གྲོས་ཚོཊ་ནས་དགོངས་པ་བསྐྱར་དུ་བཞེས་དགོས་སྲིད།

དབུས་འོས་བསྡུ་ལྷན་ཁང་གིས་སྔོན་འགྲོའི་འོས་གྲངས་གསལ་བསྒྲགས་བསྐྱངས་རྗེས། འདི་གའི་གསར་ཁང་གིས་བསྐྱར་དུ་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་ལ། བཀའ་བློན་ཁྲི་པའི་ལས་རིགས་དང་འབྲེལ་བའི་བྱེ་བྲག་གི་གནད་དོན་ཁག་ཅིག་གི་ཐད་བཅར་འདྲི་ཞུས་ཡོད།

དྲི་བ། ཉེ་ལམ་བཀའ་ཁྲིའི་སྔོན་འགྲོའི་འོས་གྲངས་བཀྲམས་པ་ནས་སྐུ་ཉིད་དངོས་སུ་བཀའ་ཁྲིའི་འོས་མིར་བཞེངས་པ་ཡིན་གསུངས་འདུག དེ་ནས་ད་བར་ས་གནས་གང་དག་ཏུ་ཕྱོགས་སྐྱོད་དང་དྲིལ་བསྒྲགས་གནང་དུ་ཕེབས་ཡོད་དམ།

ལན། བཀའ་ཁྲིའི་སྔོན་འགྲོའི་འོས་བསྡུའི་གྲུབ་འབྲས་ཕྱིར་བསྒྲགས་གནང་དུས་ང་ཡང་འོས་གྲངས་མང་ཤོས་ཀྱི་མི་དྲུག་གི་ནང་དུ་ཚུད་འདུག དེར་བརྟེན་ང་ལ་ཚོགས་པ་སྐྱིད་སྡུག་གང་འཚམ་ཞིག་གིས་རྒྱབ་སྐྱོར་གནང་བ་དང་། མང་ཚོགས་ཀྱིས་ཀྱང་གང་འཚམ་རྒྱབ་སྐྱོར་གྱི་རྣམ་འགྱུར་ཐོན་སྟབས། ང་བཀའ་བློན་ཁྲི་པའི་འོས་ཁོངས་སུ་འདུག་རྒྱུར་ཐག་བཅད་པ་ཡིན། ངས་དེ་ལྟར་སེམས་ཐག་བཅད་རྗེས་བོད་མི་ཡོད་པའི་ས་གནས་ས་ཐོག་མང་བོར་ཕྱིན་ཏེ། ང་རང་ཉིད་ངོ་སྤྲོད་དང་ས་གནས་ས་ཐོག་གི་གནས་ཚུལ་ལ་རྟོག་ཞིབ། མི་མང་གི་བསམ་ཚུལ་ལ་ཉན་རྒྱུ་བཅས་ཀྱི་འཆར་གཞི་བཏང་བ་ཡིན། ད་ལྟ་ང་ཝ་རཱ་ན་སིར་ཡོད་ལ་མི་རིང་བར་རྒྱ་གར་ཤར་ཕྱོགས་ཁུལ་གྱི་ཀ་རྡོར་སྒང་གསུམ་དུ་འགྲོ་རྒྱུ་ཡིན། རྒྱ་གར་དུ་མ་ཡོང་བའི་སྔོན་དེར་ང་ལ་རྒྱབ་སྐྱོར་བྱེད་མཁན་རེ་ཟུང་གིས་སྐད་བཏང་བ་དང་ཁོང་ཚོས་ང་ཡར་མར་འགྲོ་རྒྱུའི་འགྲོ་སོང་ཐབས་ཤེས་བྱས་པར་མ་ཟད། ང་ས་ཁུལ་གཞན་ལ་འགྲོ་རྒྱུའི་འགྲོ་སོང་ཆེད་ཞལ་འདེབས་བསྡུས་པ་སོགས་བྱུང་སྟེ་ཨ་རི་དང་ཁེ་ན་ཌེའི་ས་ཁུལ་ཁ་ཤས་ལ་འགྲོ་ཐུབ་སོང་། ས་ཁུལ་དེ་ཚོར་སོང་དུས་མི་མང་ནང་བཀའ་བློན་ཁྲི་པའི་སྐོར་ལ་ཧ་ཅང་གི་དོ་སྣང་ཆེན་པོ་འདུག་ལ། ང་བཀའ་བློན་ཁྲི་པའི་འོས་མིར་བསྡད་པར་ཡང་རྒྱབ་སྐྱོར་བྱེད་མཁན་མང་བོ་འདུག དེ་བཞིན་ང་གང་དུ་སོང་ནའང་ངས་མི་མང་ལ་བཀའ་བློན་ཁྲི་པའི་གལ་གནད་སྐོར་དང་། ང་རང་ཉིད་བཀའ་བློན་ཁྲི་པའི་འོས་མིར་འདུག་དགོས་པའི་རྒྱུ་མཚན་བཅས་གང་ཐུབ་ཐུབ་འགྲེལ་བཤད་ཞུས། མི་མང་གི་དྲི་བར་ལན་བཏབས་པ་སོགས་གང་ལྟར་ད་ལྟའི་ཆར་ཧ་ཅང་ཡག་པོ་བྱུང་།

