དམ་པ་ཞིག་དགོངས་པ་རྫོཊ།

གནས་ཚུལ་བཏང་འབྱོར་བྱུང་བ་ལྟར་ན། ཕྱི་ཟླ་ ༥ ཚེས ༡ ཉིན་ཁམས་ཏྲེ་ཧོར་བྲག་མགོ་དགོན་པའི་སློབ་དཔོན་བློ་བཟང་དོན་གྲུབ་མཆོག་དགོངས་པ་རྫོགས་ཡོད་འདུག  

དམ་པ་དེ་ཉིད་སྐུ་མྱ་ངན་ལས་འདས་མ་ཐག བོད་ཕྱི་ནང་དུ་ཡོད་པའི་བྲག་མགོ་དགོན་པའི་སེར་སྐྱ་ཡོངས་ཀྱིས་སྐྱོ་གདུང་དྲག་པོས་བསྔོ་བ་སྨོན་ལམ་ཚོགས་ཡོད་པ་མ་ཟད། བྲག་མགོ་རྫོང་སྲིད་གཞུང་གི་བོད་རིགས་ལས་བྱེད་རྣམས་གཙོས་བྲག་མགོ་ཁུལ་གྱི་སེར་སྐྱ་མི་མང་དམ་པ་དེ་ཉིད་ཀྱི་གཟིམ་ཤག་ཏུ་ཆེད་བཅར་ཏེ། སྐུ་གདུང་ལ་ཕྱག་མཆོད་དང་མཇལ་དར་བསྒྲོན་འབུལ་ཞུས་ཡོད་པ་མ་ཟད། ཉིན་དེར་སི་ཁྲོན་ཞིང་ཆེན་བོད་ཡིག་སློབ་གྲྭའི་དགེ་རྒན་དང་སློབ་མ་ ༧༠༠ ཙམ་གྱིས་སློབ་དཔོན་དམ་པ་དེ་ཉིད་ཀྱི་སྐུ་པར་སློབ་གྲྭའི་ར་བར་གདན་དྲངས་ཏེ། རང་རང་གི་དད་གུས་མཚོན་པའི་མཇལ་དར་བསྒྲོན་འབུལ་དང་བསྔོ་བ་སྨོན་ལམ་ཚོགས་ཡོད་འདུག མཇུག་ཏུ་དགེ་རྒན་ཆེན་མོ་ཚེ་དབང་འགྱུར་མེད་ཀྱིས་སློབ་མ་རྣམས་ལ་དམ་པ་དེ་ཉིད་ཀྱི་རླབས་ཆེན་གྱི་མཛད་རྗེས་རགས་བསྡུས་ངོ་སྤྲོད་དང་སྦྲགས་ཚང་མས་སློབ་དཔོན་ཉིད་ཀྱི་མཛད་རྗེས་ལ་ཁ་མིག་ཡར་བལྟས་ཀྱིས་བོད་མི་རིགས་དང་། བོད་པའི་གཞུང་ལ་དམ་པ་དེ་ཉིད་ལྟར་ཕྱག་རྗེས་འཇོག་ཐུབ་པའི་སློབ་གསོ་གནང་ཡོད་འདུག

མདོ་ཁམས་ཕྱོགས་སུ་བསྟན་པའི་མེ་རོ་སླར་གསོའི་ཕྱག་རྗེས་བླ་མེད་དུ་འཇོག་གནང་མཛད་མཁན་སློབ་དཔོན་བློ་བཟང་དོན་གྲུབ་མཆོག་དགུང་གྲངས་ ༨༦ ལ་ཕེབས་ཏེ། དགུང་ལོ་བགྲེས་པས་སྐུ་གཟུགས་ཉོབ་སྣང་གི་རྣམ་པ་མངོན་པ་ལས་གཞན་སྙུང་གཞིའི་རྐྱེན་ཚབས་ཆེན་གང་ཡང་མ་བསྟན་པར་དགོངས་པ་ཆོས་དབྱིངས་སུ་ཐིམས་རྗེས། བདུན་ཕྲག་གཅིག་རིང་ལ་ཐུགས་དམ་དུ་བཞུགས་ཤིང་མཐར་ཐུགས་དམ་ལས་བཞེངས་མ་ཐག་སྐུ་གདུང་རིན་པོ་ཆེ་གནའ་བོའི་དགོན་རྙིང་གི་དུར་ཁྲོད་དུ་ཞུགས་འབུལ་བྱས་ཡོད་འདུག  སྐུ་གདུང་ཞུགས་འབུལ་གྱི་ཉིན་དེར་དགོན་པའི་མཁན་ཁྲི་དང་། སི་ཁྲོན་ཞིང་ཆེན་ནང་བསྟན་མཐོ་སློབ་ཀྱི་སློབ་དཔོན་འཕྲིན་ལས་དོན་གྲུབ་སོགས་གཙོས། བྲག་མགོ་ཁུལ་གྱི་དགོན་ཁག་གཞན་དང་། གསེར་རྟ་བླ་རུང་སྒར་གྱི་སྐུ་ཚབ། སི་ཁྲོན་ཞིང་ཆེན་བོད་ཡིག་སློབ་གྲྭའི་དགེ་རྒན་རྣམ་པ། བྲག་མགོ་རྫོང་སྲིད་གཞུང་གི་བོད་རིགས་ལས་བྱེད་སོགས་འདུ་འཛོམས་གནང་ཡོད་འདུག 

