ངྷ་སའི་ཉེ་འཁོར་གྱི་སློབ་གྲྭ་བ་དང་།སེར་སྐྱ་མི་མང་གིས་རྔ་བ་ཀིརྟི་དགོན་པར་རྒྱ་གཞུང་གིས་དྲག་གནོན་བྱེད་བཞིན་པར་ངོ་རྒོལ་གྱིས་ཐེག་ཆེན་གཙུག་ལག་ཁང་ནས་ཀཱ་ཅཱ་རི་བར་ཞི་བའི་གོམ་བགྲོད་ཀྱི་ལས་འགུལ་ཅིག་སྤེལ་སོང་།
དེ་རིང་ཕྱི་ཚེས་༡༤ཉིན་གྱི་ཞོགས་པའི་ཆུ་ཚོད་༡༡སྟེང་ངྷ་ས་ཐེག་ཆེན་གཙུག་ལག་ཁང་དུ་བོད་ཀྱི་བུད་མེད་དང་བོད་ཀྱི་དགུ་བཅུ་གསུམ་ལས་འགུལ་ཚོགས་པ་གཉིས་ཀྱི་གོ་སྒྲིག་འོགཉེ་འཁོར་སློབ་གྲྭ་ཁག་གི་སློབ་མ་དང་།སེར་སྐྱ་མི་མང་བརྒྱ་ཕྲག་འགའ་མཉམ་འཛོམས་ཐོགརྒྱ་ནག་གཞུང་གིས་རྔ་པ་ཀིརྟི་དགོན་ལ་དྲག་གནོན་བྱེད་བཞིན་པ་མྱུར་དུ་མཚམས་འཇོག་དགོས་པ་དང་།རྒྱལ་སྤྱིའི་སྤྱི་ཚོགས་ནས་རྒྱ་ནག་གཞུང་ལ་གནོན་ཤུགས་སྤྲོད་དགོས་པ་བཅས་ཀྱི་དགོས་འདུན་དང་འབོད་སྐུལ་འོགཐེག་ཆེན་གཙུག་ལག་ཁང་ནས་ཀཱ་ཅཱ་རི་བར་ཞི་བའི་སྐད་འབོད་གོམ་བགྲོད་ཀྱི་ལས་འགུལ་ཅིག་སྤེལ་ཡོད།ཐོག་མར་མི་མང་གོམ་བགྲོད་པ་རྣམས་ཐེག་ཆེན་གཙིག་ལག་ཁང་དུ་འཛོམས་ཐོག ཆུ་ཚོད་སྐར་མ་གཅིག་རིང་འདས་གྲོངས་སུ་གྱུར་བའི་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་དུད་གནང་རྗེས། དགུ་བཅུ་གསུམ་གྱི་ཚོགས་གཞོན་ཀླུ་མཁར་བྱམས་ལགས་ཀྱིས་ལས་འགུལ་ངོ་སྤྲོད་དང་འབྲེལ་བརྗོད་དོན།ཐེངས་འདིའི་དོན་རྐྱེན་དང་འབྲེལ་ཏེ་ང་ཚོས་ལོ་རྒྱུས་ལ་ཕྱིར་མིག་ཅིག་བལྟས་པ་ཡིན་ན།མདོ་སྨད་ཕྱོགས་ལ་མཚོན་ན་སྔོན་མ་རྒྱ་ནག་མན་ཇིའི་སྐབས་སུ།སྒོ་མང་དགོན་པར་མེ་བརྒྱབ་ཏེ་གྲྭ་བ་སྟོང་ཕྲག་ཁ་ཤས་བསད་པ་རེད་ལ།རྒྱ་རོང་ས་ཁུལ་གྱི་བོན་དགོན་བླ་སྟིང་དགོན་པར་མེ་བརྒྱབ་ནས་གྲྭ་བ་སུམ་སྟོང་བཞི་སྟོང་བསད་པ་རེད།དེ་བཞིན་༡༩༣༦དང་༣༧ལོར་མ་པི་ཧྥང་གིས་བླ་བྲང་དགོན་པར་དམག་དྲངས་ཏེ།དགོན་པའི་གྲྭ་བ་དང་མི་སྐྱ་སྟོང་ཕྲག་མང་པོ་འཆི་ལམ་དུ་བརྫངས་པ་རེད།དོན་རྐྱེན་དེ་དག་གི་སྐབས་སུ་ས་ཁུལ་སོ་སོའི