ཁྱེད་ཅག་བོད་པའི་འཐབ་རྩོད་ནང་མཉམ་ཞུགས་བྱ་དགོས།

གལ་སྲིད་བོད་ཀྱི་གནད་དོན་ཆབ་སྲིད་ཁོ་ན་ཞིག་ཡིན་ན། ངོས་ཀྱིས་ཇུས་གཏོགས་བྱེད་ཀྱི་མ་རེད། འོན་ཀྱང་བོད་དོན་སངས་རྒྱས་བསྟན་པ་དང་འབྲེལ་བ་ཆགས་ཡོད་དུས་ངོས་ཀྱིས་ཐེ་བྱུས་བྱེད་ཀྱི་ཡོད་ལ། ཁྱེད་ཚོས་ཀྱང་གདུང་སེམས་མཉམ་སྐྱེད་དང་འཐབ་རྩོད་ནང་མཉམ་ཞུགས་བྱ་དགོས།

ཕྱི་ཚེས་ ༡༢ ཉིན་༧གོང་ས་མཆོག་གིས་གནས་མཆོག་ཝ་ར་ཎ་སིར་བོད་ནས་བཀའ་ཆོས་ཞུར་བར་ཕེབས་མཁན་ ༡༨༠༠ ཙམ་དང་། ཧི་མ་ལ་ཡའི་རི་རྒྱུད་ནས་མི  ༧༠༠༠ གཙོས་པའི་འཛམ་གླིང་ཕྱོགས་མཐའ་ཁག་ནས་ཕེབས་པའི་དད་ལྡན་ཆོས་ཞུ་བ་སུམ་ཁྲི་ ༣༠༠༠༠ ལྷག་ལ་རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་ཆེན་མོ་དང་། སློབ་དཔོན་ཀ་མ་ལ་ཤིས་མཛད་པའི་སྒོམ་རིམ་བར་པའི་ཆོས་འབྲེལ་སོགས་མགོ་འཛུགས་གནང་ཡོད་ཅིང་། ཕྱི་ཚེས་ ༡༣ སྟེ་ཉིན་གཉིས་པར་༧གོང་ས་མཆོག་གིས་དགེ་སློབ་བར་གྱི་དམ་ཚིག་སྐོར་གསུངས་དོན། སེར་སྐྱ་མང་ཚོགས་ནང་དོལ་རྒྱལ་བསྟེན་མཁན་ཡོད་ན་དབང་ལ་མ་ཡོང་རོགས། གཞིས་ལུས་རྒྱ་ཆེའི་མི་མང་དང་བཙན་བྱོལ་དུ་ཡོད་པའི་བོད་མི་ཡིན་ནའང་རེད། དེ་བཞིན་ཧི་མ་ལ་ཡའི་རི་རྒྱུད་ཡིན་ནའང་རེད། བོད་ཀྱི་ཆོས་རྒྱུད་འཛིན་མཁན་ཡོངས་ནས་ངོས་ཀྱིས་དགེ་སྐྱོན་གསལ་བཤད་བྱས་རྗེས་སོ་སོས་བསམ་བློ་བཏང་སྟེ། དེ་སྔ་བསྟེན་མཁན་ཁག་ཅིག་གིས་དོལ་རྒྱལ་བསྟེན་མཚམས་བཞག་སྟེ་ཧ་ཅང་ཡག་པོ་བྱུང་ཡོད། བོད་ནང་དུ་མང་ཆེ་བ་ཧ་ཅང་ཡག་པོ་ཡོད་སྟབས་གསལ་བཤད་དགོས་དོན་མི་འདུག