དྲི་བ། སྔོན་འགྲོའི་འོས་བསྡུའི་སྐབས་སྐུ་ཉིད་དང་བློ་བཟང་སེངྒེ་ལགས་ཀྱི་བར་འོས་གྲངས་ཀྱི་ཧེ་བག་ཆེན་པོ་བྱུང་བ་རེད་ལ། མང་ཚོགས་ཁྲོད་དེ་ནི་སྐུ་ཉིད་ཕྱོགས་སྐྱོད་དང་དྲིལ་བསྒྲགས་ཀྱིས་མ་འདང་བར་རྗོད་མཁན་འདུག དེ་ལྟར་རེད་དམ་ཡང་ན་རྒྱུ་རྐྱེན་གཞན་ཞིག་རེད་དགོངས་ཀྱི་ཡོད།

ལན། རྒྱུ་རྐྱེན་གཞན་རེད་བསམ་གི་མི་འདུག སྔོན་འགྲོའི་འོས་བསྡུའི་སྐབས་འོས་གྲངས་ལ་ཧེ་བག་ཡོང་རྐྱེན་གཙོ་བོ། བར་སྐབས་ཤིག་ནས་ངས་གཞུང་གི་ལས་ཀ་དེ་ཙམ་བྱས་མེད། ངས་སྤྱི་པའི་ཆེད་དུ་ལས་ཀ་ཅུང་ཙམ་བྱས་པ་དང་གྲུབ་འབྲས་གང་འཚམ་ཐོན་པ་དེ་ཚོ་ལོ་ཤས་སྔོན་རེད། དེར་བརྟེན་བོད་ཀྱི་སྤྱི་ཚོགས་དང་ལྷག་པར་དུ་ལོ་གཞོན་པ་རྣམས་ཀྱིས་ཤེས་ཀྱི་མེད་པའི་གནས་སྟངས་གཅིག་འདུག གཉིས་ནས་ཉེ་བའི་ལོ་འགའི་རིང་ང་བོད་ཀྱི་གཞིས་ཆགས་ཁག་ཏུ་འགྲོ་རྒྱུའི་གོ་སྐབས་བྱུང་མེད་ལ། བློ་བཟང་སེངྒེ་ལགས་ཉེ་བའི་ལོ་གཅིག་གཉིས་ནང་བོད་པའི་གཞིས་ཆགས་ཁག་དང་སློབ་གྲྭ་ཁག་ཏུ་ཕེབས་ཏེ། འབྲེལ་བ་ཤུགས་ཆེན་པོ་དང་དྲིལ་བསྒྲགས་ཡག་པོ་བྱུང་ཡོད་ས་རེད། ངས་དེ་ཙམ་ལས་གནས་ཚུལ་ཞིབ་ཕྲ་ཤེས་ཀྱི་མི་འདུག

དྲི་བ། དེང་སྐབས་༧གོང་ས་མཆོག་གིས་བགྲེས་ཡོལ་དུ་ཕེབས་འདུན་ཡོད་སྐོར་གསུང་གི་ཡོད་ལ། གལ་སྲིད་བགྲེས་ཡོལ་དུ་མ་ཕེབས་ནའང་སྔར་རྒྱུན་བཞིན་གཞུང་འབྲེལ་གྱི་གལ་ཆེའི་ཡིག་ཆའི་རིགས་ལ་མཚན་རྟགས་བསྐྱོན་རྒྱུ་སོགས་གནང་གི་མིན་སྐོར་གསུང་གི་ཡོད། དེ་ལྟར་བྱུང་ཚེ་སྐབས་གསུམ་པའི་བཀའ་ཁྲིའི་ཐུགས་འགན་ཆེ་རུ་འགྲོ་སྲིད་དམ།

ལན། ཡིན་དང་ཡིན། བཀའ་བློན་ཁྲི་པར་མི་གསར་བ་སུ་བསླེབ་ནའང་ཁོང་གི་ཐུགས་འགན་ཆེ་རུ་འགྲོ་ངེས། ང་ས་གནས་ཁག་ཏུ་ཕྱིན་སྐབས་༧གོང་ས་མཆོག་གིས་བགྲེས་ཡོལ་དུ་ཕེབས་འདུན་ཡོད་པའི་བཀའ་སློབ་ཕེབས་པ་དེར། བོད་མི་མང་བོས་སེམས་ཁྲལ་བྱེད་ཀྱི་འདུག དེར་བརྟེན་ངས་མི་མང་ལ་བསམ་ཚུལ་འདི་འདྲ་ཞིག་ཞུས་པ་ཡིན། ༧གོང་ས་མཆོག་ནི་བོད་མིའི་ཆོས་སྲིད་གཉིས་ཀྱི་དབུ་ཁྲིད་རེད་ལ། ཁོང་གིས་བོད་མི་མང་དང་བོད་ཀྱི་རྩ་དོན་དུས་ནམ་ཡང་བློས་གཏོང་གནང་གི་མ་རེད། ཡིན་ནའང་། ང་ཚོ་ཚང་མས་༧གོང་ས་མཆོག་ལ་གསོལ་འདེབས་ཞུས་ཏེ་བོད་ཀྱི་རྩ་དོན་དང་ཆོས་སྲིད་གཉིས་ཀྱི་ཐུགས་འགན་མུ་མཐུད་དེ་བཞེས་རོགས་ཞུ་རྒྱུ་དེ་ང་ཚོའི་ལས་འགན་ཆེན་པོ་ཞིག་རེད། དེ་མིན་༧གོང་ས་མཆོག་གི་བོད་ཀྱི་རྩ་དོན་སྟེང་ཐུགས་འགན་ཆེན་པོ་བཞེས་སྐབས། བཙན་བྱོལ་སྒྲིག་འཛུགས་ཀྱི་ངོས་ནས་གཞུང་གི་ལས་ཀ་ཆེ་ཆུང་མང་བོ་ཡོད་པ་ལས། འཛིན་སྐྱོང་གི་ལས་ཀ་ཆུང་བའི་རིགས་རྟག་ཏུ་ཁོང་ལ་ཐུགས་སུན་མི་བཟོ་བར། ང་ཚོས་གང་ཐུབ་ཐུབ་ཅིག་འགན་ཁུར་ཐུབ་ན་ཡག་པོ་རེད་ཅེས་ཞུས་པ་ཡིན།