་ནང་རང་སྲོག་བློས་གཏོང་བྱེད་མཁན་གྱི་དཔའ་བོ་མེད་སོང་པ་མ་རེད།འོན་ཀྱང་།སྐབས་དེ་དག་ལ་ང་ཚོ་རིམ་པ་བཞིན་ཕམ་དགོས་པའི་རྒྱུ་རྐྱེན་ལ་ཕྱོགས་སྡོམ་བྱས་ཡོང་ན།བོད་མི་ས་ཡ་དྲུག་ལ་དེ་རིང་ནང་བཞིན་མཉམ་འབྲེལ་གྱི་ནུས་པ་དང་གོ་རྟོགས་མེད་པར་བརྟེན།ཐ་ན་མ་པི་ཧྥང་གི་ཁྱིམ་རྒྱུད་ཙམ་ཀྱང་ང་ཚོས་ཕམ་ཉེས་གཏོང་མ་ཐུབ་པ་རེད།ཅེས་དང་།
དེ་རིང་གི་རྔ་པ་ཀིརྟི་དགོན་པའི་གནས་སྟངས་ལ་བལྟས་ཡོང་སྐབས།སྔོན་མའི་རྒྱ་ནག་གི་བཀས་བཀོད་རྒྱུན་འཛིན་དང་ཞང་བྲན་ལམ་ལུགས་སྐབས་ཀྱི་དྲག་པོའི་གཞུང་དེ་དག་གིས་བོད་ཀྱི་ས་ཁུལ་ཁག་གི་དགོན་སྡེ་རབ་དང་རིམ་པར་གཏོར་སྐྱོན་བཏང་པའི་ལོ་རྒྱུས་རྣམས།ང་ཚོའི་མིག་ལམ་ལ་གསལ་ཐང་ངེར་འཆར་ཡོང་པའི་གནས་སྟངས་ཤིག་ཆགས་ཡོད་པ་རེད།ཡིན་ནའང་།ང་ཚོས་དྲན་གསོ་དགོས་པ་ཞིག་ནི།དེ་རིང་གི་བོད་དང་གནའ་སྔ་མོའི་བོད་གཉིས་རྩ་བ་ཉིད་ནས་འདྲ་བ་མ་རེད།དེ་རིང་བོད་ཕྱི་ནང་གཉིས་ལ་སྟོབས་ཤུགས་གྲུབ་ཡོད་པ་རེད་ལ།བོད་གཞིས་བྱེས་གཉིས་ཀྱི་སེམས་པ་གཅིག་ཏུ་སྒྲིལ་ཡོད་པ་དང་།བོད་ཆོལ་ཁ་གསུམ་གྱི་སྟོབས་ཤུགས་གཅིག་ཏུ་སྒྲིལ་ཏེ་རྒྱ་ནག་སྲིད་དབང་སྒེར་འཛིན་ལ་ཁ་གཏད་གཅོག་གི་ཡོད་པ་དེ་གཅིག་རེད། གཉིས་ནས།ད་ལྟའི་སྐབས་སུ་ང་ཚོ་ཧ་ཅང་གི་ཛ་དྲག་ཆགས་ཡོད་པ་རེད།མི་ཡིན་ན་རེད།སེམས་ཅན་ཡིན་ན་རེད།རང་ཉིད་ཀྱི་ཚེ་སྲོག་གི་མཐའ་མཇུག་ལ་སླེབས་ཡོང་དུས་ཁོ་རང་གི་ནུས་ཤུགས་གང་ཡོད་བེད་སྤྱོད་བཏང་སྟེ་ཕར་རྒོལ་བྱེད་ངེས་ཡིན་པ་ལྟར།རྒྱ་ནག་ཐེ་པའི་དེ་རིང་གི་སྲིད་དབང་སྒེར་སྤྱོད་པའི་གཞུང་དེ་དག་འཛམ་བུ་གླིང་འདི་ན་སྡོད་སའི་གནས་མེད་པ་ཆགས་ཡོང་གི་ཡོད་མ་རེད།འཛམ་གླིང་ནང་ཁོ་ཚོ་རྩ་མེད་འགྲོ་བཞིན་པའི་སྐབས་འདིར་རྒྱ་ནག་གཞུང་གིས་བོད་ཐོག་ལ་འཛིན་པའི་སྲིད་ཇུས་དང་།ཁོ་ཚོའི་མཐའ་མཇུག་གི་འཕག་འཚག་རྒྱག་པ་དེ་ཞེད་སྣང་ཚ་བོ་ཞིག་ཡིན་པ་བརྒྱ་ཆ་བརྒྱ་རེད།དེ་འདྲ་ཡིན་སྟབས་ང་ཚོ་བོད་ཕྱི་ནང་གཉིས་གང་ནས་ཡིན་ཡང་ཧ་ཅང་གི་གཟབ་གཟབ་བྱ་རྒྱུ་དེ་གལ་ཆེན་པོ་རེད་ཟེར།
