དེང་སང་ཊེ་སྦེ་ན་ཚ་ཅན་མང་ཆེ་ཤོས་གཞོན་སྐྱེས་དང་། དེའི་ནང་ནས་ཀྱང་བོད་པའི་གཞོན་སྐྱེས་ཚོ་མང་ཤོས་ཆགས་ཡོད་སྟབས། ང་ཚོས་རྩེད་རིགས་འདི་བརྒྱུད་དེ་ན་ཚ་དེའི་རིགས་སྔོན་འགོག་གི་ཐབས་ཤེས་བྱ་དགོས་པའི་རེ་བ་ཞུ་བཞིན་ཡོད་ཟེར།
ཁ་སང་ཕྱི་ཚེས་༡༤ཉིན་གྱི་ཕྱི་དྲོ་གངས་སྐྱིད་ལག་རྩེད་སྤོ་ལོ་རྩེད་ཐང་དུ་བོད་གཞུང་འཕྲོད་བསྟེན་ལས་ཁུངས་བདེ་ལེགས་སྨན་ཁང་དང་། ཨི་ཊ་ལིའི་གཞུང་འབྲེལ་མིན་པའི་ཚོགས་པ་ AISPO བཅས་མཉམ་རུབ་ཐོག་འཛམ་གླིང་ཊེ་སྦེ་ཉིིན་མོ་སླེབས་ལ་ཉེ་བའི་སྐབས་དང་སྟབས་བསྟུན་ཏེ།ལག་རྩེད་སྤོ་ལོའི་འགྲན་བསྡུར་ཞིག་གོ་སྒྲིག་གནང་ཡོད་པ་དང་། དེ་ནི་བཙན་བྱོལ་སྤྱི་ཚོགས་ནང་ཊེ་སྦེ་(TB)ན་ཚ་ཁྱབ་བརྡལ་དུ་འགྲོ་བཞིིན་པ་དང་། དམིགས་བསལ་ཉེན་ཚབས་ཅན་གྱི་ Multi_Drug Resistant TB སྔོན་འགོག་དང་མཚམས་འཇོག བཀག་འགོག་བཅས་ཡོང་ཐབས་ལ་དམིགས་པ་ཞིག་ཡིན་འདུག དེའི་ཐད་བདེ་ལེགས་སྨན་ཁང་གི་ཨེམ་ཆི་ཚེ་བརྟན་ལགས་ཆེད་ཕེབས་ཀྱིས་འགྲན་བསྡུར་དབུ་འཛུགས་དང་མཉམ་དུ། ཐེངས་འདིའི་འགྲན་བསྡུར་གྱི་དམིགས་ཡུལ་དང་འབྲེལ་གཏམ་བཤད་གནང་དོན། དེང་སྐབས་ཊེ་སྦེ་ནད་གཞི་ཁྱབ་བརྡལ་ཏུ་འགྲོ་བཞིན་པར་བརྟེན། ང་ཚོའི་ངོས་ནས་གཞོན་སྐྱེས་ཚོས་དོ་སྣང་བྱ་རྒྱུ་གལ་ཆེན་དུ་གཟིགས་ཏེ་ལས་འགུལ་འདི་སྤེལ་བ་ཡིན། གང་ཡིན་ཞེ་ན། དེང་སང་ནད་གཞི་དེ་ན་མཁན་མང་ཆེ་ཤོས་གཞོན་སྐྱེས་ཆགས་ཡོད་པ་དང་། དེའི་ནང་ནས་ཀྱང་ན་ཚ་འདིའི་རིགས་ན་མཁན་མང་ཤོས་བོད་པའི་གཞོན་སྐྱེས་ཚོ་ཆགས་ཡོད་སྟབས། ང་ཚོ་ལས་ཁུངས་མི་འདྲ་བ་གསུམ་མཉམ་རུབ་ཀྱིས་རྩེད་རིགས་འདི་བརྒྱུད་དེ་བོད་པའི་གཞོན་སྐྱེས་ཚོའི་སྔར་ལྷག་དོ་སྣང་བྱ་ཡོང་བའི་རེ་བ་བྱེད་ཀྱིན་ཡོད་ལ། དེ་ཡང་བཙན་བྱོལ་ནང་གཅིག་པུ་མ་ཡིན་པར་གཞིས་སུ་གནས་པའི་བོད་མི་གཞོན་སྐྱེས་ཚོས་ཀྱང་རང་ངོས་ནས་ན་ཚ་དེའི་རིགསསྔོན་འགོག་བྱ་རྒྱུར་ཐབས་ཤེས་འདྲ་མིན་གནང་དགོས་པའི་རེ་སྐུལ་ཞུ་བཞིན་ཡོད། ཅེས་བརྗོད་བྱུང་།