དྲི་བ། སྐུ་ཉིད་ཀྱིས་ད་ཡོད་གཞུང་གི་སྲིད་ཇུས་གང་དག་ལེགས་བཅོས་དང་། གང་དག་ཚགས་ཚུད་དུ་གཏོང་དགོས་པར་མཐོང་གི་འདུག་གམ།

ལན། དེའི་སྟེང་དུ་ངས་ག་དུས་ཡིན་ནའང་བཙན་བྱོལ་བོད་གཞུང་ནི་བཙན་བྱོལ་མི་མང་གིས་འདེམས་བསྐོ་བྱས་པའི་གཞུང་གི་སྒྲིག་འཛུགས་ཆུང་ཆུང་ཞིག་ཡིན་མོད། ང་ཚོའི་དམིགས་ཡུལ་དེ་བོད་རྒྱལ་ཁབ་དང་མི་མང་གི་ཆེད་དུ་ཡིན་སྟབས། ལས་འགན་ཆེན་པོ་ཞིག་ཁུར་ཏེ་བོད་ནང་གི་དཀའ་རྙོག་སེལ་རྒྱུ་དང་བོད་མི་མང་གི་རེ་བ་འགྲུབ་རྒྱུར་འབད་བརྩོན་བྱ་དགོས་པ་རེད་བསམ་གྱི་འདུག དེར་བརྟེན་བོད་ཀྱི་གནད་དོན་སེལ་ཆེད་ད་ལྟ་དབུ་མའི་ལམ་གྱི་སྟེང་ནས་བོད་གཞུང་གིས་སྲིད་ཇུས་ཤིག་འཛིན་གྱི་ཡོད་ལ། དེ་བོད་མི་མང་སྤྱི་འཐུས་གྲོས་ཚོགས་ཀྱིས་གཏན་ལ་ཕབས་པ་དང་༧གོང་ས་མཆོག་གིས་བཀའ་སློབ་ལམ་སྟོན་གནང་བའི་དགོངས་གཞིའི་ཐོག་ཏུ་འགྲོ་བཞིན་ཡོད། དེར་བརྟེན་དབུ་མའི་ལམ་ནི་རྩ་བའི་ཆ་ནས་བོད་རྒྱ་གཉིས་ལ་ཁེ་ཕན་བསྒྲུབ་ཐུབ་པ་དང་ཞི་བའི་འཐབ་རྩོད་ཅིག་ཡིན་སྟབས། དེའི་ཐོག་ཏུ་མུ་མཐུད་དེ་འགྲོ་ཐུབ་ཆེད་འབད་བརྩོན་བྱ་དགོས། ཡིན་ནའང་ད་ལྟའི་ཆར་རྒྱ་ནག་གི་ངོས་ནས་༧གོང་ས་མཆོག་གིས་དེ་ལྟ་བུའི་གུ་ཡངས་གནང་ནའང་དོན་དམ་གྱི་འབྲེལ་ལམ་ཡག་པོ་བྱེད་ཀྱི་མེད་སྟབས། སྲིད་ཇུས་འདི་ལྟ་བུའི་རིགས་ལ་གྲོས་ཚོགས་ནས་དགོངས་པ་བསྐྱར་དུ་བཞེས་དགོས་པའམ། འདི་གཏིང་ཟབ་ཏུ་གཏོང་བ་དང་ཡར་རྒྱས་སུ་གཏོང་བ། ཡང་ན་ཐབས་ལམ་གཞན་པ་འཚོལ་དགོས་ཀྱི་ཡོད་མེད་སོགས་གནད་དོན་འདིའི་རིགས་ལ་བཀའ་བློན་ཁྲི་པའི་ལས་འགན་གྱི་ཆ་ནས་གྲོས་ཚོགས་ལ་གནས་ཚུལ་གསར་བ་ཞུ་དགོས་ཡོང་གི་རེད་ལ། ༧གོང་ས་མཆོག་ལ་སྙན་གསན་ཞུ་དགོས་པ་སོགས་གནད་དོན་མང་བོ་བསླེབ་ངེས་རེད།

