ལེ་བྷེ་ཡ་ Libya མང་ཚོགས་ཀྱི་གསར་བརྗེ་འོས་ལངས་ལ་སྲིད་གཞུང་གིས་དྲག་གནོན་བྱས་པར། ཨ་རི་གཙོས་པའི་ནུབ་ཕྱོགས་རྒྱལ་ཁབ་མང་པོས་སྐྱོན་བརྗོད་བྱས་འདུག
ཉེ་བའི་དུས་སུ་ཨ་རབ་གླིང་གི་ཊོའུ་ནེ་ཤི་ཡ་དང་ཨི་ཇིབ་མང་ཚོགས་ཀྱི་ཡར་ལངས་ལ་རྒྱལ་ཁ་ཆེན་པོ་ཐོབ་སྟེ། སྲིད་གཞུང་མགོ་རྟིང་བསླགས་ཏེ་མང་ཚོགས་ལ་རང་དབང་དང་དམངས་གཙོའི་ལམ་ཆེན་དུ་བསྐྱོད་མགོ་ཚུགས་པ་དེས་དཀྱིལ་ཤར་ཁ་ཆེ་ཡུལ་གྲུ་གཞན་དག་མང་པོ་ཞིག་ལའང་ཤུགས་རྐྱེན་ཐེབས་ཏེ། ཨལ་ཇེ་རི་ཡ་དང་ཡེ་མིན། མོ་རོ་ཀོ་སོགས་རྒྱལ་ཁབ་དང་མངའ་སྡེ་མང་པོ་ཞིག་གི་མང་ཚོགས་ཚོས་སྲིད་དབང་སྒེར་སྤྱོད་ལ་ངོ་རྒོལ་གྱི་གསར་བརྗེ་ལས་འགུལ་གཅིག་རྗེས་གཉིས་མཐུད་དུ་སྤེལ་ཡོད་ཅིང་། ཉིན་འདི་འགར་ལེ་བྷེ་ཡའི་མང་ཚོགས་ཀྱིས་གསར་བརྗེ་ཡར་ལངས་ཤུགས་ཆེན་བྱེད་ཀྱི་ཡོད་པ་དང་། དེ་ལ་གཞུང་ཕྱོགས་ནས་དྲག་གནོན་བྱས་ཏེ་མང་ཚོགས་ལ་ཤི་རྨས་ཚབས་ཆེན་བྱུང་ཡོད་འདུག
ཕྱི་ཚེས་ ༢༠ ནས་༢༡ ཉིན་བར་ལེ་ངྷེ་ཡའི་གྲོང་ཁྱེར་ཆེ་ཤོས་བྷན་ངྒ་ཛེ་ Benghazi གཙོ་བོར་གྱུར་བའི་མང་ཚོགས་ཀྱི་ཡར་ལངས་ས་ཁུལ་ཁག་ཏུ། གཞུང་གི་དྲག་ཆས་དམག་མིས་གདུག་རྩུབ་ཆེན་པོས་དྲག་གནོན་བྱས་ཏེ། མང་ཚོགས་བརྒྱ་ཕྲག་མང་པོའི་ཚེ་སྲོག་ཤོར་ཡོད་སྟབས། ཨ་རི་གཙོས་པའི་རྒྱལ་སྤྱིའི་ཚོགས་སྡེ་ཁག་གིས་ལེ་བྷེ་ཡའི་སྲིད་འཛིན་གྷ་ཌཱ་ཧྥེ་ Muammar Gaddafi ལ་སྐྱོན་བརྗོད་ཤུགས་ཆེན་བྱེད་ཀྱི་ཡོད་པ་མ་ཟད། དྲག་གནོན་འགུལ་སྐྱོད་མཚམས་འཇོག་དགོས་པའི་འབོད་སྐུལ་དང་། ཕྱོགས་ཡོངས་ནས་གནོན་ཤུགས་སྤྲོད་ཀྱི་ཡོད་སྟབས། ཕྱི་ཚེས་ ༢༡ ཉིན་ལྡི་ལིར་ཡོད་པའི་ལེ་བྷེ་ཡའི་གཞུང་ཚབ་པ་སྐུ་ཞབས་ཨལ་ཨེ་སཱ་ཝེ་ Al-Essawai ལགས་གཞུང་ཚབ་ཀྱི་ལས་གནས་ལས་དགོངས་པ་ཞུ་དགོས་པ་བྱུང་འདུག དེ་ནི་ཁོང་གི་ཕ་ཡུལ་ལུང་པའི་མང་ཚོགས་ཀྱི་གསར་བརྗེ་འོས་ལངས་ལ་ལེ་བྷེ་ཡ་གཞུང་གིས་དྲག་གནོན་བྱས་པ་དེར་ངོ་རྒོལ་བྱས་པ་ཞིག་ཡིན་འདུག