སྐབས་དེར་ཁོང་ལ་ད་ལྟའི་ཆར་བོད་ཕྱི་ནང་གཉིས་ཀྱི་ཊེ་སྦེ་ན་ཚའི་གནས་སྟངས་ག་འདྲ་ཞིག་ཆགས་ཡོད་མེད་དང་། མ་འོངས་པར་ན་ཚ་དེའི་རིགས་ལ་སྔོན་འགོག་གི་ཐབས་ལམ་ག་འདྲ་ཡོད་མེད་དྲིས་པར། ཁོང་གིས། སྤྱིར་བོད་པའི་སྤྱི་ཚོགས་ནང་ཊེ་སྦེ་ན་ཚའི་གནས་སྟངས་དེ་སྔོན་མའི་དུས་དང་བསྡུར་ན་ཡག་ཏུ་ཕྱིན་ཡོད་པ་དང་། ལྷག་པར་དུ་འདས་པའི་ལོ་ ༢༠ ལྷག་གི་སྔོན་ནས་བཟུང་རྒྱ་གར་ནང་བསྡད་མཁན་དག་ལ་ན་ཚ་འདིའི་རིགས་ཉུང་བའི་གནས་སྟངས་ཆགས་ཡོད། ཡིན་ནའང་། ཕྱིས་སུ་ལོ་ལྔ་དང་དྲུག་གི་ཡར་སྔོན་ནས་བཟུང་བོད་ནས་བསླེབས་པའི་བོད་མིའི་ཁྲོད་ཊེ་སྦེ་ན་ཚ་ཡོད་མཁན་མང་རུ་ཕྱིན་པ་ལ་བརྟེན་ནས་བཙན་བྱོལ་ནང་ན་ཚ་དེ་མང་རུ་འགྲོ་བཞིན་པའི་གནས་སྟངས་ཆགས་ཡོད། དེ་དག་ལས་ང་ཚོས་བོད་ནང་ན་ཚ་དེའི་རིགས་ཁྱབ་ཆེན་པོ་ཡིན་པའི་རྟགས་གསལ་བོ་མཐོང་ཐུབ། དེ་ཡང་གཙོ་བོ། བོད་ནང་གི་བོད་མི་ཚོའི་འཕྲོད་བསྟེན་གྱི་གནས་སྟངས་དང་དཔལ་འབྱོར་གནས་སྟངས། སྤྱི་ཚོགས་ཀྱི་གནས་སྟངས་སོགས་དཀའ་ངལ་གང་མང་ཞིག་ལ་བརྟེན་ནས་བྱུང་བ་གསལ་བོ་རེད། ང་ཚོས་ཐད་ཀར་བོད་ནང་གི་གནས་སྟངས་འདིར་བདག་པོ་བྱ་ཐབས་མེད་ནའང་། མ་འོངས་པར་ང་ཚོས་བཙན་བྱོལ་སྤྱི་ཚོགས་གཅིག་པུ་མིན་པར་ཐབས་ཤེས་འདྲ་མིན་གྱི་ལམ་ནས་བོད་ནང་ན་ཚ་འདིའི་རིགས་སྔོན་འགོག་གི་ཐབས་ཤེས་བྱ་རྒྱུ་གལ་ཆེན་པོ་རེད་བསམ་གྱི་ཡོད། མ་འོངས་པར་བོད་ཕྱི་ནང་གཉིས་ཀྱི་བོད་མི་སུ་ཡིན་ཡང་། གཙོ་བོ་ཟས་བཅུད་དང་སྤྱོད་ལམ་སོགས་ཚད་དང་ལྡན་པ་ཞིག་ཡོང་ཐབས་བྱ་རྒྱུ་གལ་ཆེན་པོ་རེད། ན་ཚ་འདིའི་རིགས་གཙོ་བོ་སློབ་གྲྭ་དང་གྲྭ་ཚང་སོགས་མི་མང་པོ་འཛོམས་སའི་གནས་སུ་འགོས་ཁྱབ་དུ་