དྲི་བ། དེས་ན་ད་ལྟའི་བོད་རྒྱ་འབྲེལ་མོལ་གྱི་གནས་བབ་ལ་གཟིགས་སྟངས་གང་འདྲ་ཡོད་པ་དང་། མ་འོངས་པར་བོད་རྒྱ་འབྲེལ་མོལ་ལ་ནུས་པ་འཐོན་རྒྱུར་ཕྱག་ལས་གང་འདྲ་ཞིག་གནང་ན་ལེགས་པར་དགོངས་ཀྱི་ཡོད།

ལན། གནད་དོན་དེའི་ཐོག་ཏུ་བཙན་བྱོལ་བོད་གཞུང་གི་ད་ལྟའི་བཀའ་བློན་ཁྲི་པ་གཙོས་དམིགས་བསལ་སྐུ་ཚབ་སོགས་འབྲེལ་ཡོད་རྣམས་ཀྱིས་མུ་མཐུད་སྐུ་ངལ་མང་བོ་བསྐྱོན་ཏེ། ཐབས་ཤེས་གང་ཡོང་ཅི་ཡོང་གནང་གི་ཡོད་པ་ངས་གསལ་བོར་ཤེས་ཀྱི་ཡོད་མོད། དེའི་ཐོག་ཏུ་ནུས་པ་འཐོན་རྒྱུ་དང་འགྱུར་བ་འགྲོ་རྒྱུར་གྲུབ་འབྲས་གང་ཡང་བྱུང་མེད། ད་ལྟ་ངས་བསམ་ན་བོད་རྒྱའི་གནད་དོན་དང་། དེའི་ནང་ནས་ཀྱང་འདས་པའི་ལོ་ལྔ་བཅུའི་རིང་རྒྱ་ནག་གི་སྲིད་ཇུས་གང་འདྲ་ཞིག་ནོར་བ། བོད་ལ་དཀའ་ངལ་ག་ཚོད་ཅིག་འཕྲད་པ་དང་། བོད་ལ་གཏོར་བཤིག་ག་ཚོད་ཅིག་བཏང་བ་བཅས་ཀྱི་ཐད་རྒྱ་ནག་གཞུང་དང་མི་མང་། མཁས་པ། ལྷག་པར་དུ་གུང་ཁྲན་ཏང་གི་མགོ་ཁྲིད་ཚོར་བསྐྱར་དུ་ཞིབ་ཚགས་པོས་ངོ་སྤྲོད་གསལ་བོ་ཞིག་བྱ་རྒྱུའི་དུས་ལ་སླེབ་འདུག་སྙམ། རྒྱ་ནག་བོད་ལ་ཐོག་མར་ཡོང་དུས་ནས་སྲིད་ཇུས་ཀྱི་གཞི་རྩ་སྟེ་རྒྱལ་རབས་ལོ་རྒྱུས་དང་ཁྲིམས་ཐོག་ནས་ནོར་འཁྲུལ་ཡོད་པ་དེ་གསལ་བོར་སྟོན་ཐུབ་ན། དེ་ཙམ་གྱིས་ད་ལྟའི་དཀའ་རྙོག་དེ་སངས་རྒྱུ་དང་༧གོང་ས་མཆོག་གི་དགོངས་པ་བཞེས་པ་དང་། བཙན་བྱོལ་བོད་གཞུང་གི་ཐབས་ཤེས་གནང་བ་བཅས་ལ་གཅིག་བྱས་ན་ཁོང་ཚོས་རིན་ཐང་གསར་བ་ཞིག་བསླེབ་སྲིད། གལ་སྲིད་རིན་ཐང་གསར་བ་ཞིག་བསླེབ་ན་འབྲེལ་མོལ་ལ་ཕན་ཐོགས་ཡོང་གི་རེད་སྙམ། གང་ལྟར་ངས་རྒྱལ་རབས་ལོ་རྒྱུས་དང་བོད་ཀྱི་དཀའ་རྙོག་གི་བྱུང་རིམ་རྒྱ་ནག་གི་མགོ་ཁྲིད་དང་མི་མང་ལ་བསྐྱར་དུ་ངོ་སྤྲོད་གསལ་བོ་ཞིག་བྱུང་ན། དེས་བོད་ཀྱི་རྩ་དོན་ཐོག་ཕན་གྱི་རེད་སྙམ།

དྲི་བ། སྐུ་ཉིད་ཀྱིས་འདས་པའི་མི་ལོ་༣༠ ལྷག་ལ་བཙན་བྱོལ་བོད་གཞུང་གི་འཛིན་སྐྱོང་ནང་ཕྱག་ལས་གནང་བ་རེད། ད་ཆར་བསྐྱར་དུ་བཀའ་བློན་ཁྲི་པར་བསླེབ་ན། དམིགས་བསལ་གྱི་ནུས་པ་ག་རེ་འཐོན་གྱི་རེད་དགོངས་ཀྱི་ཡོད་དམ།