ངོས་ཀྱིས་རྟག་པར་བཤད་དགོས་དོན་མེད་ཀྱང་ཁ་ཤས་ཀྱིས། ༧གོང་ས་མཆོག་ལ་མཇལ་ཁ་ཞུས་ཀྱང་དོལ་རྒྱལ་སྐོར་ལ་གང་ཡང་གསུངས་མ་སོང་། གཅིག་བྱས་ནས་དེ་དཀྲོག་གཏམ་ཡིན་གྱི་རེད་ཅེས་བཤད་མཁན་འདུག ཁྲི་བྱང་རིན་པོ་ཆེ་དང་སྐྱབས་རྗེ་ཕ་བོང་ཁ་གཉིས་ནས་བསྟན་གྱི་ཡོད་ལ། དེའི་ཤུགས་རྐྱེན་འོག་ངོས་ཀྱིས་བསྟན་པ་རེད། ༡༩༧༠ ལོ་སྟོད་ནས་ངོས་རང་དོགས་པ་བྱུང་སྟེ། ཆོས་ཕྱོགས་ནས་བརྟག་དཔྱད་མང་པོ་བྱས་སྐབས་མ་འགྲིག་པ་མང་པོ་ཞིག་ཆགས་ཡོང་གི་ཡོད་སྟབས་བསྟེན་མཚམས་བཞག་པ་ཡིན། ཞེས་གསུངས།

ཕ་མེས་ཀྱི་ཆོས་ལུགས་ལ་འགྱུར་བ་མ་བཏང་ན་ཁེ་ཕན་ཡོད་པའི་སྐོར་ལ།  ངོས་ཀྱིས་འཛམ་གླིང་གི་ལྟ་གྲུབ་ཡོད་པའི་ཆོས་བརྒྱུད་ཚང་མར་གུས་ཞབས་བྱེད་ཀྱི་ཡོད་ལ།  ཆོས་བརྒྱུད་འཛིན་མཁན་ཚོས་ཀྱང་སོ་སོའི་ཆོས་བྱས་ནས་ཡག་གི་རེད། ཆོས་ལུགས་བརྗེ་ན་ཡག་པོ་མེད། ཅེས་བཤད་བཞིན་ཡོད།  ང་ཚོས་ཀྱང་སོ་སོའི་ཕ་མེས་ཀྱི་ཆོས་བརྒྱུད་འཛིན་ཐུབ་ན་ཡག་གི་རེད། ཡེ་ཤུའི་ཆོས་ལ་ཆ་བཞག་ན་འཛམ་གླིིང་མིའི་སྤྱི་ཚོགས་ཡར་རྒྱས་གཏོང་རྒྱུར་ཧ་ལས་པའི་ཞབས་འདེགས་སྒྲུབ་བཞིན་ཡོད་ཀྱང་། སྐབས་རེར་ཆོས་ལུགས་སྤེལ་རྒྱུའི་ལས་འགུལ་ཤུགས་ཆེན་ཡོང་བཞིན་འདུག  སོག་པོ་དང་ཀོ་རི་ཡར་མང་པོ་ཞིག་ཡེ་ཤུ་ཆོས་ལ་བསྒྱུར་ཚར་འདུག་ལ། ཝི་ཏི་ནམ་དུའང་། ལྷོ་བྱང་ཝི་ཏི་ནམ་ཡོད་སྐབས་སུ་བྱང་ཝི་ཏི་ནམ་གུང་ཁྲན་རེད། ལྷོ་ཝི་ཏི་ནམ་ཡེ་ཤུ་ཆོས་ལུགས་སུ་བསྒྱུར་འདུག