འགྲོ་བཞིན་ཡོད་སྟབས། བོད་མི་ཚོས་ན་ཚ་དེ་དང་འབྲེལ་བའི་རྒྱུན་ཤེས་སྐོར་ཤེས་རྟོགས་བྱ་རྒྱུ་དང་། ནམ་རྒྱུན་འཕྲོད་བསྟེན་གྱི་ལམ་ནས་ན་ཚ་འདིའི་རིགས་ལ་རང་ངོས་ནས་སྔོན་འགོག་བྱ་རྒྱུ་གལ་ཆེན་པོ་རེད། ཅེས་བརྗོད་བྱུང་། གསར་འགོད་པ། དོན་གོ
ཧ་ཧ་སྨན་པ་གླན་པ་ཞིག་རེད་འདུག། ནད་ལ་དཔྱད་མི་ཤེས་ཀྱང་།ནད་དེའི་རིག་ཕོག་པའི་མི་ཞིག་གི་ཉིན་མཚན་ལྟོས་མེད་ཀྱི་ས་མཚམས་བརྒལ་དེ་ཁུར་ཡོང་མི་ཐུབ་པ་གསལ་པོ་མ་རེད་དམ།
སྨན་པ་ཚེ་བརྟན་སྨན་ལ་མཁས་སྲིད་ཀྱང་། བོད་ཕྱི་ནང་གི་གནས་སྟངས་ལ་རྒྱུས་མངའ་གཏན་ནས་མི་འདུག
གཞིས་ཀྱི་བོད་མི་རྣམས་ལ་སྤྱི་ཚོགས་ཆབ་སྲིད་ཀྱི་དཀལ་ངལ་ཡོད་དང་ཡོད་ན་ཡང་། དཔལ་འབྱོར་དང་འཕྲོད་བསྟེན་གྱི་གནས་སྟངས་རྒྱ་གར་གནས་སྡོད་པ་ལས་བཟང་དུ་མེད་ན་ངན་དུ་མེད་པ་སུས་ཀྱང་ཤེས་ངེས་རེད། གླེན་ལྐུག་ཞྀག་གམ་ཡང་ན་དྲང་བདེན་མིན་པས་འཁྱོག་བཤད་ཙམ་ལས་དོན་དངོས་གནས་ཚུལ་ཡང་ཁྱོན་ནས་མ་རེད། མ་ཟད་གསར་འབྱོར་རྣམས་བོད་ནས་TBན་ཚ་དང་བཅས་ཏེ་ཡོང་མཁན་བརྒྱ་ཆ་ཤིན་ཏུ་ཉུང་ཡང་། རྒྱ་གར་བསླེབས་དུས་འཚོ་བའི་ཆ་རྐྱེན་སྔར་ལས་སྐྱོ་བས་ཕྱི་གཟུགས་པོའི་ཟུང་ཟད། མི་རིགས་གང་མང་གི་བརྙས་བཅོས་ཡང་ཡང་མཐོང་ཞིང་མྱོང་བས་ནང་སེམས་ཀྱི་སྤྲོ་བ་གཞི་མེད་དུ་སོང་བས་ནད་ངན་འདི་བྱུང་བ་རེད།
བོད་ནང་དུ་ཊི་བྷིའི་ན་ཚ་མང་པོ་ཡོད་པའི་རྟགས་མཚན་རེད་ཟེར་བ་འདི་ནི་རྟགས་ཡང་དག་ཅིག་མ་རེད། བོད་ནས་ཕེབས་པའི་གཞོན་སྐྱེས་ཚོར་བོད་ནས་སླེབས་དུས་ནས་ཊི་བྷིའི་ན་ཚ་ཡོད་མཁན་དཀོན་པོ་ཡིན། རྒྱ་གར་དུ་སླེབས་རྗེས་ཟས་བཅུད་ཀྱི་མ་འདང་བ་དང་། སེམས་ཁམས་ལ་དཀའ་ངལ་འཕྲད་པ་། སློབ་སྦྱོང་ལ་ཤུགས་སྣོན་བརྒྱབ་པ་སོགས་ཀྱི་ཉེར་ལེན་ལས་ཊི་བྷིའི་ན་ཚ་བྱུང་བཞིན་ཡོད་པ་ཨེམ་རྗེ་མཆོག་གིས་བསྐྱར་དུ་ཉམས་ཞིབ་གནང་རོགས་ཞུ།