ཁོང་གིས་མུ་མཐུད།ཐེངས་འདིའི་རྔ་པ་ཀིརྟི་དགོན་པའི་གནས་སྟངས་ཚུད་པའི་བོད་ཀྱི་ཆབ་སྲིད་བཙོན་པ་སྟོང་ཕྲག་འགའ་རྒྱ་ནག་གི་བཙོན་ཁང་དུ་ཡོད།འདི་ཛ་དྲག་གི་གནས་སྟངས་ཤིག་ཆགས་ཡོད་པ་རེད།ཁོ་ཚོས་གནས་སྟངས་འདི་ཡག་ཏུ་བཏང་ན་དེ་ང་ཚོའི་ཁེ་བཟང་རེད་ལ་མཐུན་རྐྱེན་ཡང་རེད།དེ་ལས་ལྡོག་སྟེ་རྔ་པ་ཀིརྟི་དགོན་པའི་གྲྭ་མང་རྣམས་བཙན་ཁྲིད་བྱས་ཏེ། སྔར་འཇར་མན་གྱི་ན་ཛེ་ ( Nazi ) ནང་བཞིན་སྒོ་ར་གཅིག་གི་ནང་ནས་བསད་པ་ཡིན་ནའང་།དེ་ང་ཚོའི་མཐུན་རྐྱེན་ཞིག་ཆགས་ཡོང་གི་རེད།རྒྱ་ནག་སྲིད་དབང་སྒེར་འཛིན་གཞུང་གིས་ཡག་སྡུག་གང་བྱས་པ་རྣམས་ང་ཚོའི་མཐུན་རྐྱེན་དང་ནུས་པ་ཞིག་ཆགས་ཡོང་གི་རེད་མ་གཏོགས་གྱོང་གུད་དུ་ནམ་ཡང་འགྱུར་མི་སྲིད།བོད་མི་རིགས་གཙོས་འཛམ་གླིང་ནང་གི་མི་རིགས་གཅིག་ལ་མི་རིགས་གཞན་ཞིག་གིས་གཉའ་གནོན་བཏང་ནས་རྫོགས་སོང་པ་ཞིག་ཡོད་པ་མ་རེད་ལ།རྒྱ་ནག་གིས་བོད་མི་རིགས་རྩ་མེད་གཏོང་ཐུབ་པ་ཞིག་དེ་བས་མ་རེད།དེ་རིང་གི་རྒྱ་ནག་གཞུང་ལ་བོད་མི་རིགས་རྩ་མེད་གཏོང་པའི་ནུས་པ་ཡོད་དམ་ཞེས་ན།ང་ཚོར་དོགས་པ་མེད་པའི་ཐོག་ནས་ཁོ་ཚོར་ནུས་པ་དེ་ཡོད་པ་མ་རེད།དེ་འདྲ་ཡིན་སྟབས་བོད་རྒྱའི་རྩོད་རྙོག་གི་མཐའ་མཇུག་ང་ཚོ་རྒྱལ་རྒྱུ་ཡིན་པར་ཐེ་ཚོམ་ཟ་དགོས་པ་ཞིག་མིན།དེ་རིང་གི་དཔར་སྒྲོམ་ནང་ན་ཡོད་པའི་རྒྱལ་གཅེས་དཔའ་བོ་ཕུན་ཚོགས་ལགས་དང་ཁོང་ལྟ་བུའི་དཔའ་བོ་རྣམས་ང་ཚོ་བོད་པ་གཅིག་པུའི་དཔའ་བོ་ཙམ་མ་རེད།ཁོང་ཚོ་འཛམ་གླིང་ནང་གི་སྲིད་དབང་སྒེར་སྤྱོད་པར་ངོ་རྒོལ་བྱེད་མཁན་དང་།རང་དབང་དང་དྲང་བདེན་ཆེད་ཚེ་སྲོག་གི་ལེགས་སྐྱེས་འབུལ་མཁན་ཡིན་སྟབས།ཁོང་ཚོ་ནི་འགྲོ་བ་མིའི་རིགས་ཀྱི་དཔའ་བོ་རེད།ཅེས་བརྗོད་སོང་།དེ་ནས་