ལན། དེའི་ཐད་སྔོན་མ་དང་མ་འདྲ་བ་ཞིག་ཡོད། སྔོན་མར་བཀའ་བློན་སུ་ཕེབས་ནའང་བཀའ་ཤག་ལྷན་རྒྱས་ཀྱིས་གྲོས་བསྡུར་བྱས་ཏེ་གནད་དོན་ཐག་གཅོད་བྱེད་ཀྱིན་ཡོད་པས། བཀའ་ཤག་ནས་ཐག་གཅོད་བྱུང་བ་ཚང་མ་མི་ལྔ་དྲུག་ཅིག་གིས་མཉམ་དུ་གྲོས་བསྡུར་བྱས་ཏེ་བསམ་བློ་མཐུན་པ་དང་འཆར་གཞི་ལྡན་པའི་ལས་ཀ་ཡིན་ལ། ལས་དོན་ཚང་མ་རྩ་བའི་ཆ་ནས་བརྟན་པོ་ཡོད་ནའང་འགོར་གཞི་ཆེན་པོ་ཡོང་གི་ཡོད། དེར་བརྟེན་ད་ལྟའི་སྐབས་ཀྱི་འགྱུར་བ་ཆེ་ཤོས་ནི་བཀའ་བློན་ཁྲི་པ་གཙོ་བོས་འགན་ཁུར་ཏེ་བོད་གཞུང་གི་ལས་ཀའི་ཐོག་ཏུ་འགྱུར་བ་གཏོང་རྒྱུ་དང་སྲེག་བཅད་བྱེད་ཀྱིན་ཡོད་སྟབས། ལས་ཀའི་ཐོག་ཏུ་ནུས་པ་འཐོན་ཐུབ་པའི་གོ་སྐབས་ཡོད་ལ། དེ་གལ་ཆེན་པོ་རེད་སྙམ། གཉིས་ནས་ངས་བོད་ཀྱི་སྤྱི་ཚོགས་ནང་དུ་ལས་ཀ་བྱས་པ་རེད་ལ་ཕྱི་ལོགས་སུའང་ལས་ཀ་བྱས་པ་རེད། དེར་བརྟེན་ངས་ཉམས་མྱོང་དེ་ཕྱི་ནང་གཉིས་ཀྱི་ཉམས་མྱོང་དང་སྦྲགས་ཏེ། ལས་དོན་འགའ་ཤས་ཐོག་བསམ་བློ་གཏོང་སྟངས་གསར་བ་ཟེར་ནའང་འདྲ། གང་ལྟར་དཀའ་ངལ་མ་ཡོང་སྔོན་ནས་གྲ་སྒྲིག་བྱ་རྒྱུ་དང་ཐབས་ཤེས་བྱ་རྒྱུའི་ཆ་རྐྱེན་ཞིག་ཚང་ཡོད། དེ་ངས་བསམ་ན་བཙན་བྱོལ་བོད་གཞུང་ཡར་རྒྱས་སུ་གཏོང་རྒྱུ་དང་ནུས་པ་འཐོན་རྒྱུའི་ཕྱོགས་ལ་ཕན་གྱི་རེད་སྙམ།

དྲི་བ། ལོ་སྔོན་མར་བཙན་བྱོལ་བོད་གཞུང་གིས་འདས་པའི་ལོ་ལྔ་བཅུ་ལས་ཀྱང་འབྱུང་འགྱུར་གྱི་ལོ་ལྔ་བཅུ་གནད་འགག་ཡིན་པར་ངོས་འཛིན་དང་། གྲ་སྒྲིག་གནང་གི་ཡོད་པ་ལྟར་འབྱུང་འགྱུར་གྱི་ལོ་ལྔ་བཅུར་ངེས་པར་དུ་གྲ་སྒྲིག་དགོས་ངེས་རིགས་དང་ཚགས་ཚུད་དུ་གཏོང་རྒྱུ་གང་དང་གང་ཡོད་དམ།

