ཟླ་འདིའི་ཕྱི་ཚེས་ ༢༡ ཉིན་གྱི་དགོང་མོར་པེ་ཅིན་ཀྲུང་དབྱང་མི་རིགས་སློབ་ཆེན་བོད་རིག་པ་ཞིབ་འཇུག་གླིང་དུ་གློག་བརྙན་འགྲེམས་སྟོན་དཔྱད་བསྡུར་གྱི་ཚོགས་འདུ་ཞིག་བསྐངས་ཡོད་པ་དང་། བྱེད་སྒོ་དེར་ཀྲུང་དབྱང་མི་རིགས་སློབ་གླིང་གི་བོད་རིགས་སློབ་ཕྲུག་དག་གིས་བཟོ་སྐྲུན་དང་བསྡུ་བསྒྲིགས་བྱས་པའི་གློག་བརྙན་གསུམ་ལ་ཆེད་མཁས་པ་དང་། འཁྲབ་གཞུང་རྩོམ་པ་པོ་དག་གིས་དཔྱད་བསྡུར་བྱས་ཡོད་འདུག
ཐེངས་འདིར་འགྲེམས་སྟོན་བྱས་པའི་གློག་བརྙན་གསུམ་ནི། བོད་རིགས་ན་གཞོན་འཁྲབ་ཁྲིད་པ་དབང་མཆོག་འབུམ་ལགས་ཀྱི་༼ ལུག་རྫི་ཕག་ལོ ༽ དང་། ན་གཞོན་འཁྲབ་ཁྲིད་པ་ལྷ་མོ་བཀྲ་ཤིས་ལགས་ཀྱི་༼ གཟའ་ཉི་མ ༽ ། ན་གཞོན་འཁྲབ་ཁྲིད་པ་དཔལ་རྩལ་དང་ལྷ་མོ་ཚེ་བརྟན་གཉིས་ཀྱི་ ༼ ཤེས་རབ་ཀྱི་འཛུམ་མདངས ༽ སོགས་ཡིན་ཞིང་། བརྗོད་བྱ་དང་རྗོད་བྱེད། སྒྲིག་སྦྱོར་སོགས་ཕྱོགས་ཡོངས་ནས་བོད་མི་རིགས་ཀྱི་ཁྱད་ཆོས་འབུར་དུ་ཐོན་པར་བྱས་ཡོད་འདུག དེང་སྐབས་གློག་བརྙན་གཙོས་པའི་བརྡ་འཕྲིན་རིགས་གོ་ལ་ཧྲིལ་བོར་ཐོལ་གྱིས་ཁྱབ་བཞིན་པའི་སྒང་འདིར། བོད་ནང་གི་བོད་རིགས་གཞོན་སྐྱེས་མང་པོ་ཞིག་ལ་ཡང་རྟོག་སད་དང་ཧམ་སེམས་ཀྱིས་བརྟས་ཏེ། སྔ་ཕྱིར་བོད་རང་གིས་འཁྲབ་ཁྲིད་སྒྲིག་སྦྱོར་བྱས་ཤིང་། ནང་དོན་ཕུན་སུམ་ཚོགས་པའི་གློག་བརྙན་མང་པོ་ཞིག་རྒྱལ་སྤྱིའི་བརྙན་ཡོལ་ངོས་སུ་བསྟར་ཡོད།