ལྟ་གྲུབ་ཡོད་པའི་ཆོས་ལུགས་མེད་མཁན་གྱི་ས་ཁུལ་ཁག་ལ་ཡེ་ཤུའི་ཆོས་སྤེལ་ན་དགའ་བསུ་ཡོད། ལྷ་གསོལ་པ་ལས་ལྟ་གྲུབ་ཡོད་པའི་ཡེ་ཤུའི་ཆོས་བྱས་ན་ཡག་གི་རེད། ལྟ་གྲུབ་ཡོད་པའི་ཆོས་བརྒྱུད་གཅིག་གི་ས་ཁུལ་ལ་ཆོས་ལུགས་གཞན་ཞིག་སྤེལ་ན་དཀའ་ངལ་རེད། ཧི་མ་ལའི་རི་རྒྱུད་ནི་ཕ་མེས་ནས་སངས་རྒྱས་པ་ཡིན་དུས་དེ་བདག་པོ་རྒྱག་རྒྱུ་གལ་ཆེན་རེད། ཆོས་ལུགས་མ་བསྒྱུར་ཞེས་པ་ཆོས་ལུགས་གཞན་ལ་གུས་ཞབས་མེད་པའི་སྐད་ཆ་མིན་པར། ཕ་མེས་ཀྱི་གཅེས་ནོར་ངོ་ཤེས་པའི་ཐོག་བདག་པོ་རྒྱག་རྒྱུ་གལ་ཆེན་རེད། ཅེས་གསུངས།  

ཕྱི་ཚེས་ ༡༣ ཉིན་༧གོང་ས་མཆོག་གིས་ཧི་མ་ལ་ཡའི་རི་རྒྱུད་ཀྱི་མང་ཚོགས་ ༧༠༠༠ ཙམ་ལ་བོད་པའི་འཐབ་རྩོད་དེ་ཆབ་སྲིད་ཁོ་ན་མིན་པར་ཆོས་དང་འབྲེལ་བ་ཡོད་སྐོར་གསུངས་དོན། ངོས་ལ་ཆ་བཞག་ན་དགེ་སློང་ཞིག་ཡིན། བོད་ཀྱི་གནད་དོན་ནི་ཆབ་སྲིད་རྐྱང་པ་ཡིན་ན་ངོས་རང་དེའི་ནང་ཞུགས་ཀྱི་མ་རེད། ངོས་ཀྱིས་སྐབས་རེར་ཧི་མ་ལ་ཡའི་རི་རྒྱུད་ཀྱི་ཆོས་གྲོགས་ཚོར། རབ་བྱུང་ན་དགེ་འདུན་པ་ཚོ་ཆབ་སྲིད་ནང་མ་ཞུགས་ན་ཡག་གི་རེད་ལབ་ཀྱི་ཡོད། བོད་པའི་རྩ་དོན་འཐབ་རྩོད་དེ་ཆབ་སྲིད་ཙམ་ཆགས་ཡོད་པ་མ་རེད། འོས་བསྡུ་ཚར་སྐབས་དགོན་པའི་ནང་གི་དགེ་འདུན་པ་ཚོས་གཅིག་གིས་གཅིག་ལ་མིག་ལོག་གིས་བལྟས་ཏེ་སྡོད་པའི་བཟོ་འདྲ་ཞིག་ཡོང་གི་འདུག དེ་ནི་ཆབ་སྲིད་བྱབ་ཆུང་རེད། མང་གཙོ་ཆ་ཚང་མ་ཆགས་གོང་ལ་དེ་འདྲ་ཡོང་གི་ཡོད། མང་གཙོའི་རྒྱལ་ཁབ་དེ་དག་ནང་འོས་ལངས་སྐབས་རྩོད་པ་ཤུགས་ཆེན་པོ་ཡོང་ཡང་། འོས་མི་ཐག་གིས་བཅད་རྗེས་ཕན་ཚུན་ལ་ལག་པ་གཏོང་རེས་བྱས་ཏེ་ཧ་ཅང་འཆམ་མཐུན་ཡོད། གལ་སྲིད་བོད་ཀྱི་གནད་དོན་ཆབ་སྲིད་ཁོ་ན་ཞིག་ཡིན་ན། ངོས་ཀྱིས་ཇུས་གཏོགས་བྱེད་ཀྱི་མ་རེད། འོན་ཀྱང་བོད་དོན་སངས་རྒྱས་བསྟན་པ་དང་འབྲེལ་བ་ཆགས་ཡོད་དུས་ངོས་ཀྱིས་ཐེ་བྱུས་བྱེད་ཀྱི་ཡོད་ལ། ཁྱེད་ཚོས་ཀྱང་གདུང་སེམས་མཉམ་སྐྱེད་དང་འཐབ་རྩོད་ནང་མཉམ་ཞུགས་བྱ་དགོས། ཞེས་གསུངས་འདུག  

དེ་རིང་ཕྱི་ཚེས་ ༡༤ ཉིན་༧གོང་ས་མཆོག་གིས་ཝེ་ཏི་ནམ་དང་སོག་པོ། ཀོ་རི་ཡ། ཉི་ཧོང་། སི་ཕན། ཊི་ཊ་ལི། ཐེ་ཝན་བཅས་ནས་ཕེབས་པའི་ཆོས་ཞུ་བ་ ༡༨༠༠ ཙམ་ལ་བཀའ་སློབ་གནང་དོན། ལྟ་གྲུབ་ཀྱི་ཆ་ནས་ཆོས་ལུགས་ཕན་ཚུན་བར་མི་འདྲ་བའི་ཁྱད་པར་ཆེན་པོ་ཡོད་ལ་དེ་ནི་ང་ཚོར་དགོས་ངེས་ཤིག་ཀྱང་ཆགས་ཡོད།  སྟོན་པ་བཅོམ་ལྡན་འདས་ཀྱིས་ཀྱང་དགོས་དབང་གིས་ལྟ་གྲུབ་ཀྱི་རྣམ་བཞག་འགལ་ཟླ་ཡིན་པ་མང་པོ་གསུངས་ཡོད། ལོ་ངོ་སྟོང་ཕྲག་རིང་འཛམ་གླིང་ས་ཕྱོགས་འདྲ་མིན་དུ་ཡུལ་སྲོལ་གོམ་གཤིས་དང་། གནམ་གཤིས། འཚོ་བ་སྐྱེལ་སྟངས་མི་འདྲ་བ་ཡོད་པ་དེར་རང་བཞིན་གྱིས་བསམ་བློ་མི་འདྲ་བ་ཡོད་པ་ལས་བྱུང་རེད། ཡེ་ཤུའི་ཆོས་གྲོགས་ཚོས་སྟོང་པ་ཉིད་སྐོར་ལ་དོ་སྣང་བྱེད་སྐབས། ངོས་ཀྱིས་དེ་ནི་ནང་པའི་ལས་ཀ་ཡིན་པ་ལས་ཁྱེད་ཚོའི་ལས་ཀ་མ་རེད། ཅེས་བརྗོད་ཀྱི་ཡོད། ནང་ཆོས་ནས་གསུངས་པའི་སྟོང་ཉིད་ཀྱི་ལྟ་བ་དེ་ཡེ་ཤུའི་ཆོས་པ་ཚོས་འཛིན་པའི་འཇིག་རྟེན་བཀོད་པ་པོ་འདོད་པའི་བསམ་བློ་དེར་གནོད་ཀྱི་ཡོད་ཀྱང་། ནང་པ་ཚོས་ཡེ་ཤུའི་ཆོས་ལུགས་ནས་གསུངས་པའི་བསླབ་བྱ་མང་པོ་ལེན་དགོས་ཀྱི་ཡོད། ཆོས་ལུགས་མ་བསྒྱུར་བར་ཕན་ཚུན་བློ་བསྐྱེད་ལེན་རྒྱུ་མང་པོ་ཡོད་ནའང་། ཕ་མེས་ནས་ནང་པ་ཡིན་མཁན་ཚོས་རང་གི་ལེགས་བྱང་གི་རིན་ཐང་དེ་ཤེས་ཐུབ་དགོས་ཀྱི་ཡོད། ཅེས་གསུངས་ཡོད་འདུག

 གསར་འགོད་པ། དཔལ་ལྡན།