ལན། མ་འོངས་གྲ་སྒྲིག་བྱ་རྒྱུར་གཙོ་བོའི་གཙོ་བོ་བོད་ཀྱི་རྩ་དོན་བསྒྲུབ་རྒྱུར་དམིགས་ཡུལ་མ་བརླག་པ་བྱ་དགོས་པ་རེད་ལ། དེ་དྲན་གསོ་བྱ་རྒྱུ་གལ་ཆེན་པོ་རེད། ད་ལྟ་རྒྱ་གར་དང་བལ་ཡུལ་ནང་རང་བཞིན་གྱིས་དཀའ་ངལ་མང་བོར་འཕྲད་ཀྱིན་ཡོད་སྟབས། ག་དུས་ཡིན་ནའང་ང་ཚོའི་དམིགས་ཡུལ་ཆེན་པོ་དེ་གཙོ་བོར་འཇོག་དགོས། གཉིས་ནས་བཙན་བྱོལ་བོད་གཞུང་དེ་ང་ཚོ་རང་གི་མིས་བཟོས་པའི་སྒྲིག་འཛུགས་ཆེན་པོ་ཞིག་རེད་ལ། དེ་ག་དུས་ཡིན་རུང་ཡར་རྒྱས་སུ་གཏོང་རྒྱུའི་འགན་ཡོད་ལ་གོ་སྐབས་ཀྱང་ཡོང་གི་རེད། སྔ་མོའི་ལས་ཀ་བྱེད་སྟངས་དང་མི་འདྲ་བར་དེང་སྐབས་སྒྲིག་འཛུགས་ཤིག་ཡིན་ནའང་འདྲ། ཚོང་གི་སྡེ་ཚན་ཞིག་ཡིན་ནའང་འདྲ། ཡང་ན་གཞུང་གི་སྡེ་ཚན་གང་ཡིན་རུང་ལས་བྱེད་ལ་གསོ་སྐྱོང་ཡག་པོ་བྱ་རྒྱུ་དང་མུ་མཐུད་དེ་སྦྱོང་བརྡར་དང་སློབ་སྦྱོང་སྤྲོད་རྒྱུ་སོགས། གང་ཅིའི་ཐད་ནས་ལས་ཀ་བྱེད་མཁན་ལ་ལྟ་རྟོག་དང་རིན་ཐང་སྤྲོད་པ། མགོ་ཁྲིད་བྱེད་པ་བཅས་ཐབས་ལམ་གསར་བ་མང་བོ་ཞིག་འཛམ་གླིང་ཚང་མར་ཡོང་གི་ཡོད། དེའི་རིགས་བཙན་བྱོལ་ནང་དུ་ནུས་པ་ཆེ་རུ་གཏོང་དགོས་ཀྱི་རེད་སྙམ། དེ་བཞིན་བཙན་བྱོལ་བོད་གཞུང་ལ་ལས་ཀ་དང་འཆར་གཞི་མང་བོ་ཡོང་གི་རེད། དེ་ཚོ་བསྒྲུབ་རྒྱུར་དཔལ་འབྱོར་གྱི་གནས་སྟངས་གལ་ཆེན་པོ་རེད་ལ། དཔལ་འབྱོར་གྱི་མཐུན་རྐྱེན་མེད་ན་ང་ཚོས་ལས་ཀ་ག་རེ་ཡིན་ནའང་འགྲུབ་དཀའ་བས། དཔལ་འབྱོར་གྱི་སྟེང་དུ་བཙན་བྱོལ་བོད་གཞུང་གིས་ག་རེ་བྱ་དགོས་ཀྱི་འདུག དེའི་སྟེང་དུ་བསམ་བློ་གསར་བ་དང་ཐབས་ཤེས་གསར་བ།  འཆར་གཞི་གསར་བ་བསྒྲིག་དགོས་པ་གལ་ཆེན་པོ་རེད། 

དྲི་བ། དེང་སྐབས་ངྷ་ས་དང་ལྡི་ལི། བལ་ཡུལ་སོགས་ས་གནས་ཁག་ཅིག་ཏུ་བོད་ནས་གསར་དུ་འབྱོར་ཞིང་དཔལ་འབྱོར་དང་རྒྱབ་རྩ་ཅི་ཡང་མེད་པའི་གཞོན་སྐྱེས་ལས་མེད་མང་བོ་ཡོད་སྟབས། ཁོང་ཚོར་དམིགས་བསལ་གྱིས་ལྟ་རྟོག་རོགས་རམ་འདྲ་གནང་འཆར་ཡོད་དམ།

ལན། དེའི་སྐོར་ལ་བསམ་ཚུལ་ཕྲན་བུ་ཡོད། བོད་ནས་རྒྱ་གར་ལུང་པར་གསར་དུ་འབྱོར་བའི་བོད་མི་ཚོར་དཀའ་ངལ་ཆེན་པོ་ཡོད། ཡང་དམིགས་བསལ་གྱི་དཀའ་ངལ་ཆེན་པོ་མང་བོ་ཡོད་ཟེར་ནའང་ཤེས་ཀྱི་མི་འདུག ལོ་ཆུང་ཆུང་ཡིན་ཚེ་བོད་ཁྱིམ་དུ་ཚུད་ན་རིམ་གྱིས་སློབ་སྦྱོང་སོགས་གང་ཐད་ནས་ཡག་པོ་ཡོང་གི་ཡོད། ཁག་ཅིག་འཇིག་རྟེན་སྤངས་ཏེ་དགོན་པ་ཁག་ཏུ་ཆོས་ཀྱི་སློབ་སྦྱོང་བྱེད་དུ་འགྲོ་ཡི་ཡོད་ན་དེ་ཡང་འགྲིག་འགྲོ་བཞིན་ཡོད། དེ་མ་ཡིན་པའི་ན་གཞོན་མང་བོ་ཞིག་ལུང་པ་གསར་བ་ཞིག་ཏུ་མི་ཚེ་སྐྱེལ་དགོས་ཐོག སྐད་ཡིག་གི་དཀའ་ངལ་དང་དཔལ་འབྱོར་གྱི་དཀའ་ངལ། ཡང་རེ་ཟུང་ལ་སློབ་སྦྱོང་ཡག་པོ་ཡོད་ནའང་ལས་ཀ་ཏག་ཏག་མ་འགྲིག་པ་སོགས་དཀའ་ངལ་མང་བོ་ཞིག་ཡོད། དཀའ་ངལ་དེ་ཚོ་གསར་བའམ་ཉེ་བའི་ཆར་འཕྲད་ཀྱིན་པའི་དཀའ་ངལ་རིགས་ཤིག་རེད། དེའི་རིགས་ལ་བོད་གཞུང་གིས་ཞིབ་ཚགས་པོས་བལྟས་ཏེ་འཕྲལ་སེལ་གྱི་དཀའ་ངལ་སེལ་བ་ཙམ་མིན་པར་ཕུགས་རྒྱང་རིང་བོར་གང་འདྲ་བྱས་ཏེ་དཀའ་ངལ་སེལ་དགོས་ཀྱི་འདུག ཐབས་ཤེས་གང་དག་ཡོད་མེད་ལ་དམིགས་བསལ་དགོངས་པ་བཞེས་དགོས་པ་གལ་ཆེན་པོ་རེད། ངས་ཤེས་རྟོགས་བྱུང་བ་ལྟར་ན། སློབ་སྦྱོང་ཡག་པོ་ཐོན་པའི་ན་གཞོན་མང་བོ་ཞིག་བསླེབས་ཡོད་ནའང་སློབ་སྦྱོང་གིས་ལས་ཀ་ཡག་པོ་བྱ་རྒྱུ་མེད་པའི་དཀའ་ངལ་རིགས་ཤིག་འདུག དེ་ཚོར་ང་ཚོས་དམིགས་བསལ་གྱིས་བསམ་ཤེས་བྱ་དགོས་སྙམ།