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ཀྱིས་རྒྱལ་སྤྱིའི་ཁྱོན་ལ་གསར་འགོད་གསལ་བསྒྲགས་ཤིག་སྤེལ་དོན།ད་ལྟ་བོད་ནང་གི་གནས་སྟངས་ཛ་དྲག་པོ་ཆགས་ཡོད་པ་དང་།ལྷག་པར་དུ་རྔ་པ་ཀིརྟི་མ་དགོན་དང་དགོན་པ་དེའི་གྲྭ་མང་ལ་རྒྱ་ནག་གཞུང་གིས་མི་སྤྱོད་ལས་འདས་པའི་དྲག་གནོན་དང་མནར་གཅོད་གཏོང་གི་ཡོད་པ་འཕྲལ་དུ་མཚམས་འཇོག་དགོས་པར།རྒྱལ་སྤྱིའི་སྤྱི་ཚོགས་དང་མཉམ་འབྲེལ་རྒྱལ་ཚོགས།དེ་བཞིན་མཉམ་འབྲེལ་རྒྱལ་ཚོགས་ཀྱི་ཚོགས་ཆུང་ཁག་བཅས་ཀྱིས་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུ་བཞིན་ཡོད།ཅེས་ཁྱབ་བསྒྲགས་གནང་སོང་།
མཐར་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གི་འགན་འཛིན་ཨོ་རྒྱན་བསྟན་འཛིན་ལགས་ཀྱིས།ཐེངས་འདིའི་རྔ་པ་ཀིརྟི་དགོན་གྱི་གནས་སྟངས་དང་བོད་ནང་གི་འགྲོ་བ་མིའི་ཐོབ་ཐང་གི་དཀའ་ངལ་ཐད་ནས་ངོ་སྤྲོད་གནང་དོན།ད་ལྟ་རྔ་པ་ཀིརྟི་དགོན་པའི་ཛ་དྲག་གནས་སྟངས་འདི་ཚང་མས་མཁྱེན་གསལ་ལྟར།༢༠༠༨ལོར་བོད་ཡོངས་སུ་མི་མང་ཞི་རྒོལ་ཆེན་མོ་བྱུང་ཞིང་།ལྷག་པར་དུ་ཕྱི་ཟླ་༣ཚེས་༡༦ཉིན་མདོ་སྨད་རྔ་པ་ཁུལ་གྱི་སེར་སྐྱ་མི་མང་གི་ཡར་ལངས་ལ་རྒྱ་གཞུང་གིས་མི་གསོད་ཁྲག་སྦྱོར་གྱི་དྲག་གནོན་ཚབ་ཆེན་བྱས་ཏེ།མི་ལོ་གསུམ་འཁོར་བའི་དུས་ཚིགས་དང་བསྟུན་ནས་ཀིརྟི་དགོན་པའི་གྲྭ་ཕུན་ཚོགས་ལགས་ཀྱིས་རང་ལུས་མེ་སྲེག་བཏང་པ་དང་།དེ་བཞིན་༢༠༠༩ལོའི་ཕྱི་ཟླ་༢ཚེས་༢༧ཉིན་ཀིརྟི་དགོན་པའི་གྲྭ་བཀྲ་བྷེ་ལགས་ཀྱིས་རང་ལུས་མེ་སྲེག་བཏང་བ་བཅས་ཀྱི་སྐབས་སུ་རྒྱ་ནག་ཉེན་རྟོག་པས་ཁོང་ཚོར་སྲོག་སྐྱོབ་ཉེན་གྲོལ་བྱེད་རྒྱུའི་ཚབ་ལ་དྲག་རྡུང་མནར་གཅོད་བཏང་པ་སོགས་ནི་རྒྱལ་སྤྱིའི་ཁྲིམས་དང་།རྒྱ་ནག་རང་གི་ཁྲིམས་ལུགས་དང་འགལ་ཡོད་པ་ཞིག་རེད།ཅེས་དང་།གྲྭ་ཕུན་ཚོགས་ལགས་ཀྱི་དོན་རྐྱེན་བྱུང་རྗེས་ཀྱི་ཕྱི་ཚེས་༡༧ཉིན་ནས་རྔ་པ་འབྲིང་རིམ་སློབ་གྲྭའི་སློབ་མ་རྣམས་ཀྱིས་ཕྱི་ཚེས༢༣བར་རྒྱ་གཞུང་གི་བྱས་ཉེས་ལ་ངོ་རྒོལ་དང་གྲྭ་ཕུན་ཚོགས་ལགས་ལ་གདུང་སེམས་མཉམ་སྐྱེས་ཀྱིས་ཟས་བཅད་ངོ་རྒོལ་བྱས་སྟབས།རྒྱ་གཞུང་གིས་མི་མང་ཡར་ལངས་ཡོང་པའི་ཉེན་ཁ་ཞིག་མཐོང་སྟེ།ཀིརྟི་དགོན་པར་དྲག་ཆས་དམག་མི་འབོར་ཆེན་བཏང་ནས་དགོན་པར་དམ་དྲག་བྱས་པ་དང་།ཕྱི་ཚེས་༡༩ནས་དགོན་པའི་ཉིན་རེའི་ཆོས་ཕྱོགས་ཀྱི་ལས་རིམ་རྣམས་བཀག་སྡོམ་དང་།གྲྭ་པ་རྣམས་ཕྱི་རུ་མ་བཏང་པ་དང་ཕྱི་མི་དགོན་པར་མ་བཏང་སྟབས།རིམ་བཞིན་གྲྭ་མང་གི་ཟས་འབྲུ་རྫོགས་པའི་གནས་སུ་གྱར་བ་རེད།
དེ་བཞིན་དགོན་པའི་ནང་རྒྱ་ནག་གིས་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་ཏེ།ཨང་དང་པོ་སོ་སོའི་རྒྱལ་ཁབ་ལ་དགའ་ཞེན་དང་གཙི་བཀུར་ཞུ་དགོས་པ།རྒྱལ་ཁབ་ཀྱི་ཆེད་དུ་སོ་སོའི་དགེ་རྒན་དང་རྩ་བའི་བླ་མ།༧གོང་ས་མཆོག་བཅས་ལ་སྐྱོན་བརྗོད་བྱ་དགོས་པ་དེ་རེད།དེ་འདྲ་མ་བྱུང་ན་གྲྭ་པ་ཚུལ་ལྡན་ཞིག་ཡོང་ཐབས་མེད་པ་སོགས་རྒྱལ་ཁབ་དང་དེའི་ཁྲིམས་ལ་གཙི་མཐོང་བྱ་དགོས་པའི་སློབ་གསོ་སྤྲོད་ཀྱི་ཡོད་པ་རེད།རྒྱལ་གཅེས་ཆོས་གཅེས་ཀྱི་སློབ་གསོའི་ལས་འགུལ་འདི་སྔོན་མ་བརྒྱད་ཅུ་གྱ་གྲངས་ནང་འབྲས་སྤུངས་དང་དགའ་ལྡན་སོགས་སུ་སྤེལ་ཏེ།རྒྱལ་གཅེས་ཆོས་གཅེས་ཀྱི་ལས་འགུལ་ལ་ངོས་ལེན་མི་བྱེད་མཁན་ཚོ་དགོན་པ་ནས་སྡོད་མི་ཆོག་པའི་གནས་སྟངས་ཆགས་སྟབས།གྲྭ་པ་མང་པོ་དགོན་པ་ནས་ཐོན་དགོས་པ་དང་རང་ཤི་རྒྱག་དགོས་པའི་གནས་སྟངས་ཀྱང་བྱུང་ཡོད་པ་རེད།འདས་པའི་ཉིན་ཤས་གོང་ནས་ཀིརྟི་དགོན་པའི་ནང་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་སྐབས་གྲྭ་པ་མང་པོ་རླངས་འཁོར་དུ་བཅུག་ཏེ་ཁྲིད་འགྲོ་བ་དེ་དག་རིམ་བཞིན་དགོན་པ་སྟོང་པ་བཟོ་རྒྱུའི་ཇུས་ངན་ཞིག་རེད།
