མའོ་ཚོགས་པ་ཟླ་སྒྲིལ།

ཉེ་ཆར་རྒྱ་གར་ཕྱི་སྲིད་དྲུང་ཆེ་ལྕམ་ནེ་རུ་པཱ་མཱ་རོཡེ་ Nirupama Rao ལགས་བལ་ཡུལ་དུ་ཉིན་གསུམ་རིང་རྒྱལ་དོན་སྐོར་སྐྱོད་བྱས་ཡོད་ཅིང་། སྐབས་དེར་ཁོ་མོ་བལ་ཡུལ་ཕྱི་སྲིད་དྲུང་ཆེ་དང་། སྲིད་བློན། སྲིད་འཛིན། གྲོས་ཚོགས་ཚོགས་གཙོ་སོགས་ལ་མཇལ་འཕྲད་གནང་ཡོད་པ་མ་ཟད། ད་ལོའི་ཕྱི་ཟླ་དང་པའི་ཚེས་གཅིག་ནས་རྒྱ་གར་ནི་རྒྱལ་ཚོགས་ཀྱི་བདེ་འཇགས་ཚོགས་ཆུང་གི་ཚོགས་མིའི་གྲས་སུ་ཚུད་ཀྱི་ཡོད་སྟབས། ཁོང་གིས། བལ་ཡུལ་གྱི་ཚོགས་པ་ཆེ་ཁག་གིས་སོ་སོའི་འགལ་ཟླ་དང་ལྟ་ཚུལ་མི་མཐུན་པའི་རིགས་ཟུར་དུ་བཞག་ཏེ། ཚང་མའི་སྟོབས་ཤུགས་གཅིག་སྒྲིལ་གྱིས་བལ་ཡུལ་སྲིད་གཞུང་སྲ་བརྟན་ཡོང་ཐབས་དང་། བལ་ཡུལ་ནང་གི་རྒྱལ་ཚོགས་བདེ་འཇགས་དམག་དཔུང་ཕྱིར་འཐེན་བྱས་ཏེ། སྲིད་བློན་མཱ་ཌེཧྥུ་ཀུ་མར་གྱིས་སྣེ་ཁྲིད་པའི་དམིགས་བསལ་ཚོགས་ཆུང་གསར་འཛུགས་བྱས་པ་དེ་ལ་ཕྱོགས་འདེགས་བྱ་དགོས་པའི་སྐུལ་མ་བཏང་ཡོད་པ་རེད།

ཕྱི་ཚེས་ ༢༢ ཉིན་མའོ་ཚོགས་པའི་བཅིངས་གྲོལ་དམག་མི་(People’s Liberation Army) ༢༠༠༠༠ ཙམ་བལ་ཡུལ་གཞུང་ལ་རྩིས་སྤྲོད་བྱས་ཡོད་ཅིང་། ཉིན་དེར་བལ་ཡུལ་གྱི་ལྷོ་ཕྱོགས་ཅེ་ཊི་ཝན་རྫོང་དུ་ཡོད་པའི་མའོ་དྲག་ཆས་དམག་སྒར་དུ་སྲིད་བློན་མཱ་ཌེཧྥུ་ཀོ་མར་གཙོས་གཞུང་གི་དཔོན་རིགས་ཆེད་ཕེབས་ཐོག མའོ་ཚོགས་པའི་རུ་དར་གྱི་ཚབ་ཏུ་བལ་ཡུལ་རྒྱལ་དར་སྒྲེང་འཛུགས་བྱས་ཤིང་། ཉིན་དེ་ནས་བཟུང་མའོ་དྲག་ཆས་དམག་དཔུང་གི་བཀོལ་འདོམ་ཆ་ཚང་དང་། ཚོགས་པའི་ལས་དོན་ཀྱི་དབང་ཚད་ཡོངས་རྫོགས། ད་ལྟའི་བལ་ཡུལ་གཞུང་འཛིན་སྲིད་བློན་མཱ་ཌེཧྥུ་ཀོ་མར་གྱིས་སྣེ་ཁྲིད་པའི་དམིགས་བསལ་ཚོགས་ཆུང་དེར་ཡོད་པའི་གྲོས་མཐུན་ལ་མཚན་རྟགས་བཀོད་ཡོད་འདུག

ཐེངས་འདིར་མའོ་ཚོགས་པ་བལ་ཡུལ་གཞུང་འོག་ཏུ་ཟླ་སྒྲིལ་བཏང་ཟིན་ཡང་། མའོ་ཚོགས་པར་དགོས་འདུན་ཞིག་ཡོད་པ་ནི། དེ་སྔའི་མའོ་ཚོགས་པའི་དམག་མི་རྣམས་བལ་ཡུལ་དྲག་ཆས་དམག་མིའི་ཁོངས་སུ་གཏོང་དགོས་པ་དང་ཁོང་ཚོའི་གནས་རིམ་ཀྱང་སྔར་བཞིན་གནས་དགོས་པ་དེ་རེད། འདིའི་ཐད་བལ་ཡུལ་ཆབ་སྲིད་ཚོགས་པ་ཁག་ཅིག་གིས་དམག་མི་ ༥༠༠༠ ཙམ་བལ་ཡུལ་དམག་མིའི་ཁོངས་སུ་གཏོང་རྒྱུ་དང་། ལྷག་མ་རྣམས་ལ་ཚོང་ལས་སྦྱོང་བརྡར་སྤྲོད་པའམ། ཕྱི་རྒྱལ་ཁག་ཏུ་འགྲོ་འདོད་ཡོད་རིགས་ཚོར་དེ་ལྟར་མཐུན་འགྱུར་ཞུ་རྒྱུ་བཅས་ཀྱི་བསམ་ཚུལ་བཏོན་འདུག གཞུང་ཕྱོགས་ནས་ཆབ་སྲིད་བསམ་བློའི་ཤུགས་རྐྱེན་ཆེན་པོ་ཐེབས་ཡོད་པའི་མའོ་དམག་མི་རྣམས་རྒྱལ་སྲུང་དམག་མིའི་ཁོངས་སུ་འཇོག་རྒྱུ་དེ་ལས་སླ་བོ་ཞིག་མིན་ནའང་། གང་ལྟར། ཁོང་ཚོར་འཚོ་བ་གསར་བ་ཞིག་གོ་སྒྲིག་བྱ་རྒྱུའི་ཁེ་ལེན་བྱས་ཡོད་འདུག

གསར་འགོད་པ། བནྡེ་སྐྱབས།