དྲི་བ། བོད་གཞུང་འཆར་འགོད་ལྷན་ཁང་གིས་མི་འབོར་ཞིབ་བཤེར་སྐབས་ཀྱི་སྡོམ་ཐོ་ལྟར་ན། འདས་པའི་ལོ་ལྔ་བཅུའི་རིང་བཙན་བྱོལ་དུ་ཡིག་རྨོངས་སེལ་བའི་བརྒྱ་ཆ་ ༨༤ ཟིན་འདུག མ་འོངས་པར་ཤེས་ཡོན་གནས་ཚུལ་ཐོག་གཞི་རྐང་ཇེ་བརྟན་དང་ཚད་གཞི་ཇེ་མཐོར་གཏོང་རྒྱུར་དགོངས་བཞེད་འདྲ་ཡོད་དམ།

ལན། དེའི་སྟེང་དུ་ལམ་སེང་འདི་རེད་ཅེས་ཞུ་རྒྱུ་ཁག་ནའང་། སྤྱིར་དེང་སྐབས་སྤྱི་ཚོགས་གང་འདྲ་ཞིག་ཡིན་རུང་ཤེས་རིག་གི་མཐུན་རྐྱེན་དང་ཤེས་རིག་གི་གནས་ཚུལ་མཐོ་རུ་གཏོང་རྒྱུར་དགེ་མཚན་ཆེན་པོར་མཐོང་གི་ཡོད། དེར་བརྟེན་མུ་མཐུད་དེ་གསོ་སྐྱོང་དང་མུ་མཐུད་དེ་མཐུན་འགྱུར་རོགས་རམ་མ་བྱས་ན། སྤྱི་ཚོགས་མང་བོར་འགྱུར་བ་འགྲོ་བཞིན་ཡོད་སྟབས་ང་ཚོས་རྗེས་ཟིན་རྒྱུར་དཀའ་ངལ་ཡོད། སྔ་མོར་གཞི་རིམ་མམ་མཐོ་རིམ་སློབ་གྲྭ་ཐོན་ཚེ་ལས་ཀ་ཞིག་ཏུ་བསྡད་དེ་འགྲིག་འགྲོ་ཡི་ཡོད། དེང་སང་གི་དུས་ཚོད་འདིར་སློབ་གྲྭ་གང་འདྲ་ཞིག་ཐོན་ནའང་། ལོ་གཉིས་གསུམ་ནང་མུ་མཐུད་དེ་སྦྱོང་བརྡར་གསར་བ་དང་ལེགས་བཤད་གསར་བ་སྒྲུག་གིན་སྒྲུག་གིན་མ་བྱས་ཚེ། རིག་གནས་ཀྱི་ཆ་དང་ལས་དོན་གྱི་ཆ་གང་ཡིན་རུང་རྗེས་ལུས་ཐེབས་ཀྱི་ཡོད། དེ་ཚོའི་ཐོག་ཏུ་ང་ཚོའི་སྤྱི་ཚོགས་ནང་གཅིག་པུར་ཡར་རྒྱས་བཏང་བ་ཙམ་མིན་པར། ཕྱིའི་རྒྱལ་ཁབ་ཁག་གི་སྤྱི་ཚོགས་ཆེན་པོ་དེ་ཚོར་བལྟས་ཏེ། ཁོང་ཚོས་དེའི་ཐོག་ཏུ་གདོང་ལེན་གང་འདྲ་བྱེད་ཀྱི་ཡོད་མེད་ལ་ཆེ་ས་ནས་བལྟ་དགོས། དེ་ནས་བསླབ་བྱ་ལེན་དགོས་པ་ཏན་ཏན་མང་བོ་ཡོང་གི་རེད་སྙམ།

དྲི་བ། དེ་སྔོན་སྐུ་ཉིད་ཀྱིས་ཨ་རིར་བོད་མི་ཆིག་སྟོང་ཙམ་བཏང་བ་དང་། ཉེ་ཆར་ནས་བཟུང་ཁེ་ན་ཌར་བོད་མི་ཆིག་སྟོང་ལེན་འཆར་ཡོད་སྐོར་བརྗོད་ཀྱི་ཡོད། ཡིན་ནའང་བཀའ་ཤག་སྐབས་གཉིས་པས་བོད་མི་ཕྱི་རྒྱལ་དུ་འགྲོ་རྒྱུར་ཐུགས་མོས་ཆེན་པོ་གནང་གི་མེད་སྟབས། བོད་མི་ཕྱི་རྒྱལ་དུ་ཕྱིན་པར་དགེ་སྐྱོན་གང་ཡོད་དམ།