གནས་སྟངས་འདི་འདྲ་འཕྲད་ཡོང་སྐབས་བོད་ནང་གི་བོད་མི་ཚོས་ཕྱི་ལོགས་ན་ཡོད་པའི་བོད་མི་ཚོར་རེ་བ་ཞིག་རྒྱག་གི་ཡོད་པ་ནི།བོད་ནང་གི་ཛ་དྲག་གནས་སྟངས་རྣམས་རྒྱལ་སྤྱིའི་ཁྱོན་ལ་གསལ་བཤད་དང་འབོད་སྐུལ་ཞུས་ཏེ།བོད་ནང་གི་གནས་སྟངས་ཡག་ཏུ་ཡོང་ཐབས་བྱ་རྒྱུ་དེ་རེད།ང་ཚོ་རང་དབང་ལུང་པར་ཡོད་པའི་བོད་མི་ཚོས་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཆོས་དད་རང་དབང་དང་།གནར་གཅོད་འགོག་ཐབས་སྡེ་ཚན་སོགས་ལ་ཞུ་གཏུགས།དེ་བཞིན་རྒྱལ་སྤྱིའི་ཉེས་ཡངས་ཚོགས་པ།འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་བཅས་ལ་འབོད་སྐུལ་ཞུ་རྒྱུ་སོགས་ལས་འགུལ་གང་མང་མང་སྤེལ་དགོས་པ་ཞིག་ཆགས་ཡོད་པ་རེད།ཅེས་གསུངས་སོང་།
གསར་འགོད་པ། བནྡེ་སྐྱབས།
ཀླུ་མཁར་བྱམས་ཀྱི་གཏམ་བཤད་ལ་ལོ་རྒྱུས་ཀྱི་དགེ་ཐོན་ཞིང། ངོ་མ་མི་སེམས་འགུལ་ནི་ཞིག་རེད། ད་དུང་མུ་མཐུད་ནས་འདི་ལྟ་བུ་གཏམ་བཤད་གནང་ན་ཉན་སྤྲོ་ཞིང་བློ་སྒོ་འབྱེད་པ་རང་རེད། དེ་མིན་ནམ་རྒྱུན་ཁ་བདེ་བོ་ཚོས་མི་མཐོ་བོ་ཚོའི་ལད་མོ་བྱས་ནས་བསྐྱར་ཟློས་ཡང་ཟློས་བྱས་ན་སུན་ནི་ཞིག་རེད།
ཧེ་ཇ་མ་རྙོག་གཏམ་མ་བཤད་རོགས། རྔ་བ་ཀིརྟི་དགོན་སྡེ་གཉིས་ཀྱི་དགག་བར་ཆད་བཟློག་དགོས་ན་ཀིརྟི་རིན་པོ་ཆེས་མིག་བཙུམ་ནས་བོད་ནང་དུ་ལོག་དགོས་དོན་གང་ཡིན་ནམ། བཙན་བྱོལ་བོད་གཞུང་ད་དུང་ཡང་གྲགས་འགུལ་མེད་པ་ཅི་རེད་དམ། ད་སྐབས་ཁ་མ་གྲགས་ན་ག་དུས་ཁ་གྲགས་དགོས་ནི་རེད། དངོས་གནས་བློ་ཕམ་པ་ལ།
རྔ་བ་ཀིརྟི་དགོན་སྡེ་གཉིས་ཀྱི་དགག་བར་ཆད་བཟློག་དགོས་ན་ཀིརྟི་རིན་པོ་ཆེས་མིག་བཙུམ་ནས་བོད་ནང་དུ་ལོག་རྒྱུ་དེ་རེད།
བདག་གིས་ཕ་ཡུལ་གྱི་གནས་སྟངས་གོ་ན་སེམས་པ་དངོས་གནས་ན་ཡོང་གི ཁ་སང་ངའི་གྲོགས་པོ་ཞིག་གིས་ཕ་ཡུལ་དུ་ཁ་པར་བཏང་ནས་གནས་ཚུལ་ལ་ཞུགས་ན། རྔ་ཡུལ་ཀིརྟི་དགོན་པ་ཡིན་དང་ཡིན། དེ་ལས་གཞན་པའི་བདག་གི་སྐྱེ་ཡུལ་ཨ་འ