དམ་པ་བློ་བཟང་དོན་གྲུབ་མཆོག་ནི། ཕྱི་ལོ་ ༡༩༢༤ ལོར་ཁམས་བྲག་མགོ་ནོར་པ་གཡང་སྡེ་རུ་སྐུ་འཁྲུངས་ཤིང་། རང་ལོ་བཅུ་གཅིག་སྟེང་བྲག་མགོ་དགའ་ལྡན་རབ་བརྟན་རྣམ་རྒྱལ་གླིང་དུ་ཆོས་ཞུགས་ཀྱིས་ཡི་གེ་འབྲི་ཀློག་ལ་བསླབས་ཤིང་། ཕྱི་ལོ་ ༡༩༤༡ ལོར་ལྷ་ལྡན་འབྲས་སྤུངས་བློ་གསལ་གླིང་དུ་འཛུལ་ཞུགས་ཀྱིས་ཏྲེ་ཧོར་སྐྱོར་དཔོན་རིན་པོ་ཆེ་ཚེ་དབང་ནོར་བུ་དང་། ཚུལ་ཁང་མཁན་ཟུར་འཇམ་དཔལ་འཕྲིན་ལས་ཡོན་ཏན་རྒྱ་མཚོ། བྲག་མགོ་དགེ་བཤེས་ཡེ་ལོ་སོགས་ཀྱི་མདུན་ནས་དབུ་ཕར་འདུལ་མཛོད་ཚད་མ་བཅས་ལ་བསླབ་པ་ཚུལ་བཞིན་གནང་སྟེ། ཀུན་གྱིས་གཙུག་ཏུ་བཀུར་བའི་མཁས་པའི་མཚན་སྙན་རྒྱས་ཡོད་འདུག

ཕྱི་ལོ་ ༡༩༥༩ ལོར་རྒྱ་དམར་གྱིས་བོད་ས་བཙན་འཛུལ་གྱི་དུས་ཟིང་དེར་རང་ཡུལ་བྲག་མགོ་དགོན་དུ་ཕེབས་དགོས་བྱུང་ཞིང་། རེ་ཞིག་སློབ་མ་གསོ་སྐྱོང་དང་སློབ་ཁྲིད་ཀྱི་མཛད་འཕྲིན་སྐྱོང་མ་ཐུབ་པར་བཞུགས། ཕྱིས་རིག་གནས་གསར་བརྗེ་རླུང་འཚུབ་ཆེན་པོའི་སྐབས་དམ་པ་དེ་ཉིད་ཀྱང་འཐབ་འཛིང་སྣ་ཚོགས་ཀྱིས་བགྲང་བྱ་གཅིག་གི་རིང་བཙོན་ཁང་དུ་ཚུད་ཅིང་། ཕྱི་ལོ་ ༡༩༨༡ ལོར་རིག་གནས་གསར་བརྗེའི་དུས་ཟིང་ལྷིང་འཇགས་བྱུང་རྗེས་མི་ཉག་པའི་མཁས་པ་ཐུབ་བསྟན་ཉི་མ་སོགས་ཀྱིས་སྡེ་དགེ་རྫོགས་ཆེན་གྱི་སི་ཁྲོན་ཞིང་ཆེན་བོད་ཡིག་སློབ་གྲྭར་གདན་ཞུས་ལྟར་ཚད་མ་རིག་པའི་དགེ་རྒན་དུ་ཕེབས། ཕྱི་ལོ་ ༡༩༨༤  ནས་སྔ་ཕྱིར་ལོ་ ༡༣ རིང་བྲག་མགོ་དགོན་པའི་མཁན་པོ་དང་མཁན་ཟུར། ཚོགས་ཆེན་ཁྲི་ལ་མངའ་གསོལ་བ་དང་ཆབས་ཅིག གྲྭ་མང་ཡོངས་ལ་གཞུང་པོ་ཏི་ལྔའི་ཕྱག་དཔེ་སློབ་ཁྲིད་མཛད།

ཕྱི་ལོ་ ༡༩༨༥ ལོར་པཎ་ཆེན་སྐུ་ཕྲེང་བཅུ་པ་མཆོག་བྲག་མགོ་ཁུལ་དུ་གཟིགས་སྐོར་ཕེབས་སྐབས་མཁས་མཆོག་དེ་ཉིད་ཀྱི་ལུང་རིགས་ཀྱི་རྟགས་བསལ་ལ་ཐུགས་ཡིད་ཤིན་ཏུ་དགྱེས་པའི་བསྟོད་བསྔགས་ཀྱི་མེ་ཏོག་གཏོར་མྱོང་ཞིང་། ཕྱི་ལོ་ ༡༩༨༧ ལོར་སི་ཁྲོན་ཞིང་ཆེན་བོད་བརྒྱུད་ནང་བསྟན་སློབ་གྲྭར་གདན་ཞུས་ལྟར་མི་ཉག་དཔལ་ལྷ་སྒང་དུ་ཕེབས་ཏེ་རིས་མེད་གྲུབ་མཐའ་ཁག་གི་སློབ་མ་རྣམས་ལ་ཚད་མ་རིག་པའིི་སློབ་ཁྲིད་གནང་། ཕྱི་ལོ་ ༡༩༩༥ ལོར་བྲག་འགོ་དགོན་པའི་བཤད་གྲྭ་དངོས་སུ་འགོ་ཚུགས་པ་དང་མཁས་མཆོག་དམ་པ་དེ་ཉིད་ཀྱིས་དགེ་རྒན་དང་དབུ་འཛིན་གཅིག་ལྕོག་གནང་སྟེ་ད་ལྟའི་བར་དཔེ་ཁྲིད་གནང་ཡོད་འདུག