ལན། དེའི་ཐོག་ཏུ་སྤྱིར་བཏང་སོ་སོའི་ལུང་པ་བཞག་སྟེ་ཕྱི་ལ་འགྲོ་སྐབས་དགེ་དང་སྐྱོན་མང་བོ་ཡོད་ལ། ང་ཚོའི་གནས་སྟངས་ཀྱི་ཆ་ནས་རྒྱ་ནག་བོད་དུ་བསླེབས་ཏེ་བོད་མི་མང་བོ་ཞིག་བཙན་བྱོལ་དུ་ཡོང་བ་རེད། དེར་ང་ཚོས་ལོ་ལྔ་བཅུ་ཕྱིན་པའི་སྐབས་འདིར་ཞིབ་ཚགས་པོ་བྱས་ཏེ་བལྟས་ཚེ་དགེ་ལས་སྐྱོན་མེད། དེ་བཞིན་བཙན་བྱོལ་ནང་རྒྱ་གར་དང་བལ་ཡུལ་ནས་ནུབ་ཕྱོགས་རྒྱལ་ཁབ་ཨ་རི་དང་ཡུ་རོབ་ཁུལ་དུ་སྔོན་ནས་ཕྲན་བུ་ཕྲན་བུ་འགྲོ་བཞིན་ཡོད་མོད། མང་བོ་ཞིག་གིས་ཕྱི་རྒྱལ་དུ་བོད་མི་མང་བོ་ཕྱིན་ན་དེས་ང་ཚོའི་སྒྲིག་འཛུགས་ལ་ཕན་གྱི་ཡོད་དམ་གནོད་ཀྱི་ཡོད། ཡང་ན་ང་ཚོའི་བོད་ཀྱི་རིག་གཞུང་བརླག་གི་རེད་ཅེས་སེམས་ཁྲལ་བྱེད་ཀྱི་ཡོད། ཡིན་ནའང་། འདས་པའི་ལོ་བཅུའི་ནང་ཨ་རིར་བོད་མི་ཆིག་སྟོང་ཕྱིན་པ་དང་དེའི་རྗེས་ཁོང་ཚོའི་ནང་མི་ཚོ་ཕྱིན་ཏེ་ཨ་རིར་བོད་མི་མང་བོ་བསླེབས་ཡོད་པས། ང་ཚོས་སྤྱི་ཡོང་ནས་དགེ་སྐྱོན་གང་ཆེ་བ་འདུག་བལྟས་ན་དགེ་ཆེ་བ་འདུག སྤྱིར་རྒྱ་གར་གཞུང་མང་ང་ཚོར་བཀའ་དྲིན་ཆེན་པོ་ཡིན་ནའང་། བོད་མི་མང་བོ་ཞིག་རྒྱ་གར་ནང་དཀའ་ངལ་ཕྲན་བུའི་འོག་གནས་དུས་སྒེར་གྱི་དཀའ་ངལ་སངས། ནང་གི་གནས་སྟངས་ཡག་ཏུ་ཕྱིན། ལྷག་པར་དུ་ན་གཞོན་ཚོར་ཨ་རི་དང་ཡུ་རོབ་ནང་དུ་སློབ་སྦྱོང་དང་ལག་ཤེས་གསར་བའི་གོ་སྐབས་མང་བོ་ཞིག་རག་སྟེ། སྤྱི་ཡོངས་ནས་བོད་ཀྱི་གནད་དོན་ཐོག་ཡག་ཏུ་ཕྱིན་ཡོད།  རིག་གཞུང་སྲུང་སྐྱོབ་སྐོར་ནས་ལོ་གཞོན་པ་རྣམས་ལ་ཉིན་ལྟར་བོད་སྐད་རྒྱག་པ་དང་བོད་ཡིག་སྦྱོང་རྒྱུ་མེད་སྟབས། དཀའ་ངལ་ཕྲན་བུ་ཕྲན་བུ་ཡོད། དེ་བཞིན་ཉུང་ཤས་ལུང་པ་ཡག་པོ་ཞིག་ཏུ་བསླེབས་ནའང་གནས་སྟངས་ཡག་པོ་མ་ཆགས་པ་ཡོང་གི་འདུག་མོད། དེ་ལྟ་བུའི་ལུང་པ་ཡག་པོ་ཡིན་ནའང་རེད། སྐྱོ་བོ་ཡིན་ནའང་རེད། གང་ལྟར་ཉུང་ཤས་ཤིག་དཀའ་ངལ་ནང་དུ་ཚུད་ཀྱི་ཡོད་པ་དེ་གཅིག་མཚུངས་རེད། སྤྱི་ཡོངས་ནས་བོད་མི་སུ་ཡིན་རུང་དཔལ་འབྱོར་དང་ཁོར་ཡུག་གི་ཐོག་ནས་སོ་སོ་རང་གི་གནས་སྟངས་དང་ནང་མིའི་གནས་སྟངས་བརྟན་པོ་ཞིག་བྱུང་ཚེ། ཏན་ཏན་བོད་ཀྱི་རྩ་དོན་བསྒྲུབ་རྒྱུར་ཕན་ཐོགས་ཡོང་གི་ཡོད།

གསར་འགོད་པ། ཨ་རིག་འགྱུར་མེད།