དུས་སྡེ་བའི་ཡུལ་མི་གཉིས་འཇུ་བཟུང་གིས་གར་སོང་ཆ་མེད་དུ་གྱུར་ཡོད་པ་དང་། བོད་ཀྱི་སྐད་ཡིག་གི་འདུ་ཚོགས་ཤིག་གི་སླད་དུ་ལས་བྱེད་གཉིས་ཕྱིར་འབུད་བྱས་པའི་གནས་ཚུལ་འདུག ཡིན་ནའང་དོན་རྐྱེན་འདི་འདྲ་མང་པོ་ཞིག་ངའི་ཕ་ཡུལ་རྔ་བའི་ས་ཆར་བྱུང་བཞིན་པ་ལགས་ན། ཕྱོགས་ཡོང་ནས་རྔ་ཡུལ་བཙན་བྱོལ་བ་དག་གིས་རང་རང་ས་ནས། བཙན་བྱོལ་བོད་གཞུང་ལ་དོན་རྐྱེན་དེ་དག་རེ་རེ་བྱས་ནས་ཞུ་གཏུགས་བྱེད་དགོས། འུ་ཅག་གིས་ཕ་ཡུལ་གྱི་གནས་ཚུལ་བོད་གཞུང་ལ་བཤད་དགོས་པ་ནི། རྔ་ཡུལ་མི་མང་གི་རིགས་སུ་གཏོགས་པའི་ཆ་ནས། ཕ་ཡུལ་གྱི་གནས་ཚུལ་གང་གོ་བ་དེ་ཤོད་དགོས། རེམ་ཤིག ད་ལྟ་ནི་མདོ་དབུས་ཁམས་གསུམ་གྱི་ཁྲོད་ནས་རྔ་ཡུལ་འདི་ཛ་དྲག་ཡིན་པས་དེ་ཚོའི་བདེ་སྡུག་ངེས་པར་དུ་འཛམ་གླིང་མི་མང་ལ་ཤེས་སུ་འཇུག་དགོས་སྙམ།
ཀླུ་མཁར་བྱམས་ཀྱི་འཐབ་རྩོད་ཀྱི་ཆུ་ཚད་ངོ་མ་མཐོན་པོ་རེད། ཁས་བླངས་བཏང་ནི་ཡིན།
གཏམ་བཤད་འདི་འདྲ་རྒད་པོ་འགན་འདེ་ཡིས་ཀྱང་བཤད་མྱོང་མི་འདུག
མ་ཐིན་ལི་ཐར་གྱིས་ཀྱང་བཤད་མ་མྱོང་བ་འདྲ།
བོད་མི་ཟེར་བ་རེད།
བདེན་དོན་རྩོད་ལེན་གྱི་ཆེད་དུ་རང་སྲོག་བློས་བཏང་ལ་ཡ་ང་དང་བག་ཚ་མེད་པ་གཞིས་བྱེས་ཆོལ་གསུམ་སྤུན་ཟླ་ཡོངས་ལ་ཞུ་རྒྱུ་ཕྱོགས་གཅིག་ལ་དཀའ་ངལ་འཕྲད་ན་ཕྱོགས་ཐམས་ཅད་ནས་རུབ་དགོས་པ་དེ་ང་ཚོའི་ལས་འགན་ཡིན་ཙང།
རང་ས་རང་ས་ལ་ནུས་པ་གང་ཡོད་ཀྱིས་བདེན་པ་རྩོད་པ་ནི་དུས་སུ་བབ་པ་དང་སྐབས་དང་ཁེལ་བ་ཡིན་པས།
མཐུན་སྒྲིལ་རྡོག་རྩ་གཅིག་དྲིལ་གྱི་འབོད་སྐུལ་དང་སེམས་ཤུག་མི་འཆག་པར་མགོ་ནག་བོད་མི་ཡོངས་ཀྱི་འཛམ་གླིང་ཁྱོན་ཡོངས་ཀྱི་ཐོག་ཏུ་བདེན་པའི་སྒྲ་སྒྲོོག་པར་སྙིང་ནས་དགའ་བསུ་ཡོད།
རྔ་བ་ཁུལ་གྱི་དགོན་སྡེ་ཡོངས་ལ་གདུང་སེམས་མཉམ་བསྐྱེད་ཡོད།
བསྟན་སྲུང་དབང་པོར་བཅོལ་ནས་ཁྱོད་སྒྲུབ་ཀྱི། །དམ་བསྐུལ་གཡར་དམ་གཉེན་པོ་མི་གཡེལ་བར། །ཉེས་མེད་བརྙེས་སུ་བརྩམ་པའི་རྒྱ་དམར་གྱི། །སྲོག་དབུགས་སྙིང་དང་བཅས་པ་ད་ལྟ་ལོང།