ད་ལྟའི་ལེ་བྷེ་ཡ་གཞུང་གི་སྲིད་འཛིན་གྷ་ཌཱ་ཧྥེ་ཟེར་བ་དེས་འདས་པའི་མི་ལོ་ ༤༡ ལྷག་རིང་སྲིད་དབང་སྒེར་གཅོད་ཀྱིས་མི་གཅིག་དབང་སྒྱུར་གྱི་སྲིད་དབང་བཟུང་ཡོད་ཅིང་། ཉེ་ཆར་ལེ་བྷེ་ཡ་ཉེ་འཁོར་གྱི་སྲིད་དབང་སྒེར་གཅོད་བྱེད་མཁན་གྱི་སྲིད་གཞུང་ཁག་ཅིག་མགོ་རྟིང་སློག་ཡོད་སྟབས། ཐེངས་འདིར་ལེ་བྷེ་ཡ་མི་མང་ཚོས་ཀྱང་སོ་སོའི་སྲིད་གཞུང་ལ་གསར་བརྗེ་བྱས་ཏེ། འཛམ་གླིང་སྤྱིའི་འགྲོ་སྟངས་ལྟར་དམངས་གཙོ་དང་རང་དབང་གི་སྲིད་གཞུང་གསར་པ་ཞིག་འཛུགས་དགོས་པའི་རེ་འདུན་འོག གྲོང་ཁྱེར་ཆེ་ཁག་ནང་མི་མང་ཡར་ལངས་ཀྱི་ལས་འགུལ་འདི་སྤེལ་བ་ཞིག་ཡིན་འདུག
མི་མང་གི་འོས་ལངས་དེ་ལ་གཞུང་ཕྱོགས་ནས་དྲག་གནོན་བྱས་ཡོད་པ་མ་ཟད། སྲིད་འཛིན་གྱིས་མུ་མཐུད་མཁྲེགས་བཟུང་གིས་སྔར་ལས་དམ་དྲག་ཆེ་རུ་གཏོང་རྒྱའི་གྲ་སྒྲིག་ཡོད་པ་དང་། ས་གནས་ཁག་ཏུ་དྲག་ཆས་དམག་མི་འགྲེམས་མགོ་བཙུགས་ཡོད་སྟབས། ད་ཆར་མི་སེར་མང་པོ་ཞིག་ལེ་བྷེ་ཡའི་རྒྱལ་མཚམས་བརྒལ་ཏེ། ཊོའུ་ནེ་ཤི་ཡ་དང་ཨི་ཇིབ་སོགས་ཁྱིམ་མཚེས་རྒྱལ་ཁབ་ཁག་ལ་བྲོས་བྱོལ་དུ་འགྲོ་བཞིན་ཡོད་འདུག
གསར་འགོད་པ། བནྡེ་སྐྱབས།
འདི་ནི་འཛམ་བུ་གླིང་གི་སྲིད་དབང་སྒེར་གཅོད་པའི་པགས་པ་བཤུ་བའི་ཡོངས་ཁྱབ་རང་བཞིན་གྱི་ལས་འགུལ་ཞིག་ཏུ་འགྱུར་བཞིན་འདུག་པས་ཧ་ཅང་ལེགས་ལ། ཉེ་དུས་འདིར་རྒྱ་ནག་གྲོང་ཁྱེར་ཁ་ཤས་ཤིག་ཏུའང་མང་གཙོའི་ཡར་ལངས་རྣམ་པ་ཐེངས་འགར་བྱུང་འདུག་པ་ཡང་གསར་འགོད་པས་འཚོལ་ཞིབ་བྱས་ཏེ་ཀློག་པ་པོར་རྒྱུ་ཆ་རུ་སྤེལ་ན་ལེགས་པར་སྙམ།