཡོང་བར་ཐབས་ལམ་སྣ་ཚོགས་འཚོལ་བཞིན་པ་རྣམས་ལམ་ལྷོང་ཡོང་བའི་སྨོན་འདུན་ཞུ།
ངས་འདི་རིང་ཤེས་པའི་རྒྱ་སྐད་ཚིག་གསར་ཅིག་ཤེས་སོང་བ་ནི།
ཧན་ཙང་ཏཱ་ཐོན་ཇའེ་ = རྒྱ་བོད་མི་རིགས་མཐུན་སྒྲིལ།
བོད་ཡིག་ཏུ་བྲིས་པའི་རྒྱ་སྐད་སློབ་དེབ་ཅིག་ག་ནས་རག་གི་རེད།
༸གོང་ས་མཆོག་སྐུ་ཚེ་བསྐལ་བརྒྱར་བརྟན་པའི་སྨོན་ལམ་འདེབས།
དཔྱོད་ཡངས་ནགས་མཚོ་དང་རྒྱ་མཚོ་གཉིས་ལ་བཤད་རྒྱུར། ཁྱེད་གཉིས་ཀྱིས་ཡིག་ནོར་ལ་གཟབ་རོགས་གནང་། གཏག་ནོར་ཡིན་ན་ཡང་འདྲ། གང་ལྟར་གཟབ་གཟབ་གནང་རོགས།
ང་ཚོས་བོད་ཡིག་འདི་ལྟར་བེད་སྤྱོད་བྱས་ན་ཕན་ལས་གནོད་ཆེ་སེམས་སོ།།
ཝང་ལི་ཞོན་ལགས་ཐུགས་རྗེ་ཆེ་དཔེ་ཡག་པོ་འདུག་་་་་་་་་་༧གོང་ས་མཆོག་སྐུ་ཚེ་ཁྲི་ལོ་བརྟེན་པར་ཤོག་
འཛམ་གླིང་ཞི་བདེའི་དེ་དབོན་བོད་མི་ཆོས་སྲིད་གཉིས་ཀྱི་དབུ་ཁྲིད་གོང་ས་སྐྱབས་མགོན་ཡིད་བཞིན་ནོར་བུའི་སྐུ་ཚེ་ཁྲི་ལོ་བརྟན་པར་ཤོག ལོ་གསར་ནང་པའི་རྒྱ་བོད་མཐུན་སྒྲིལ་གྱི་མཛད་བརྩེ་ཨ་སྔོན་དགུང་དང་མཉམ་པར་ཤོག་ཤོག་ཤོག་ཤོག་ཤོག་ཤོག་ཤོག་ཤོག་